Geç hubb-ı câh-ı âlem-i nâ-ber-karârdan

Geç hubb-ı câh-ı âlem-i nâ-ber-karârdan
Ol mâye-gîr-i feyz-i bekâ iftikardan
Ezhâr-ı dâg-ı aşktan al şemme-i huzûr
Olma heves-pezîr-i safâ nev-bahârdan
Düşme hevâ-yı hestîye ey sâlik-i gurûr
Gör gayet-i vücûdunu her bir gubârdan
Izhâr-ı hâhiş eyleme arş olsa mesnedin
Vâreste kıl serin elem-i rûzgârdan
Ol meyden et ümîd neşât-ı derûn kim
Zehr-âb-ı gam-sıfat ola âri humârdan
Ol gülden ara neş'e-i bûy-ı vefâyı kim
Pejmürde şâh u berg ola âh-ı hezârdan
Dil-besteyiz o va'de ki billah adîm olur
Hızr olsa imtidâd-ı dem-i intizârdan
*Ekrem* dil-i hazînime bâlîn-i hâb olur
Her seng-i gam ki vâsıl olur sûy-ı yârdan