What Ails My Heart?

What ails my heart--what dims my e'e?
What maks you seem sae wae, Jamie?
Ye werena aye sae cauld to me;
Ye ance were blythe and gay, Jamie.
I 'm wae to see you, like a flower
Kill'd by the winter's snaw, Jamie,
Droop farer down frae hour to hour,
An' waste sae fast awa, Jamie.

I 'm sure your Jeanie's kind and true,
She loves nae ane but thee, Jamie;
She ne'er has gien thee cause to rue;
If sae--ye still are free, Jamie.
I winna tak your hand and heart,
If there is ane mair dear, Jamie;
I 'd sooner far for ever part
With thee--though wi' a tear, Jamie.

Then tell me your doubts and your fears,
Keep naething hid frae me, Jamie;
Are ye afraid o' coming years,
O' darker days to me, Jamie?
I 'll share your grief, I 'll share your joy,
They 'll come alike to me, Jamie;
Misfortune's hand may all destroy,
Except my love for thee, Jamie.