Ordé Braes

There 's nae hame like the hame o' youth,
Nae ither spot sae fair;
Nae ither faces look sae kind
As the smilin' faces there.
An' I ha'e sat by mony streams,
Ha'e travell'd mony ways;
But the fairest spot on the earth to me
Is on bonnie Ordé Braes.

An ell-lang wee thing then I ran
Wi' the ither neeber bairns,
To pu' the hazel's shining nuts,
An' to wander 'mang the ferns;
An' to feast on the bramble-berries brown,
An' gather the glossy slaes,
By the burnie's side, an' aye sinsyne
I ha'e loved sweet Ordé Braes.

The memories o' my father's hame,
An' its kindly dwellers a',
O' the friends I loved wi' a young heart's love
Ere care that heart could thraw,
Are twined wi' the stanes o' the silver burn,
An' its fairy crooks an' bays,
That onward sang 'neath the gowden broom
Upon bonnie Ordé Braes.

Aince in a day there were happy hames
By the bonnie Ordé's side:
Nane ken how meikle peace an' love
In a straw-roof'd cot can bide.
But thae hames are gane, an' the hand o' time
The roofless wa's doth raze;
Laneness an' sweetness hand in hand
Gang ower the Ordé Braes.

Oh! an' the sun were shinin' now,
An', oh! an' I were there,
Wi' twa three friends o' auld langsyne,
My wanderin' joy to share.
For though on the hearth o' my bairnhood's hame
The flock o' the hills doth graze,
Some kind hearts live to love me yet
Upon bonnie Ordé Braes.