Book XIII (Vegio's Supplement)

Prologue

Towart the heuin, amyd the someris hete
Quhen in the Crab, Appollo held hys fete
During the Ioyus moneth tyme of Iune
As gone nere was, the day and supper done
I walkit furth, about the feildis tite
Quhilkis tho replenist, stude ful of delite
With herbis, cornes, cattel, and frute treis
Plente of store birdis, and besy beis
In amerand medis, fleand est and west
Eftir labour, to tak the nychtis rest
And as I lukit, on the lift me by
All birnand rede, gan waxen the euin sky
The son entired hale, as to my sicht
Quhirllit about his ball with bemes bricht
Declynand fast, towart the north in dede
And fyrie Phigie, on his dym nychtis stede
Doukit sa depe his hede, in fludis gray
That Phebus rollis doun, vnder hel away
And esperus in the west, with bemes bricht
Vp springis, as fore rydare of the nycht
Amyd the hawchis, and euery lusty vale
The recent dew, begynnis doun to skale
To meis the birning, quhare the sone had schyne
Quhilk tho was, to the nethir warld declyne
At euery pilis poynt, and cornes croppis
The teicheris stude, as lemand buriall droppis
And on the helsum herbis, clene but wedis
Like cristall knoppis, or smal siluer bedis
The licht begouth, to quenschyng out and fall
The day to dirkin declyne and deuall
The gummis risis, doun fallis the donk rime
Bayth here and thare, skuggis and schaddois dym
Vp gois the bak, with hir pelit leddren flicht
The Larkis discendis, from the skyes hicht
Singand hir complene, sang eftir hir gise
To tak hir rest, at matyne houre to ryse
Out ouer the swire, swymmys the soppis of myst
The nicht furth spred, hir cloik wyth sabyl lyst
That al the bewty, of the fructu•us feild
Was wyth the erthis vmbrage, clene ouer heild
Bayth man and beist, firth, flude, and woddis wylde
Inuolnit in the schaddois warren sylde
Styll was the foulis, fleis in the are
All store and cattall, sesit in thare lare
All creature quhare so, thame lykis best
Bownis to tak, the halesum nychtis rest
Eftir the bayis labour, and the hete
Clois warren all, and at thare soft quiet
But sterage or mouyng, he or sche
Outher beist bird, fysche, foule by land or se
And schortly euery thyng that doith rapare
In firth or feild flude, forrest erth or are
Or in the scroggis, or the buskis rouk
Lakis meressis, or thare pulis Douk
A stablit lyggis styl, to sleip and restis
Bot the small birdis, syttand on thare nestis
The lytil mydgis, and the vrusum ••eis
Lauborius emottis, and the bissy beis
Als wele the wyld, as the tame be stiall
And euery vthir thingis, grete and small
Out tak the mery nychtyngale, philomene
That on the thorne sat, syngand fro the splene
Quhais myrthfull nottis, langing for to here
Vntyll ane garth, vnder ane grene Laurere
A walk anone, and in ane sege doun sat
Now musyng apoun this, and now on that
I se the poll, and eik the vrsis brycht
And horned lutyne castand, bot dym lycht
Becaus the somer skyes, schane so clere
Goldin venus, the maistres of the ȝere
And gentill Ioue, wyth hir participate
Thare bewteous bemes, sched in blyith estate
That schortlie, thare as I was lenit doun
For nycht silence, and thir birdis soun
On slepe I slaied, quhare sone I saw appere
Ane agit man, and said quhat dois thou here
Vnder my tre, and wyllist me na gude
Me thocht I lurkit vp, vnder ony hude
To spy thys auld, that was als sterne of speich
As he had bene ane medicinare, or leiche
And wele persauit, that hys wede was strange
Thare to so auld, it had not bene change
Be my consate, fully that fourty ȝere
For it was threde, bare into placis sere
Side was hys habyt, round and closit mete
That strekit to the ground, doun ouer his fete
And on hys hede of laurere, tre ane croun
Lyke to fum poet, of the auld fassoun
Me thocht I said, to hym with reuerence
Fader gif I haue done ȝou any offence
I sal amend gif it lyis, in my mytht
Bot soithfastlie, gif I haue perfit sicht
Vnto my dome I saw, ȝou neuir are
Fane wald I wit, quhen or quhat wise or quhare
Aganis ȝou trespassit, ocht haue I
Wele quod the tothir, wald thou mercy cry
And mak amendis, I sall remit this falt
Bot vthir wayis, that set sall be full salt
Knawis thou not, Mapheus wegious the poete
That vnto virgillis, lusty werk swete
The .xiii. buke ekit Eneadane
I am the same, and of the nathyng fane
That has the tothir thuelf, in to thy toung
Translait of new thay may be red and soung
Ouer Albioun Ile, into ȝour vulgare lede
Bot to my buke, ȝit list ȝe tak na hede
Maister I said, I here wele quhat ȝe say
And in thys case, of perdoun ȝou I pray
Not that I haue ȝou ony thing offendit
Bot rather that I haue my tyme mispendit
So lang on virgillis volume, for to stare
And laid on syde, full mony graue mater
That wald I now wryte, in that trety more
Quhat suld folk deme, bot all my tyme forlore
Als sundry haldis, fader traistes me
ȝour buke ekyt, but ony necessite
As to the text accordyng, neuir ane dele
Mare than langis to the cart, the fyft quheil
Thus sen ȝe bene, ane christen man at large
Lay na sic thing, I pray ȝou to my charge
It may suffyce vyrgyl, Is at ane end
I wait the story of Ierome, is to ȝou kend
Quhow he was doung, and heft into his slepe
For he to gentilis bukis, gaif syc kepe
Full scharp repreif, to sum is write ȝe wyst
In this sentence, of the haly psalmist
Thay are corruptit, and made abhominabyl
In thare studying, thing vnproffitabyl
Thus sare me dredis, I sall thole ane hete
For the graue study, I haue so lang forlete
ȝa son quod he, wald thow eschape me sa
In fayth we sall not thus part or we ga
Now think we, he assonȝeis him for to astart
As all for conscience, and deuote hart
Fenȝe and hym Ierome, for to counterfete
Quhare as he liggis, bedouin lo in swete
I lat the wyt, I am na heithin wycht
And gif thou has afore tyme, gane vnrycht
Followand sa lang virgyll, ane gentyle clerk
Quhy schrenkis thou, with my schorte Crystin werk
For thocht it be, bot poetry we say
My buke and virgillis, morale bene bot tway
Len me ane fourtene nicht, how euir it be
Or be the faderis saule, me gat quod he
Thou sall dere by, that euir thou virgil knew
And with that wourd, doun of the sete me drew
Syne to me with his club, he maid ane brade
And twenty rowtis, apoun my riging laid
Quhil deo meo, merey did I cry
And be my richt hand, strekit vp in hy
Hecht to translate his tuke, in honour of god
And his appostlis, twelf in nowmer od
He glade thareof, me be the hand vp tuke
Syne went away, and I for fere a wouke
And blent about, to the north eist wele fer
Saw gentyl Iubar, schynand the day ster
And chiron clepit, the signe of sagittary
That walkis the someris nycht, to bed can cary
ȝounder doun dwynis, the euin sky away
And vpspringis the bricht, dawning of the day
In till ane vthir place, not fer in sounder
That to behald was plesance, and half wounder
Furth quencheing, gan the sternes one be one
That now is best, bot lucifer allone
And forthirmore to blasin, this new day
Quhay micht disiryue the birdis, blisful bay
Beliue on wyng, the bessy lark vpsprang
To salute the bricht morow, with hir sang
Sone ouer the feildis, schynes the licht clere
Welcum to pilgryme baith, and lauborere
Tite on his hines gaif, the greif ane cry
Awalk on fute, go tyl our husbandry
And the hird callis, apoun his page
To driue the catall, to thare pasturage
The hynes wiffe clepis, vp katherine and gyl
ȝa dame said thay, god wate with ane gude wist
The dewye grene powderit, with dasies gay
Schew on the sward, ane cullour dapil gray
The mysty vapouris, spryngand vp ful swete
Maist confortabil, to glaid al mannis sprete
Thareto thir birdis singis, in thare schawis
As menstralis playis, the Ioly day now dawis
Than thocht I thus, I wil my cunnand keip
I wil not be ane daw, I wyl not sleip
I will complete my promys schortly thus
Maid to the poete, maister Mapheus
And mak vp werk hereof, and clois our buke
That I may syne, bot on graue materis luke
For thocht his stile, be not to virgil like
Full wele I wate, my text sal mony like
Syne eftir ane, my toung is and my pen
Quhilk may suffice, as for our vulgar men
Quhay euer in latine, has the brute and glore
I speik na vers, than I haue done before
Lat clerkis ken, the Poete different
And men vnletterit, to my werk tak tent
Quhilk is twiching this .xiii. buke in fere
Begynnis thus, as furth wyth followis here.

Book XIII

As Turnus, in the latir bargane loist
Vincust in feild ȝald furth the fleand goist
Thys marciall prince, this rial lord Enee
As victor, ful of mangnanymyte
Amyddis baith, the routis baldly standis
That to behald him, apoun athir handis
Astonist and agast, ware all him saw
And to the latine people, hale on raw
Ane felloun murnyng and ane woful bere
And gan deuode, and hoistit out ful clere
Depe from thare breistis, the hard sorow smert
With curage loist, and doun smytten thare hert
Like as the huge forest can bewale
His granis doun bet, and his branschis skale
Quhen thay bene cached, and all to schakin fast
With the fell thud, of the north wyndis blast
For thay thare lancis, fixit in the erde
And lenys on the swerdis, with ane rerd
Thare scheildis of thare schulderis, stang away
That bargane, and that were fast wary thay
And gan abhor of hiars, the wylde lufe
Quhilk laitlye thay desirit, and did aprufe
The bridill now refuse, thay not to dre
Nor ȝoik thare nekkis, in captiuite
And to Impiore for gifnes, in all greif
Quyet and end of harmys, in myscheif
As quhen that twa grete bullis, on the plane
Togiddirrynnys, in byttir grete bargane
Thare lang debait, mydland, quhare thay stand
With large blude scheddand, on athir hand
Quhill athir, of thame vnto the battellis syne
His awne beistis, and hirdis dois inclyne
Bot gif the price of victory betydis
Til ony of thir twa, on athir sidis
Anone the catall quhilk, fauourit langer
The beist ouercumin, as thare cheif and here
Now thame subdewis, vndir his ward in hye
Quhilk as the ouerhand, wynnyng mastery
And of fre wil, al thocht thare myndis be thra
Assentis him til obey, and euin richt sa
The rutulianis, al thocht the grete site
Thare breistis had bedowit, and to smyte
With grete affray of slauchter, of thare duke
ȝit thocht thame leuir, and hale thare purpois tuke
To follow and obey, for all thare harmes
The gentill chiftane, and bettyr man of armes
And thame subdew, to the troiane Enee
And him beseik, of pece and amite
Of rest and quyet, euermore from were
For thame thare landis, moblis and vthir gere
Eneas tho, wyth plesand voce, ful brade
And stand and aboue, Turnus thus he sayd
O dawnus son, how come this hasty rage
An to thy breist, wyth foly and dotage
That thou micht not suffer the troianis
Quhilkis at commaund of goddis, in to thare planis
And by power of hie Ioue, ar hydder cary
Wythin the boundis of Italite to tary
And all in vane so excellyng wald
Of thare behest, and promyst hald
Lerne for to drede grete Iouy, and not ganestand
And to fulfyl gladly, the goddis commaund
And for thare greif, wele aucht we to be war
Sum tyme in yre will grow grete mupyter
And oft remembrance, of that wykkit wrak
Solistis the goddis tharof to tak
Lo now of al sic furour and effere
The lattir meith and terme, is present here
Quhare aganis ressoun and equite
Aganis lawte, and brokin al vnite
Of confederacioun, sworn and band ar now
The troiane pepyl sare, and trublyt has thou
Behold and se the extreme finale day
To gyf al vtheris, gude exampil for ay
That it mot neuir, leful be agane
Tyll ony tyl contempne grete Ioue in vane
As for to rais, wyth sic drede and effere
Sa vnwourthy mocioun, of wykkit were
Now beis glad, bruke thine armour but pled
Allace ane nobil corps, now lyggis dede
The grete Turnus, and as to my demnyng
Lauania has the coist, na littyl thyng
Nor thou na schame, nedis thynk in na part
That of Eneas handis, thou kelyt art
Now cummys here, rutilyanis but delay
The body of ȝour duke, tursis hyne away
I grant ȝou baith, the armour and the man
Hald on and do tharto, al that ȝe can
As langis vnto the honour of berying
Or to bewale the deith, of sic ane kyng
Bot the grete passand gyrdyl, and sic gere
That Pallas my dere freynd, was wount to were
To Euander, I wyl send for to be
Na lityl solace, to him quhen he sal se
His felloun fa is kelyt, this vnknaw
Ful glaid tharof, Turnus is brocht of daw
And netheles, now ȝe Italyanis
That vthirwyse, bene clepit Ausomanis
Remember hereof and lerne in tyme cummyng
Wyth better aspectis, and happy begynning
To moue and tak on hand debait or were
For be the blyssit sternes brycht, I swere
Neuer na oistis, nor ȝit armour glaidly
Aganis ȝou in batal, mouyt, I
Bot cunstrenit by ȝour furie, as I kend
Wyth al my force, I set me to defend
The troiane party, and of our awyne of spryng
As al forsoith this was, but leifsum thyng
No more Eneas sayd, bot tharewyth all
Addrsseit him towart the ciete wall
And throw the feyldis socht ful ioyuslye
To his new troiane resset, and herbry
Samin him followis, al the rout attanis
The pissance hale, and ȝoungkeris of tewcranis
And ouer the planis glaid and wounder licht
The swift stedis, as the foule at flicht
Throw spede of fute, assayis by and by
And oft with bittir mouth, and crying fy
And can accuse, the Latyne pepill all
Oft faynt folkes, and sleuthfull did thaime call
That with thare rerde, and bemyng quhare thay fare
For the deray full hich dynnys the are.

And thocht Enee the besy thochtfull curis
Constrenit has, as twiching sepulturis
Of his folkis slane, and bering
With funerall fire, and flambis according
ȝit neuertheles in his breist, rollis and steris
Ane grete mater, and largeare as efferis
Bot first the souerane honoure, on thare gyse
On the altaris, with detfull sacrifice
He ordand has, and than fra hand to hand
Efter the rite, and vsance of thare land
The ȝoung oxin, gan thay steik and sla
Wythin thare tempil, haue thay brocht alsua
The bustuous swyne, and the twinteris snaw quhite
That wyth the clufis, can the erde smyte
Wyth mony plat scheddand, thare purpoure blude
Furth haue thay rent thare entraillys ful vnrude
And gan denude, and striping of thare hydis
Syne hakkyng thame, by tailȝeis and be sydis
The hayt flambis brycht, has thame laid
And furth thay ȝet the wyne, in coupis glaid
God bachus gyftis, fast thay multiply
Wyth platis ful, the altaris by and by
And gan do charge and wourschip with fat lyre
The smelland sence, vp blesis in the fyre
Than throw that hald thay feist, and make gude chere
Vprais the mery rerd, and ioyus bere
Thay did extol, and louing wyth grete wounder
Grete Iupiter, the fereful god of thunder
And dame Venus, thay wourschippit also
And the Saturnus dochter, quene Iuno
Now pecifyit, in bettir than before
Ane huge laud, to the thay ȝald tharfore
And eik him selfe, Mars the grete god of armes
Thay magnify, as workar of thare harmes
Syne hale the remanent, of thare cumpany
Of the goddis, thay name furth by and by
Wyth hie vocis, and wyth loud cryis
Louit and borne vp hie, amang the skyis
Before thame al, maist gratius Eneas
His handis two, as the custum was
Towart the heum, gan vplyft, and arrace
And syne the chyld Ascaneus, did enbrace
Sayand ane few wourdis, that al mycht here
O thou my son, and onlie chylde moist dere
In quham onlie restis, thy faderis beleif
Quham throw sa mony laubouris and myscheif
I caryit haue, cachit ful mony gatis
Be the hard fortoun, and the thrawart fatis
Lo now our rest, and quyet found for ay
Lo now the rest and maist desirit day
To mak end, of our harmes and distres
Our paneful laubour, passit is expres
Lo the acceptabil day, for euermore
Quhilk I ful oft, has schawin the before
Quhen vntil hard bargane, callit was I
This was to cum, and betid by and by
Be disposicioun, of the goddis abufe
And now my derest chyld, for thy behufe
To morne sone, as Aurora waxis rede
To the ciete of Laurent, that rial stede
I sal the send, as victor with ouir hand
To be maister, and to mantene this land
And eftir this, he turnyd him agane
Vnto his folkis, and pepyl troiane
And from the boddum of his breist, wele law
Wyth soft speche, furth can thir wourdis draw
O ȝe my feris, and my freyndis bald
Throw mony hard perrellis, and thik fald
Throw sa feil stormis, baith on land and se
Hidder now caryit, to thys coist wyth me
Throw sa grete feruour, of batall, in to stour
And doubil furie, of werefare in armour
Be sa feil wynterys blastis, and tempestis
By al wayis, noyfum, and vnrestis
And all that horribil was, or ȝit heuy
Woful, hidduous, wykkit and vnhappy
Or ȝit cruel, or myscheuus, now stade
In bettir hope, returne ȝour myndis beis glade
Now is the end, of al ennoy and wo
The terme is cuming, here sal thay stynt and ho
And lyke as we desyrit for the best
Wyth Latyne pepill, in ferme peace and rest
We fal conione, and life in vnite
And Lauinia, of that ilk blude quod he
Quham I defendit, haue, in strang bargane
Of Troiane kyn, wyth blude Italiane
Samyn mydlyt to me, as spous in hy
Sal ȝeild lynnage, to reyng perpetually
Ane thing my fallowis, and my freyndis dere
I ȝou besekyng, and I ȝou requere
Bere ȝour myndis equale, as al anys
As commoun freyndis, to the Italianis
And to my fader in law, the kyng Latyne
Obeyis al, and wyth reuerence inclyne
Ane mychty scepture, and ryal weris he
This is my mynd, this is my wyl perde
Bot in to batal, and douchty dedis of armes
ȝou for to wreik and reuenge, of ȝour harmes
Lerne for to follow me, and to be meik
ȝe conterfete my reuch, and piete eik
Quhat glore is betid, ful wele is knaw
Bot he the heich heuin, and sternes law
To wytnessyng, that I the samyn wycht
Quhilk thou deliuerit has, in to the fycht
From sa huge harmes, and mischeuys sere
I sal ȝou seis, and induce now but were
In fer largeare rewardis mychtely
And ȝou rendir ȝour desiret by and by
Wyth sic wourdis, gan he thame confortyng
And in hys mynd, ful, mony sundry thyng
Of chancis bypast, rollyng to and fro
Thinkand how he is brocht to rest also
With na litil laubouris, sturt and panis
And wyth excedand luf of the troianis
Ful ardently, he flowis al in Ioye
Glade at the last, from dangeare and, ennoy
So huge and heuy perrellis mony fald
Thay war eschapit, and brocht to souir hald
Lyke as quhen that the gredy glede on hycht
Skummand vp in the are, of Turnus his flycht
Wyth felloun fard, watchand the chykinnis lyte
Thare deith mannassand, reddy for to smyt
The ereiseit foule thare moder, tho ful smart
For hir pullettis, wyth harmes at hir hart
Affray it gretely, of that wofull chance
Gan rax hir self, and hir curage auance
For to resist hir fa, scharpand hir bill
And with hale force, and mycht of egar will
Apoun hir aduersare, baldlie fettis sche
Quhill at the last, to gif the bak and fle
With mekill pane, and verray violence
Scho him constranis, and to pik him hence
Hir birdis syne clokand, scho sekis on raw
And all affrayit, dois thame samyn draw
Ennoyit greitlie, for hir childer dere
And quhen thay bene assemblit, all in fere
Than glaid scho wourdis, and thare mete can scrap
For that thay haif, sa grete perrell eschaip
Nane vthir wise, the son of Anchises
With freyndlie wourdis thus, amyd the preis
The troyane myndis, can mese and assuage
As man fulfillit of wit, and vassalage
Driuand furth, of thare hartis all on flocht
The hald drede, and birnand heuy thocht
That wele thame likis now, thare ioy and eis
At last fundin eftir sa grete diseis
And at lait to fore, was tedious
To suffir or sustene, and ennoyus
Now to remember the samin, or rehersing
Dois to thame solace confort, and lykyng
Bot maist of al, in the grete Enee
Quhilk in excellent vertewe, and bounte
Excedit all the remanent, ane fer way
And for sa seil dangeris, and mony affray
The goddis power, and mychty maieste
With giftis grete, and offerandis wourschippis he
Eik Iupiter the fader of goddis, and king
Gan to extoll, with maist souerane louing

In the menetyme, the rutulianis, yche one
The grete dede corps, reuthfull and wo begone
Of thare duke Turnus, slane as said is are
Within the ciete, of Laurentum bare
With mekill murnyng, in thare myndis emprent
And from thare ene, ane large schoure furth sent
Ofteris grete, as thocht the heuin did rane
And fer one brede dyd fyl, the eris twane
Of kyng Latyne with cry, and womenting
That al to irkyt, was the nobill king
And in his breist the self tyme, in ballance
Was rolling mony selcouth, diuers chance
Bot quhen he hard, thare loude womenting
Incressyng mare and mare, and Turnus ȝing
Wyth sa grisly ane wound, throw gird has sene
Than mycht he not, from teris him contene
And syne this rout, so trist and wo begone
Fail curtasly chargis, be styl anone
Baith wyth hys hand, and wourdis in his presence
Intoned has, and commanded them silence
Lyke as quhen that the fomy bere, has bet
Wyth hys thunderand, awful tuskis grete
Throw out the coist, and eik the entrallys all
Ane of the rout, the hound maist principall
Than the remanyng, of the questyng sort
For thys vnsilly chance, offrayit at schort
Wyth drawis & about, the maister hunter
Wyth quhyncheand, mouthis quaik and standis for fere
And with grete ȝouling, dyd complene and mene
Bot thare lord rasis hys hand bedene
And byddis ceis, thay hald thare mouthis still
Thare quhyngeing, and thare questing at hys wyll
Refrenis, and all clois gan thame withhald
Thir same wyse thir rutulianis, as he wald
Gan at command debait thare, voce and ceice
To here the kingis mynd, and hald thare peace
Than thus weping, from his hart rute wele law
The king Latyne begouth, thir wourdis schaw
O how grete motioun, quhat altering vnstabill
How oft syis interchangeit, and variabill
Bene the actis, and dedis of men quod he
Wyth how grete trubil, but tranquilite
Is quhirllit about, the lyffe of man behald
O dampnabill pride, and ambicioun that wald
Bruke croun or septure proude, in thine entent
Quhilk bene so fragil, and not permanent
O fury o lust, that bene ouer gretumly
Bred in ȝour breistis, to couate senȝeorie
Thou blynde desire, insatiabil may not tary
Our mortal myndis, quhiddir do thou cary
O glory and renowne, of lois in vane
Conquest with feil perrellis, and huge pane
To quhat condicioun, or to quhat estate
Thou steris furth, thir proude myndis infltate
How mony slichtis, and dissatis quent
With the thou tursis, how mony wayis to schent
How feill tormentis grete harme, and wikkitnes
Quhat labour curis falsched, and craftynes
How mony dartis, how feyll swerdis kene
Gif thou beheld, thou has afore thy ene
Allace thou swete venom, schawis and ȝit
This warldly wourschip, has the dedelye bit
Allace the sorowful reward, in al thing
Of realme, and thame couatis for to ryng
Quhilk coistis oft na litil thyng, but were
Allace the heuy birding, of warldly gere
That neuir houre may suffir, nor promyt
Thare possessoure, in rest nor pece to sit
Allace the miserabil chance, and hard estate
Of kinglye honour, sa infortunate
The chance of kingis, standis vnder lout
To mekil drede, ay subiect and in dout
From thare estate, to decay suddanlie
That all quiet, and eis is to tham deny
O turnus quhat aualit, the to stere
In huge bargane so, and fere of were
Al Italie, with sic deray attanis
And to perturbe, the strang Eneadanis
Constrenyng tham hard, batall tyl assay
Or quhat aualis now, I pray the say
For til haue brokin, violate or schent
The haly promyssis, and the bandis gent
Of peace and concord oblist, and sworne
Quhat was thy mynd to rent, and al to torne
With sa mekyl impacience, on this wyse
That thay list moue the, were but myne auise
With thy pepill so bald, strang and sage
That bene discendit, of the goddis lynnage
And at command of Ioue, the god of thunder
Ar hiddir carryit, for to mak sic blunder
That wylfully, but motiue so beliue
Enforcit the thame, ouer coist to dryue
And forth brek the band, that promyst we
Of our douchter, til our gud son Enee
And with thy hand hard bargane, rays and stere
Quhen I planely denyit, to moue were
How was sa grete folie, and dotage
Inuoluit in thy mynde with furie rage
How oft quhen thou to auful batall wend
Amyd the routis, and on thy stede assend
In schynand armour, arrayit al at rycht
I assayit the, to wythdraw from fycht
And feil tymes, defendit the and forbad
To go the way, that thou begunnyng had
And al efferit, quhen thou wald depart
Amyd the ȝet, the stoppit wicht sare hart
Bot al for not, nathing mycht slyntin the
quhat I haue sufferit syne, how standis wyth me
Our ciete wallis, wytnessing fute hate
Wyth tenementis and bigginnis, half doun bet
Aud the large feildis strowit, quhite with banis
And hale the pissance, of Italyanis
Al wastit and distroyit, thus alake
The huge slauchter, and mischeuus wraik
And al the feyldis, waxin rede and browne
Of mennis quelling, grete and occisioun
The lang abasit ferful quaking drede
And hard laubour, quhilk in extreme nede
In my age sa oft has vndertane
In sa feil dangeris, quhare remede was nane
Bot now Turnus here thou lyggis dede
Quhare is the nobil renoune of thy ȝouth hede
And quhare is thyne excellent hie curage
Quhydder is it went thy strenth and vassillage
quhare is the statly bewtie, of thy face
Quhare is the schinand fygure now alace
Of thy fare vysage, quhidder are gone but were
Thy pleasand forret, schaiplie and ene clere
Ha how feil teris, and woful dolour smart
Sal thou Turnus, rendir to dawnus hart
And with how large wepyng, dule and wa
Ouerfleyit, sal al the ciete of Ardea
Bot thay sal not behald the wyth siclake
Throw gyrd wyth schamful wound, caucht in the bak
Na note the of na cowardice, in thy mynd
Nor that thou was degenerit, out of kynd
And to the woful fader, wil of rede
At last, this sal be solace of thy dede
Al thocht thy harmes, doth him sore smert
That grete Eneas swerd, has persit thy hart
And sayand thus, with teris of piete
His chekis baith and face, ouer chargit he
Syne turnand him towart the mekil rout
The reuthful corps, of this ilk Turnus stout
Bad turs away, and cary furth anone
Vntil his faderis ciete, wo begone
And commandit to do the body cald
Al funeral pomp, efter the vsage ald

The Rutilianis anone, al in ane rout
This dede corps that slane lay, stert about
The gentil body, of this stout ȝoungkere
Thay haue addressit and layd on ane riche bere
And with him eik, feil takynnis by the way
Reft from Troianis, in the bargane, bare thay
Baith helmis hors, scheildis, and vthir gere
Swerdis githernis, and mony stalwart spere
Syne eftir this his wery cart furth went
Of Troiane slauchter, and hate blude al besprent
Furth haldis wepand, Metestus the cartare
As he that in the craft, was not to lere
Ledand the stede, bedouin al of swete
And thekis wet, of flotterand teris grete
Quhilk stede had caryit Turnus, oft tofore
As victore hame, with grete triumph and glore
Ful pompusite, apoun ane vthir wyse
Efter feruent slauchter, of his inemyis
ȝounder vtheris about him, enuyroun
Beris thare armour, and scheildis turnit doun
The remanent syne of the hale barnage
Followis wepand knycht swane, and page
With haboundance of mony, trigland tere
And kyng Latyne, wyth al thame with him were
Towart his palace, can returne anone
Wyth mynd trublit trist, and wo begone
For sa excellent dede corps, as was slane
Teris al samyn furth ȝettis, euery ane
Bayth agit men matronus, and chylder lite
The ciete fillis wyth womenting, and site
Daunus his fader, no wyse wyttand so
He suld remane, to se sic dule and wo
Nor that his son, his stalwart sprete had ȝald
And maid end, in the lattir bargane bald
That thus was brocht to toun dede, by his feris
Wyth sic plente of bitter wepand teris
The samyn tyme, with vthir diseis was socht
At mekil said dolour, and hauy thocht
For as the latyne pepill, war or set
In to battall by troyanis, and doun bet
And turnus by his het, and recent dede
Had wyth hys blude littyt, the ground al rede
And suddane fyre, within the wallis hie
Vmbeset halelye, Ardea ciete
The byggyngis, of hys fader wo begone
Brynt and doun bet, of reky flambis schone
And all returnis, into assis rede
The fyrie sparkis in to eueyry sted
Twynkland vpspringis, to the sternes on hye
That now no hope of help, may fundyn be
Quhydder so it was, vnto the goddis lyking
Or that the fatis before, list schaw sum signe
Of turnus deith, in horybyl battal slane
And quhen the pepill saw, remedy was nane
Belife the woful, trublit citezanys
Thare drery breistis batand, all attanis
Gan fast bewale, with pietuous wepand face
Of this vnhappy chance, the wrechyt cais
In lang rabill the women, and matrons
With al thare fors fled, reuchfully attanis
From the bald flambis, and bry•blesis stout
And like as that of emotis, the blak rout
That ythandlie labouris, and besy be
Had beildit vnder the rute, of ane hye tre
In tyll ane clift, thare bike and duelling stede
To hyde thare lang sum werk, and wyuter brede
Gif so betid, thay fel the ax smyte
Apoun the treis schank, and theron byte
So that the crop down weltis, to the ground
That with the felloun rusche, and grisly sound
Thare smale cauernis, all to brok and rent is
Than spedely this litill rout, furth sprentis
Is wyll of rede fleand, thay wat not quhare
Tursing thare bi•dingis, affroi•lye here and thare
Or like as that, on the house syde the snale
Schakand hyr toppit schell, or than hir tale
Fleand the birnand hett, that schodois fele
Ane lang tyme gan do wersil, and to wrele
Thristand fast with thare feit, vnto the wale
And ȝit her hede with force, and strenthis all
Frawart the feruent flambis, fast with drawis
Scho skaldis, and with mony wrikis and thrawis
Preissis for to eschew, the ferefull hete
Nane vthir wise in sa feil, perrellis grete
Thir wofull cietezanis, gan thame self slyng
Ruschand with trublit mynd, in tylane lyng
Bayth here and thare, and wist not quhare away
Bot maist of allace, and wellaway
Wyth reuthful vocis, cryand to the heuin
The a git kyng dawnus, and woful steuin
And tho amyd the flambis, furth wyth all
Ardea the foule, quham the heroun clepe we
Betand hyr wyngis, thay behald and fle
Furth of the fyre, heich vp in the are
That bayth the name, and takin ouer al quhare
Beris of this ciete, ardea the auld
Quhilom wyth wallys, and towrys hye vntauld
Stude werelye wrocht, as strenth of grete defence
That now is chaunget, and ful quyte gone hence
Wyth wyngys wyde fleand bayth vp and doun
Now bot ane foule was, are ane ryal toun
Astonyst of thys nyce, and new cace
And oft the wounderus meruellis, in that place
Quhilk semyt nothing, lytyl for to be
As thocht thay send war, by the goddis hie
The pepil al coufusyt, styl dyd stand
Thare burding is, on thare schulderys cariand
And mouit nouther fute toung nor mouth
And kyng Daunus, for thys affray vncouth
With ardent lufe smytyn, and desire
Of thys cheif cyite, destroyt and brynt in fyre
The hard dolour, and the sorow smert
Haldys ful clois depe, grauyng in hys hart

Amyd al thys deray, and grete effere
Fame of dyseis forryder and messingere
Come hurland with huge murmure fast to toun
And wyth large clamour fillis enuiroun
Thare myndis al howane dede corps new than
Was cumand at hand with mony wofull man
And Turnus lifeles laid, wyth mortall wound
In feild discomfist slane, and brocht to ground
Than euery wycht trublit, and wo begone
The blak blesand fyre brandis, mony one
As was the gyse, has hynt into thare handis
Of schinand flambis, glitteris all the landis
Thus thay recounterit thame, that cumand were
And samin Ionit, cumpanyis in fere
Quham als fast, as the materis can espye
Thay smate thare handis, and rasit vp ane cry
That to the sternes went, thare wofull bere
Bot fra Dawnus the corps, of his son dere
Beheld, he gan stynt, and arreist his pase
And syne half dele, enragit in ane rase
Wyth huge sorow smyte, in ruschis he
Amyd the rout, that reuth was for to se
And apoun Turnus corps, him strekis doun
Enbrasing it on groufe, all in ane swoun
And als fast as he speke micht, has furth brade
Wyth wourdis lamentabil, on thus wyse he said
Son the deseis of thy fader, thus drest
And of my febyl eild, the reuthfull rest
Now me bireft, quhy has thou so allace
In to sa grete perrillis, and insye case
Me cachid thus, and driue quhidder quod he
And vnder cruell bargane, as I may se
Now finale thus vincust, and ouercum
Quhare is thy wourthy valour, now becum
Quhare is thy douchty constance, of thy sprete
Me caryit thus from rest, and all quyet
Is this the notabyl honour, and louyng
Of thy manhede, and glory of thy ring
Is this the grete wourschip, of thine empyre
O my dere son, quhilom thou bald syre
Bryngis thou vs hame, sikkin triumphe as thys
So this the rest and eis, thou did promis
To thy fader so trist, and wo begone
And oft ouerset, wyth Inemyis mony one
Is this the meith, and finale terme or end
Of al laubouris, as we desirit and wend
O wa is me wretchit, and wofull wycht
How haistely, doun fallyng from the hicht
Thir slyddry warldly chancis drawis fast
With how grete farde, ouer rollit and doun cast
Sa haistely bene thare, fatis behald
He that was laitlie, sa stout hie and bald
Renownit with grete honour of cheuelry
And haldin grete throw out al Itale
Quham the troyanis, so awfull f•lt in armes
And dred sa oft his furour, wrocht thaym harmes
My awne Turnus, lo now apoun this wise
Ane lamentabil, and woful corps now lyis
Now dum and spechles, that hede liggis thare
Quhilum in al Italie nane sa fare
Nor nane mare gracious, in til eloquence
Nor nane so byg, but armes nor at defence
Son quhare is now thy schinand lusty hede
Thy fresch figure, in visage quhite and rede
Thy plesand bewtie, and thine ene tweyne
With thare swete blenk and lukis mony ane
Thy gracius glitterand, semelie nek lang
Thy vocis soun, quhilk as ane trumpet rang
The glore of mars, in batal or in stour
Is conquest wyth sic auenturis sour
Had thou sic wyl thy selfin in to submit
To feruent bargane, and to dedis bit
Quhen thou departit, of thys stede from me
For to returne, with sic pompe as we se
O haitful deith, that only quhare thou likis
Wyth thy reuengeabil wappinnis, so sare strykis
That thou thir proude myndis, bridil may
To all pepill elyke, and common ay
Thou haldis euin, and beris the scepture wand
Eternalli abseruand, thy cunnand
Quhilk grete and small, doun thringis and nane rakkis
And stalwart folk, to febill equale makis
The commoun pepyl, wyth the capitanis
And ȝouth and age assemblis baith attanis
Allace detestabill deith, dirk and obscure
Quhat chance vnwourthy, or mysauenture
Has the constrenit, my child thus to be reif
And with ane cruell wound, thus dede to leif
O sister Amata, happy quene quod he
Be glad of sa happy chance, as happynnyt the
And of thy awne slauchter, be blyith in hart
Quharby thou has, so grete dishonour astart
And fled so huge, occasiouns of myscheif
So hard and charge and huge, wo and greif
O goddis aboue, quhat ettil ȝe more to do
Vnto me wrechit fader, sen ellis lo
My son ȝe haue bireft, and ardea
My ciete, into flambis brynt alsua
Consumed is, and turnit in assis rede
Syth wyngis fleis, ane foule in euery stede
Bot ha Turnus, mare trist and wo am I
For the maist pictuous slauchter, so bludy
Wantit this last myschance, ȝit or sic thyng
To thy vnweildy fader, auld Dawnus kyng
Bot siekirly, with sic conditioun ay
Thir warldly thingis, Turnis and writhis away
That quham the furious fortoun list Infest
And eftir lang quiet, bring to vnrest
Brayand apoun that catiue, for the nanys
With all hir fors, assailȝeis sche attanis
And wyth all kynd of torment, in hir •reif
Constrenis him wyth soundis, of mischeif
Thus said he wepand sore, as man schent
With large flude, of teris his face bisprent
Drawand the sobbis herd, and sichis smart
Throw rageand doloure, depe out from his hart
Like so as quhare Iouis, big soule the Erne
With hir strang tallouns, and hir punsis sterne
Lichtand had claucht, the litil hynd calf ȝing
Torring the skyn, and made the blude out spring
The moder this behaldyng, is al ouer set
Wyth sorow for slauchter of hyr tendir get

The nixt day following, with his bemes bricht
The warld on brede, Illumynit has of licht
The Kyng Latinis, tho seand but let
Italianis discomfist, and ouerset
By the fatale auenture of were
And wele persauit, how and quhat manere
The fortoun hale, turnit to strang Enee
And in his mynd reuoluit, eik has he
The huge dout of battel, and deray
Full mony ferefull change, and grete affray
His confederatioun, and hys sworne band
The wedlok promyst, and the ferme cunnand
And spousale of his dochter, hecht with all
Of all the rout, vntil him gart he call
Ane thousand wourthy men walit at richt
The quhilk the troyane Duke, and douchty knycht
Quham he desirit, suld conuoy to toun
In robbis lange, also or traleside goune
wyth thame he Ioned, oratouris in fere
And to thame gaif, fell strate commandmentis sere
And forther eik, quhen thay depart can
Of his fre wyll, tham chargit euery man
That sen be fauouris, and admonissyngis
Of the goddis, be many ferefull singis
Expedient it was, the kyng troyane
Conione and myddill, with blude Italiane
And tharfore glaidly, to thame gang wald thay
And with gude wyllis, vesy and assay
For to conuoy, the said Eneadanis
With Ioy within the, hie wallis attanis
And in the myd, quhile him self ful besy went
The ciete quhilk was, disarayit and schent
To put to poynt, and ordinance agane
And the vnweildy, commoun pepyl Ilkane
To caus addres, eftir thare faculte
Thare myndis mesis, and astablis he
And gan thame promys, rest in time cumming
And how within schort time, he suld thame bring
In tyll eternale peace, for euir mare
Syne chargeit he, the pepyll ouer al quhare
In ioy blythnes, solace and deray
Tryumphe to mak with myrth gam and play
As was according, and al thare lugeingis hye
Thare kyngly honour, and sport ryall to be
And merely commandis, man and page
With ane assent blyith vult, and glaid vyssage
His gude son, thay suld do welcum and mete
And with hale hert, ressaue apoun the strete
The troyane pepill, feistand thame in hye
With glade semblant ryall, and melody
And to furth schaw, sere takynnis of kyndnes
And of new peace, so lang desyrit solace
Be this the rout, as thay instrukkit were
In full gud reule, and ordinance in fere
Ar enterit, in the troianis new ciete
And on thare hedis, garlandis of Oliue tre
Peace thay besocht, as cheif of thare message
Quhen gentyl Eneas euery man and page
Within his palice riall, to presence
Chargeit conuoy, and gif thaym audience
And of thare cumyng, the caus and manere
With visage full debonare did enquere
Than the agit drances with curage •ote
Begouth the fyrst, hys toung for to note
As he that was bayth glaid, Ioyful and gay
For Turnus slauchter, that tho was done away
And thus he sayd, O gentyl duke troyane
Ferme hope and glore, of the pepyl phrigiane
To quhem of piete, and dedis of armes fare
In al the warld, thare may be na compare
We vincust folkis, to witnessing doith call
And by the goddis sweris and goddessis all
Contrare hys willis, sare the kyng latyne
Behald the grete assembil, and conuyne
Of the Italianis, and folk of latyne land
Agane hys stomak, eik I bare on hand
Outtragiusly, the contract is Ibrokin
Ne neuir he in dede, na worde has spokin
That mycht the troyiane, honour truble ocht
Bot fer rather, baith in dede and thocht
Sen that the goddis, respons sa has tald
The wedding of hys douchtir, grant ȝou wald
And wyth ful grete desire, ful wele I knaw
Oft couite ȝou, to be his son in law
For all the breke, and sterage that has bene
In fere of were, and birnist armour kene
wyth sa grete rage, of labour and of pane
The wylde furie of Turnus, now lyis stane
Inflammyt wyth the stang, of wikkitnes
And infekkit, with hie haitrent erpres
Has brocht on hand, and mouit sa to stere
Agane thare wyll, to rais batall and were
The latyne pepil, constrening by and by
Quhilk thay playnly refusit, and gan deny
Him, all the oist, turnand bakwart agane
Besocht to ceis, and draw fra the bargane
And suffir the grete anchises, son of troy
His wedlok promist, eniois but ennoy
Syne the mayst nobil kyng, Latine full fane
Him for to brek, and wythdraw agane
His auld vnweildy handis, twa did hald
Hym to require, hys purpous stynt he wald
For wele he saw, in ouer ardent desyre
Of the bargane, he scaldit hait as fyre
Bot al our prayeris, and requeistis kynd
Mycht nowthir bow, that doure mannis mynd
Nor ȝit the takynnis, and the wounderis sere
From goddis send, wyth diuyne ansuere
Bot that euermore, and more feirsly he
Furth spoutand fyre prouocand the melle
And for sic, sucquerdry vndertake now
His awne mischeif, wele wourthy til allow
He fundin has, quhilk finale on the land
Thou beand victor, with the ouerhand
Him bet to ground, has made do gnaw and kite
The blak erd in till his mortall syte
Now lat that Ilk rehatour, wynde in hy
The blak hellis, biggingis to vesy
Vnder the drerey depe flude, of acheron
Lat hym go seirs, sen he is thidder gone
Vthir oistis or barganis, in his rage
And als ane vthir manere of mariage
Thou fer bettir, and grete dele wourthiar
To bere the riall sceptoure and to be are
Succede to realme, and heretage sall
Of laurent cuntre, with the nobillis al
In the alhale, the hous of king latyne
And his vnweildy age, like to declyne
His hope and all beleif, restis in the
And the onlie Italianis, al said he
Aboue the schynand sternes, as gold brycht
Full wilful ar, for to vphie on hicht
As mayist excellent, wourthy werioure
Thay the extol, in batall and in stoure
Thy heuinlie armour, eik with loude steuin
And thy verray renowne singis to the heuin
The graue faderis, of counsall venerabill
In thare degest, decretis sage and stabill
The anciant pepil, vnweildy for age
The glaid ȝoung gallandis stalwart of curage
The lusty matrouns, newfangil of sic thing
Wenschis vnwed, and litill childer ȝing
All with ane voce, and hale assent at accorde
Desiris the, as for thare prince and lord
And ioyus ar, that into feild fute hete
Vnder the wappinnis Turnus lyis doun bet
The auld Italie, clepit ausonia
Beseikis hereof, and forthirmore alsua
Doith the extol, maist wourthy wise and wicht
In the onlie returnite, is thare sicht
The kyng hym self, Latinus now full ald
His anciant vnweildy lyfe, to hald
Has only thys beleif, and traist quod he
That he his douchter, may do wed with the
Quhilk of kyn, successioun and lynnage
Be that ilk souerane band, of mariage
Of troyane and Italiane, blude discend
Sal childer furth bryng, quhil the warldis end
Perpetualy to ring, in hye empire
Tharfore haue done, cum on thou gudely sire
The grete ledar of the troyane rout
Cum enter in, our werely wallis stout
Ressaue thys wourthy notabil fair proffit
And sasyne tak, of honouris quhilk we offit
Thus endit he, and al the remanent
In til ane voce, samyn gaif thare consent
Quham the reuthful Eneas, wyth glaid chere
Ressauit has ful tendirly, in fere
And in few wourdis, and ane freyndly mynd
Thaym ansuerand, he carpit on this kynd
Not ȝou nor ȝit the kyng Latyne, but leis
That wount was, for to reygn in plesand pece
I wyl argew, of thys maner and offence
Forsoith I wate, the wilful violence
Of turnus, al that grete werk brocht about
And I am souir eik, and out of dout
Sa grete dangere of battal, it was he
Prouokit sa, and mouit to the melle
For ȝoung desire, of hye renowne perfay
And lois of proues, mare than I did say
And neuertheles, how euir it be I wys
Thys spousage Italiane, that me promyst is
Ne wyl I not, refuse on nakin wyse
Nor na knitting vp, as ȝe deuise
Thys haly peace, with frendly alliance
With eterne concord, but disseuerance
The samyn kyng latyne, my gude fader ald
Sal his empir, and vene rabill sceptoure hald
And I troyane for me, vp in this feild
Ane new resseit, and wyth wallis sall beild
Quhilk ciete sall ressaue, his dauchteris name
And my goddis domesticall, that fra hame
Wyth me I brocht, I sall with ȝou conioe
In concord and vnite, all commoune
Intyme tocum, samin vthir fallouschip
Vnder ane law fall leif, in grete freyndschip
In the mene tyme go, and spede vs sone
Vnto our werk, that restis ȝit vndone
And lat vs birne the bodyis, and bery eft
Quham the hard woful rage, has vs bereft
And into battall, kelit lyis dede
Syne to morne arely, as the son worthis rede
And with his clere dayis, licht doith schyne
Blyithly we seik, to the ciete Laurentyne
Thus said he, and the Latinis, quhill he spak
Wyth vissage styll, beheld him stupefak
Of his wise gracius ansueris, wounderand all
And of sic wourdis, debonare in speciall
Mare euidently gan maruell, he and he
Of his grete werk, of reuth and sic pyete
Blissit with all thare forcis, euery wicht
Weltis doun treis, grew ful hie on hicht
And haistely togiddir, gadderit has
In hepis grete, the funerall fyre to rais
And thare aboue, thir cietizanis has laed
Vnder quham syne, thay set in blesis brade
The flamb and reik, vpglidis in the are
That of the laithly smokis, here and thare
The heuin dirknit, and the fyrmament
Thay hynt from all, the feildis adiacent
Innowmerabyl rouch, twynter scheip syne
And of thir accorne swelliaris, the fat swyne
The tiby ȝoung oxin, stik thay fast
And in the funerall fyris, did thame kast
The large planis schinis, all of licht
And throw that hait, skaldand flambis bricht
Stude blunt of beistis, and of treis bare
Wyth huge clamour, smyte dyntlit the are

Be this the schinand, secund dayis licht
Vprasit phebus, with goldin bemes bricht
Than all the troyanis, and Ausomanis
Full blyithly in ane rout, assemblit attanis
Mounted on hors, and held thare wayis syne
Vnto the maister ciete, Laurentyne
With wallis hye, and biggingis warely maid
Before thame all, reuchful Eneas rade
And nixt perordour, drances that to the kyng
As agit man carpis, of mony thing
Syne come hys only son, Ascaneus
That vthir wayis, was clepit Iulus
Nixt him Alethus, with mind ful degest
Graue Ilioneus mynystheus, and sterne sergest
Syne followis thame, the forcy Serestus
Syas also, and forcy Cloanthus
Eftir thame mydlit, samin went arayne
The vthir troyanis, and folkis Italiane
In the mene quhile, the latine cietezanis
wythout thare wallis, I schit out attanis
That with grete laude, and myche solempnite
And triumphe riall, has ressauit Enee
Be this thay cuming war, in to the toun
Quham with blyith front, to mete thaime reddy boun
The kyng Latine, with huge cumpany
Thame welcum is, and feistis by and by
And fra that he beheld, amyd the rout
Eneas cummand, the Dardane capitane stout
His verray figure, did him not dissaife
For quhare he went, excellent all the laif
And heare fer ane, grete dele semes he
Thar fer on brede, his ryall maieste
And pryncely schynand countenance did appere
And quhen that he, cummin was so nere
That athir gudly to vthir speik mycht
And here the wourdis, carpit apoun hicht
And lyke as thay, desirit on the land
To lay in armes, and adione hand in hand
The kyng Latinis, as ane courtas man
with glaid semblant, thus first to speik began
Wele be ȝe cummyn, finaly Enee
And the ferme hope, has not dissauit me
Of my desirus mind, now full of ioye
O schynand glorius licht, to folkis of troye
Quham the command, of the grete goddis mycht
Throw sa feil chancis, catchit and euyl dicht
In Italie within our, boundis plane
Has destinat, and ordant to remane
And thocht mannis, wantoun wilfull offence
Be our malapert, and vndantit licence
In thare fury with brag, and mekil vnrest
The haly lawis, trublit and infest
Prouokand and commouand, the goddis greif
So that also quhiddir, me war loith or leif
Full oft resistand, and denyand the were
Constrenyt I was, and warpit thare and here
That magre my hede, me behuffit sustene
The hard dangeris, of mars and mekil tene
Now is it endit, bot certis na lityl thyng
Has it coist sum man, sic vndertakyng
The godlie powere, wilful vengeance to tak
Hauand disdene, that sic deray was mak
Vnto the wikkit saulis, for the nanys
Has send condigne punytioun, and iust panys
Haue done grete troyane prince, now I the pray
Sen bayth the crop, and rutis ar away
Of all sedicioun, and discord I wys
And wirkaris, of sa grete trespas and mys
Cum and ressaue, the spous and mariage
To the promyst succede, to heretage
Realmes I haue, and cieteis mony ane
Full stranglie biggit with hie wallis of stane
And sum also, that I in were conqueist
And thare barmkyn•is, to ground bet and doun kest
Bot only the beleif, and beild quod he
Of my verray age, and antiquite
Ane douchter haue, quhilk suld be myn are
Quhare in tyme cumming, for euermare
I the ressaue, and haldis in Deynte
As son in law, and successour to me
To quham the gentill Eneas, reuerently
This ansuere maid agane, and said in hy
Maist rial king, al tyme accustumate
To leif in plesand peace, but al debate
O this werefare, and sa grete stryffe quod he
I traist euer, thare was na wyte in the
Tharfore my derest fader, I the pray
Do all sic doutis, of suspitioun away
Gif ony sic thochtis, restis in thy mynd
And traistis wele, Enee fald and kynd
Now am I present, reddy as ȝe wald
That now ressauis, and fra thys sal hald
As fader in law, and in al chancis perde
As verray fader, that me begat but le
The figure of the grete Anchises dede
I se here present, to me in this stede
And I agane, in feruent hate desyre
ȝou for to pleis, my fader lord and syre
Sal birn in loue, as sumtime wont was I
Towartis hym •e engenerit, of his body

With siclike sermond, athir vthir gret
And samin to the cheif palice wyth thet
Thay held in fere, than mycht thou se with this
The matrounis and the ȝoung damysellis I wys
That grete desire, has sic thing to be hald
Thring to the stretis, and hie wyndois thik fald
The agit faderis, and the ȝoung gallandis
Perordour eik assemblit, reddy standis
In grte routis, to vesy and to se
The gudlie persouns, of the troiane menȝe
Bot specially, and first of al the laif
The grete capitane Enee, notit thay haif
Attentfully, behaldand euery wycht
His stout curage, his byg stature and hycht
And in thare mynd comprasit his kyn maist hye
His plesand vysage, and knichtly large bewty
And glaid and ioyful, extol and lofe thay can
The grete apperance of gude in sic ane man
And sa fare giftis, and beleif but leis
As thay desyrit, of finale rest and peis
Lyke as quhen the grete ythand, wete or rane
From the cluddis furth, ȝet ouer all the plane
Haldis the husbandis ythil, aganis thare wyll
Lang wyth his crukit beme, the pleuch lyis styll
Syne gyf brycht Tytan, list to schew his face
And with swyft cours, fer furth ane large space
Dois cache his stedis, and his gyltin chare
And kyithis his goldin bemes in the are
Makand the heuinnys, fare clere and schene
The weddir smout, the fyrmament serene
The landwart hynes, than bayth man and boy
For the soft sessonn, ouer flowis ful of ioy
And athir vtheris, gan exhort in hy
To go to labour, of thare husbandry
Na vthir wyse, the pepyl Ausoniane
Of this glade time in hart, wox wounder fane
Be this the kyng Latyne, lord of that land
With maist nobyl Eneas, hand in hand
Within the cheif palice, baith he and he
Ar enterit in the sale ryall, and hie
Quham followis nixt, the ȝoung Ascaneus fare
That was his faderis, only child and are
Syne folk of Italy, mydlit with troyanis
Ar enterit in that, ryall hald attanis
Wyth pompus feyst, and ioyus myrth ouer all
Resoundis tho baith palice, bour and hall
And al the chymmes, ryall round about
Was fyllit with thare trine, and mekyll rout
Aud tharewithall, of chalmeris by and by
Wyth sa gudely ane sort, and cumpany
Of fare ladyis, and damysellis vnwed
Innowme rabil almaist, als furth was led
The fare fresche, Lauinia the may
Amid thame schinand, in hir riall array
The crystall bemes, of hir ene twane
That as the bricht twinkland, sternes schane
Sum dele eschamed, towart the erth dois hald
Quhom as the troyane prynce, first gan behald
Of bewty schape, and all effaris perfay
Sa excellent that wounder was to say
At the fyrst blenk, astonist half wox sche
And musand houeris, styl on hir to se
And in his mynd can rew, the hard myschance
Of Turnus quham, no litle apperance
Sa baldly mouit, to derene bargane
To rais the were, and ficht for sickin ane
For wele he, thocht, the hope of syc ane wycht
To dedis of armes, aucht to constrene ony knycht
Syne to abrege our mater, hand in hand
Thay war coniunct, into eternal band
Of matrymonye, and tho at all deuise
The wedlok with honour, as was the gyse
The menstralis, and heraldis of grete fame
Was playit and soung, and throw the court proclame
Than ioy and myrth, with dansyng and deray
Full mery noyis, and soundis of game and play
Aboue the brycht sternes, hie vpwent
That semit for to peirs, the fyrmament
And ioyus vocis, ryngis furth also
Ouer all the palyce ryall, to and fro
And sic ryot Indurand, amyd the preis
Enee thus carpis, to traist Achates
And bad him go beliue, but mare delay
Do fetche the reche robbis, and array
The fresche attyre, and all precious wedis
Wrocht craftely, and weiff of goldin thredis
Quhilom be fare, Adromathais hand
By quham thay war, him geuin in presand
And eik the cowar, of the fyne gold bricht
Wyth precious stanis, and with rubyis picht
Quham sche also, about hir hals quhite
Was wount to were, in maist pomp and delite
Quhil that the troyane, were fare stude aboue
The grete coupe eik, the quhilk in sygne of loue
Quhylom kyng Priame: to his fader gai•
Auld Anchises of fyne gold and engraif
Than but delay, Achates at command
Brocht thir riche giftis, ane wounder fare presand
Syne to his fader in law, the kyng latyne
The precius coup gaif he, of bricht gold fyne
And to his spous, Lauinia the may
The wedis ryall, and the collere gay
Than athir, did thare deulie obseruance
Wyth blyith breistis, and plesand daliance
To feisting, intertene and cheris
Thare feris about, on the maist gudly wyse
Wyth dyuers sermond, carpand all the day
Thay schort the houris, driuand the tyme away

Be this, it waxis late towart nicht
And fast declynyng, gan the dayis lycht
The tyme requiring, eftir the auld manere
To go to mete, and sit at the suppere
Anone the banket, and the manorie
For feist ryal, accordyng by and by
Wyth al aboundance, pertenyng to sic thyng
As wele efferit, in the hous of ane kyng
Wyth alkin maner ordinance, was made
Amyd the hallis hicht, lang and braid
Apparalit, at al deuyse and deray
Vnto the banket, hale assemblit thay
And on the carpettis spred, of purpour fyne
The tablis set, quhare thay war seruit syne
wyth alkin danteys, and with metes sere
That al to rekkin, prolixit war to here
As how the cristal eueris, to thare handis
The wattir gaif, and how feil seruandis standis
To mak thame minystracion, in all curis
And how thay trasing, on the large fluris
With blyith vissage, in to euery stede
And how that first on burdis, thay set brede
Sum with mesis, gan the tabillis charge
Ane vthir sort, doith set in all large
The coupis grete, and drinkin cassis fyne
And gan to s•ink, and birll •the nobill wyne
That to behald thare walkin, to and fro
Throw the roume hallis, and so besy go
And thame at tabillis, makand so grete chere
Ane paradise, it was to se, and here
Bot with his ene vnmouit, Latyne kyng
Gan fast behald, the child Ascaneus ȝing
Woundering on his efferis, and visage
And of the speche and wourdis graif, and sage
Of sic ane childis mouth, sic wise suld fale
And of degest, and reddy wit with all
Before the ȝeris of maturite
And of fele thingis, him demandis he
Athir to vthir randerand, mony ane saw
And syne wald he also, ane vthir thraw
Full tendirlie do kys, hys lusty face
And lap him in his armis, and enbrace
And wounderly, reiosit declarit wald he
Happy and to the goddis, bedewit Enee
Quhilk him had geuin, sic ane child as that
And quhill thay thus, at the supper sat
Eftir that with sa mony, deynteis sere
Thare appetite of metis, asswagit were
With commonyng, and carping euery wicht
The lang declynand, and ouer stippand nycht
Gan schape full fast, to mak schort and ouer driue
Now the troyanis, hard auenturis beliue
Rehersing ouer, and all the grekis slicht
Now the feirs bargane, and the awfull ficht
Of laurent pepil, calling to thare mynd
As how and quhare quham by, and be quhat kynd
The oistis first disconfist, war in feild
And quhare that athir•rowtis vnder scheild
With dartis casting dynt, of swerdis and mace
Constrenit was to f•e, in sic ane place
And leif the feild, and quha best did his det
Quha bald in stour eik maid, the first vnset
And quha first one ane stertland coursour gude
His birnist brand bedyit, with rede blude
Bot principalie Eneas, troiane bald
And Latynis the king sage, and auld
Of conquerouris, and sufferand princis ding
The geistis can rehers, fra king to king
Twichand the state, quhilom be dayis gone
Of Latium, that mychty regioun
How vmquhile Saturne, fleand his sonnyis brand
Lurkit and dwelt, in Italy the land
Be quhilk resoun he did it latium call
That kynd of pepil, skatterit ouer al
In mountanis wyld, togiddir made conuene
And gaif thame law, and statutis and fulle bene
Taucht thame to grub, the wynes, and al the art
To ere and saw, the cornes and ȝoik car
And-how the grete Iupiter, god diuyne
To this his faderis resset, socht has syne
And how that he engenerit thare alsua
On Atlas douchter, the fare wynsche elet•ra
Schit dardanus that eftir, as thay sayne
His awin brother Iosyus, has slane
Syne from the ciete, chorite in Italie
To sey is went, with ane grete cumpany
And gan arriue eftir, in Phrigia
And belt the ciete, on the mont yda
How that he in signe, for his banere
From Iupiter, ressauit his fader dere
The fleand Egill, displayit fare and plane
Ane knawin takin, to pepill hectoriane
As the first nobill armes, and ensenȝe
Baith of the troiane ancestry, and menȝe
Be him ereckit, and vprasit stude
was first begun, and cheif stude of that blude
Thus with sic manere taking, euery wicht
Gan driuing ouer, and schortis the lang nycht
Thare with the brute and noyis rais in thay wanys
Quhil all the large hillis, rang attanis
Of mannis voce and sound, of instrumentis
That to the rufe on hie, the dyn vpwenis
The blesand orcthis schane, and sergeis bricht
That fer on bred, all lemes of thare licht
The harpis and the gethornis, play is attanis
Vpstert troianis, and syne Italianis
And gan do doubil brangillis, and gambettis
Dansis and roundis, trasing mony gatis
Athir throw vthir reland, on thare gise
Thay futtit it so, that lang war to deuise
Thare haisty fare, thare reuelling and deray
Thare morisis, and quhil sic riot nere day
Bot for to telling how with torche licht
Thay went to chawmer, and syne to bed at nycht
Myne auttor list na mencion, therof draw
Na mare wyll I for thingis bene knaw
All ar expert, eftir new mariage
On the first nycht, quhat suld be the subcharge.

And thus thay feisting dayis, nyne at all
With large pompe, and kingly apparel
According sic ane spousage, as was this
And quhen the tent morow, cumin is
Than this ilk souerane, and maist douchty man
Eneas for to found, his toun began
First gan he make ane cirkil, with ane pleuch
Quhare the wallis suld stand, thare drew ane seuch
Syne troianis foundis tenementis for thame self
And gan the fowsyis, and the dykis delf
Bot lo anone, ane wounder thing to tell
Ane huge bleis, of flambys brade doun fel
Furth of the cluddys, at the left hand straucht
In manere of ane lychting, or fyre flaucht
And did alycht richt in the samyn stede
Apoun the croun, of fare Lauinias hede
And fra thine, hie vp in the lyft agane
It glad alway, and tharein did remane
The fader Eneas, astonyst wox sum dele
Desirus this sing suld be takin fele
His handys baith vpheuis, towart the heuyn
And thus gan mak his bane, with myld steuyn
O Iupiter gifeu•t, ony time sayd he
The troiane pepil, baith by land and se
Thine admonicions command, and impyre
Obeyit has, page man of fyre
Or gif that I ȝour power, and godhede
Dred and adornit, in tyl ony stede
Our altaris, or ony wourschip did thareto
And be that thing ȝit, that restis for to do
Gif ony thyng behind ȝit dois remane
Wyth this ȝour happy takin, auguriane
ȝeild vs ȝour plesand rest, and ferme pece
Mak end of al our harmes, and caus thaim ceis
As he sic wourdis, warpis out that tyde
His goldin moder, apperis, him besyde
Confessand hir to be, the fair venus
And with hir blissit mouth, scho carpis thus
Son do sic thocht, and drede furth, of thy mynd
Ressaue thir godlie thingis, in better kynd
And Ioyously enioyis, myne awne Enee
The grete welefare fra thens, sall betyd the
Now is thy rest, and quiet fund and kend
Now of thy harmes, is cum extreme end
Now at the last, as thou desiris perfay
Thys warld with the, sall knyt vp peace for ay
Abhor thou not the fire, and flambis bricht
From thy dere spousis hede, glaid to the hicht
Bot constantlie thy mynd, thou now addres
It sal besche, I the declare expres
That sall with blude riall, thy douchty name
Thy successioun, renowne and nobill fame
And troiane princes of thy sede discend
Aboue the cloudis hie, and sternes send
Sche sall of thy lynnage, my son Enee
Bare chylder, ful of magnanimyte
Of quhais ofspring, sic men sall succede
That all this large warld, fer on brede
With thare excellent wourschip, sall fulfyll
And by thare mychty power, at thare wyll
As conquerouris, vnder thare senȝeorie
Subdew and reule this warldis, monarchy
Of quham the schynand souerane, glorie sall wend
And fer beȝonde the occiane, se extend
Makand thame equale, with the heuynnys hie
Quham finalie, thare ardent grete bounte
Eftir Innoumerabill, sa fele douchtydedis
And souerane vertew spred, so fer on brede is
Sal make thame goddis, and thame deity
And thame vpheis, full hie, aboue the skye
This flamb of fyre, the wourschip, and renoun
Doith signifye, of thy succession
The god almychty, from his sterit heuin
Has schawin tharefore, this signe of firie leuin
Tharfore in recompence, of sick in thing
And sa mekill wourschip, of hir sall spring
This ciete quhilk thou closis, with anewall
Efter thy spousis name, clepe thou sall
And fortthir eik the goddis quhem thou hynt
Of troy that tyme, quhen in flambis brint
Penates or the goddis, domesticall
Thou set also within, the samyn wall
Tharin thougart them sone, to be brocht in hys
In hie honour, and tyme perpetually
Thare to remane, eternal to duell
I sall to the of thame, ane wounder tell
Thay sall sa stranglie lufe, this new cietë
That gif thame happinnis, caryit for to be
Tyll ony vthir stede, or place thareby
All be thame self agane, sal haistelie
Thay sall returne to thys ilk, toun of thine
That thou beildis in boundis, of kyng Latyne
ȝa how oft syis that, thay away be tane
Thay sall returne, ha•ewart agane ilkane
O happy ciete, and wele fortinat wall
With quham sa grete relikis romane sall
Quham thou sall in tyme to cum, but leis
Gouerne the troiane folkis, in plesand peys
Eftir this at last, Latyne thy fader in law
Wery of hys lyfe, and fer in age ydraw
Dounne to the goistis in campe Elisee
Sall wend and end, his dolly dayis and dee
Vnto his sceptoure, thou sall do succede
And vnder thy sen••orie, feron brede
Sall weild and leid, thir ilk Italianis
And common lawis for thame, and the troianis
Statute thou sal, and syne thou sal ascend
And vp to heuin glaidly, thy self asend
Thus standis the goddis sentence, and decrete
Na mare scho said, but as the gleme dois glete
From thence scho went away, in the schere are
I wat not quhiddir, for I come neuer thare
Enee astonist hauand, his mynde smyte
With sic promys of renoune, and delite
Hys blissit moderis command, gan fulfyl
And now at plesand rest, at his awne wyll
The troyane pepill reulit, he in pece
With this the king Latynis, can deceis
And left the sceptoure vakand, to his hand
Than the reuthful Enee, ouer al the land
Of Italiane, succedis, in his stede
And gan full large boundis, in lordschip lede
That hale lie obeyit, to his wand
And at his liking reulis, al the land
Now equalie of fre wyll, euery ane
Baith pepill of troy, and folk Italiane
All of ane rite manere, and vsance
Becumyn are freyndle, but distrepance
Thare myndis, and thare breistis in amyte
In ferme concord, and grete tranquillite
Gan leif in eis confederate, and ally
As vnder ane law samyn, coniouit euinlie

Venus with this all glaid, and full of ioye
Amyd the heuenly hald, •icht mylde and Moye
Before Iupiter doun, hir self set
And bayth hir armes, about his feite plet
Embrasand thame, and kissand reuerendlye
Syne thus with voce, expres, scho said in hy
Fader almychty, that from thy heuinlie ryng
At thy plesure reulis, and steris al thing
That mannis dedis thochtis and auenturis
Rekynnys and knawis, and therof has the curis
Wele I remember, that quhen the pepill troiane
With hard vnfreyndlie fortoun, was ouertane
Thou promist of thare labouris and distres
Help and support and efter diseis solace
Nouthir thy promyssis, fader nor sentence
Has me dissauit for lo, with reuerence
All the faderis, of Italye has se
But discrepance fully, thir ȝeris thre
In blyssit peace, my son enioyis that land
But certis fader, as I vnderstand
Vnto the e••rnit heuinly hald, on hie
Thou promyst raise, thy maist douchty Enee
And for his merite aboue, the schynand skye
Him for to place in heuin, and deifye
Quhat thochtis now dois, rolling in thy mynd
Sen ellis dois the verteuis, theuis kynde
Of thys reuthful Eneas, the require
Aboue the polis bricht, to rais that syre
The fader tho of men, and goddis all
Gan kys venus his child, and thare with all
Ther profound wourdis, from his breist furth braid
My dere douchter Citheria, he said
Thou knawis how stranglie, the mychty Enee
And the Eneadanis, all of his menȝe
Ithandly and vnirkit, lufit haue I
On sey and landis, catchit by and by
In perrillis sere, and how that oft time eik
Hauand piete, of the my douchter meke
For luf of the, for thare diseis was wo
And now I haue, lo finalie also
Al thare harmes and ennoy, brocht til end
And made Iuno, as that ful wele is kend
For to becum freindly and fauorabil
Now likis me forsoith, al ferme and stabil
My sentence promist, to complete quod he
Quhen that the riall troiane, duke Enee
Amang the heuinnis, institute I sall
And him to nowmer of the goddis cale
And thus I grant, with gude willis perfay
Tharefore se that thou change, and do away
Gif thare be in him, ony mortal thing
And sine aboue al the sternes, thou him bring
I sal also heich ony of his kin
Quhilk of thare propir vertew list do wyn
Perpetual louingis, by dedis honorabil
And doth contemne, the wrechit warld vnstabil
Thame inlikewise, aboue the heuynnys hie
I sal do place, and deify quod he
The hoddis aboue, alhale gaif thare consait
Nor riall Iuno, at that tyme present
List not contrary, but gan persuade ful euin
To bring the grete Enee, vp til heuin
And freindle wourdis, of him carpis thare
Than venus slaid, discendand throw theare
And socht vnto the feildis, Laurentane
Nere by quhare that numetius, throw the […]
That fresche riuere, flewis to the se
Dikit about, with redis growand hie
Quhare in the body, of hir son so dere
Scho maid do wesche, and vnder the stremis cler
Al that was mortal and corruptibill thyng
Gart do away, and sine at hir lyking
The recent happy saul, with hir hint sche
And bare it vp aboue the are full hie
Vnto the heuin, quhare reuthful Eneas
Amyd the stremes, chosin has his place
Quham the famile and kinred Iuliane
Doith clepe and cal, amangis thame euery ane
Indigites, quhilk is als mekil to say
As god induellare, that thare sudiornis aye
And in remembrance, of this ilk torne
Thay his templis wourschip and adorne