The Women Are A' Gane Wud

The women are a' gane wud,
Oh, that he had biden awa'!
He 's turn'd their heads, the lad,
And ruin will bring on us a'.
George was a peaceable man,
My wife she did doucely behave;
But now dae a' that I can,
She 's just as wild as the lave.

My wife she wears the cockade,
Tho' I 've bidden her no to do sae,
She has a true friend in her maid,
And they ne'er mind a word that I say.
The wild Hieland lads as they pass,
The yetts wide open do flee;
They eat the very house bare,
And nae leave 's speer'd o' me.

I 've lived a' my days in the Strath
Now Tories infest me at hame,
And tho' I tak nae side at a',
Baith sides will gae me the blame.
The senseless creturs ne'er think
What ill the lad wad bring back;
The Pope we 'd hae, and the d--l,
And a' the rest o' his pack.