Book XII

Prologue

Dionea nycht hird, and wache of day
The sternes chasit of the heuin, away
Dame synthia, doun rolling in the seye
And venus loist the bewte, of hir Eye
Fleand eschamet, within Cilenyus caue
Mars vmbedrew, for all his grundin glaue
Nor frawar saturne, from his mortall spere
Durst langare, in the farmament appere
Bot stal abak, ȝound in his regioun far
Behind the circulate warld, of Iupiter
Nectymene affrayit of the licht
Went vnder couert, for gone was the nycht
As fresche aurora, to mychty tytane spous
Ischit of hir saffron bed, and euery hous
In crammesy clede, and granit violate
With sanguyne cape, the seluage purpurate
Vnschet the wynd, of his large hall
Spred all with rosis, and full of balme riall
And eik the heuinly portis, cristallyne
Vpwarpis brade the warlde, till illumyne
The twynkling stremouris, of the orient
Sched purpoure sprayngis, with gold and asure ment
Persand the sabil, barmkin nocturuall
Bet doun the skyes, cloudy mantil wall
Eous the stede, with ruby hammyts rede
Abufe the seyis liftis, furth his hede
Of culloure sore, and sum dele broune as bery
For to alichtin, and glade our emysperery
Tha flambe out brastin, at the noys thirlis
So fast pheton with the quhip, him quhillis
To roll Appollo, his faderis goldin chare
That schroudith all the heuynnys, and the are
Quhil shortlie with the blesand, corche of day
Abilȝeit in his lemand fresche array
Furth of his palice riall, Ischit Phebus
With goldin croun, and vissage glorius
Crisp haris bricht as, chrissolite or thopas
For qhuais hew mycht, nane behald his face
The fyrie sparkis brasting, from his ene
To purge the are, and gilt the tendir grene
Defoundand from his sege etheriall
Glade influent aspectis, celicall
Before his regal hic magnificence
Myfty vapoure vpspringand, swete as sence
Insmoky soppis of donk dewis wak
Moch hailsum stouis, ouerheldand the slak
The auriate phanis, of his trone souerane
With glitterand glance, ouer, spred the occiane
The large fludis lemand, all of licht
Bot with ane blenk, of his supernale sicht
For to behald it was, ane glore to se
The stabillyt wyndys, and the calmyt se
The soft sessoun, the firmament serene
The loune illuminate, are and furth amene
The siluer scalit fyschis on the grete
Ouer thowrt grete stremes, sprinkilland for the hete
Wyth fynnys schinand broun, as Synopare
And chesal talis, stourand here and thare
The new cullour alichting, all the landis
Forgane the stanryis schene, and beriall strandis
Quhil the reflex, of the din•uale bemes
The bene bonkis kest, ful of variant glemes
And lusty flora, did hir blomes sprede
Vnder the fete of phebus, sulȝeart stede
The swardit sole enbrode with selkouth hewyis
Wod and forest obumbrate, with thare bewis
Quhais blysful branchis porturate on the ground
With schaddois schene schew, rochis rubieund
Towris turettis, kirnalis, pynnakillis hie
Of kirkis castellis, and ilk faire ciete
Scud payntit euery fane phioll and stage
Apoun the plane ground, by thare awin vmbrage
Of Eolus north blastis hauand no drede
The sulȝe spred hir brade bosum, on brede
zepherus confortabill inspiratioun
For tyll ressaue law, in hir barin odoun
The cornis croppis, and the bere new brerde
Wyth glade sum gardmond, reuesting the erde
So thyk the plantis sprang, in euery pete
The feildis ferlyis, of thare fructuous flete
Byssy dame Ceres, and proude priapus
R•iosing of the planis plentuous
Plennyst so plesand, and maist propirly
By nature nurissit, wounder nobylly
On the fertyl skyrt lappys, of the ground
Strekand on brede, vnder the cyrkil round
The varyant vesture, of the venust vale
Schrowdis the scherald fur, and euery fale
Ouerfret wyth fulȝeis, and syguris ful dyuers
The pray bysprent, wyth spryngald sproutis dyspars
For callour humoure, on the dewy nycht
Rendryng sum place, the gyrs pilis thare licht
Als fer as catal, the lang some rys day
Had in thare pasture ete, and guyp away
And blysful blossomes, in the blomyt ȝard
Submyttis thare hedys, in the ȝoung sonnys safgard
Iue leuis rank ouerspred the barmkyn wall
The blemit hauthorne cled his pykis all
Furth of fresche burgeouns, the wyne grapis ȝing
Endlang the traȝileys, dyd on twistis hing
The loukit buttouns, on the gemyt treis
Ouerspredand leuis, of naturis tapestryis
Soft gresy verdour, eftir balmy schouris
On curland stalkis, smyland to thare flowris
Behaldand thame, sa mony diuers hew
Sum peirs, sum pale, sum burnet, and sum blew
Sum gres, sum gowlis, sū purpure sum sanguane
Blanchit or broun, fauch ȝallow mony ane
Sum heuinly colorit, in celestial gre
Sum wattry hewit, as the haw wally se
And sum depart in freklis, rede and quhate
Sum bricht as gold, with aureate leuis lite
The dasy did onbrede, hir, crownel smale
And euery flour, vnlappit in the dale
In battil gers burgeouns, the banwart wylde
The clauir cat•luke, and the camuomelde
The slourdelyce, furth sprede his heuynly hew
Floure damas, and columbe, blak and blew
Sere downis smal, in denthilion sprang
The ȝoung grene blomit strabery leuis, amang
Gimp geraslouris, thare rone leuis vnschet
Freche Prymrois, and the purpour violet
The rois knoppis, tetand furth thare hede
Gan chyp and kyth thare vernale lippis rede
Crysp skarlet leuis, sum scheddand baith attanis
Kest fragrant smel, amyd fra goldin granis
Heuenlie lyllyis, with lokkerand toppis quhyte
Opynnit and schew thare creistis redemite
The balmy vapour, from thare sylkyn croppys
Distilland halesum, sugurat hony droppis
And syluer schakeris, gan fra leuys hing
With crystal sprayngis, on the verdure ȝing
The plane ponderit, with semelie seitis sound
Bedyit ful of dewy peirlys round
So that ilk burgeoun syon herbr, or floure
Wor all enbalmyt, of the fresche liquour
And baithit hait did in dulce humouris flete
Quhare of the beis, wrocht thare hony swete
Be mycht Phebus operatiouns
In sappy subtell exhalatiouns
Forgane the cummyn, of thes prynce potent
Redolent odour, vp from rutis rent
Halesum of smel, as ony spicery
Triakil draggis, or electuary
Seropys Sewane, succure and synamome
Pretius inuntment, saufe or fragrant pome
Aromatike gummes, or ony fyne potioun
Must myr aloyes, or confectioun
Ane paradise it semyt to draw nere
Thir galȝeard gardingis, and ilk grene herbere
Mayst amyabil waxis, the emerant medis
Swannis southis, throw out the resp and redis
Ouer all thir lochis, and the fludis gray
Sersand by kynd, ane place quhare thay suld lay
Phebus rede foule his curale creist can stere
Oft strekand furth his hekkil crawand clere
Amyd the wortis, and the rutis gent
Pikland hys mete in alayis quhare he went
His wyiffis toppa, and partelot hym by
As bird al tyme, that hantis by gamy
The payntit poune paysand wyth plumys gim
Kest vp his tale ane proud plesand quhele rym
Ischrowdit in his fedderane bricht and schene
Schapand the prent of argois hundreth ene
Amang the bronys, of the Oliue twistis
Sere smale foulis, wirkand crafty nestis
Endlang the hedgeis, thik and on rank akis
Ilk bird reiosand, with thare mirthful makis
In corneris and clere fenesteris of glas
Full besely aragne, weuand was
To knyt hys nettis, and his wobbis sle
There with to caucht, the litil mige or fle
So dusty pouder vpstouris in euery strete
Quhil gorby gaspit, for the feruent hete
Vnder the bewis, hene in lusty valis
Within fermance, and parkis clois of palis
The bustuous bukkis, rakis furth on raw
Heirdis of hertis, throw the thyck wod schaw
Bayth the brokittis, and with brade burnist tyndis
The sprutal calfys soukand, the rede hyndis
The ȝoung fownys, follow and the dun days
Kiddis skippand, throw ronnys eftir rais
In lesuris and on leyis, litill lammes
Full tait and trig, socht bletand to thare dammes
Tydy ky lowis welis, by thaym rynnis
And snod and slekit worth, thir beistis skinnis
On salt stremes wolk, dorida and thetis
By rynnand strandis, nymphes and neadis
Sic as we clepe, wynschis and damyssellis
In gresy grauis wanderand, by spring wellis
Of blomed branschis, and flouris quhyte and rede
Plettand thare lusty chaplettis for thare hede
Sum ring sangis dancis, ledis and roundis
With vocis schil quhil all the dale resoundis
Quhareso thay walk, into thare karoling
For amourus layis, dois the rochis ring
Ane sang the schip salis, ouer the salt fame
Wil bring thir merchandis, and my lemane •ame
Sum vthir singis I wil be blith and licht
My hert is lent apoun, sa gudly wicht
And thochtful luffaris, rownys to and fro
To leis thare pane, and plene thare Ioly wo
Eftir thare gise, now singand now in sorow
With hertis pensiue, the lang someris morow
Sum bailittis list, endite of his lady
Sum leuis in hope, and sum alluterly
Disparit is, and sa quyte ouer of grace
Hys purgatory he fyndis, in euery place
To pleis hys lufe, sum thocht to flatter and fene
Sum to hant bawdry, and vnleifsum mene
Sum rownys till his fallow, thaym betwene
Hys mery stouth and pastyme, lait ȝistrene
Smyland sais ane, I couth in priuate
Schaw the ane burd, he, quhat be that quod he
Quhat thing that moist, be secrete said that vthir
Gude lord mysbeleue, ȝe ȝour verry brothyr
Na neuir ane dele, bot herkys, quhat I wald
Thou man be preuy, lo my hand vphald
Than sal thou walk at cuin, quod he quhiddir
In sic ane place here, west we baith to giddir
Quhare sche so freschesang this hendir rucht
Do cheis the ane, and I sall quench the licht
I sall be thare quod he, I hope and leuch
ȝa now I knaw the mater wele yneuch
Thus oft diulgate, is thys schamful play
Na thing accordyng, to our halesum may
Bot rathir contagius, and infectyue
And repugnant, that sessoun nutratiue
Quhen new curage, ettillis al gentil hertis
Seand throw kynd, ilk thing spryngis and reuertis
Dame naturis men••ralis, on that vthyr parte
Thare blisful bay, Intonyng euery arte
To bete thare armouris, of thare nychtis bale
The Merle the Mauys, and the Nythtingale
Wyth mery notis, myrthfully, furth brist
Enforsing thaym quha micht do clink it best
The knowschot croudis, pirkis on the ryse
The stirling changis, diuers steuynnys nyse
The sparrow chirmis, in the wallis clyft
Goldspink and •••tquhite, for dynnand the lyft
The gukkow galis, and so quhitteris the quale
Quhil riweris re•rdit, schawis and euery dale
And tendir twistis, trymblit on the treis
For birdis sang, and bemyng of the beis
In werblis dulce, of heuinlie armonyis
The Larkis loude releischand in the skyis
Louis thare lege, with tonys curious
Bayth to Dame Natur, and the fresche Venus
Rendring hie laudis, in thare obseruance
Quhais suggourit throttis, made glade hartis dance
And al smal foulis, singis on the spray
Welcum the lord of licht, and lampe of day
Welcum fosterare, of tendir herbis grene
Welcum quikkynnar, of flurist flouris schene
Welcum support, of euery rut and vane
Welcum comfort, of al kind frute and grane
Welcum the birdis beild apoun the brere
Welcum maister, and reulare of the ȝere
Welcum welfare, of husbandis at the plewis
Welcum reparare of woddis treis and bewis
Welcum depanter of the blomyt medis
Welcum the lyffe of euery thing that spredis
Welcum storare, of al kynd bestial
Welcum be thy bricht bemes, gladand al
Welcum celestiall myrrour, and espye
Atteiching all that hantis sluggardy
And wyth this wourd in chawmer quhare I lay
The nynt morow of fresche temperit may
On fute I sprent, into my bare sark
Wilful for to complete my langsum wark
Twiching the lattir buke, of dan virgill
Quhilk me had taryit al to lang ane quhyle
And to behald the cummyng of this king
That was so welcum, to al warldly thyng
With sic triumphe, and pompus curage glad
Than of his souerane chymmes, as is said
Newlie arising, in his estate ryall
That by his hew, but orliger or dial
I knew it was past, four houris of day
And thocht I wald na langarely in may
Leis phebus suld me losingere atteynt
For progne had or than, sonng hir complayn•
And eik hir dredful sister, philomene
Hir layis endit, and in woddis grene
Hid hir selwin, eschamit of hir chance
And Esatus, completit his pennance
In ryueris fludis, and euery laik
And peristera biddis luffaris awake
Do serf my lady venus, here with me
Lerne thus to make ȝour obseruance quod sche
In to my hartis ladyis swete persence
Behaldis how I being, and dois reuerence
Hir nek scho wrinklis, trasing mony fold
Wyth plumis glitterand, Asure apoun gold
Rendring ane cullour, betwuix greue and blew
In purpure glance, of heuinlie varient hew
I mene our awin natiue bird, gentil dow
Singand on hir kynde, I come hidder to wow
So prikling hir grene curage for to crowde
In amorus voce, and vowar soundis lowde
That for the dynnyng, of hir wantoun cry
I irkit of my bed, and mycht not ly
Bot gan me blis, syne in my wedis dressis
And for it was are morrow, or tyme of messis
I hint ane scripture, and my pen furth tuke
Syne thus began of virgil the twelf buke
THe lusty crafty preambil perl of may
I the intitillit crownit quhil domysday
And al with gold, in signe of state riall
Moist bene Illumynit, thy letteris capitall.

Book XII

Quhene Turnus knew, the latyne pepil hale
Irk of the were, and saw thare curage fale
By the thrawart aduersiteis of mart
Quhilk was to fore vnwrokin and flout of hart
And thocht the tyme, requiris him but abade
For to complete, the promys he had made
Semyng as towartys him, tho euery wicht
And to that effect, addressyt thare luke and sicht
Than vnquirit, be insaciabil desire
Langand to fycht, and birnand hait as fyre
Ful hie rasand, his curage and his chere
He gan amyd, the audience appere
Fers as ane wylde Lioun, ȝond in trace
By the huntare woundit, in the chace
Quhen the smart straik, in his breist al fast is
For Ire the lokkeris, of his nek vpcastis
Than first begynnyng, to rais his sterne mude
Reiosit of the batal, feirs and wod
Vnabasitlie raschand, the schaft in sounder
And on the man liggand, at wate thare vnder
Him to reuenge, wyth bludy mouth dois bray
Nane vthir wise ferde Turnns, the ilk day
Smytin so brym, in feruent violence
That al commouit, in the kingis presence
On this manere begouth, to speik and say
Thare sal in turnus, be found no delay
For al for not ȝone cowarte Eneadanis
Thare promyssis, and thare wourdis cummys aganis
Willing retrete, thare behestis and sawis
Sa sal thay not, for we will nane sic lawis
I sal thare falshede resist, and gane stand
And fecht contrare, thare chiftane hand for hand
Thow rial prince, and fader kyng latyne
Do sacryfyce and conferme, thys conuyne
For owthir sal I, with thir handis twa
ȝone ilk troiane, forhoware of Asia
Do put to deith, send doun to hell quod he
Lat latyne pepill sitting by to se
How myne allane, wyth swerde in thare presens
I sall reuenge and end, our alleris offence
Or than so betid he wyn the gre
Lat vs all vincust, til him subiect be
ȝeild hym the crowne enduring the terme of lyfe
And lat him Iois lauinia, to hys wyfe
Kyng Latyne, so with sad, and degest mynde
To him ansueris, and said apoun this kynd
O douchty ȝounker, excellent of curage
How fer as by thy forcy vassalage
My febil age, thou dois excede quod he
Als fer mare, diligentlie pertenis me
And ganand is to counsale and prouide
And examyne euery chance, may be tide
As I that has, in parte ane manere fere
Be lang experience, knawand the doutis of were
Thou weildis Dawnus, thy faderis realme and land
And feil cieteis, conquest, wyth thy awne hand
Thareto thou has also, ane gentil hert
Liberale and fre, and in were maist expert
And king Latyne, has gold to gif the eik
Perfay enewch vtheris, not fer to seik
Of madynnnys bene, vnwed in Latyum wyde
And in the laurent feildis, here besyde
Of blud and fryndeschip, na thyng myssemand
Bot wourthy to be, quene of ony land
Thole me I pray the, all dissait done away
Thir wourdis quheyn, of wecht till the to say
And samyn prent, thir sawis in thy wit
Vnlesum is I suld, in wedlok knyt
My dochteris till wowaris of this land
That hir to fore had askit in sic band
Al the spaymen, and goddis reueling
Declarit thaym that was vnlesum thyng
And netheles I vincust clene but were
For lufe of the my spousis cousing dere
Ouer cumming, by hir wofull teris and site
All maner bandis, thou has brokin […]
And fra my son, in law ful wranguslie
His spous vnto him promyst, rest haue I
And forthir on him, mouit ane vikkit were
Sen syne in quhat chance I stand and dangere
And how fers batellis, now persewis me
Ful wele thou wate, and seis Turnus quod he
And how huge trawell, thou has tholit and pane
As principale mayst douchty capitane
Lo twyis in batal Vincust haue we be
As now skantlie within our wallit ciete
The hope and wele, of Italie defendis
Now of our recent blude, as notourly kend is
The flude of tyber waxis hate agane
And of our huge banys, quhite semes the plane
How am I sterit, thus in purpois sere
And quhiddir flow I thus oft thare and here
Quhat mad folie, all to changis my thocht
Gyl that I reddy be, and doutit nocht
The troianis for my frendis to ressaue
Gif so war Turnus dede, war and bygraue
Quhat aucht I not, fer rathir end the were
He beand in prosperite hale and fere
Quhat wald our cousingis the Rutulianis
Or quhat wald say the vthir Italianis
Gif I suld thus wise sa wilfully
Asking our dochteris wedlok, and ally
Expone or offer, to the dede quod he
Fortoun defend that chance, that sa suld be
Behald the chance of batal variabil
Persaue of were the fikkil warde vnstabill
Haue reuth and mercy of thy fader ald
Quham Ardea, now his cuntre doith withhald
Diuidit fer and disseuerit, from the
And for thy saik, how wo begone is he
Thus sayd the king, bot the violent curage
Of turnus hie mynd, bowit neuer ane stage
Quha wald with cure of medicine him meis
The more incres, and growis his male eis
And eftir that he first, micht speik agane
Thus he began expreme with wordis plane
O thou maist souerane fader, I the pray
To sauf my honour, thou wald do away
Thir curis thochtis, and sollicitude
For me thou takis, and schortlie to conclude
Suffir me for to plege, my dede in wage
For glorius renowne, of vassyllage
For we fader can swak dartis and brandis
Not with febil, but stalwart richt handis
And of our woundis, the rede blude ruschis out
The ȝounder proude troiane, that clepit is to stout
His moder at this tyme sal be fer to scik
Quhilk goddis, wyth hir subtyl slychtis eik
Hyr son accustumate, ay to take the flycht
Was wount to dek, and to hyde out of sycht
Wythin ane wyseler cloud, as for ane trane
And heild hyr selfe also inschaddois vane

Be than the quene Amata, al in fere
Of this vncouth and new manere of were
Wepyng ful sore, al dede lyke ful of harmes
Hyr son in law, Turnus hynt in her armes
That was so feruent, in his ardent desyre
Turnus sayd scho; thou best belouit syre
Be thir ilk woful teris, I the pray
And be the wourschip thou awe tyl Amata
Gyf ony honour, of hyr or thy kyn
Twichis or mouis, in thi breistis wythin
I the beseik ane thyng mine awin knycht
Decist and ceis, to mache troianis in fycht
Thou onlie comfort of our febyl eild
Thow al our rest, our welfare and our beild
Haue reuth and piete, of my woful bale
In the power, and michtis rest alhale
The wourschip and empyre, of kyng latyne
His hous and famyl, thou lyke to declyne
In the remanis, and is by the vp bore
I the assure, and certyfyis tharefore
Quhat auenture in this fycht, sall happin the
The self chance Turuus, sal be tide me
Samyn wyth the, gif thou endis in that stryfe
I sal depart out of this irk sum lyfe
Nor neuer thral, sal I remane to se
ȝone ilk Eneas sun in law to me
Lauinia the made, wyth sore teris smert
Hyr moderis wourdis, felt depe in hir hert
So that the rude did hir vissage glow
And ful of teris, gan hir chekis strow
The feruent fyre of schame, risis on hie
Kyndland mare large, the rede collorit bewtie
So that the natural hete, the blude did chase
Ouer al the partis, of hir quhitlie face
Quhill that this vyrgine, in this woful rage
Sic culloris rendris, from the fresche vissage
As quhay byspark wald, the quhite enoure indane
Wyth scarlot droppis, or with broun sanguane
Or quhare the schene lyllies, in ony stede
War pulderit with the vermel rosis rede
The hate luf trublis sore the knycht
That on thys made, he fixis al his sicht
And al the more, he birnis in desyre
Of bargane into armys hate as fyre
Syne to the quene Amata but abade
In few wourdis, on this wyse he sayd
O my dere moder, of thy weping ho
I ȝou beseik, do not do not so
Persew me not thus, wyth ȝour gretand teris
Nor quhen I pas in to thir mortal weris
In marcial bargane contrary my fo
Do way to present me sic takyn of wo
In Turnus michtis, lyis not quod he
The chance of deith, to mak him self in fre
I say gif deith this way, be to me schape
Now may I not astart, nor ȝit eschape
For at this time instant, my messengere
Idmon clepit, my credence hecht to bere
Now to ȝone troiane, tirrant rehersyng
My wourdis, quhilkis lykys hym nothing
That is to knaw to morow als arely
As bricht aurora, in the orient skye
With rosy chariot, liftis vp hir hede
The firmament schrouding in cullour rede
That he moue not aganis rutulians
His oistis nor nane, army of troianis
Bot athir half, fra batall for the best
Baith sal troianis, and rutulians them rest
And lat vs twa, the bargane to conclude
Betuix vs only dereyne, with our blude
And into ȝounder feild, in s••wart strife
Lat athir seik Lauinia, to his wife
Fra this was said fast to his in he spedis
And bad anone, lat do him se his stedis
Behaldand thaym reiosis he in hert
To se thaym stand sa feirs, with curage smert
Quhilk kind of hors, quhilum as thay say
Orichia the lusty fresche may
Of Athenis the kingis douchter and are
As ane maist rial present wounder fare
Send from hyr cuntre to king Pilumnus
Was ferd grantseir vnto this ilk Turnus
The quhilk stedis schapin at all delite
Excedit fer the snaw, in cullour quhite
To speik of spede, thare swiftnes, was vntald
For thay the wyndis blastys, forryn wald
The besy knoppis, and verlotis of his stabil
About thaym stude, ful ȝape and seruiabil
And with thare how luffis, gan thaym chere
Did clap and straik, thare leyndis to make them stere
Thare lokkerand manis, and thare crestis hie
Dressis with trelȝeis, and kamis honestly
From thens vnto his chalmer, went he syne
About his schulderis, assayis his hawbrek fyne
Of burnist male, and schynand rychely
Of fynest gold and quhitly alcomye
Tharewith also, his swerd addressis he
Quhat way he wald it vse, in the mele
His souir scheild assayis he also
And eik his tymbrit helme, with creistis two
Quhilk swerde was made, vnto Dawnus hys syre
Be Vlcanus the mychty god of fyre
That forgit thys blade, and temperit with his handis
Hate glowand dippit in the stigeane strandis
Syne wyth grete force enarmyt in al his gere
Ful lichtlie vp he hynt, his stalwart spere
Quhilk tho amyddis, the hal lemand stude
Vp by ane pillare huge square and gude
Quhilum the spulȝe, he bereft from ane
Clepit Attoure, ane Capitane Armicane
The schaft he schuke, and brangillis lust•ly
Thareto with loude voce, thus can he cry
O now thou spere, that neuir failȝete in dede
Quhen I the callit to my desire in nede
Quhilum the veildit, Actoure the maist douchty knicht
Now the in hand withhaldis Turnus wicht
Now is the tyme, that I mayist myster the
For to doun bet, the corps thou grant to me
Of ȝounder Phrigiane, is skant half ane man
That wyth my stalwart I may than
His hawbrek, of his body to arrace
Hakkit and rent, and persit in mony place
And in the dusty pouder, here and thare
Subdill and fule, his crispe and ȝallow hare
That are made creis, and curlis now sa wele
Yplet ilk nycht, on the warme brotht of stele
Dekkit and donk, in his wiselie manere
Of fragrant myr, vthir enuntmentis sere
With sikkin furie, rage caucht is he
That thus he carpis, to ane schaft of tre
And from the vissage, of this ardent syre
The sparkis glidis, as the hote fyre
For verray feruour, of the fereful tene
Schynis and bristis furth of baith his ene
Lyke as the bul, that bargane begyn wald
Geuis terrybyl routis, and lowis mony fald
Or than aggreuit, bustuous and furth borne
Presys his yre, to assay wyth his horne
Lenand hys spald, to the stok of ane tre
And wyth his dynt, the wynd to rentis he
Or for to make debate, apoun the land
Wyth his hard clufe, vpwarpis fast the sand
In the self tyme, na les of curage Enee
Cled in hys moderis armour, auful to se
Scharpys him selfe, in furour marcial
Rayssand his greif, for ardour bellical
And ioyus wolx of wexe, to make ane end
Be sic proffer, and poyntment as was send
Syne confortis he, his feris dolorus
And mesyt the drede, and sayd Ascaneus
Declarand thame, the fatal ordinance
Thare destany, and goddis purueance
And to the kyng of Laurentius latyne
Twichand the forsaid tretye and conuyne
Bad the messengeris, bare hame but delay
Souir answere, as thay dasirit alway
And of the pece and truce, as thay spak
Proclame artikles, and lawis of contrak

SC•rslye vpsprang, the nixt day following
Scheddand the bemes, of his brycht mornyng
Vpoun the toppis of the mountanis hie
As phebus stedis, fyrst of the depe see
Rasit thare hedis, and noyis thyrllis on hycht
Ouer al the feildis, blawand the clere lycht
Quhen that the troianis and rutilyanis
The ground mesuris euynnys, dichtis and planis
Vnder the wallis, of the cheif ciete
Thare as the feyld, and fechtin place suld be
Amyddis quham the harthis vp thay set
Quharon the firis, suld be made and bet
And to the common goddis, eik bedene
The altaris couerit wyth the scherald grene
Sum vtheris brocht, the fontanis wattir tare
And sum the haly ingil, wyth thame bare
Wyth lynning valis, or lyke apronis lycht
Thay war arrayt, and thare hedis dycht
In wyppys of the haly herb varuane
The legiouns tho behaldis to the plane
And al the routis, of ausonianis
That vthir wyse, are hate Italianis
Furth thringis at the portis, ful attanis
Wyth lancis lang, and pikkys for the nanys
Thydder al the troyanis wardis by and by
And thirrene oistis, ruschis hastely
Bodin ful wele, in nobil armour sere
Nane vtherwyse wyth wappynnis and wyth gere
Arrayit for the batal, al at rycht
Than thocht the furie of mars, callit thame to fycht
Amyd the thou sandys, swiftly throw the planys
Furth sprentis lustely thare capytanys
In ryche purpour arrayit, and fyne gold brycht
Assaritus sonnys, and Mnestheus wycht
And on the tothir part, strang Asilas
And bald Mesapus, also wyth hym was
Neptunus son, expert in hors dantyng
And efter that, the trumpet blew ane sing
Than euery partyment bownis to thare stand
And gan thare speris, stik doune in the land
Set by thare scheildis, to behald the fyne
The wom•n wedois, and the matrouns syne
Desirus for to se the bargane stout
Of childer and of commons, mony ane rout
That couth na wappins weild, nor armour were
Wyth the vnweildy agit folk in fere
Clam on the hicht, and hedis of the touris
The wallys al and housis riggingis flouris
And sum aboue, apoun the portis hie
Ascendit, or to behald the melle
Bot Iuno tho doun, from the hecht ywys
Of the mountane, that albane clepyt is
Now in our dayis, set then this hillisdoun
Had nouther name honour, nor renone
Scho did behald, amyd the feildis plane
Athir battellis and the oistis twane
Baith of troianis, and the lawrenteis
And kyng latinis ciete, eik scho seis
Anon to turnus sister, apoun hie
That clepit was Inturna, carpys sche
This goddis to that haly nymphe maystres
Of wellis stankis, and routand stremis expres
Quhilk honour Iouye, the king of heuynnys hie
Hir gaif, for the bereft virginite
Sayd o thou nymphes, wourschip of fludis clere
That to my saul, is hald maist le if and dere
Thou knawis wele, I the prefar it ay
Til al the vthir damysellis, perfay
Of latyne cuntre, quhat soeuer thay war
That wranguslie, ascendit or draw nar
The bed vnproffi•abil, of Iupiter maist he
And glaidli eik, haue I not stakit the
In till ane parte, of the heuyne alsua
Herk now thy sorow, thou Iuturna
And wite me not, bot I the warnit haue
Turnus and thy cheif ciete, haue I saue
Sa lang as that the fatis sufferit me
And quhil werde sisteris, sa tholit to be
And now I se that ȝoung men, haist but fale
To mache in feild, wyth fatis inequale
The lattir terme and day, approchis ne
Of fatale force, and strangest destany
Nowthir this bargane, ȝounder on the grene
Nor consederatioun, may se wyth ene
Pas on for thy dere brother germane
Gif thou dar suffir ony mare dredeful pane
To the thys semys, and pertenis quod sche
Gif that percase, ony better may be
Or ocht betyde vnto ȝone catiuis kend
Scars had Iuno, thir wourdis brocht to end
Quhen that the nymphe, Iuturna bedene
Plente of teris, furth ȝet from hir ene
Hir fare quhite breist, thare as sche did stand
Thryis or foure tymes, smate wyth hir owne hand
Saturnus get, this Iuno sais thay teris
Na wise to thys tyme pertenis nor efferis
Haist the gif that thou can, be any way
Wythdraw thy brothir, from the deith away
Or than do mak the oistis, bayth on stere
Provoke the batal, and thaym moue to were
And this conuyne, and trety new consaif
Do brek disturbe, and wyth the wynd bewaif
I sal the warrand, and thy wirkare be
To mak the baldly, vndertake quod sche
On this wyse Iuno, can this nymphe exhort
And left hir hale in were, and dout at schort
With mynde full trift, wo begone and vnsound
Full depe smytting, wyth the sorowfull wound

In the mene tyme, the kyngis of athir rout
From thare cieteis, and strenthis Ischis out
Amyd ane four quhelit thare, Latyne that thraw
Wyth huge pompe, by stedis foure was draw
Quhais haris and his templis, war wele dicht
Wyth ryall croun of fyne gold byrnist brycht
Quhareon ••urettis twelf, lyke bemes schene
As it ane riche adornament, had bene
Of clere phebus, that was his grantschire hald
Nixt came furth, was rollit prince Turnus bald
Wyth ane •wa quhelit •art, of delyte
That drawin was with stedis, twa mylk quhyte
In athir hand held he, in fere of were
The brade hede, brangilland Ieuilling spere
The fader Eneas also, furth wyth all
The romane lynnage, the originall
Apoun the tothir half, come thame agane
Wyth by•••st scheld, that bricht as sternis schene
And heuinly armoure, lemand all of lycht
Besyde him rade Ascaneus, the swete knycht
That semit wele, to euery mannis doine
Ane vthir gude beleue, and hope to grete rome
Furth come the preist, quham to accordit mak
The sacryfice of concord, and contract
In vestement clene, for sic religioun wrocht
And ane ȝoung birssit swyne before thame brocht
Wyth ane rouch, twynt•• schepe samyn in fere
Quhais woll or fleis, neuir clepit wyth schere
The beistis furth has […] this Ilk syrs
Vnto the altare blesand, of hate fyre
The princis tho quhylk, suld this […] makyng
Turnus towart, the bricht sonnys vprisyng
Wyth the salt melder, in thare handis raith
The forrettis, of thir beastis toppis baith
Thay clepe and mesure, as tho was the gyse
And coupis ful of wyne in sacrifyce
About the altaris ȝettis he and he
Wyth drawin swerd, syne the reuthful Enee
His orison furth made, and thus he sayd
O thou brycht son, wyth the schene bemes glaid
Be witnes now, to my behest I pray
And this ilk ground, mot testifye quhat I say
For quhen sa grete pane, and aduersite
I sufferit haue feil syis, on land and se
And now almychty iouy, here my prayere
Saturnus douchter thou his spous sa dere
Now more benyng, than thou was of before
Swete goddis here me, now I the Implore
And gentil Mars, thou takis tent heretyl
That wythaldis, and writhis at thy wyll
Euery batal stryue, werefare and debate
Vnder thy hie power deificate
All fludis I cal fountanis and stremis clere
And al manere of goddis reuerent sere
Abut the heuin ydrad and starrit sky
And ȝou eik blissit wichtis I testifye
That vnder erth, or law in hel doun bene
Or in the fomy seyis, stremes grene
Gyf so betyde that, fallis the victory
To Turnus on the ansomane partie
It is conuenient, and we grant to fle
As vincust folk, to Euandrus ciete
Ascaneus sall als tyte, thir feildis wythdraw
Nor Eneadanis, neuir from the ilk thraw
Aganis ȝow sal rebell, or moue were
Ne with wappinnis, eftir this cuntre dere
Bot gif sa beis, Mars our god glorius
The victorie in our hand grantis vs
Is I beleif afer rathir sal befall
And that als tyte conferme sal goddis al
Throw the grete mychtis of thare deire
Gif that so fare fortoune betydis me
Ne will I not, command Italianis
To be subiect, nor obey the troianis
Nor ȝit this realme, desire I not to me
Bot athir of oure pepil mot go fre
Vnthral vnuincust, in lawis all euinlie
Confederate in perpetual allye
The wourschipping of goddis in sacrifice
And I sal thaym lerne and teiche, at my deuise
My fader in law the kyng latyne here
Moist reule the pepill bayth in pece and were
My fader inlaw as souerane lord and syre
During hys lyfe moist bruke, solempnit Impire
Suffir my troianis than, as we ar boune
For me to beild ane strenth, and wallit toun
And to this ciete, quhare we sal duell at hame
Lat the madin lauinia, gif the name
Thus first Eneas sayd, and eftir syne
Apoun thys wise followis kyng latyne
Behald and towart heuyn, quhare he did stand
And to the sternes vpheuis, his richt hand
Be this ilk erth, seyis and sternes hie
I swere in like wyse, vnto ȝou Enee
And be latonys birth, or twinnis twa
The bricht Appollo, and chaist Diana
And be the doubil frontit Ianus and all
The pissance, of the goddis infernall
And by the dirk sanctuarie, blak as sabyl
Of greuous Pluto, that god reuengeabyll
The hie fader aboue, mothere my cry
That dois with thunder, sic concord ratifye
I twiche thir altaris, and Ingill present quod he
And testifyis ilk, godly maieste
Sall neuir tyme sesoun, nor day betyde
To brek the peace, on the Italiane syde
Na this confiderance, anis part in two
Quhat way that euir happin, the mater go
Ne na maner of violence, boist noraw
Sall ony wyse, me therfra withdraw
Bot ferme and stabyl, all sall haldin be
All thougt the erth, wald myddyll wyth the se
And with diluge, or Inundatioun schent
Couir and confound, ather element
Or thocht the heuin, in hell resolue wald
Or promis sall, Inuiolate be hald
Lyke as this ilk scepture, wand we se
Perchance that tyme, ane scepture in hand bare he
Sall neuir burgeoun, nor sprede branschis lite
Nowthir rank leuis, nor blossum of delite
Sen it is anis in wod, thare as it grew
Law from his stock, hard by the rutis hew
And wantis now his moder of nurissing
For all the syouns and twistis wount to spring
Or grew therfra, as ye may se perfay
Wyth edgeit lomis, bene sued ful quite away
Vmquhile ane grouand tre, quhare it did stand
That now thus by, the crafty werkmannis hand
Inclusit is, and couerit lustely
In birnist gold, and finest alcomye
And geuin our forefathers of Latine land
As scepture riall, for to bere on hand
Wyth wourdis sic and ferme relatiouns
Thir fynale sure confederacions
Athir princis, had confirmid and sworne
Amyd thare nobillis, standand thame beforne
Syne eftir thir auld ceremonis and gise
The beistis deuly, addressit for sacrifyce
Thay brytnyt haue amang the flamis rede
And rentis out, or thay war fully dede
The entrellis of thare beistis, ȝit on lyue
Syne furth of platis, or ballantis belyue
Wyth pasit flesche, plennyst the altaris large
Thareon bestowand in hepis mony ane charge
Bot tho begouth of new, this ilk bargane
Seming to the rutilians, euery man
To be ane richt vneuinly interpryse
And diuers rumour, can in thare breistis ryse
Wyth mony sundry deinyng and consate
He thinkys thus, and he ane vthir gate
And ay the nerer, and mare diligently
That thay the mater consider and espye
Wele thay persaue, and behaldis sans fale
Thir campiouns war not of strencht equale
And vnto this opinioun the ilk thraw
Helpit mekil, that wyth stil pase so law
This turnus mufand, towart the altaris past
And it laulie adornit, with face doun cast
Wyth chekis waxin leyn to thare semyng
Quharon the soft berde, newlie did furth spryng
As al to ȝing, with sic ane to haue dale
Thay thocht his visage, al becummyne pale

And eftir that this ilk commonyng
Thus waxand mare and mare, by mony ane sing
Iuturna hir sister did persaif
And saw the commoun vulgare hartis waif
In diuers sentencis, and intentis sere
Than in amyd the routis drew scho nere
In forme and liknes, of Camertiz bald
Of nobil blude cummin, and lynuage ald
And of his fader the brute and renownee
Was magnified in wourschip wounder he
Thareto him selfe, maist douchty cheualrye
In dedis of armes and in fate of were
Hardy and stout, liberal syncere
Amyd the oistis, this wyse did scho thryng
Not vnexpert, to conuoy sic ane thyng
And diuers rumouris in the preis stalis sche
Syne sic lyke wourdis, carpis apoun hye
O rutulianis eschame ȝe not for fere
Into sa grete ane perrell, and dangere
Ane silly saule, to put in auenture
That for ȝou al sal, vnderly sic cure
Quhidder ar we not equale in our entent
To the troyanis in nowmer, or hardiment
Lo al the troianis, and archadianis
Before vs here, arrayit on the planis
The fatall pissance is hale in this stede
And the tuskanis, that Turnus has at fede
Sa few thay bene, ȝe may behald and se
That gif we li•• mak, vnset trai••is me
The half of al our menȝe, grete and small
Sal not fynd ȝounder, ane fa to mache with all
ȝone turnus, to the goddis aboue ful straucht
To quhais altaris, hym vowit and betaucht
He has for ȝou, al that ȝe se sayde sche
Wyth fame eternale sall wpheit be
As euermare alife, and maist name kouth
Carpit and sang, in euery mannis mouth
Quhen we as thrallis, leif sall our natiue land
And vnto proude tyrrantis, has the ouerhand
Sall be compellit, as lordis tyl obey
That thus now sleuthfully, sa fant and fey
Huffis still on thir feildis, as we war dede
And for our self list schape, for na remede
Wyth sic lyke wourdis, the mindis and consate
Of the ȝounkeris, was inflammyt hate
And mare and mare, now all the feilde about
The murmoure crepis, out throw euery rout
So thay quhilkis, are desyrit peace and rest
And for the commoun wele, thocht it was best
To mak end of the bargane, on this wyse
Ar alterit halely, in ane vthir auyse
For now desyre thay batall, but abade
Prayand god this contract, had neuer bene made
And has compassioun, caucht in hart but fale
Of Turnus chance, senyng so inequale
The self tyme eik, has Iuturna I wys
Ane vthir greter wounder, ekit to thys
And heich vp in the heuin, before thame plane
Ane takin has sche, schawin auguriane
Sic ane sygne that nane, vthir to that entent
Was mare effectuous, nor conuenient
To trubyl Italiane myndis, and mak thame raif
And wyth fals, demonstratioun to dissaif
For Iouis •oule the Eirne, come forand by
Fleand vp heich, touward the bricht rede sky
Before him cachand, ane grete flicht or oist
Of foulis that did ha•t, endlang the ceist
Quhilkis on thare wyngis, fore dredand his wraik
Skrymmis here and thare, with mony spreich and craik
Quhyl suddanly this egil, wyth anesours
As he towart the fludis, made his cours
Despituously, in tyl his punsis he
Has claucht ane swan, excellent of bewte
Than the Italianis, apoun athir syde
Rasit thare myndis to se, quhat suld betyde
And sone the vthir foulis, heich in the skye
Corned agane with mony, skreyme and cry
To chais and to assale, thare aduersare
Ane wounder thing to se, vp in the are
The licht thay dirkin, wyth thare pennys thik
And throw the skyis, wyth mony ane scraik and pyk
Samyn in ane sop, thik as ane clud but baide
Thare fa thay did assailȝe, and inuade
Sa lang quhil that by fors, he was ouerset
And of the heuy byrdin, sa mait and het
That his micht failȝeit, and of his clukis rude
The egyl lete his pray, fall in the flude
And vp amang the cluddis, flew away
Than the Rutulianis, al full glaid and gay
Wyth huge brute, and clamour loud anone
Salust this signe, or takin augurione
Syne sped thare hand, and made thame for the fycht
And fyrst of vtheris, columnyus, the wycht
That was ane spaman, and Diuinour sle
ȝa this was it, ȝa this was it quod he
Quhilk oft I wesyit, and desyrit by and by
Thys gude takin I ressaue, and ratifye
And knawis the goddis, fauour in our supple
Rutulianis hynt ȝour wappinnis, and follow me
Quham now ȝone wauingeour, ȝone ilk strangere
Affrayis so, wyth hys vnwourthy were
Lyke tyl vnweyldy foullis, on the coist
And our marchis with fors, and mekle boist
Inuadis rubbis, and spulȝeis as ȝe se
He sal for fere, gif sone the bak and fle
Mak sale anone, and hald for euir away
Throw the depe se attoure, the fludis gray
Charfore ȝe sal, al samyn with ane assent
Assembill now ȝour routis here present
And into feild defend, as men of mane
ȝour king Turnus, he be not reft and slane
Thus said he wyth that wourd als so fast
Towart hys fayis, forganis hym dyd cast
Ane werely dart anone, with al his •ir
The souir schaft flew, quhissilland wyth ane quhir
Thare as it slidis, scherand throw the are
Oneschewabil, baith certane lang and square
Samyn wyth thys, vprysis for the nanys
Ane huge noyis, and clamour, al attanys
Wyth sic effray, and hidduous dyn and here
The wardis all, and oistis wax on stere
That for the rerde, and deray hait in Ire
The hartis kyndil•is, of euery bald syre
Furth flew the takill, richt ouer forgane his face
Thiddir as for the ilk tyme stude percase
Myne brethir germane, fresche and ȝoung of age
Nane in thare oist mare semely personage
Quham the trew faythful wyfe, thirrene Ilkane
Bere tyll hir spous, Gelip, archadene
Of quham this dart hit ane, thare he did stand
Ane gudly springald, ane fare ȝoung galland
Richt scharplie maid, in armoure schynand brycht
And at the myddil markit hym ful rycht
Quhare as the wouyn girdil orti sche
Aboue his nauyl, was beltit as we se
And smate hym euin, into the samyn place
Nere quhare the bukkil, his sydis did embrace
Throw gird his body, wyth ane greuous wound
And speldit him stark dede apoune the ground
Bot than hys bald brether, in ane rout
Wod wroith, for wo sum hynt swerdis out
Sum claucht in hand, the darte with the stele hebe
And in thare blynde furye, full of fede
Ruschit on thare fais, wythane ferfull braid
Aganis quham to resist, and muaid
The routis of the army laurentanis
Ran to recounter thaym, and the attanis
Agane assemblit, as ane spate of flude
The troyanis and the tuskanis wroith as wede
Wyth thaym of archade, in arrayit feildis
Wyth burnist armour and thare payntit scheildis
Apoun sic wyse that al with ane assent
Caucht hale desire, to fecht apoun the bent
And to dereyn in feyld wyth bitand brand
The hale mater, sum schot doun wyth thare hand
The altaris markit for the sacryfyce
Beliue ouer al the lift vpsemyt rise
The fell tempest, of dartis schott and flanys
So thik as ony schoure, of scharp hailstanis
As did incres this flycht of stelit hedis
Full greuous grew, the bargane in al stedis
Sum ran to the wyne, flaccouns for grete Ire
And sum hynt vp the furnes ful of fyre
The kyng hym self, Latynus for the affray
Fled to the ciete, and tursit wyth hym away
Hys goddis, and his mawmentes dreuin abak
Wyth ane schamefull rebute, and mekil lak
Left the concord vndone, not brocht till end
Sum bridillis stedis, and cartis vp dyd bend
And sum in haist, with ane loupe or ane swak
Thame self vpcastis, one the horsis bak
And war all reddy, in the stoure at hand
With drawin swerd, and nakit birnist brand
Mesapus full desirus, in the preis
For till confound the trety, and the peis
Ane kyng thirrane, anlestys in that stede
Wyth kingis ensenȝeis, and with crowne on hede
Affrayis sore at hym, driuand his stede
The tothir drew away, for fere and drede
And bakwart fallis, on hys schulderis and cronn
Vnhappely apoun ane altare doun
Quhilk stude percace, behind him on the land
Mesapus than ful feirs, wyth spere in hand
Apoun him draif, thocht he besocht hym fare
And with hys schaft that was also rude and square
As it had bene ane Cabir, or an spar
Doun from his stout coursoure, na thyng skar
Smat hym ane greuous wound, and dedelik bit
And syne thir wordis said, ha art thou hit
He that thou has, this is be myne auyse
To our grete goddis, mare ganand sacrifice
Italianis hurlis on him in ane flote
Spulȝeit hys corps, his membris ȝit alhote
Charyneus tho that was, ane stout troyane
To mete ane Ebusus, come hym agane
That wald haue smyte hym, with ane bustuous dynt
And on altare ane birnand schide has hynt
And gan it rycht amyd, his visage stare
That blesit vp, his lange berde of hare
Quhilk scaldit thus, ane strang fleoure did cast
And forthir this Choryneus also fast
Ruschit on his fa, thus fyre fangit and vnsaucht
And with his left hand, by the hare him claucht
Syne with his kne, him possit with sit ane plat
That on the erde, he speldit hym al flat
And wyth hys stife stok swerde, in sic ane state
Throw bayth hys sydis, at the first dynt hym smate
And Podalirius, with drawin swerde list not ceis
Alsus the herd to persew, throw the preis
Quhilk ruschis abak, for fere of his lyffe to saif
In the vandgarde, throw mony and poyntit glaue
Bot quhen he saw his fa, sa nere inuade
That he na wyse mycht, eschew nor cuade
Vphesit he his brade ax rude and square
And akwartlye straik, at his aduersare
Quhilk from amyd hys forehede, nere his croun
Vnto hys chyn, the edge did caruyn doun
That fer on brede hys armour, quhare he stude
Was al besprent, and blandit ful of blude
Tho podalyrius, the herd reft did expres
Or cauld or Irny slepe, of deithis stres
And vp the breith he ȝald in to thare ficht
With ene closit, in euirlestand nycht

Than the reuthfull and pacient Eneas
Behalding all wrang how, the gam did pas
His rycht arme vnarmyt, to ftynt thare feid
Furth strekis, and vncouerit has his hede
And cryis clepis, on his pepil tho
My freyndis dere, quhiddir now hurle ȝe so
Ilkane aganis vihir, how may this be
Quhat has mouit, thys hasty discord quod he
O stanche ȝour wraith, for schame or al is lorne
The peace and concord, now is twychit and sworne
The artikillis, and eik the lawis ding
Appoyntit vp, and promyst euery thyng
Of det and richt, I aucht appoun this land
Allane turnus recounter, hand to hand
Snffir me performe, my derene by and by
And do away all drede and velany
I sal• wyth my hand, sone mak ferme and stabt••
Our appoyntment, for euir vnuariabyl
For thys ilk sacryfyce, violete in this stede
Sall rendir anone, Turnus to me dede
Amyd sic sawis, as he thyr wordis said
For to assuage thare mynd, but mare abade
Ane quhirlland arrow, lo with ane fedderit flicht
At swift randoun, did in hys the bane licht
Vncertane fra quhat hand it was sent
Quhat kynd of schot, nor of quhat instrument
The hie glore, of sa notabil ane dede
Is hyd, that nane knew quhat it did but drede
Nor wist quha wrocht, had to the rutulianis
Sa grete wourschip, and louing for the nanis
Quhidder it betid on cace, and auenture
Or of sum god, be dispositioun sure
Nor neuir persoun, eftir he nor he
dyd hym auant, he woundit had Ence
Quhen Turnus, all the chiftanis trublit saw
And Eneas sare woundit, hym wythdraw
Than for this hasty hope, als hate as fyre
To mell in fecht, he caucht ardeat desyre
He askis hors and harnes baith attainis
And haltanely, in his cart for the nanis
He sckippis vp, and mustouri• wantonlye
Furth sprentand, throw the feildis by and by
And at his wyl, quhare so hym list hym be
Wyth hys awne hand; the renȝeis reulis he
And driuand furth, thus into hys Ire
Laid feil corps dede, and mony bald syre
Doun strowand eik, vnder fute in the plane
Diuers vtheris, ȝit throwand and half •ane•
Quthir wicht his cart, the rowtis he brayf away
Or as thay tuke, the slicht, for grete e••ray
Cesting speris, and dartis scharp hynt he
And let thaym thik amang hys fayis fle
Sic wyfe, as bludy armypotent god Mars
Besyde his frosty flude, he brum in trace
Ful haistely bowand, to batel feild
Makis grete brute, and clattering with hys scheild
Quhen he list mouing, were maist cheuelrus
Furth steris hys stedis, feirs and furious
Quhilk fleis furth, sa wyth mony ane stend
Out ouer the planys, at large quhare thay wend
That they forryn, and gois, before alway
zepherus and Nothus, swftest wyndis tway
And with the dyn, of thare fete and his carte
All trace gronys vnto the forther parte
About hym walkis, as his godly feris
Drede wyth pale face, deban and mortall weris
The wrayth and Ire, and eik frandeful dissait
Ligging vnder couert, at ane buschement or wa•e
Turnus sic like als chery proude and licht
Amyd the batall, cachis to the fycht
Hys stedis reikand of sweit, quhare thay rade
And sa baldlie, hys fayis dyd Inuaid
Wyth syc slauchter, that pitie was to se
And sic deray, has maid in the melle
That hys swyft stedis, •uffis quhare thay went
Spa•git vp the bludy sparkis, ouer the bent
Quhilk blude and brane, in haboundance furth sched
Mydlit wyth sand vnder hors fete was trede
For he or now, has doun bet schelenus
And kelit eik, Thamyrus, and Polus
The formest twa, he flew, machit at hand
And thys polus, as he fer oft dyd stand
On fer eik slew he, of Imbrasius
The sonnys twa, glaucus and Iasus
Quham this Imbrasius, fosterit had baith twa
Into the fare cuntre of licia
And thaym instrukkit, had ful equaly
In fate of armes, and to hant cheuelry
Owthir till assale, before, or ȝit behynd
Or wyth swift hors, for till forryn the wynd
ȝound in ane vthir part, amyd the feild
Wmedes the feris walkis, vnder scheild
Quhilk was the son and are, as that thay tel
Of agit Dolon, vailȝeant in battel
The name he bare, of his fore grantschir wicht
Bot the strang handis, and stout curage in ficht
Of his awin fader, this dolon he bare
Quhilk at troy vmquhile, as the sege lay thare
And was of sa stout curage, and her wyl
That he durst ask the chariot, of Achill
To hys reward quhare that he sa baldly
The grekis tentis tuke, on hand to espy
Bot the son of Tedeus, diomede
Ane vthir fassoun hes him quyt his mede
For sa stout vndertaking, and hym sleuth
And ȝit for all his renowne prouit yneuch
Ne durst he anis pretend, for all his dedis
That he was wourthy to weild Achillis stedis
Bot to our purpos, this forsaid Gumedes
As turnus did behald, ȝond in the preis
On the plane feld, as thare he dyd ryde
First wele at him, ane fer way at him did he glyde
Ane fleand dart, and furth wyth that rycht thare
Gan stynt his horsis, and his quhirland chare
And frelie, did lepand from his cart
And sone apon his aduarsare astart
Quhilk thowas fal, to ground, and halfe dele dede
Syne wyth hys fute doun thrist, in the ilk stede
His fare nek bane, and out of his rycht hand
Rycht austernly, has he thrawin the brand
Quhilk schynand bricht, into his throt he wet
And thareto ekit, thir wourdis wounder het
O thou proude troiane liggand thare at ground
Now may thou mesure, the feild that thow has found
Lo here the boundis, lo here hsperia
Quhilk thou to seik, in werefare was sa thra
This is the bounteth, thay sal bere away
That dar wyth wappinnis, or armour me assay
To hym in fere also, has he layd
Wyth ane scharp casting hede, but mare abade
Ane butis and eftir him ane Choreus
Syne Sybar dares and therssibotus
And Thymetes, ane man of grete fors
Castyng from his staffage skeith and hede strang hors
And as the blastis, wyth thare bustuos soune
Fra mont Edane, in trace cummys thuddand doun
On the depe sey, Egeane fast at hand
Chaissand the flude and wallis to athir hand
And quhare the wyndis, assalis soith to say
The cluddis fleis fast, ouer the heuin away
The samyn wyse, quhat way that Turnus went
The routis red hym plane, roume on the bent
And al the oistis fast, abak did fle
And wyth sic fors, and farde furth driuis he
His bissy mouand tymbrell euery art
Catchis the wynd, and are forgane bys carte
Phegeus ane troyane, scand turnus al mad
Sa instantlie assail with strakis sad
Na langare mycht hym thole, bot wyth bald hart
Hym self kest in the way to meit his carte
And he the renȝes, in his richt hand hynt
Syne writhit has, aboute or euer he stynt
The famy mouthis, of the haisty stedis
And as this douchty man, sa gude at nedis
Thus hang and harlit, was in euery arte
By the lymouris, and hames of the cart
That he hys mody, micht not kepe nor heild
To couer with his armour, and his scheild
The spere him followis, with scharp hede and brade
And rent his hawbrek, of doubyl plyis made
Hurt his body some dele, not fully sound
Peirsand the syde, and maid ane litle wound
He not the les agane his fa, furth sprent
Wyth his brade scheild / or targate euir vpstent
And in his hand heild, drawin the birnist blade
Cryand for help, his aduersare tyll inuade
Quham tho allace, grete piete was to se
The quhirland quhele, and spedy swift extre
Smate donn to ground and on the erde lay plat
And as he fell, Turnus fallowis with that
And euin betuix the helme, can him arrace
At vmaist roll or hem, of his curace
Smate of his hede, clenly with his brand
And left the corps, like ane stok in the sand

And as Turnus thus, in the batell stede
Wyth the ouerhand, sa feil corps layd dede
The mene quhile m•escheus, and traist Achates
Has led the bald Eneas, of the preis
Ascaneus ȝing, with thame in cumpany
And to the tentis, brocht hym all brudy
Wyth steppis slaw, furth steppand all in fere
Leuand Ilk pais, one ane lang poyntit spere
Wod wroith he wordis, for disdene and dispite
That he ne mycht his feris succour als tyte
He writhis, and enforcis to withdraw
The schaft in brokin, and the hede wyth aw
He askis helpe at al, thare standand by
Quhat was the nerrest way, and maist reddy
And bad thay suld with ane scharp knyfe that tyde
Schere doun the wound, and mak it large and wyde
Rype to the bodum, wele and take good tent
To serche the hirnis, quhare that the hede was went
That thay maist baist thame selfe, but mare delay
To the batall, for to stynt this affray
Now was thare than, new present in the preis
Iapis that was, son of Iasides
Aboue all vtheris, to the god phebus he
Was best belouit, and haldin in daynte
Wyth quhais fauoure, vmquhyle strangly caucht
This god appollo, has him glaidly tauht
His craftis and his office, by and by
Of diuinatioun, or of augury
The music tonis to play, on harp wele sle
And for to schute, and lat swyft arrowis fle
Bot this Iapis, for to prolong perfay
His faderis fatis, quhilk as bedrel lay
Before his ȝet, of his liffe in dispare
Had leuer haue knawin, the science and the lare
The micht and fors, of strenthy herbis fyne
And all the cunning vse, of medicine
And with sic secrete craftis, priuely
To leid his lyffe, and tyme mare esely
Eneas standis, bitterly chidand
Lenand apoun ane, bustuous spere in hand
Amyd grete confluence, of thir childir ȝyng
And eik his son Ascaneus, sare weping
Bot he na thyng hym mouit, at thys teris
Than this Iapis sage, and auld of ȝeris
Wyth habit schapin, of the s•rurgiane make
Vprollit weill, and wymplit fer abak
Richt beselie, with hys nate handis tway
Begouth for tyl exem, and till assay
The wound, with mony crafty medicine
And mychty herbes caucht, be god appollyne
Bot al fornocht, his trauel and his pane
Oft with his richt hand, serchis he in vane
To ripe the out gate, of the wound •o wide
And for to seik the schaft, on euery syde
Wyth hys wynrys, and grippand turkes sle
To thrist the hede, and draw furth pressis he
Bot for na chance, that euer betid may
Wald fortoun dreis, his hand the souir way
Na thyng aualit, his crafty medicine
Nor ocht hym helpis, his maister Appollyne
And now the grysly drede, ay mare and mare
Ouer al the feildis walkis here and thare
Nerre drawis the perrell, and affray
So that al dirknit wax, the clere day
Of dusty pouder, in the heuyn dyd stand
The hors men, al approchis fast at hand
That dartis thik, amyd the tentis fell
Woful clamour, wyth mony cry and ȝell
Went to the skyes, of ȝoung men faucht in feild
And thaym that swelt, sare woundit vnder scheild
Venus, his moder, tho thus pane to meis
Caucht reuth and piete, of hyr sonnys diseis
And from the wod, of mont Yda in Crete
Vp has sche pullit, Dictam, the herb swete
Of leuis rank ripit, and wounder fare
Wyth sproutis spraingis, and vanys ouer al quhare
As that we se on sic verdoure springand
And on the top, ane purpoure floure curlland
Sic gresis gude bene, na wise vnknaw
Tho the wylde beistis, quhen that ony thraw
Thay with the fleand arrow, bene ouer tak
The hede stikand out, in syde or bak
Thiddir brocht Venus, this herb and sche was schrout
Baith face and body, in ane wattry cloud
And with the herb also mydlit, has sche
The halesum thrifty wattir, wounder sle
That from hir bricht, lippis sche ȝet in hy
And temperis and enbalmes, priuelie
The plester thare with strinkland, al ouer ane
The helsum Ius of herbe ambrosiane
And the wele smelland herb hecht penates
This antiant surrigiane Iapis
With sic wattir or Ius that he nocht knew
The wound masis and softnyt has of new
And suddanlie the pane vanist, als clene
Of his body as thocht it had bene
Bot ane dirling or ane litill stonud
All blude stan chit and stude in the depe wound
Tharewith baith hed and schast come furth droppand
But ony pull folowyng, of mannis hand
That strenth and force, of new to mak debate
Restorit war, vnto thare auld estate
Harnes harnes bryng him hiddir in hy
Quhy stand ȝe sa Iapis, gaif ane cry
And wyth thys wourde agains thare fais he
Has first thare sprete, inflammit to Melle
O Eneas quod he, I make ȝou sure
Throw mannis micht, was neuir wrocht this cure
Nor be na maister, craft of medicine
Thow art not helit by this hand of myne
Bot be sum greter god, full wele I se
The quhilk to greter, werkis preseruis the
Eneas the desyrus, of bargane
Hys lymmes in legharnes, gold begane
Claspit full clois, and dyd him self array
Bad spede in haist, for he hatit delay
He schuke and brangillit, fast his spere that tyde
And eftir his actyue scheild, was by his his syde
Couchit full mete, and on his bak full thyk
Sesit his curace, or his syne hawbrik
Ascaneus ȝoung, tenderly the ilk place
Wyth all his harnes, belappit dyd enbrace
And thorow his helmes, ventall ane lytell we
Him kissit his syne, on this wyse sayd he
O thou my chyld, do lernyng I the pray
Vertew and veray, labour to assay
At me, quhilk am thy fader, as thou wate
Desyre to be chancy, and fortunate
At vthir princis, quhilkis mare happy bene
Now sall my richt hand, the querrell sustene
And the defend in batal by and by
To make the partis man of grete senȝeory
Do ȝou siclike, I pray the mine awin page
Als fast as thou cummis, to perfyte age
Remember hereon, and reuolue in thy mynd
Thy lynnage, thy forbearis and thy kynd
Exempil of prowes, in the steris freyndis before
Saith fader Eneas, and thy vncle Hectore

Quhen this was said, furth at the portis he
Schakand in hand, ane grete spere Ischit he
Wyth him also to the field ruschis out
Antheus Mnestheus, and ane full thyk rout
Alhale the barnage flokkis, furth attanis
Left vode the toun, and strenth wyth waisty wanis
Than was the plane ouerset, quha come behynd
Wyth dusty stew of powder, maid folk blynd
And for stamping, and fele dynnyng of fete
The erde mouit, and trymlit euery strete
Turnus apoun the party, ouer richt forgane
Persauand thame, thus sterand throw the plane
Than saw also, the pepil Ausonianis
And the cauld drede, for fere ran throw thare banis
Fyrst of the Latynis, all this ilk made
Iuturna thame knew, and was not glaid
Sche herd the soundis, and the fell derray
And quakand fast, for fere has fled away
Bot thys Eneas, full bald vuder scheild
Wyth all his oist, draw throw the plane feild
And with him swyftly, bryngis ouer the bent
Ane rouch cole blak, of the stew quhare he went
Lyke as the bub, or plaig of fell tempest
Quhen that the cluddis, brekis est or west
Driuis by fors, throw the sey to the land
Doand the cairful husbandis, vnderstand
The grete myschief to cum and felloun wraik
Quhilk wyth sare hartis, quakand allaik allaik
Sais lo ȝone bub, sall streik doun grouand treis
Doun beit our cornes, and by the rute vpheis
And fer on brede, ouerturne all dois vp stand
Herk here the swoich cummys, brayand to the land
On siclike wyse, this Ilk Chiftane troyane
The corssy pasand, Osiris he has slane
Mnestheus kelit Arehet, and achates
Behed it has the, wicht Epulones
Gyas doun bet Vfens, the grete capitane
Doun fell also, the grete Anguriane
Tolumnēus him selfe, at the ilk day
Threw the first dart, his fais till assay
Vpry is than ane clamour and ane skry
Quhilk semyt, went vnto the sternit sky
Thare cours about, than the rutilianis
Has tane the •lycht, and gayf the bak attanis
Skatterit throw out the feildis, here and thare
Quhil stout of pouder, vp strekis in the are
Bot the chiftane, this vailȝeand Enee
Dedenȝeit nane doun bett as, thay did fle
Na thame inuade that met him, face for face
All thocht thay faucht with wappinnis swerd or mace
But throw the thikest sop of dust in hy
Onlie Turnus went, to seik and espye
And him allane, according the tretie
He askis and requyres vnto melle
Wyth drede herof, the mynd was smytin so
Of Iuturna, the verray virgo
Quhilk terme to expoun, be myne auyse
Is ane woman exersand mans offyce
Amyd the lyamis, and the thetes thare
Doun swakkis scho, mitestius the cartare
That Turnus chare, had for to reule on hand
And left him lyggand fer, ȝound on the land
Fra the cart, lymmouris, warpit ane grete way
And scho in stede, his offyce dyd assay
And wyth hir handis about wrythis sche
The flexibyl renȝes frawart the melle
Berand the lykenes in al maner thyng
Of mytes•us voce, persoun and armyng
Als fele wrinkis, and turnys can sche make
As dois the swallow, with hir plumes blak
Fleand and seirsand, swiftlie thare and here
Ouer the grete lugeingis, of sum michty here
Apoun hir wingis, skimmmand euery side
Thir hie hallis, bene full large and wyde
Gadderand the smal morsellis, est and west
To bere hir birdis chepand, in thare nest
Now into gousty portis, dois fle
Now by the donky stankis, soundis sche
In siclike wyse, this Iuturna beliue
Throw out the oistis, can the horsis driue
Circuland about with swift farde of the carte
The feildis ouer al quhare, in euery art
And schew hir brethir turnus, in his chare
Now brauland in this place, now voustand thare
Be na way wald sche suffir, that he
Assembil hand for hand, suld wyth Enee
Bot fled him fer, and frawart him held ay
Withand hir cartis cours, ane vthir way
In na les haist, Eneas on the bent
His quhelis turnis, and writhis mony ane went
The men he seirsis, throw the effcayit routis
And on him callis, with loude cry and schoutis
Als feil syis, as he his ene kest
Apoun his fa, all tymes he hym addrest
To chace him with, swift cours throw the melle
On hors that semyt ryn as foule dois fle
Bot euer als oft, Iuturna ane vthir art
Awaywart turnis, and writhis hir brotheris cart
And thus Eneas, temanys al on flocht
In sundry motioun of Ire, bot al for nocht
Allace ne knawis he not, now quhat to do
Dyuers thochtis, and sere consatis lo
Hys mynd in mony contrare purpois sent
And as he thus was trublit, in entent
Mesapus that on cais was nere hand by
And in his left neif, haldys all reddy
Twa soupil castyug speris, hedit wyth stele
Of quham that ane, ful souirlie and wele
Towart Enee, addressit dyd he glyde
Eneas houit stil, the schot to abyde
Hym schroudand, vnder hys armour and his scheild
Bowand his hoch, and stude a lytle on heild
And netheles this spere, that scharplie schare
Of his basnyt, the tymbrell quyte doun bare
And smate away, the crei••ys toppis hie
Than mare in greif and Ire, vpgrowys he
Seand him caucht, wyth dissate and stycht
Quhen that he has persauit in hys sycht
Turnus hors, furth dreuinane vthir art
Awaywart turnis sa feyl syis his cart
Tho mony tymes loud did he testifye
Grete Iupiter, how that sa wrangusty
He was ••urit, and constrenit to ficht
To witnes drew he, als with grete vnrycht
The altaris of confederance vyolate
And now at last, ful furius and hate
The mydwart of his inemyis did inuaid
Wyth prosper chance of batal so vnglaid
And terribil to his fais waxis he
That hale but ony difference of degre
All to wraik, for na man lyst he spare
Ane cruel slauchter, he has rasit thare
All kynd of wraith and breithfull yre now hie
Lete slip at large, but brydil wyth renȝe fre

Quhat god sal now me teaching to •ndy•e
Sa mony woundis, and this careful syte
Or quha me lerne in matir, to declare
Sa feil and diuers slauchteris as war thare
And grete deseis of Dukis, in that stede
Ouer all the field, strowin liggis dede
Quham euery ane, samyn his cours abut
Now doun bet Turnus, now Eneas stout
O Iupiter was it, plesand to the
Wyth sa grete motioun, oh crudelite
Athir pepill suld rusche, on vthir in preis
Quhilkis eftir suld be, ane in eterne peis
Eneas fyrst that taryit, not to lang
Smate ane Sutrone, ane Rutuliane strang
Ane greuous wound, he hit him in the syde
Throwout his rybbis, can the styff swerd glyde
Peirsit hys coist, and breistis condict in hy
Thare as the fatell deith, Is maist haisty
This bargane first fermyt, troyanis to stand
That langeir fled Turnus, fra hand to hand
Tho Turnus has recounterit, in the preis
Amytus and his brother, Diores
Quham fra thare hors, on the ground doun bet
On fute in feild, strangly he vmbeset
And the formest, with ane lang styff spere
Smate dede and with ane, swerd the tothir in fere
Sine baith thare hedis, hakkit of in hy
And at hys cart hyngis, thame by and by
The blude tharfra, droppand tursys away
Theself stede Eneas, at ane alsay
Or at ane vnset, has kelit Ianaus
Talon also, and the stout Cethegus
Syne eftir thame, he kelit in the preis
The sa and ay sorowfull, Onytes
Renowned of Thebis blude, and the ofspryng
Descenbyng doun from Etheon the kyng
And of his moder born, Peridia
This vther chif Captane Turnus kelit twa
That brethir war, and out of Lithia send
Appollois cuntre, troianis to defend
And eftir thaym, ane meneit has he slane
Ane ȝoung man, that was borne in archadane
That al his dayis, euir hatit the melle
Bot al for not, forhe moist nedis thus de
About the laik of larne and fludis gray
His craft was, for to fisching euery day
Ane pure cote hous he held and bure him law
Rewardis of riche folkis, war to hym vnknaw
His fader erit, and sew ane pece of feild
That he in hire gang, held to be hys beild
And like as that the fyre, war now vp bet
And in sum dry widderit wod, vpset
Baith here and thare, at diuers partis sere
Amyd the soundand, buskis of Laurere
Or quhare the fomy riueris rede on spate
Hurlis doun from the mouth, of ane large gate
With hidduous brute, and felloun farde attanis
Thare as thay rin, ouer flowand al the planis
Ilkane distroyis, waistis and driuis away
Na stawar bayth, this Turnus, and Enee
Hurllis and ruschis, feirs throw the melle
Now now, the braithful Ire and felloun thocht
Within thare myndis, boldynnys al on flocht
And thay breistis, can na wys vincust be
Now breistis ful of grief, and cruelte
Now lasch thay at, with bludy swerdis bricht
For to mak woundis wyde, in al thare mycht
The tane of thaym, that is knaw Enee
Kyng Murranus, of ancestry mayst hie
Soundand the name, of his forefaderis auld
Ouer al the clan, of Latyne Kyngis bald
Obseruit man, •e man vnto his day
Furth of his carte, has smittin qwite away
And bet him doun, vnto the erd wynd flaucht
Wyth ane grete rouk, and quhirland stane ouer raucht
That this murranus, the renis and the chetis
Quherewith his stedis, ȝok kit war in thretis
Vnder the quhelis, has do weltit doun
Quhare as he liggis, in his morrall soun
Of his awne gledis, aboue him rap for rap
The sterand hufis, stampand with mony clap
Ouer treddis and doun thringis, thare maister law
And can thare lordis, hi• estate misknaw
Ane Turnus has, recounterit ane hilo
That ruschand hurllit, thro the melle tho
Full feirs of mynd, and austerne of curage
Bot this Turnus, for al his vassallage
At his gilt halffettis, ane grundin dart did thraw
That fixt throw his helme, the schaft flaw
Peirsand his brane, quhil out bruschit the blude
Nor thy richt hand, Creteus sa gude
Thou forciest greik, cummyng fra Archade land
Micht the deliuer, from this ilk Turnus hand
Nor all his goddis, Cupentus in the plane
Mycht from Enee, come him agane
Bot as his breist with the steill, poynt has met
That thirlit has throw all, and doun him bet
That nowthir scheild, nor obstant plait of steil
This catiuis breist, has helpit neuir ane dele
O Eoline the feildis, Lawrentane
Has the behald the ron, doun bet and slane
And with thy brade bak, in the riche wede
The ground thou has bespred, richt fer on brede
Thare lyis thou dede, quhom gregioun oistis in ficht
Nowthir vincus, nor to the erde smite micht
Nor feirs Achillis, to the erde couth bryng
That was ouerquhelmare, of kyng Priamus ring
Here war thy methis and thy terme of dede
The houssis and […], or the nobyl stede
Of the kynrent stant, vndermont Ida
In the grete ciete, of Li•nesia
Bot in the feildis, of Laurentine sulȝe
Thy sepulture is made, for ay to be
Apoun this wyse the oistis, and wardis hale
On athir part, returnyt in batale
Aganis vtheris to fycht, samyn attanis
All the latinis, and alhale the troyanis
Duke Mnestheus, and the sterne Serestus
And the tothir half prince Mesapus
That of grete horssis, the danter clepit was
And with him eik, the stalwar Asilas
The thirrene routis, semblit all attanis
And kyng Euandrus army Archadianis
Euery man for hymself, as he best mycht
At the vterance of all his fors, gan fycht
No rest nor tary was, thay so contend
Sum to confounding all, sum to defend

At this tyme the bargane, enduring thus
Eneas moder, the farest dame venus
In to his mynd, sche has put this Intent
To hald vnto the wallys, Incontinent
And stere his oist, the ciete til assay
Wyth haisly vnset, and suddane effray
At grete myscheif the Latynis tyl effere
Quhilk of his cumnyng, tho vnwarnit were
And as that he, mouing tyl espye
Turnus, throw sindry routis, by and by
On euery syde, he has cassin his Ee
And at the last, behald is the cite
Saikles of batal, fre of al sic stryffe
But pane or trauel, at quiet man and wyffe
Than of ane greter bargane, in his entent
All suddanly the figure dyd emprent
He callis Mnestheus, and eik feregestus
Chif anis of hys oist, and strang Serestus
And on ane litill mote, ascendit in hye
Quhare sone forgadderit, all the troyane army
And thyck about hym flokkand, can but baid
Bot nowthir scheild, nor wapinnis doun thay laid
And he amyd one the knollis hicht
Vnto thaym spake thus, herand euery wicht
Here I command, no tary nor delay
Be maid of my preceptis, quhat I sal lay
Nor se that no man, beswere nor slaw to rin
Tyl our haisty vnset, we wyl begyn
Sen Iupyter, assistis to our syde
Now herkis quhat I purpois, do this tyde
Thys day I sall destroy, and sone bet doun
Of laurent hale, the cyete and the toun
Quhilk is the caus of al our weryng
And quyte confounde, the king Latinis •ing
Les than wil thay, relsaue the bridil at hand
Be at obeysance, and grant my comand
And ȝone hie turettis; and thay topp is hie
Of reikand chynais ȝounder as we se
I sal mak plane and equale with the ground
Quhat suld I tary, or delay ane stound
Abiding here, in sic place, quod he
Quhyl turnus list, fecht wyth vs in melle
Or quhil that he ane vther time agane
Ouer cum and vincust, in to batal plane
May haue refuge, to thys toun to beleif
Syne efter in feild, vs recounter and gre••
O cytezanis the hede is this ciete
Of our welefare, and cheif of iniquite
Twrs thidder in hy the hate byrnand fyre brandis
Aud wyth the blesand flammis, in ȝour handis
Renewis and require, agane said he
The trety sworne, and promist ȝou and me
Quhen this was said, thay put thame in array
Togiddir al the ciete til assay
Thay pingil thraly, quhay mycht formest be
Wyth doure myndis, vnto the wallis hye
Knyt in ane sope, with grete pussance thay thryst
The ledderis to the wallis, or thay wyst
And haistely, fire blesys dyd appere
Sum vtheris of the troyanis, ruschit in fere
Vnto the portis, and the first thaym met
Has kelit at the entre, and doun bet
Sum vtheris schutis, Dartis, takillis and flanys
At thayin quhilk, on the berinkin hede remanys
That wyth the flicht of schaftis, here and thare
Thay dirknit all, the skyis and the are
Enee hym self, wyth the formest can stand
Vnder the wallis puttand, to his hand
To the assalt and with loude voce on hye
The kyng Latinis, fast a•cusis he
Drawand the goddis, to wytnes how agane
He is constrenyt on hors, to moue bargane
And how that he Italianis, thus twyis
At sundry tymes, schew them hys Inemyis
And how falsly that day, thay brokin had
The secund confederatioun, sworne and mad
Amang the cietezanis, into grete affray
Vprais distord, in monysundry way
Sum bad vnclois, the ciete, and als fast
Warp vp the portis, and wide the wallis cast
To the troyanis, and thare grete prince Enee
Ressaue as for thare kyng, in the ciete
Vtheris stert to thare wappinnis, and thare gere
For to defend thare toun, of fere of were
As we may gyf ane similitude, wele like
Quhen that the herd, has fund the byis bike
Closit vnder ane derne, cauerne of stanis
And fyllit has full sone, that littile wanys
Wyth smoik of soure, and better rekis stew
The beis wythin affrayit, all of new
Ouerthowrt thare hiuis, and waxy ten tis rynnis
With mekil dyn and beming in that Innis
Scharpand thare stangis, for Ire as thay wald ficht
Swa here the laithly odoure, rais on hicht
From the fyre blesis, dirk as ony roik
Thar to the ruvis toppis, went the smoik
The stanis warpit, in fast did rebound
Within the wallis, the grete brute and sound
And vp the reik all wod, went in the are
Quhar as na tenementis stude, nor hossis ware
Betide also to, thir wery Latinis
Quhilk so Irkit, at his myscheif and pynys
Ane chance of mysfortoun, that all the toun
Wyth womenting straik, to the boddum doun
For as the quene Amata, saw sic wise
The ciete vnbeset, with Inemyis
The wallis kyndillit, be with flammis hete
The fyre blesis aboue, the ruffis glete
Na Turnus army cumand, thame aganis
Na ȝit the oistis, of Rutulianis
Sche fell vnhappy, in the batell stede
Wenyt ȝoung Turnus fechtand had bene dede
And tho for verray sorow, suddanlye
Hir mynd trublit, cane to rame and cry
Sche was the caus, and wite, of al thys greif
Bayth crop and rute, and hede of sic mycheif
And in hir dolceus fury, thus myndeles
Al enragit for dule, tho dyd expres
Ful mony ane thing, and reddy to de wythal
Rent with his handis hir purpoure wede rial
And at ane hie balk, teyt vp sche has
With ane loupe knot, ane stark cord or ane lace
Quharewith hir self, sche spilt with schameful dede
And fra the latine matrouns, wil of rede
Persauit has this vile mycheuous wraik
Thay rent thare hare, with harro and allake
Hir dochter first, beside the dede corps standis
Riuand hir giltin tressis, with hir handis
Hir rosy chekis, to tore and startis sche
Than all the laif, that piete was to se
Of ladyis that about the dede corps stude
Rentis and ruggis thaym self, as thay war wod
That of thare goling, greting and deray
The large hale, resouudis ane fer way
Quhill from the kyngis palice, inuiroun
Divulgate went and sprede, ouer al the toun
The fey vnhappy fame, of sic ane dede
Than euery wicht, tynt hart for wo and drede
Wyth habit rent, king latine on the gate
Waxis wo begone, astonist of the fate
Of his dere spous, of the ciete syne
That semyt brocht, vnto fynale rewyne
His cannois hare sare mouit in his entent
With vnclene pouder, has he all besprent
And mony tymis hym selft• has accusit
That he sa lang has, lachit and refusit
To ressaue glaidlie, the troiane Enee
Repenting sare, for wele of the ciete
That he had not requirit him, and draw
Or than to be his maich or son in law

In to the mene time, as weriour vnder scheild
Turnus ȝoud to the fer part of the feild
Ane few menȝe, persewand ouer the plane
Quhilk at the stragil fled, in al thare mane
Sum dele or than, walxis dolf this syre
Seing his hors begyn to sope and tyre
That euer the les and les, ioyus was he
Of thare renkis and gate throw the melle
Thare with the wynd, and southing of the are
The fereful clamours, brocht to him rycht thare
Myxt wyth vncertane terrour and effere
The confusioun of sound, smate in hys ere
Come from the ciete, ane felloun murmuring
Rycht vnglade brute, of care and womenting
Ha wa is me he sayd, quhat may this be
How bene the wallys trublyt, of this ciete
Wyth sa grete dule and sorow, as I here
Or how thus ruschis, sa felloun noyis and bere
And clamour fra the toun, at euery part
Thus has he sayd, and gan do stynt his cart
And al enragit, tyt the renȝeis abak
Quham to his syster, the Iuturna spak
As scho that was turnyt, as I sayd are
In semblant of metestus the cartare
That hors renȝeis fyde, renȝeis and cart did sche
Reul and direct, amydwart the melle
Wyth sic wourdis, scho ansueris him fute hate
Turnus lat vs persew troianis thus gate
Quhare victory vs schewis the reddy way
Thare bene enew vtheris, be my fay
For to defend, and wele mantene the toun
ȝone is Eneas makis the brute and soun
That can inuaid, Italianis as ȝe here
Mydlit the batall, in sic feare of were
Tharfore lat vs wyth cruel hand in this stede
Lay als fele corps, of the troyanis dede
For wyth na les nowmer slane vnder scheild
Nor les honour sal thou wend of the feild
Turnus ansueris, O thou my sister dere
I knew ful wele, that it was thou lang gere
That by the craft, and quent wilis sa fle
Our consideratioun, trublit and trety
And enterit in thys batal•quhilk thou wrocht
And now goddes, thy wilis ar for nocht
Bot quha was that send the, from heuin so schene
So huge sturt, and trauell to sustene
Qubiddirgif thou come, to that entent to se
The cruell deith, of thy brother sayd he
Quhat sall I do lat se, quhare sal I now
Or quhat succours, promittis fortoun and how
I sal my self, before myne ene lang gere
Grete Murranus, quham nane mare leif nor dere
Vnto was that leuand, is this day
Swete on the ground, and with loude voce perfay
On me did call, quhare as he lay vnsound
At ei•th discumfist, wyth ane grislie wound
And lo doun bet, and slane in his defence
Is not also, the stout Capitane vsence
That he suld not, our lak and schame behald
Hys corps and armour, dois troianis bayith wythhald
Sal I als suffir thaym, doun the ciete ding
Of our myscheif, thare restis bot that ane thyng
Now sall I not, wyth thys rycht hand in hy
Confound schir drantes, lynnage vnworthy
Sal euer this ground, behald or se sic lak
That I sall fle, or Turnus gyf the bak
Is it al out, sa wrechit thing to de
That or thay steruin, men suld rather fle
ȝe manes, clepit goddis infernall
Beis to me frendlie, now sen that all
The goddis myndis aboue, ar me contrare
He ȝe beneuolent, when that I cum thare
Ane haly saule to ȝou discend sall I
Saklis of al sic cryme and velany
Na wyse vnworthy, namyt for to be
Wyth my eldaris, and forefaderis maist he
Skars has he said, quhene lo throw the plane
Ruschand amyd his fayis come hym agane
Ane sages montit, on ane fomy stede
And he was woundit sore, and gan to blede
In the face with ane arrow, vnder the Eee
Cryand help, Turnus be hys name quhare is he
Turnus quod he in the, and thy twa handis
The extreme help, and lattir welefare standis
Haue reuth and piete of thy awne menȝe
Now as the thunderis blast faris Enee
In bargane so enragit, he doith mannace
The cheif ciete of Itale doun to arrace
And to fynale rewyne to bet doun
The principale, and al the rial toun
And now into the thak and ruffis hie
The flambis of the fire, blesis dois fle
In the thare vultis, in the thare ene but fale
The Latine pepil, dressit has alhale
The kyng hym self, latynus the grete here
Quhisperis and musis, and is in manere fere
Quham he sal cheis, or call vnto hys thraw
To be his douchteris spous, and son in law
Or to quhat freyndschip or alliance fyne
Is best him selfin, at this tyme inclyne
And farthermare, Amata the fare quene
Quhilk at al tymes, thine ane fald freynd has bene
Wyth hir awne hand doth sterue, lyggand law
And for effray, hir selfe has brocht of daw
Onlie Mesapus, and Atynas kene
At the portis, he dois the stoure sustene
About thir twa, on athir hand thik standis
Arrayit routis, wyth drawin swerdis in handis
Ful horribil and austerne, athir barnage
Cled in steil wedis, wyth wappinnis man and page
And thou thus rolling furth the cart bedene
Walkys at auantage, on the wod grene
Turnus astonaid, stude doun in studying
Smyte wyth the ymage, of mony diuers thyng
Depe in his hart, boldynnis the felloun schame
Al myxt with dolour, aagir and defame
Syne feruent luf hym cachit, in furie rage
And has by kynd, hardiment and curage
As first the schaddois of pertrublance
Was dryue away, and his remembrance
The licht of ressoun, has recouerit agane
The byrnand sicht, of baith his ene twane
So aggreuit, towart the wallis he kest
And from his cart, blent to the cietie prest
Bot lo ane sworl of fyre, blesis vp thraw
Lemand towart the lift, the flamb he saw
Amang the plankis, and the loftis schyre
Stremand and kendylland, fast the hate fyre
That caucht was, in ane mekil toure of tre
Quhilk tour of sillis, and geistis grete belt hye
And thare vnder to rollyt quhelis set
Wyth staris hi•, and battilling werely bet
Now now sister quod he, lo al and sum
The fatis has vs vincust and ouer cum
Decist therfore, to mak me langare tary
Lat vs follow that way, and hiddir cary
Quhare god, and this hard fortoun callis me
Now standis the poynt, I am determyt quod he
Eneas hand for hand, for til assale
Now standis the poynt to suffer in batale
The bytter dede, and al paneful distres
No langar sister germane, as I ges
Sal thou mese, sa schamful vnwourthy wycht
Bot I beseik the manlie, as ane knycht
In to this fetuent, furoure, suffir me
To go enragit to batal, or I de
Thus has he sayd, and from the cart in hy
Apoun the land he lap deliuerly
And left his syster, tryst and desolate
Christ throw his fais, and wappin al sute hate
And with sa swift ferde, schot throw the melle
That the myd routis and wardis, schudderis he
And lyke as the grete roche crag, with ane soun
From the top of sum montane, tumlyt doun
Quhen that it is ouer smyte, with windis blast
Or with the drumlyschouris, spate doun cast
Or than be lang proces of mony ȝeris
Lowsing away the erd, and away weris
Is made to fal and tumbil, with al his swecht
Lyke til ane wikkyt hil, of huge wecht
Haldyng hys fard, the discence of the bra
Wyth mony skyp and stend, baith to and fra
Quhyl that the schout fer, in the plane ground
And al that he ouer rekys, doys confound
Woddys heirdis flokkys cattal and men
Ouer welterand wyth hym, in the depe glen
Towart the wallis, Turnus ruschit als fast
Throw out the routis, by hys fard doun cast
Quhare to the ground wet, and bedyit stude
Ane wele for way, wyth effusioun of blude
And large one brede, the skyes and the are
For schaftis schot, and quhissilling here and thare
Ane bekin with his hand, to thaym maid he
And samyn eik, wyth loude voce cryis lat be
Stynt ȝe rutulianis, se ȝe fycht na mare
And ȝe Latynys ȝour dartis castyng spare
How euer the fortoun, standis at this tyde
The chance is myne, the fait I mon abide
It is mare iust, and equale I allane
For ȝou sustene the pane, was vndertane
And purge the cryme, so happinnit now of late
Of thys confederatioun, violate
Lat me stand, to my chance I tak on hand
For to derene, the mater wyth thys brand
Than euery man, amydwart thaym betuene
Can draw abak, and made roume on the grene

This fader than, this grete prince Ene
Herand the name, of turnus cryit on hie
The w•llis left, and fra the toun went away
Rycht haistelye, secludand al delay
Styntis al the werk, that he begunnyng had
And hoppis vp for Ioy, he was so glad
The hussilling in his armour did rebound
And kest ane terribil, or ane fereful sound
Vpraxit him he had amyd the place
Als big as Achon the hie mont in trace
Or heith as mont Erix in Cecilly
Or than the fader, of hillis in Italy
Clepit mont Apeninus quhen that he
Dois swoith or bray, with roky quhynnis hie
and Ioyis to strik his snawy top on hicht
Vp in the are, amang the skyis bricht
That is to say, amang al vthir wichtis
Eneas semyt, to suremonting in hichtis
The remanent, of al the mekill rout
As thir montanis, excedis the knollis about
And than forsoith, rutulianis egirly
And al the troyane oistis, and army
Towart thare dukis, did returne thare ene
The rutulianis I say, and eik bedene
All the latynis, that on the wallis stude
And al thay als to fore as thay war wode
The barmkin law, smait wyth the rummys fast
Now on thare schulderis, can thare armour cast
The king him self, latyne abasit to se
Tua men so big, of huge quantite
Generit and bred, in realmes, fer in sounder
Of sere partis, of the warld, that it was wounder
Twa of sic stature, vnmesurabil of hicht
For tyll assembill, samyn in to ficht
Or for to se thaym, machit on the grene
Derene the bargane, wyth thare wappinnis kene
And than athir thir campiouns vnder scheild
Quhen wodit wele, and rowmyt was the feild
That patent was, the plame ane wele large space
With haisty farde on fer, has tane thare rais
And gan speris cast, or thay come nere
Quhil scheildis loundit, and al thar vthir gere
And martial batall thay begin but baid
And achir sternlie did his fa inuaid
So did the strakis, dyn on thare fiele wede
The erde granys, and dynlis fer on brede
Syne raschis togiddir, with swerdis or euir thay stynt
And routis thik, thay doublit dynt for dint
With force of proues, and fatall auenture
Mydlit samyn the bargane, thay indure
Like as twa bustuous bullis, by and by
On the hie mont thaburne, in champany
Or in the mekill forest, of Stila
Quhen thay assemble, in austerne battall thra
With front to front, and horn for horne attanis
Ruschand togiddir with crones, and ferefull granis
That the maisteris, and hirdmen euery wicht
Abasit geuis thame place, so brim thay ficht
For fere the beistis dum, all standis by
And all in dout squelis the ȝoung ky
Quha sall be maister, of the cattal all
Of quhilk of thame, the bowis follow sall
Thay swa bullis, thus striuand, in that stound
Be mekill fors wirkis, vthir mony wound
And duschand fessynnys, fast thar hornes stout
Quhill that haboundance of blude, stremis out
Than can do wesche, body or al to baith
Thare grym nekkis, and thare spaldis baith
That of thare rousting, al the large plane
And woddis rank routis, and low is agane
Nane vthir wise Enee, the troyane here
And Dawn us sone, turnus, samyn in fere
Hurllis togiddir, with thare scheildis strang
That for grete Raschis, al the heuinnis rang
Thus Iupiter him self, as has atheris chance
Ane wele lang space, to hungin in ballance
Be equale mesure, and pasit has also
The fatis diuers, of thame boith two
Quhom the stout laubour, suld deliuer fre
And quham the pasand wecht, ouerweltit to de
Turnus at this time, wa•is bald andblyth
Wenyng to caucht ane stound, his strenth to kyith
But ony dangere, or aduersite
He raxis him, and heuis vp on hie
His bludy swerd and smait, in al his mane
Ane grete clamour, gaif the pepill troiane
And eik the latynis quaking, gan and schont
Full prest thame to behald, stud athir out
Bot his vntraist fals blaid, is brokin in sunder
And ardent Turnus brocht, has in grete blounder
For it amyddis of his dynt, him falis
And desolate him left, that nocht aualis
To him his strenth, his hardyment and mycht
Lese than he tak for his defence the flicht
ȝa swifter than the wynd, he fled I ges
Quhen that he saw, his richt hand wappin les
And persauit the plomet, was vnknaw
For so the fame is, at the ilk thraw
Quhen he first ruschit, in his cart in hy
And gart do ȝoik his stedis by and by
To go vnto the battal, the samyn daye
That for the suddane vnset, and effray
The cartur Metestus swerd, hint in hand
And al for ȝet his faderis, nobil brand
And thys ilk swerd, was sufficient ane lang space
Quhil that he followit the troyanis in the chace
That gaif the bak, as we haue said or this
Bot als fast as it twichit, or machit is
With diuyne armour made be god vulcane
And theron smytten in all turnus mane
This vntrew, temperit blayd and fals brand
That forgyt was bot with ane mortal hand
In flendris flew, and at the first clap
As broukyll yse, in litle peces lap
Quhil the small partis, of the blade broken in tway
As glas gletand, apoun the dun sand lay
Quharfore this Turnus, half myndles and brayne
Socht diuers wentis, to fle out throw the plane
Wyth mony windis, and turnis all on flocht
Now here syne thare, vnsouirly he socht
Troyanis stude thyk, belappit enuiroun
In maner of ane compas, or ane croun
And on the tane half, eik ane laik braid
Him so inclusit, that he micht not euaid
And on the tothir syde, fermit als has he
Wyth the hye wallis, of the chief ciete
And thotht the wound taryis, Enee sum dele
Wrocht to him by the rakyll, with hede of stele
To weild his kne, maid sum Impediment
That he micht not brade, swiftly ouer the bent
Wyth na les preis and haist, ȝit not for thy
He fute for fute persewis, hym feruently
Lyke as sum tyme, quhen that the huntar stout
Betrappit, has, and vnbeset about
Wyth hys ralys, and with his houndis gude
The mekyll hart, swymmand amyd the flude
Quhilk thare inclusit, nedelinges mon abide
For he may not eschape, on nowthir syde
For fere of houndis, and that awfull berne
Beryng schaftis fedderit, with plumes of the erne
The rynnyng hound, dois hym assale in threte
Baith with swift rais, and with his questis grete
Bot this hart all abasyt, of thare flycht
And of the strait and stay, bankis grete hicht
Can fle and eik returne, ane thousand wayis
Bot than the swipper, tuskand hound assayis
And neris fast, ay reddy hym to hynt
Now now almaist like, or euer he stynt
He suld hym hynt, and as the beist war tak
Wyth, hys wyde chaftis, at hym makis ane suak
The bit oft failȝeis, for ocht he do mycht
And chakkis waist, togiddir hys wappynnis wycht
Rycht so at thys tyme, apoun athir syde
The clamour rays, that al the laik wyde
And brayis about them, answerd so thay ferde
The heuyn ouer al, and eik rumlyt of that rerd
And Turnus samyn, fast agane can cal
Rutylianis chidand baythane, and al
Euery man clepand, by his propir name
To reik him his traist swerd for schame
And by the contrare awful Enee
Can thaym mannace, that nane sa bald suld be
And schew present the deith all reddy here
To thare vndoing, gif ony drew nere
And quaking for the fere made agast
Schorand the ciete to distroy, and doun cast
Gif ony help, or supple to hym schew
And thocht he sare was, feirslie did persew
Thus fyue tymes round, intil ane rais
About the feild, can thay fle and chais
And als fele syis went turnyng here and thare
Like as before the hound, wyskis the har
And na wounder, for so the mater lyis
To na bourding, twyching thare interprise
Nor for smal wagys, thay debait and stryfe
Bot apoun Turnus blude schedding and life
On cais amyd thys feild haid grow of late
Ane wylde Oliue •o fawnus consecrate
Quhare on grew bittir leuis, and mony ȝeris
Was hald in wourschip, with al marineris
At the quhilk tre quhen thay eschapit had
The stomres blast, and wallis made thaym rad
Thare on thare offerandis, wald thay affix and hing
Vnto this god vmquhile, of laurent Kyng
And thareon eik, the clathis bekend vpsent
Bot tho the stok of the tre, doun was rent
By the troyanis mysknawing, it hallowit was
To that entent, to plane the batall place
Eneas big lance, or hys castyng spere
Percais vpoun the poynt, was stikand here
Thiddir this, schaft the grete fors of his cast
Had thraw the ilk stound, and thare fixit fast
Amang the grippill rutis, fast haldand
Wedgit ful law, the lance on end did stand
The troyane prince, it grippis in that stede
Willing in hand, to put out the stele hed
With cast therof, to follow him at the bak
Quham he throw spede of fute, mycht not ouer take
Bot than turnus, half mangit in affray
Cryis O thou Fawnus, help, help, I the pray
And thou tellus, maist nobill god of erd
Hald fast the speris hede, by ȝour werde
As I that euir has, wourschippit on thir planis
ȝour honour that be, the contrare Eneadanis
Has violate and prophanit, be strife quod he
With blude schedding, and doun hewing ȝour tre
Thus sayd he, and nothing in vane I wyse
The goddis help, he asktt for that hys wys
Ane ful lang tyme, wrelis and taryis Enee
Furth of the teuch rutis, of this Ilk tre
His spere to draw, and bitis on his lip
Bot fessynnyt sa is in the ware the grip
That by na manere force, thocht he was wicht
Furth of the stok, the schaft vp pul he mycht
And as brymly, thus enforcis fast
To draw the spere, this goddis at the last
I mene Iuturna, dochtir to dawnus king
Out throw the feild, come rynnand in ane ling
Changeit agane, as that to foresche was
In to metestus, semlant and liknes
And to hyr brothir, has his swerd detaucht
Quhare at dame Venus, grete disdenȝe caucht
Sic thing suld be tholit, thys bald Nymphe to do
Than suddanly, to the spere rekis scho
Bayth schaft and hede, anone or euir sche stent
At the first pul, from the depe rute has rent
Than athir restit, and refreschit wele
Baith in curage, and scharp wappinnis of stele
He traistand in hys swerd, that wele wald schere
And he full proude, and sterne of his big spere
Incontrare vtheris, baldly lang thay stand
In martiall batall, athir resistand
Ilkane full wilful, vtheris til ouer thraw
At sic debait, that baith thay pant and blaw

The fader almyghty, of the heuin abuf
In the mene tyme, vnto Iuno his, luf
Quhilk tho doun, from ane ȝallow wattry cloud
Beheld the bargane therof, nathyng proude
Thus spak and sayde, O my derespous quhat now
Quhat end sall be, of this mater or how
Quhat restys fynalle, now at al lat se
Thou wate thy self, and grantis, thou wate Ene
Is destinate, vnto the heuin to cum
And for to be clepit, wich al and sum
Ane god amang, the goddis Indigites
And by the fatis, for to rest in pece
•pheyit aboue, the sterry skyis hye
Quhat purpossis, or ellis thou now lat se
And in to quhat belief, or quhat Intent
Hingis thou swa, in the cauld fyrmament
Was it honest, ane godly diuine wycht
With ony mortall straik, to wound in ficht
Or ȝit ganand the swerd, loist and adew
To rendir Turnus, to his brand of new
And strenth increscis, to thame that vincust be
For quhat aualit Inturna, but thy supple
Desist hereof, and at last be the leist
And condiscend to bow, at our request
Na suffir not, thy hid sorow I pray
Na langare to consume, and waist away
That I ne mare, sic wofull thochtis se
Schyne nor appere in thi swete, quod he
For now is cummyn the extreme, lattir poynt
Thow mycht quhil now haue, cachit at disioynt
The sylly troyanis, baith be se and land
And eik thou mycht also, at thine awne hand
Ane feil vntellabil batel, rais on were
Deforme the houshald, and bring al on stere
Be mony diuers wayis, of furie rage
And all wyth murning, mixt thare mariage
Bot I forbid ȝou ony mare sic thing
Thus spekand carpis Ioue, grete heuinnis kyng
Saturnus douchter, Iuno the goddes
Answered on this wyse castand doun hir •ace
O Iupiter dere lord, certis sayd sche
Becaus this thy grete wil was knawin to me
On force tharefore, and in contrare my mynd
I left the erd, and my freynd Turnus kynd
Ne war not thay, thou fuld me se allone
Thus syttand in the are, all wo begone
Sustenand thus, al maner of mischefe
And euery stres, baith leifsum and vnleif
Bot that I suld gyrthit, with flambis rede
Stoutly haue standin, in ȝone battale stede
And suld haue drawin, ȝone troyanis ane and all
In to fell mortall bargane, Inimicall
I grant I dyd, perswading out of drede
Iuturna to pas doun, at sic nede
To hir brothir, and for hys lyffe eik I
Apprufis wele, and als dois ratify
To vndirtak mare, than to hir pertenit
Bot I forsoith persuadit, neuir nor menit
That sche suld dartis cast, or takillis draw
Nor with the bow, mak debait ony thraw
I swere thare to, be the vnplesand well
Of Stix the flude, and cheif fontane of hell
Quhois only dredefull, supersticioun here
The goddis kepis, that nane dar it forswere
And now forsoith, thy wyll obey sall I
And geuis ouer the caus, perpetualy
And here I leif sic weris, and debait
The quhilk certis, I now detest and hate
Bot for the land, of Latin or I tall
And for maiesty of thy owne blude, sans fale
Ane thing I the beseik, quhilk wele I wate is
Na wyse include in statutis, of the fatis
That is to knaw, quhen that as wele mot be
Wyth haypy wedlok, and felicite
ȝone pepil twane, sall knyt vp peace for ay
Bynd confederance, baith conione in ane •ay
That now ne wald, the auld inhabitantis
Byd change thare Latyne name, nor Itale landis
Ne charge thame nowthir, to be called troyanis
Nor ȝit be clepit Phrigiane nor tew•ranis
Nor ȝit the Latyne pepyll, thare lord to change
Nor turne thare clethyng, in vthir habit strange
Lat it remane, latine as it was are
And lat the kingis, be namit euirmare
Princis and faderis, of the stile albane
The lynnage eik, and grete ofspring romane
Mot discend tharfra, patent and mychty
Vnder the vertewis, titil of Italy
Troy is doun bet, doun bet lat it remane
With name and all, and neuir vprise agane
Than gan to smyle Iupiter, the grete king
That is producer of men, and euery thyng
Sister germane, quod he, to Ioue art thou
And secund child, to saturne, auld ha how
Sa grete ane storme, or space of felloun Ire
Vnder thy breist, thou rollis hait as fyre
Bot wirk as I the byd, and do away
That wraith consauit, but ony caus I pray
I gif and grantis, the thy desire, quod he
Of fre will vmcust, referris me to the
Thir ilk pepyl, clepit Ausonianis
And vthir wyse, callit Italianis
The auld vsance, and lede of thare cuntre
Sal bruke and vse, and eik thare name sal be
It is now and as, thare stile remanis
Allan•••e thare persouns, the troyanis
Sall inter middill, and remane thaym amang
The fassouns and the ritis, that not gang wrang
Of sacrifice to thaym statute I sall
And latyne pepill, of ane toung mak thaym all
The kynd of men, discend from thir troianis
Mydlit with kyn of the Italianis
Thou sall behald, in piete and gentilnes
To go aboue bayth men, and goddis expreis
Nor neuir clan, nor vthir natioun by
Lik thaym sall hallow, nor ȝit sacrify
Thy wourschip eik, and honour as thay sall do
Iuno aunerdit, and gaif consent here to
Full blyith and Ioyus, of this grant perfay
Fra hic auld wraith, has writhit hir mynd away
And in the mene tyme, vnto the heuin hir drew
And left the cloud and had Turnus adew
This beand done, as said is on sic wise
This hie fader, can with himself deuise
Ane vthir craft, and prouidis the way
How that he sall Iuturna driue away
From helping of hir brothir, in till armes
Thare bene two vengeabil monstouris, ful of harmes
Clepit to surname, dire wikkit as fyre
That is to say, the goddis wraik and Ire
Quhilk myscheuous, and cruell sisteris twa
Samyn wyth the helis furie megera
Bare at ane birth, for na thing profitabill
The nicht thare moder, that barne tyme miserabill
And al elik wimplit, and cled ther traikis
With edderis thrawing, and haris full of snaikis
And thare to ekit wyngis, swift as wynd
Thir wikkit schrewis, reddys sall ȝe fynd
Before the trone of Ioue, and eik also
Within the wanis, of cruell King Pluto
Thay scharp the drede, to mortal wrechit wichtis
Quhen euir the king, of goddis by his michtis
The deith, or the contagius seiknes s•re
Disponis him to fend, in the erth here
Or quhen that him list, to smite and affray
Cieteis with werefare as deseruit haue thay
Ioue ane of thir full swyppet to descend
Furth of the heuin aboue, anone has send
And bald hir hald, doun baldly to the erde
For to resist Iuturnais Ire, and werde
And scho anone duun flew, to pleis the larde
And to the ground thuddis, with hasty swarde
Nane vthir wise, than from the string doth fle
The swift arrow, out throw the are we se
Or in to bittir venom, wet sum slane
Castin or schot, by sum archeare perfane
By sum persone, or man of sydony
The schaft thrawin, that quhirllis throw the skye
And quhare it hittis, wirkis ane wound of pyne
Vncurabill, be craft of medicyne
And so swiftly slydis, throw the clouddis gray
That quhare it went, nane may persaue the way
On sic manere the nychtis, dochter on flocht
Throw the skyies doun to the erth, sone socht
And eftir that scho saw, the troiane oistis
And Turnus routis, arrayit on the coistis
Sche •ir transformyt in liknes, of ane foule
Quhilk we ane litill howlet, clepe or oule
And that sam time, in granis or stokkis of tre
Or ane waist thak, or he•ssis ruffis hie
Sittand by nycht. singis ane sorowfull tone
In the dirk skuggis, with skrikis Inoportune
This vengeabill wraik, in sic forme changit thus
Euin in the face, and visage of Turnus
Can fle and staf, and mad him for to grow
Sho soundis so, with mony his and how
And in hys scheild, can with hir wyngis smyte
Ane new dolfnes dissoluit, his membris tite
For verray drede, and for grete honour als
Vpstert his hare, the voce stak in hys hals
Bot as Iuturna, sone on fer couth here
Of this furie the quhissilling, and the bere
The southyng of hir wyngis, and hir flycht
Hys wofull syster, hir hare rent for that sicht
Wyth nalis ryiffand reuthfully hir face
And smytand with hir neiffis, hir breist allace
Turnus my best belouit, brothir quod sche
Quhat may thy sister help, now wayis me
Or quhat now to me restis, wrechit wycht
Thy liue prolong, how may I se quhat slicht
May I oppin me to resist, or stryue
Wyth sic an monstour na, nane wycht on lyue
Now now I leif the feild, and gois away
O ȝe myscheuus foulis, I ȝou pray
Do me na mare grife, trimbland for fere
The clappyng of ȝour wyngis, I knaw and here
And eik the dedely soundis, wele on fere
The power command, of mychty Iupiter
That gidis all thyng, by his maieste
Dois me not now, astert for I it se
Is this the ganȝeild, that he rendris me
In recompens, of my virginite
Quhareto eternale lyffe, has he me geif
Quharto suld I, on this wyse euer leif
Quharto is me bereft, the faculte
Of deith, and grantit Inmorralite
For gyf I mortall war, now now foithly
Thir sa grete dolorus, mycht I end in hy
And wyth my reuthfull brothir, go with all
Amang the dym, schaddois infernale
O dere brother germane, wythout the
Is na thing sweit, nor plesand vnto me
O now quhat ground, land or erde teuch
Sall swelly me tharin, half depe yneuch
And thocht I bene ane goddes, doun me draw
And send me vntill infernale, wychtis law
Thus mekyll said sche, and tharwyth bad adew
Hir hede valit with ane haw, claith or blew
And murnand greitlye, thare as sche stude
Thys goddes depe, doukit vnder the flude

Enee with this instantly, did not ceis
For to recounter, Turnus in the preis
And his big spere, apoun him schakis he
Quhilk semyt rade, and square as ony tre
And with ane bald, and bustuous breist thus spak
Quhat menis that, langsum delay ȝe mak
Quhy tary ȝe for schame, Turnus all day
Quharto wythdrawis, thou the so away
We pingyl not for spede, na cours to ryn
Bot we debait, suld this barres within
With wappinnis kene, and with our birnist brandis
To giddir mete deryue, It with our handis
Do change thy self, or turne at thy awne eis
In al maner of figuris, as the pleis
Sadder togiddir, and assembil now lat se
All that thou has, of strenth and subtillite
Wys now to fle vp, to the sternes on hicht
With fedderit wyngis, for to tak thy flicht
Or for to clois thy self, this Ilk thraw
In to sum cauerne, vnder the erth law
Turnus schakande his hede, said thou fers fo
Thy feruent wourdis, compt I not ane stro
Thy sawis makis me, not agast perfay
It is the goddis, that dois me affray
And Iupiter becumin my Inemye
Na more he said, bot blent about in hy
And dyd espie, quhare that ane grete roik lay
Ane ald crag stane, huge grete and gray
Quhilk on the plane percase, was liggand nere
Ane marche setin that ground, mony ane ȝere
Of twa feildis, for to discerne thare by
The auld debait, of pley or contrauersy
Skarsly twyis sex, stout walit men and wycht
Quhilk now the erde produtis, has sic mycht
To charge it on thare schulderis, or to bere
Quham full lychtly Turnus, that nobil here
Hynt in his hand, and swakkit at his fo
And raxit him on hicht, thare vnder also
And tharwith chargit, ane ful swyft cours ran
Bot sa confoundit, is this douchty man
That he ne knew him selfin, in that stede
Nowthir quhare that he ran, nor quhare he ȝede
Nor felt him self lyftand, on the land
The mekill stane, nor stere it with his hand
His kneis stummerit, and his lymmes stydis
The blude congelit, for fere within his sydis
So that the stane, he at his fomen threw
Fayntly throw out the vode, and waist are flew
Ne went it all the space, as he dyd mynt
Nor as he etlit, perfurnist not the dynt
Lyke as sum tyme, in our slewing we tak kepe
Quhen langsum dreuellyng, or the vnsound slepe
Our ene ouer settis, in the nychtis rest
Than semes vs full besy, and full prest
That vs streik, and doith addres in hye
Lang renkis for to mak, and ryn swyftly
Bot al for not, for at the first assay
Or in the myddis of the streit, by the way
All faynt we fall, as for feblit war we
The toung aualis not, It wyll not be
Nor ȝit the strenthis, in our body knaw
Semys sufficient, to vs at that thraw
For set we preis vs, fast to speike out braid
Ne voce nor wordis followis not, is said
Sic like wyse, hes the goddis myscheuus
Vmbeset al the way, of Turnus
Quhat euir to do, by hys strenth etlit he
Sche made obstakil, al that ganestandis sche
That in hys mynd, become his wittis strange
And begouth for to wary, and to change
And oft he did behald, rutulianis
And oft the ciete with al that rial wanys
He houeris all abasit, for drede and fere
And gan to quayk, se and at hand the spere
Ne gan he fynd, quhiddir away to wend
Nor on quhat wyse, hym self he may defend
Nor wyth quhat strenth, assale his aduersare
Nor be na wayis persaif his cart or chare
Nor se hys sister, that had hys cartare be
And as he stude, on houer thus Enee
The fataile dedely spere, in hand can tais
And wyth his ene markit, and walit has
Ane place be fortoun, to smyte oportune
And with the hale fors, of his body sone
Furth from his hand, the lance can thraw
Neuir sa swiftlie, quhidderand the stane flaw
Swakkit from the ingyne, vnto the wall
Nor sulderis dynt that causis touris fall
With sic ane rumyll come bratland on sa fast
Lyk the blak thud of awfull thunderis blast
Furth flew the schaft, to smyte the dedely straik
And wyth It brocht, meikil mischeuus wraik
Quhil throw the hawbrek skirtis peirsit has
And the extreme bordoure, can arrace
Of his strang scheilde couchit of seuin ply
And quhirrand smat him throw the thy in hy
That wyth the dynt huge, Turnus ful vnsound
Wyth faldand hochis, duschit to the ground
Vp stert Rutulianis, samyn complenyng
Wyth ane ȝalloch, and careful womentyng
Quhil all the hyllis, rumyssit thaym about
And fer on brede, thik woddis gaifane schout
And Turnus than, quhare he at erth did lye
Addressis furth ful humyll and lauly
Towart Enee, his sicht and enetway
And strekis furth his rycht hand him to pray
And thus he sayd, forsoith I haue deserue
The deith I knaw, and of thy hand to sterue
Ne wyl I not, beseik the me to spare
Vse furth thy chance, quhat nedis proces mare
Bot gif that ony cure, or thocht quod he
Of ony woful parent, may twiche the
Haue reuth and mercy, of king dawnus the auld
Thou had forsoith, as I haue hard be tauld
Anchises sic ane fader, as is he
And me or than, gif bettir likis the
My body spulȝeit, and the life bereft
Vnto my folkis, thou may rendir eft
Thou has me vincust I grant, and me ouer cum
Italianis present, all and sum
Has sene streik, furth my handis humelie
Lauinia is thy spous, I not deny
Extend na forther, thy wraith and matelent
Eneas sterne in armes tho present
Rolland his ene, towart Turnus did stand
And list not strik, bot can withdraw hys hand
And more and more, thir wourdis by and by
Begouth inclyne, him to reuth and mercy
Abiding lang houir, quhat he suld do
Quhil at the last, on turnus schulder lo
The fey girdil he sette, did appere
With stuchis knaw, and pendes schinand clere
The belt or tische, of the child pallas
Quhilk by this Turnus laitly vincust was
As we haue said, and wyth ane greuous wound
Slane in the feild, be• doun and brocht to ground
And Turnus in remembrance of this thing
About hys schulderis bare, thys vnfreyndly sing
Bot eftir that Eneas, with hys Ene
Sa cruell takynnis, of diseis has sene
And can sic wede bereft thare espie
And ful of furour, kendillis he in hie
Full brym of Ire, and terribil thus can say
Sal thou eschape me, of this stede away
Clede with the spulȝe, of my freyndis dere
Pallas Pallas, with thys wound richt here
Of the ane offerand, of the goddis makis
And of the wikkit slauchter, punitioun takis
And sayand thus full feirs, in all his mane
Laich in hys breist, or coist lay him forgane
His swerd has hit full hait, and therwithall
The cald of deith dissoluit his membris all
The sprete of lyffe, fred murnand with ane grone
And with disdene, vnder the dirk erth is gone.