The Muir o' Gorse and Broom

I winna bide in your castle ha's,
Nor yet in your lofty towers;
My heart is sick o' your gloomy hame,
An' sick o' your darksome bowers;
An' oh! I wish I were far awa'
Frae their grandeur an' their gloom,
Where the freeborn lintie sings its sang
On the Muir o' Gorse an' Broom.

Sae weel as I like the healthfu' gale,
That blaws fu' kindly there,
An' the heather brown, an' the wild blue-bell
That wave on the muirland bare;
An' the singing birds, an' the humming bees,
An' the little lochs that toom
Their gushing burns to the distant sea
O'er the Muir o' Gorse an' Broom.

Oh! if I had a dwallin' there,
Biggit laigh by a burnie's side,
Where ae aik tree, in the summer time,
Wi' its leaves that hame might hide;
Oh! I wad rejoice frae day to day,
As blithe as a young bridegroom;
For dearer than palaces to me
Is the Muir o' Gorse an' Broom!

In a lanely cot on a muirland wild,
My mither nurtured me;
O' the meek wild-flowers I playmates made,
An' my hame wi' the wandering bee.
An', oh! if I were far awa'
Frae your grandeur an' your gloom,
Wi' them again, an' the bladden gale,
On the Muir o' Gorse an' Broom.