Tahmîs-i Gazel: Şu'le-rîz-i dag-ı hicrân oldugum demdir bu dem

Şu'le-rîz-i dag-ı hicrân oldugum demdir bu dem
Aşkla berk-i fürûzân oldugum demdir bu dem
Bâd-veş berçîde-dâmân oldugum demdir bu dem
Peyrev-i ömr-i şitâbân oldugum demdir bu dem
Bezmgâh-ı kurba pûyân oldugum demdir bu dem
Eylemişken sun'-ı hak şâhenşeh-i evreng-i cevr
Gamze nâz eyler o meh müstagnî-i âheng-i cevr
Mahv olup aşkıyla hâlâ olmadım dil-teng-i cevr
Elvedâ ey hâk-i hasretü'l-firâk ey seng-i cevr
Bezm-i âlemden girîzân oldugum demdir bu dem
Dil esîr-i derd-i aşkım n 'eylesin tende hayât
Derd-i hasret oldu câna ârzû-bahş-ı memât
Nâz u istignâyı koysun gayrı ömr-i bî-sebât
Rehgüzâr-ı mevc-i eşkimden sakınsın kâ'inât
Bahr-ı hicrânım hurûşân oldugum demdir bu dem
Bî-nişândır za'ftan cismim figan u zâr ile
Şu 'le-zâr oldu derûnum iştiyâk-ı yâr ile
Bir aceb hâletteyim germiyyet-i efkâr ile
Zahm-ı hûn-alûde sanma hasret-i dîdâr ile
Pây-tâ-ser çeşm-i giryân oldugum demdir bu dem
Fahr edersem baña yektir cevher-i zât u sıfât
Himmetim ikbâl içün olmaz esîr-i müşkilât
Hep usandık ben hayâtımdan ve hem benden hayât
Tâc u tahtın başma çalsın sipihr-i bî-sebât
Ben vücûdumdan peşîmân oldugum demdir bu dem
Başladı cûşa serimde * Ekremâ * sevdâ-yı yâr
Güller açdı dâgdan tende nesîm-i nevbahâr
Girye-hîz-i hasret oldu âh-ı çeşm-i eşk-bâr
Olsun âhımdan yine eczâ-yı âlem târ u mâr
Aşkla * Nâmık * perîşân oldugum demdir bu dem