Book XI

Prologue

How hie renowne of martis cheuelrie
Quhiik gladis euery gentil wycht to here
Gif thou micht mars or Hercules defy
Quharfor bene nobillis to fallow prowes swere
Wele auchten eldaris, exemples vs to stere
Til hie curage, al honour til ensew
Quhen we consider quhat wourschip therof grew
Al vice detest, and vertew lat vs lere
Proues but vice, is prouit leful thing
Be haly scrypture, into sundry place
Be mathabeus, Iosue Dauid kyng
Michael and eik his angellis ful of grace
That can the dragoun, furth of heuynnys chace
With vailȝeand dintis, of ferme mind contrare
None vyle strokis, nor wappinnis had thay thare
Nouthir spere bud geis, staf polax swerd nor mace
In takin that in cheuelry and fecht
Our mindis suld haue iust intencioun
The ground of batal groundit apoun richt
Not for thou list to make discencioun
To seik occasioun of contencioun
Bot ripe the querel, and discus it plane
Wranges to redres suld were be vndertane
For na conquest, reif stayt nor pensioun
To speke of mortall vertewis, hardyment
Or rathir of diuyne, is myne entent
For warldly strenth is febill and important
In goddis sicht, and insufficient
The psalmist sais, that god is not content
In mannis stalwart lymmys, nor strenth of cors
Bot in to thame not traisting, in ther fors
Askand mercy, and dredand iugement
Strang fortitude, quhilk hardyment clepe we
Aboue the quhilk the vertew souerane
According princis heich magnanymyte
Is ane boet set, betuix vices twane
Of quhame fule hardines, clepit is the tane
That vndertakis, al perrillis but auyse
The tothir is namyt, schamefull cowardise
Voyde of curage, and dolf as ony stane
The first is hardy, all out by mesure
Of tyme nor resoun geuis he, na cure
Nor dout he castis, bot all thinkis sure
Nocht may he suffir, nor his hete indure
The tothir is of all proues sa pure
That euer he standis, in fere and felloun dred
And neuir dar vndertak, ane douchty dede
Bot dois all curage, and manhede samyn smure
The first soundis towart vertew sum dele
Hardy he is couth he, auisit be
Of hardyment, the tothir has na feile
How may curage, and cowartnes agre
Of fortitude to compt ȝou, euery gre
As Aristotil in his ethikis, dois expres
It wald as now contene ouer lang proces
Quhareof of vthir cheuelry, carp wyl we
Gyf Cristis knichtis, lyst vs be
So as we aucht, and promyst has at font
Than man we bide baldly, and neuir fle
Nouthir be abasit tepit, nor ȝit blont
Nor as cowardes to eschew the first dont
Paul witnessis, that nane sall wyn the croun
Bothe quhilk duelie makis him redy boun
To stand wichtely, and fecht in the forefrount
And quhay that sal not wyn the croun of mede
That is to say the euerlastand blys
The fyre eternale nedelinges, moist thay drede
For Crist in to his gospell sayis I wis
Quha bydis not with me, contrar me is
And gif thou be aganis god but were
Than art thou wageour vnto Lucifere
God saue vs all, from sic ane syre as this
The armour of our cheuelry perfay
So the apostle teachis vs expres
Not corporal, but spiritual bene thay
Our conquest hale, our vassalage and prowes
Aganis spretis and princes of myrknes
Not agane man, our awin brother and mate
Nor ȝit aganis our maker to debate
As reuel til all vertew and gudnes
The flesche debatis aganis the spiritual goist
His hie curage, with sensuall lust to law
And be the body vyctor, baith are lost
The sprete wald vp, the cors ay doun list draw
The secound fa the warld ane vthir thraw
Makis strang assaltis, of couatice and estate
Aganis quham, is ful perrellus debate
The fais familiare bene, full quent to knaw
Leif in thy flesche, as maister of thy cors
Leif in this warld, as not ay to remane
Resist to freyndis, with slicht and al thy force
He is the ancient enemy, werst of ane
Ane thousand wilis he has, and mony ane trane
He kendillis oft the flesche, in birnand hete
He causit wrechit plesance, sem ful swete
And for nocht, of this fals warld makis the fane
He is thy fa, and aduersare principale
Of promyssioun, wald the expel the land
For he the samyn loist, and caucht ane fal
Enforce the stranglie, contrary hym to stand
Rais he the targe of fayth, vp in the land
On hede the halesum helme, of hope vnlace
In charite, thy body al inbrace
And of deuout orisoun, make thy brand
Stand at the defence, and schrink not for ane schore
Think on the haly marthyris, that are went
Think on the pane of hel, and endles glore
Think how the lord for the, on rude was rent
Think and thou fle fra him than thou art schent
Think al thou sufferis, vntil his pane nocht is
Think how with precius price, as thy saul bocht is
And aye vnto his wourd thy mynd be bent
Fele bene thy fais, fers and ful of slicht
Bot be thou stal wart campioun and knycht
In feild of grace, with foresaid armour bricht
Thay mayd de bait, thame lithlie in ilk ficht
For of fre will, thine actioun is sa wicht
Nane may it peirs, will thou resist and stande
Becum thou towart crawdoun, recriand
And by consent cry cok, thy dede is dicht
Think how that fa is waik, and impotent
May vincus nane, bot thame list he ouercum
He sall the neuer ouerset, but thy consent
Eith is defence to say na, or be dum
And for thy wele lo, this is all and snm
Consent neuir, and thou sal neuir be loist
By disassent, thou may vincust ane hoist
And for anis, ȝa tyne thy mede euery crun•
Na wounder is forby exemple, we se
Quha seruis his souerane in till all degre
Full meny dais, and eftir syne gif he
Commyttis any tressoun suld he not de
Les than his prince of greter humanite
Perdoun his falt, for his lang trew seruice
Gif he wald mercy craif, the samyn wise
We bene forgeuin, so that repent will we
Bot quhat walis begin ane strang melle
Syne ȝeild the to thy fa, but ony quhy
Or towartlye to tak the bak and fele
Na sall nane obtene, hie victorie
Les thay sustene, the bargane douchtely
And sa quha perseueris, to the end
Ane conquerour, ane campioun euir is kend
With palme of tiumphe, honour and glorie
The maist vnsilly kind of fortoun is
To haue bene happy Boecius techis vs so
And to haue bene in welth, and hartis blys
And now to be decayit and in wo
Richt so quha vertuus was, and fallis tharefro
Of verray reasoun, mallewrus hat is he
And ȝit by grace, and his fre volunte
He may recouer merit, agane also
I say be grace, for quhen thou art in grace
Thou may eik grace to grace ay more and more
Bot quhen thou fallis be syn, therfra allace
Of the merite, thou gettis it neuer more
ȝit quhen thou deulie disponis the tharfore
Doand all that, in the thare may be done
Of his gudnes, the eternal lord alsone
Restoris the merite, with the grace in erlis of glore
Hale thym erite thou had tofore the fall
That is to say, thy werkis meritabil
Restorit ar agane, baith grete and small
And grace thareto, quhilk is sa profitabyl
That thou thareby to eik merite art habyll
Bot not ilk gre of grace, thou had before
That gettis thou not sa sone, quhil forthirmore
Be war tharefore, fal not bot standis stabyll
For lyke as quha offendit had his lord
That lang tofore, his trew seruandis had bene
And syne agane, becummys at ane accord
With his maister, althocht hys lord wald mene
On his ald seruyce ȝit netheles I wene
He sal not sone be tender, as he was are
Be war tharwith and kepe ȝou fra the snare
Tyne not ȝour labour, and ȝour thank betwene
Exemple takis, of this prince Enee
That for his fatal cuntre, of behest
Sa feil dangeris sustenit, on land and se
Sic strife in stoure so oft, with spere in reist
Quhil he his realme conquest, bayth west and ei••
Sen al this did he, for ane temperale ring
Preis vs to wyn, the kinrike ay lesting
Addres vs fast, for till attene that feist
He may be callit, as sayis sanct Augustyne
And delicate ouer esy christin, knicht
Refusis to thole trauell, sturt orpyne
And but debait wenys, to obtene the ficht
To wyn the feild, and neuir preif thy mycht
That war nyce thing, thy king Christ in batell
Quhat sufferit he for the, o catine wicht
Lyis thou at eis, thy prince at bargane fell
Eschames of our sleuth, and Cowardise
Seand thir gentilis, and thir paganis auld
Ensew vertew, and eschew euery vice
And for sa schorte renowne, warren so bald
To sustene were, and panis tere vntald
Than lat vs striue, that realme for to possede
The quhilk, was echt to Abraham and his sede
Lord that vs wrocht, and bocht graunt vs that hald.

Book XI

During this quhile, furth of the sey did spring
The fresche aurora, with the brycht dawing
Enee albeit, his basty thochtfull curis
Constrenit him, as twiching sepulturis
Of his folkis new slane, and berying
For to prouide ane tyme, maist accordyng
And greitlie eik in mynd, he trublit was
For the slauchter, and dede corps of Pallas
ȝit netheles, as first the son vpsprent
Schedding his bemes, in the orient
•s victor he vnto the goddis, als tyte
With sacrifice, can his vowis acquite
Ane akin tre was huge, grete and square
The branschis sned and cut, about alquhare
Apoun ane mous hicht, vpset has he
And all with schynand armour, cled the tre
The coist armour, and spulȝe tharon hang
Of mezentius, the vailȝeand campion strang
To the gret god of striue, armypotent
In signe of trophe, thareon was vpstent
His creist and hewmond, all besprent with blude
The brokin trunscheons, of his speris rude
And his fyne hawbrek, with spere swerd and matis
Assayit and peirsit, in twys sex platis
His steilit scheild, did on his left syde hing
About his gorget, or his nek armyng
Was hung his swerd, with euore scalbert fyne
And thus exhortis Enee, his feris syne
The chiftanis all about him, lowkit war
Quhilkis glaidsum werren, of thys Ioyus fare
O douchty men quod he, wourthy in weris
The gretest party, of our werkis and efferis
Bene endit now, sa that in tyme cumming
All fere and drede ar passit, of ony thing
Thir bene the spulȝe, and first werelie wede
Reft from the proude king, be my handis in dede
Lo here mezentius vincust, lyis doun bet
Now to the wallis, and laurent and the ȝet
The way is made, to kyng latyne to wend
Tharefore addres ȝour myndys and attend
To armes and to werefare, euery ane
Prouidyng in ȝour consatis, for bargane
So that ȝe reddy be, and na delay
May floppin ȝou, nor stonis ane vthir day
Bot ȝour awin sleuth, for lak of gud forsicht
Gyf ȝe vnwarnist, beis callit to sicht
Als sone as first, the god omnipotent
Be sum signis, or takinnis lyst consent
The ensenȝeis, and baneris be vp hynt
And al the ȝonkeris met, for swerdis dynt
Of thare tentis, conuoyit in array
Se ȝe al reddy be, than but delay
And the mene quhile, let vs to erd haue
The corpsis of our fallowis, and vnbegraue
Quhilk onlie honour, is haldin in daynte
At acheron, the lawest helles se
Pas on he sayd, thay saulis vailȝeand
Quhilk with habundance, of chare blude besprent
Has conquest vs this realme, apoun sic wyse
Do honour, with thare funeral seruice
And wourschip, with the fynale last rewardis
Bot first before al corpsis, of thay lardis
Vnto Euandrus dolorus ciete
Of ȝoung pallas, the body send mon we
Quham wantand na vertew nor prowes
The woful day has vs bereft expres
And with ane woful slauchter, caucht allace
Thus sayd he, wepand, salt teris ouer his face
Syne tuke his vayage, towart the ilk stede
Quhare Pallas lifles corps, was liggand dede
Quham Ancient acetes, thare did kepe
With flottrit berde, of teris all bewepe
The quhilk atetes, had tofore be
Squyare to king Euander, from the ciete
Of Parrha, cum in to Archadye
And at that tyme, was send in cumpany
With his dere foster child he had, in cure
Bot not as are, with happy auenture
About the corps, alhale the multitude
Of seruitouris, and commouns troianis stude
And dolourus Phrigiane wemen, on thare gise
With hare doun schaik, and pieteous spraichis and cryis
Bot fra that enterit was, Eneas bald
Within the portis, of that large hald
Ane huge clamour thay rasit, and womenting
Beting thare breistis, quhill all the lift did reyng
So loude thare wofull bewaling haboundis
That all the palice dynnys, and resoundis
This prince himself fra that he did behald
The snaw quhite visage, of this pallas bald
His hede vphald not, the self sustene
And eik the gapand, dedely, wound has sene
Maid by the speris hede, rutuliane
Amyd his sneith, and fare slekit breist bane
With teris brist, and from hys ene thus plenit
O douchty child, maist wourthy to be menit
As fortoun me inuyit, sa far that eft
Ouer wele is cummyne, thus art thou me bereft
Sa that thou suld not se, ouer reyng said he
Nor ȝit, ane victor with prosperite
Vnto thy faderis ciete, haue retoure
Sic promys, hecht I not the lattir houre
To thy fader euandrus, quhen that he
At my departing, last embrasit me
And send me to conqueis, ane large empire
And dredand eik for the that lordelie sire
Vs monist to be war, and auyse
Becaus the men quham, with to do had we
Ware bald and sterne, said we had were at hand
Wyth bustuous folk, that wele in stryfe durst stand
Now certis he leuand, in hope in vane
For thy prosper returnyng, hame agane
Perchance dois mak prayer, and offerandis
Chargeing the altaris, oft with his awin handis
Bot we his lifles child, quhilk aw na thing
Vnto the goddis, of the heuinly ryng
With womentene here, menand tenderly
And vane honour, accompanyis by and by
O fey vnhappy, kynge Archadian
Now thy sonnis dede, corpis cruelly slane
Thou sall behald allace, the panis strang
This is ouer hamecome, thou desyrit lang
This sall be ouer tryumphe, now lang abaid
To se thy awin son, on this bere tre laid
Ha quhat is this my promys, and gret faith
Bot o Euander beis, not with me wraith
Thou sall not se, thy son was drife abak
Wyth schameful woundis, that he caucht in the bak
Not thou his fader, war he alyue this day
Suld neuer haue lak, of him na for him pray
For his desert he deit, ane schamefull deith
And now wyth, honour he has ȝald the breith
Bot netheles quhat harme, full wayis me
How large supporte, ha quhat beild or supple
In him has tint, Ausonia the ryng
And how grete dele has loist Ascaneus ȝing

Quhen he bewaled had on this manere
This woful corps, he bad do lift on bere
And with hym send ane thousand men in hye
Walit of euery rout and cumpany
For to conuoy, and do hym falloschip
At his last honour and funerall wourschip
And to be present, at the lamenting
Of his fader, to confort the murnyng
Thocht smal solace, was that to his regrate
Quhilk was sa huge, bot to his estate
According wele that sic thyngis suld be
Quhen all wichtis mycht, rew on him to se
Sum of Eneas feris besely
Flokis to plet thaym preissis, by and by
And of smal wikkeris, for to beild vp ane bere
Of sowpill wandis, and of brounys sere
Bound wyth the syouns, or the, twistis sle
Of smal rammel or stobbis of Akin tre
Thir beddis beildit, on funerall littetis
Sic tumbis as for dede corps efferis
Wyth grene burgeouns, and brāschis fare & wele
Thay gan ouerheild, and stintis euery dele
Amyd the quhilkis, of blumes apoun ane bing
Strowit ful hie thay laid this Pallas ȝing
Ligging tharon, as semely for to se
As is the fresche flouris, schynand bewty
Newlie pullit vp, from his stalkis smal
With tendir fyngeris, of the damysell
Or the soft Violet, that dois freschely schyne
Or than the Purpoure floure, hate I acinctyne
Quham al thocht the erd, his moder wyth sap
Him nurissis not, nor comfortis on hir lap
ȝit than his schyne, cullour and figure glaid
Is not al went, nor his bewty defaid
Eneas syne twa robbis furth gart fald
Of riche purpoure, and styf burde of golde
Quhilk vmquhile dido quene of Sydones
Of sic labour, ful besely tho I ges
As at that tyme, to pleis him wounder glaid
With hir awin handis, to him wrocht and maid
Woiffin ful wele, and brusit as riche wedis
Of coistly stuf, and subtil goldin thredis
And with the tane of thir, ful dolorusly
Eneas cled the ȝoung Pallas body
To be his fynale and his last honour
His lokkis and his haris the selfe houre
Quhilkis war to be brynt, in assis cald
Into the tothir habit did he fold
Aboue al this rewardis, mony ane
I conquest in this batel laurentane
In hale hepis, with him has he send
And bad thay suld tak gude kepe attend
To lede the pray, perordoure pompusly
Feil horsis as he gaif thame by and by
With wappinnis eik, and vtheris precius gere
That he had reft his famen in the were
The prisoneris also, quham he had tak
He sendis with handis bound, behind thare bak
Quhilkis at the obsequyis or intyrement
To the infernale goistis suld be sent
And with thare bludis schede, as was the gise
The funeral famb, strinklit in sacrifyce
He bad the capitanis, and the dukis al
In signe of trophe, or pomp triumphal
Grete pykis bare, of trene syplyne that square is
Cled wyth armour, of thare aduersaris
To wryte and hing thareon, baith al and sum
The names of thare inemys ouercum
Furth led was, the silly Achates
Ouerset with age of sorow, mycht not ceis
Now bludy and wyth his awin breist with his feistis
Now with his nalis, his face renus and breistis
And oft doun fallis, speldit on the erde
Wyth mony goule, and ane ful pietuous rerd
And furth war led riche cartis, for the nanys
By sprent wyth blude, of the Rutulianis
And eftir come Aethon, his werely stede
Dispuleȝit of his harnessing and wede
Wepand he went, for women mycht haue sene
With grete teris, flodderit his face and ene
Ane bare his helme, ane vthir bare his spere
For the remanis, of hys harnes and gere
Sic as his riche girdil, and coit Armour
Turnus victor, byreft him in the floure
Furth haldis syne the drey cumpany
Of Troianis and Tyrrene Dukis thaym by
And wofull Archades, in signe of dolour weris
Scheildis reuersit, and doun turnit thare speris
And eftir that, Perordour by and by
Thay bene furth passit, euery cumpany
Eneas tho gan stentyn, and abaide
And wyth ane pietuous regret, thus he sayd
The horribill batellis, of thire samyn weris
Til vtheris funeral, womentyng and teris
Callis vs from thens, we may not follow the
Thyne entirement, for to behald and se
A dew for ay Pallas, belouit best
Farewele for euer intil eternal rest
Na mare he sayd, bot went towart new Troy
Enterit therin wyth teris of ennoy

Be this war cummin, fra kyng Latynis ciete
Embassiatouris, wyth branche of olyue tre
Besekand fauouris, and beneuolence
That he wald suffir, to be caryit from thence
Thay corpis dede, quhilk on the feildis broun
Lay strowit here and thare, with swerd bet doun
And thame restore agane, of his gentrice
To suffir thame, begrauin for to be
Assuring thame thare, mycht be led na were
On vincust folkis, that lifles micht not stere
And prayit spare thare peopil, at sic mischance
Quhilom clepit his freyndis, and acquentance
Quhen that Eneas, heynd curtas and gude
Thare peticioun, sa ressonabyl vnderstude
As man that was fulfillit of bounte
Thare hale desire, ful gladlie grantit he
And for thir eik, vnto thaym thus he sayd
O Latine folkis, quhat mysfortoun vnglaid
Has ȝou inuoluit, in sa vnhappy were
That ȝe chace vs away, ȝour freyndis dere
Desire ȝe peace, bot for thaym that bene loist
By martial fate, and slane into this oist
And I forsoith, til al that leuand be
Wald glaidly grant the samyn, I say for me
Neuir hidder had I cummin, war not perfay
Into this stede, the fatis hecht for ay
Our resting place, promouit and herbry
Ne na werefare, with ȝour pepill lede I
Bot ȝour king, has our confederance vp geif
And rathir has settin, al his beleif
On Turnus vassalege, and his hie prowes
Thocht more equale, and ganand war I ges
To thys Turnus, the brekar of our pece
To auenture himself, to de in preis
Gif he pretendis, in batale with ane brand
To end the were, or troianis of this land
For to expel, here semyt hym vnder scheild
With wapinnis, to recounter me in the feild
That nane bot ane of vs, war left leuand
Quhois lyffe god list, withhald ouer his rycht hand
Now haldis on, and al the lifeles banis
And corps of ȝour wrechit cietezanis
Do birne and bery eftir ȝour awin gyse
Sayis Eneas the troiane war and wyse
Than of this speich, so wounderit war thay
Kepit thare silence, and wist not to say
Bot ather, towart Turnus but mare
And can behald his fallow, in ane stare
The eldest man, amang thaym fynalie
Clepit drances, that had ful grete inuy
At ȝoung Turnus, alway to him infest
Or auld malice, or of cryme manifest
Begouth tospeik, and ansuere thus agane
O huge grete is thy fame, thou Duke troyane
Bot fer greter, all out we may espye
Thy dedis of armes, and thy cheuelrye
Wyth quhat louyng equale, I may compare
The to the goddis in heuin, aboue the are
Quhidder sall I fyrst extoll, and wounder in the
Thy grete gentri••, and sa iust equyte
Or the grete force, and labour bellicall
Glaidly forsoith, now hamewart bare we sall
Vntyl oure natiue, boundis and ciete
Thir sa grete sygnis, of humanite
And gif that ony chance, can fynd the way
We sall do fully, all that euer we may
To the conione, wyth kyng Latyne in hy
That Turnus quhare him list go seyk ally
And furthir eik, wele lykis vs at all
To help to rayis, this fatall massy wall
And for to bere apoun, our schulderis war ioye
Thir stones grete, to thys new werk of troy
Thus sayd Drances, and all the remanent
Thare to cryis, wyth hale voce and consent
Twelf dayis of trewis, thay band to stanche debate
For to kepe pece, and weris sequestrate
Than throw the woddis, and thir holtyes he
Troyanis and Latynis, samyn he and he
Quhare so thaym list, wanderis but dangere
The hie eschis soundis, thare and here
For dyntys rude, of the scharp stelit ax
Doun weltit, ar with mony granand strax
The firris rekand, to the sternes on hye
The mekill sillis, of the, warren tre
Wyth wedgeis, and with propppis bene diuide
The strang gu••and Ceder, is al to schid
Ne ceis thay not apoun, the girgirand wanys
The grete aikis, to turs away attanis

Than fame wyth this als, fast as sche mycht spring
As messingere, of the grete womenting
Flaw furth, and al with murnyng fillis sche
Euander king, his Pallice and ciete
Quhilk late to fore, had schewin that Pallas
In latyum land, sa victorius was
Now sayis sche, lo is he brocht on bere
The Archades ruschit, to the portis in fere
And euery wicht, in handis hynt als tite
Ane hate fyrebrand, eftir the auld rite
In lang ordoure, and rabil that al the stretes
Of schynand flambis, lemys brycht and gletis
Quhil al the large feildis, of the licht
Mycht soueraly, be reknyt at ane sycht
The troyane routis, one the tothir hand
Wyth thaym adionis, thare folkis sare wepand
Quham as the matronus, behald on sic wyse
So dulfully went, to the kyngis palice
The dolorus toun, in euery strete and way
Wyth pyetuous skrykis, and glouling fillit thay
Than was na force, Euander mycht not refrene
Bot in amyddis thaym, wyth grete disdane
He ruschis Plenȝeand, on woful manere
And fel on grufe, aboue dede Pallas bere
Wepand and waland, as his hert wald brek
Embrasit hym, but na wourd mycht he speke
And skars at last, wyth grete difficulte
The condutis of hys voce, war lousit fre
Quhen he mycht speik, than thir his wordis was
This is not the last cunnand son Pallace
Thou promyst not so, vnto thy fader dere
Bot that thou suld pas mare warly in were
And not in dangere, of the cruell mart
Ouer wele I wist, wyth harmes at my hart
Quhat auenture, and of how mekil mycht
Til ony ȝoung man, the first seild into fycht
Was grete desyre, of new lufe and glorye
And how swete was renowne, of Cheuelrye
Allace the first commantement and assayis
To ȝoung men bene in were, full fey al wayis
And richt hard bene the first, enteichement
Of haisty batall, to thaym bene not acquent
My vowis nor my prayeris, grete and smal
War not accept, to nane of goddis all
O thou my blissit spous, deceissit or now
Full happy of that dede, in fayth was thou
That to this sorow, not preseruit was
Bot to the contrare I, allace allace
Ouer leuit has my fatis, proffittabil
And am alyffe, as fader miserabil
Quham wald god, in ȝone samin mortal weris
Rutulianis had ouerquhelmyt, wyth thare speris
That followand to the feild, my feris of troy
I mycht haue ȝald, this saul ful of ennoy
So that this funeral pomp, quhilk here is wrocht
My body and not Pallas, hame had brocht
Na bid I not ȝou Troyanis to argewe
Of amyte and alliance, bound of new
N•oure rycht hand, and promyssis quhilkis we
In frendschip knyt, and hospitalite
This mysfortoun is myne, of auld thirllage
As therto detborne in my wrechit age
Bot had this haisty dede sa vndegest
Sufferit haue, bot my sone ane stound to lest
Quhil of Rutulianis, he had slane thousandis
And inuestit the troianis, in thare landis
That is to say, in Latinum or lauyne
Wele likit me, that he had endit syne
And forthir eik, Pallas my son so dere
Na mare richely, couth I lay the on bere
Nor with mare wourschip list me entyre the
Than is prouidit, be reuthfull Enee
Be mychty troyanis, and princes thirrene
For al the tuskane Menȝe, as here is sene
Sa riche trophee, and riche spulȝe hidder bryngis
On parkis richelie cled, with thare armyngis
Quham thy rycht hand, in feild has put to dede
Bot o thou Duruus, in the samyn stede
Amangis vtheris here, suld haue be
In forme and, manere of ane stok of tre
Gif ȝe of age had bene equale, of peris
And bayth elik cummyn, to ȝour strenthy ȝeris
Bot now allace. I fey vnhappy wicht
Quhareto delay, I troianis from the ficht
Pas hame in harst, and remember to say
Thir my desiris to ȝour prince I ȝou pray
Euander sayis, that thy richt hand Enee
Is al the cause that he delayis to dee
Or that his haitsum lyffe, sustene he wald
Sen now is loist, his son Pallas the bald
Say til him, that he oblist is of det
Bayth to the son, and the fader to set
ȝone Turnus slauchter, for our recompens
To the Eneas only but offens
And to fortoun remaynis this iorney ȝit
Quharewyth thou may thankfully be acquyte
Tell him na lust, to liffe langare seik I
Vnlesum war, sic pleasoure I set by
Bot for ane thrawdesyre, I to lest here
Turnus slauchter, and deith with me to bere
As glaid tything is vnto my child and barne
Amang the goistis law, and skuggis derne

The mene sessoun, Aurora rasit hir licht
Rycht comfortabil, for euery mortal wicht
Rendring agane, the oportunite
Of laubour, and of wirking as we se
The prince Eneas, and the king Tarchone
Grete binges has of treis, mony one
Vpbeildit, by the bow and coistis bay
Thidder euery ane did cary, but delay
Efter thare eldaris, gif that vnto that stede
The corpsis of thare freyndis, that war dede
As for to do, thare obseruance of det
And thare vnder, the smoky fyre has set
Quhil that the heuynuis hie, did waxin dirk
Inuoluit with the reky stewis mirk
And thryis on fe•te, al samyn euery man
In s••y•and armour, about the feris ran
And thryis the woful funeral, inglis thay
Cirrculit, about, on horsis bak in array
With gowing and with voeis miserabil
Quhil that of trigland teris lamentabil
The feildis strowit war in euery place
Armouris al wet wich weping and thare face
The clamour of the men an trumpis steuin
Gan springing vp on hecht, vnto the heuin
Syne cummis sum, and in the fire dois sling
The werelie wedis, spulȝe and arming
Rent from the latinis, slane in the were
As helmis, scheildis, and riche swerdis sere
Brydyllis and al thare stedis trappouris sare
The haifly hurland chariot, quhelis square
And vthir sum kest in the fyre sic gere
As wele bekend the corps, was wount to were
Thare awin wappinis, and thare vnsilly schildis
Quhilk micht not thame defend, in to the feildis
Ful mony carcage, of thire oxin grete
About the firis, war britnit and doun bet
And bustuous bonkis, of thr •irsit swrne
Our feildis al bireft, from euery hyne
Thay stik the bestis, and swakkis in the fire
Endlang the coistis, al the birnand schyre
And can behald how that thare feris brynt
Obseruand wele, the gledis half out queynt
And eik the assis half brynt of the dede
N• may thay thens be harlit of that stede
Quhil that the heuyn, ouer quelmit the dirk nycht
That ganand is, for fyry sternis bricht
And netheles the latinis lamentabil
In placis sere fyris innumerabil
Vpbeildit has, and sum with woful rerde
Feil corps dede, bedeluit vnder erd
And som also in cartis hawe thay sent
To townes in the feldis, adiacent
And sum also, was send to the ciete
To be entyrit, as thame accordit be
The remanent al samin, assemblit ouer a•e
But nowmer and but ordoure, euery ane
Of corps slane in huge hepe birn thay
And thus on athir sidis, the hie way
And large feildis, did oft fyrys schyne
As that the third dayis licht efter syne
The dirk nicht remowit fra the skye
The assis depe, murnand, with mony cry
Doun did thay cast, and scrappis out attanis
The hete ameris, and the birsillit banys
And ȝit all warme vnculit sone thay haue
Bedeluin thame, and to the erd thame graue
Bot certis than renewis the womentyng
Within the michty burch, of latyne kyng
The rumour rais, and murmoure principally
Of bewalyng al out the maist party
The woful moderis, and matrouns wepis here
The eldmoderis, and eik the sisteris dere
Thare mycht be herde, with duleful breistis grete
The ȝoung babbyis waling, on the strete
That had thare faderis stane, this hendir day
Cryand ych ane, allace and welaway
Thay curs and wary fast, this vengeabil were
And turnus wedloke, bannis with mony ane tere
All in ane voce, thay cry desyrand he
Suld vndertak, the batell and me•le
And fecht allane, to mak end of this thing
As he the quhilk pretendit, to weild the ryng
Of Italy wyth, honour principale
Desyrand that he suld, be lord of all
The brym drances, aggregris wele this thyng
And bure on hand baldly, before the kyng
Nane but this Turnus challance wald Enee
Turnus only, to fecht desyris he
And be the contrare, mony sense mentis
For Turnus schawis, euident argumentis
Of quene Amata, the grete authorite
Dekkis and defendis, him wyth wordis sle
And his grete fame, and actis tryumphale
Hys querrel did sustene, aganis thame all

Aboue al thys, lo the ilk stound anone
Thir messengeris, all trift and wo begone
Returnyt hame wart, in to thare maist nede
From the grete ciete, of schir Diomede
Reportand ansuere, that all hale was loist
Thare lang trawel, and maist sumptuous coist
Schortly thay had done, thare na thyng that docht
The riche gyftis, nor gold aualit nocht
For all thare large requestis, and prayeris
To help the Latyne people, in thare weris
Behuffis thame to seik, vthir supple
Or to mak pece, wyth troyane prynce Enee
Herand thir wourdis, this auld latyne kyng
Falis all curage, with grete lamentyng
For pa•iently the goddis, wraik him thocht
Schew that by fate Enee, was thiddir brocht
And manifest mycht, of goddis did him sustene
That schew the new grauis before thare ene
Quharefor ane gret counsel, assemblis he
And callis the cheif ledaris, of his menȝe
Thar geand thay suld, in his palice conuene
Vnto the rial chymes, tho bedene
Thay flock sa fast that euery way was hid
This ancient king, did set him doun amyd
The cepturit men as first and principall
Bot nothing semyng glad of chere at al
Than the ambassiat, that was returnir agane
From Diomedes riete, Etholiane
He bad do schaw the credence that thay brocht
Perordoure alhale, thare ansuere falland nocht
Sylence was maid ilk man, his toung held than
And venulus, of thaym the gretest man
Begouth for till obey, the kingis charge
And schew his credence, planelye thus at large
O cietezanis, we haue vesyt Diomede
And sene thay strenthis, by thaym ofarge in dede
Vp beildit in the boundis, of Italie
The wayis thidder, we haue met by and by
And eschapit all dangeris by the gate
All thocht our Iourney, was not fortunate
We haue twichit, that samyn douchty hand
Be quham of troy, distroyit was toun and land
Quhilk now as victor in the feildis plane
Besyde the skirtis, of the mont Gargane
Within the boundis, of Iaxipiasuleȝe
That now on dayis, apulȝe cleping we
Vprasing has the ciete Argirapas
Quham fra his natiue pepil he namyt was
Fra that we enterit, war in his presence
And for to speik was, geif vs audience
The giftis and rewardis present we
Our credence our estate, and our contre
Declarit plane, and quha with were vs socht
And quhat occasioun, has vs thidder brocht
He hard vs wele, and one ane freyndly wyse
Thus ansuerd he, wyth wourdis wer and wyse
O fortunat folk, quham saturne regnit sua
The anciant pepil, of Ausonia
Quhat mysauentur, and vnkindly hete
ȝou steris from ȝour lang rest and quiet
Prouokand ȝou to mouing, rais and stere
Sa perrellus vncouth, and vnthrifty were
For euery ane of vs, that did effence
In troyis boundis, wyth swerde and violence
Or cruell handis, set for to inuard
King Priamus, and of his realme degrade
I leif vntald, al thaym that in the feild
By troyis wallis, has swelt vnder scheild
Or that the flude, of Symois by the toun
Drownit in stremes, warpis vp and doun
Ouer al the warld of vs hale the remanis
Bene punyst sore, wyth vnrehersibil panis
And sufferit has, al maner of torment
Ful wel knawis my wourdis quhat I ment
The soroufull constellation, of god mynerue
Quhilk causit mony douchty man to sterue
And on the coistis, of Eboica
The rokkis beris wytnys ȝit alsua
And the montane Caphereus godwote
That vengeance tuke, and wraik apoun our flote
From that were fare, and cursit cheuelry
We cachit ar to sindry coistis fer by
Our natiue boundis, and auld heretage
Lo menelay ane of the cheif barnage
And Atryus son, clepit Atrydes
To protheus pillaris hait Priamedes
Constrenyt is in exile, for to wend
Vlixes a so, as ful wele is kend
Beuauit is wyde, quhare ouer al the se
So that the Ciclopes of Ethna saw he
Quhat suld I say, of N•optoloneus
That vthir wise, to name is hait Pirrus
The hard myschance, and tynsel of his ryng
Or how aganis Idomeus, the kyng
Hys kyndly goddis, and cuntre did rebel
And hym agayne, of hys natyue realme expell
Or how the Locris, Aiar, Oelus oist
Now dois inhabit the waist Libiane coist
Syne he hym self, the grete Agamenone
The King of Myce, and cheif Ledare of one
Of al the Grekis oislis in batall
Ha schame to sa, foulely befell
That by the handis of his awin wyfe
The first nycht, in hys palyce loist his liffe
And he that vincust, Asia lyis dede
The sle adultrare, Occupiis his stede
The goddis eik, so fer dyd me inuy
That my natyue land, neuer sal I spy
My chaist spousage, like as before has bene
Ne Calid one my Realme of crymes clene
And now also, ane grislye thyng to se
Ane selcouth monstoure, to betid has me
My feris loist, wyth Plumes in the are
As thaym best likis, ar sle and ouer alquhare
Allace of my folkys, the wengeabil wraik
Transformyt in foulis, wanderis by the laik
And of thare lamentabil and woful soundys
The large coistis, Dynnys and resoundis
Thir myscheuis for my trespas, and cryme
I may traist has m• betid, sen that tyme
That I witles, and so rekles perfay
The heuinlie bodyis, durst with swerd assay
Ano with imert wound was ouer presumptutis
To violate the richt hand, of venus
Solist no more quod he, persuade me not
That to so dangerus, battellis I be brocht
E•tir the betting doun, of troyis wallis
With the teweranis, quhat chance that euer be fallis
I will no more debatis, mak nor weris
Nor of our auld strife, thir hunder ȝeris
That so myscheuus was, and bald to se
Nay I glaidlie remembir, now said he
Thay giftis riche, and mony fare presandis
Quhilk ȝe to me, has brocht out of ȝour landis
Returne and bere, vnto prince Enee
Contrare his kene dartis, ellis stand haue we
And hand for hand, matchit him in ficht
Beleif me as expert, how stout and wicht
He is outhir in battell, place or felde
And how sternlie, he raisis vp his sche••d
Or with how grete thud, in the melle
Ane lance towartis, his aduersaris thrawis he
Forthir I said, I certifye ȝou alsua
That gif the foresaid ground o• Phrigea
Twa vthir sic men fosterit had, or bred
The cieteis all of arge mycht, sore haue dred
And of the ofspryng, of dardane eselye
Mycht in our realme ariuit by and by
So that grete suld haue murnit euery toun
The fatis auld, reuersit vpsyde doun
Alhale the stope resitence, and delay
Made at troy wallis, quhil the sege thare lay
Was by the handis of Hector and Enee
The grekis conquest lang tyme traistis me
By thame was stintit, apoun sic manere
That it prolongit was, quhil the tent ȝere
Athir of thame, in bounte and curage
Excellent war, and ful of vassalage
Athir of thame, maist souerane and douchty
In dedis of armis, prowes and cheuelry
That this Enee was, first out al expres
Of reuwth co••passioun, and of gentlines
Tharfore al samin adionis ȝour richt han•is
In ferme alliance, of concord and sic bandis
Be ony wise, se ȝe obtene quod he
For gif •e stert to armes in melle
Be war with thame, for to debate I rede
Maist nobil kyng of kingis, in this stede
His answere has thou herd, as I haue tald
And twichand this grete batel quhat he wald

Scars had the messingeris, thir wordis said
Quhen al the latynys, trublitful vnglaid
Fra, hand to hand, quhisperis fast and roundys
On diuers wyse, deming wyth murmour soundis
Lyke as the swift wattir stremys clere
Sum tyme routand, men on fer may here
Quhare it stoppit, wyth thir stanys round
That of the riuerys brute, and brokyn sound
Bry••and on skellyis, ouer thyr demmyt lynnys
The bankis endlang al the fludis dymmys
Bot eftir that thare mudis mesit were
Thare wauerand wourdis, stanchit and sic bere
With reuerence, first blissand the goddis mycht
The king thus carpis from his trone on hicht
O Latyne pepil forsoith, I wald alga••
And so had bene, fer bettir wele I wate
Full lang or now auisit, had we be
Twiching the commoun wele, and materis he
And not at sic ane poynt, apoun this wise
Our counsele for to assembil, and to auyse
Quhat our fais, and aduersaris ar boun
For to besiege the wallis, of our toun
O cietezanis we moue, and ledis at hand
Ane were inportune, quhilk is vnganand
Aganis folkis of goddis, clan discend
That bene inuincibil, and wele can defend
So that no bargane may, thame irk nor tyre
Nor thocht thay vincust war, bayth man and syre
May thay resist, ne withdraw the melle
Gif ony hope or confidence, had we
In cheuelry, of the Etholianis
Quhilkis in Naplis, with Diomede remanis
And for thare men of armes thidder send
Do all sic traist away, and ȝou defend
Lat euery man in his awne self haue hope
Bot how febill sic traist, is ȝe ma grope
And eik before ȝour eue, clere ȝe may se
In how grete perrell, and proplexite
All vther materis lyis now, or standis
All sic thingis bene brade, amang ȝour handis
I wyll accus nor argew, now na wicht
Alhale the force or strenth, mycht be in ficht
Exercit was I wate, sene all the floure
And pissance, of this realme did sterue in stoure
Now is it so, that I wyll breuely end
And in schort wourdis, mak vnto ȝou kend
The doutsum purpois, in my mynd remanis
Attendence gif and harknes all attanis
I haue besyde Tyber, the tuskane flude
Ane auld feild vnproffitabill, and rude
Far strekand west to the boundis, quhare remanis
The cecil pepil, quhilkis clepit ar sitanis
The folk armitane, and of rutuly
This ground sawis, full vnthriftely
With scharp plewis, and steil stokkis sere
Thare hard hillis, hirstis for till ere
And on thir wild boltis, hats also
In faynt pastoure dois, thir beistis go
All that cuntre, and band of hillis hie
Sa full of rochis, pynnakillis as we se
Lat it be geif for amyte, and concord
To the troyanis, and Eneas thare lord
Syne offer thame, equale trety condigne
And as our peris, do call thame in thys ryng
All samyn lat tham duell, here by and by
Gif thay haue sic desire to Italy
Do lat thame beild, thare ciete wallis square
Bot gif so be that thay list, ellis quhare
The othir coislis, or pepil for to wend
Thare duelling place, for ay to apprehend
And possibil, be that of our boundis thay
May so depart, and from thens wend away
Twys ten schippis, lat vs beild agane
Of strang tymmer and treis Italiane
And gif thay •ald complete, may in this land
Ther lyis now all redy, by the strand
Of thare schippis the noumer, and the maner
Lat thame commaund, and we sall furnis here
The irne graith the werkmen, and the wrichtis
And all that to the schippis, langis of richtis
And forther eik it likis, me quod he
To •er my wourdis, to thys prince Enee
And to conferme our freyndschip, and our pece
Ane hundreth gay ambassatouris, but le•s
Of gretest blude, of the latyne menȝe
And in thare handis reik furth, the peciabil tre
And bere him giftis, and rewardis large
Of gold and euore, mony soume and charge
The chare or sete, according for the ring
Our rob riall ensenȝeis, for ane king
Awyse hereon amang ȝou, for the best
And helpe to bringe our febil, wile to reste
Ane Drances tho vpstude and speik began
The quhilk Drances, was the self man
That as we said, haue latlye here to fore
Was richt molest, to Turnus euermore
Quham the renowne, of Turnus and glorie
Prikkit full sore with lurkand, hid inuy
Of moblis riche, and plenteous was he
And maist expert in speiche, and wordis sle
Bot of his handis, in to battall stede
Full cald of curage, dolf as ony lede
And in to counsalis geuing, he was hald
Ane man not vndegest, bot wise and cald
Bot ane seditioun, or ane brek to mak
Sa maisterfull tharin was, nane his maik
The nobill kinrent, of his moderis syde
Maid him full grete of blude, and full of pride
His fader was vncertane and vnknaw
And vp he stertis, in this ilk thraw
With thir wourdis Turnus, to our charge
Aggregeing on him wraith, and malice large
O douchty king thou askis counsele said he
Of that mater, quhilk as semes me
Is nouthir dirk nor doutsum, but full clere
That mysteris, not our auisis bene here
The pepil hale grantis, that thay wate
Quhat fortoun schawis, and in quhat estate
Our matteris standis, bot thay ar arth to schaw
Quhisperand amangis thame, thay stand sic aw
Bot caus him gif thame liberte, to speik
Do way his boist that, thare breith may out breik
I mene of him, be quhais vnhappy werde
And fraward theuis now dede, on the erde
Sa mony chief Chiftanis, and dukis lyis
Forsoith I sall say furth, all myne auise
All thocht with braik, and boist or wappinnis he
Me doith awate, and manace for to de
For by his dedis may we se, expres
This ciete halely plungit, in distres
Quhilkis that he has made, him to assay
The troyanis strenth, and stall sa sone away
Hauand assurance, for to withdraw and fle
And into armes dois boist, the heuynn ys hie
But o thou al thare best, and riall king
To all thir giftis eikis, but ane thing
Vnto thir presendis, and wise wourdis sere
That to troyanys thou has bid say, and bere
Eikys ane gift, and lat neuir demyt be
The bustuousnes, of ony man dant the
Bot that thy dochter, O thou fader gude
Vnto ȝone gentill prince, of whurthy blude
Be geuin to be thy son in law, I wys
As he that wourthy, sic ane wedlokis
And knyt vp pece, but mare disseuerance
With all eternall band, of alliaunce
And gif sa grete dreddour, or drede haue we
Within our myndis, or our breistis quod he
That for Turnus we dar not, do sic thing
Than lat vs for the welefare, of this ryng
Beseik him tharfore, and with hale intent
Requier him that he, wald grant his consent
So that the king, at his fre volunte
Mycht vse and do, his proper dewite
And for the wele public, of this land,
Desire that he na wise, thareto gane stand
O Turnus hede, and causere verely
Of thir myscheuois grete, in Italy
Quhare to sa feil syis, in plane perrellis now
Thir silly wretchit cietezanis, warpis thou
Nane hope of welefare, haue we in this were
For pece halile, we all require
To giddir with Lauinia, the schene may
Quhilk is the pand or plege, this dar I say
Of pece to be kepit in violate
And I forsoith quhilk is, by thy consate
Thou fenys thy euyll willare, for to be
And for the commoun wele, sa mot I the
So for to cum, I refuse not gude brother
Bot lo me here now, formest of all vthir
Humelie the beseiking, I require
Haue mercy lord, of thyne awne freyndis dere
Lat be thy stout mynde, go thy way but lak
With ane mare strang, rebute and driue a bak
Dede corps bet doun ynew haue we sene
Our large feidis, and boundis all betwene
Left desolate and waist, of Induelleris
Bot gif thy fame, and gret renoune thou steris
Gif in thy breist sa hie curage, and mycht
Thou has consauit think and the so wicht
And gif that on sic wise this hald riall
Suld be thy drowry, and riche gift dotal
Thou betis in hert, and is to the sa dere
To vndertak, this thing, and end the were
Addres thy body baldly, and not spare
For to recounter agane, thy aduersare
To that intent, that Turnus al his lyfe
May weild the kingis douchter, to his wyfe
So that we dolf of curage, as the lede
Be not doun strowit in the feildis dede
In cumpanyis vnberyit, or bewalit
Bot thou that has in feild sa fele assayit
Gif ony strenth thou has, or hardiment
Or marcial prowes, stering thine entent
For thy cuntre, aganis the for his richt
Behald thy sa prouokand the to ficht
ȝounder al reddy, to make his party gude
Delay no mare, but manfully go tude

The feirs mind of turnus this bald syre
At sic sawis kindillyt, hait as fyre
Sichand richt sore depe, in his breist anone
Thir wourdis pronouncis, with ane pietuos grone
Drancis forsoit quod he euer has thou bene
Large and to mekil of speche, as weil is sene
Now quhen the batel, desiris werk at hand
The counsel sittand, first thou does vpstand
Bot not with wourdis suld the court be fyllyt
Set thou be grete tharm, and ful euill wyllit
With haltand wourdis, fleand from the here
Quhen thou assouerit art, of al dangere
Sa lang, as that our strenthy wallis gude
Our inemies debarrit, dois exclude
Or quhil the fowsyis of our forteres
Kinnis not ouer, of bludy spate I ges
Tharefore trump vp, blaw furth thine eloquence
As thou was wont to do, make thy defence
Bot than thou may drances, be mine auyse
Me to reproche of fere, or cowardise
Quhen that thy richt hand, in to batal stede
Sa mony hepis of troianis, has laid dede
And quhen thou takinnit has, sa vnwourthely
With signe tropheal, the fild as haue I
Ful cith it is, for til assale and se
Quhat may our sprety force, in the melle
And als full wele, is knawin to vs cik
Our fa is bene not fer, from thens, to seik
Bot plant about the wallis, of our toun
Aganys thame, go make vs redy boun
Quhy duellis thou, and taryis thus al day
Quhiddir gif thy marciall dedis as thay war ay
In to thy wyndy clatterand toung sal be
And in thy cowart fete, euir wount to fle
Sais thou, I was repulsit, and driffe away
O maist vnwourthy wicht, quha can that say
O me Iustely reprocheing, of sic lak
That I rebutit was, and doung abak
By me quhen thou beheld, mycht Tyber flude
Boldyn and ryn on spate, with troyanis blude
And al the femel, of Euander king
Brocht vnto ground, alhale and his ofspryng
And the Archades confoundit, and ouerset
With mony ma in armes, I doun bet
The grysly bytais, and Pandarus hys brothyr
Thay ar expert gyf I fled, ane or vthir
And eik thay thousand saulys, on ane day
Is vyctor I to hel send, hine away
Quhen that I was inclusit, at dystres
Amyd my ynemyis, wallys and forteres
Thou sayis in were na hope, is of welfare
O w•les wicht pronunce that and declare
Sic chance betid ȝone dardane, capitane
And spay sic thingis, vnto thy dedis ilkane
And forther eik sen thou art made becum
Ceis not for to pertrubil, all and sum
And with thy fellound, reddour tham to fle
The febil mychtis, of ȝour pepill fey
In to batal twyis vincust, schamefully
Spare not for tyl extoll, and magnify
And be the contrare the pissance of Latyne king
Do set at nocht, but lichtlie and doun thring
Now the nobil myrmydone, capitanis
Quakis in armis, for fere of the troianys
And now Tedeus, son diomedis
Agast is, and Larissiane, Achilles
And Ansidus the swift, flowand riuere
Rynnys contirmont, frawart the sey for fere
And quhil also this ilk, schreuit wycht
That is contruwar, of many wikkit slycht
Fenȝeis him fleyit, or abasit to be
That he dar not chide furth incontrare me
Than with his drede, and sle contruwit fere
My cryme aggregeis, he on his manere
Desiste drances be not abasit, I pray
For thou sall neuer leis, schortlie I the say
Be my wappin nor this rycht, hand of myne
Sic and peuis and catiue, saule as thine
And lat it duel with the, as best may gane
Within that wrechit corps, and thare remane
Now O thou grete fader, and prince souerane
To the and thy counsale, I turne agane
Gif thou list no thing traisting, nor affye
In •o our armes, nor our cheuelrye
Gif that we be of help, all desolate
And hale at vnder, in to this last debate
Distroyit for ay, and na help may mak
For that our oist was, anis dreuin abak
And fortoun has na returne, nor regres
Lat vs beseik, for peace at sic distres
Mak him request to rew apoun our harmis
And reik him furth, our richt arme bare of armis
How beit o wald god in this extreme nede
That ony thing, of curage or manhede
Remanit, as was wount with vs to be
Abuse the laif, thame wourthy thinkis me
Maist fortunate, in fatis marcial
And excellent, in hie curage, ouer al
Quhilkis wilfully, as thame se••in wald
That thay ne sulden, sic myscheif behald
Feld dede to ground, be fatal happy werd
And with thare mouth, anis byte the erd
Bot gyf we haue riches, and moblis sere
And euir assayit, ȝit fresche ȝoung powere
And in our helpin, of Italianis
Cieteis and peplis, haboundis and remanis
Or gif that also, to the troiane syde
Wyth effusioun of blude, and woundis wyde
This victor betid, as traistis me
Thay haue als fele dede corps, as haue we
Gyf thys tempestuous traik, of the batal
On baith the halfis, is al ou• equale
Quhy failȝe we sa schamfully our mycht
Into the fyrst entre, of the ficht
Quhy quakis thus oure membris, vp and doun
Before the bludy blast, and trumpis soun
For time felesyis, and eik the varyant chance
Of our instabyl lyfe, hing in ballance
Reducyt has, ful mony vnlykly thyng
To better fyne, than was thare begynnyng
And fortoun interchangeabill, with blenkis quent
Full mony ane dissauit, has and schent
Syne efter in ane thraw, thus wele I wate
Restorit, thame agane, to thare ferme estate
I put the cais set, the Etholianis
With Diomede, and the pepill arpanys
List not tocum, in our help nor supple
ȝit than the bald Mesapus wele, will be
And the happy columpnyus, alsua
With all the vthir dukis mony ma
That fra sa feil pepillis, bene hidder sent
And nane litill renowne be myne entent
Followis the chosin folkis, of Italie
Nor tham that dwellis, in Laurente feildis hereby
Haue we not eik, the stalwart Camylla
Of the famyll, and kinrent of wolsta
Ledand thare armyt oistis, and sterne feildis
In burnist plait arrayit, and schynand schildis
Bot gif the troiane pepil, euery ane
Desiris me to feill, fecht in feild allane
Gif that be plesand vnto the, schir king
And I sa fer eftir Drances mening
Gane standis the commoun, wele in to that cais
That schame, sall neuir betid me in na place
For victory me hatis, not dar I say
Nor list sic wyse withdraw, thir handis tway
That I refuse suld till assay, ony thing
Quhilk mycht sa grete beleif, of weil inbring
With stout curage agane, him wend I will
Thocht he in proues pas the grete Achill
Or set in cais sic armour, he weris as he
Wrocht be the handis, of god Vulcanus sle
To ȝou and king Latine, my fader, in law
I turnus here, quham ful wele ȝe knaw
Na thyng behynd, na to be repu••es
To name of all our eldaris, in prowes
Thys saul and lyffe, the quhilk sa wele I luf
Doith promys and auowis, for ȝour behuffe
Thay say allone, me challancis Enee
And I beseik grete god, he challance me
Na bid I not that drantis dere aby
Ocht with his deith, quhare apposit am I
Nor quhiddir this turne, to goddis wraikfull wrask
Or hardyment and honour, we vndertak
Na thing at all thareof, salbe hys part
The chance is myne, I will it not estart

Quhil thay thus, at grete altercatioun were
Amangys thame self, in doutsum thingis sere
Eneas all his oist, and hale armye
Has rasit trumpin, to the toun in hye
Ane messingere come ruscheing, in with haist
Amyd the rautis ran, as he war chaiste
Than with huge rumour, and ferefull dyn
Fyllit anone, the kingys riall In
And with grete drede, the ciete stuffit all quhare
Schawand how that thare fais cummyn ware
In plane batall arrayit, to conclude
The troyane barnage, from Tyber the flude
With ordynance of tuskane, that did spred
In forefront all the large feildis, on bred
Anone the pepillis hartys affrayit war
And commonis breystys proplexit all for fere
In sum the greyf, and Ire dyd fast haboynd
Rasyt wyth braithfull stangis full vnsound
And with ane felloun drede, all on stere
Thay hynt to harnes, and cryis eftir thar gere
Harnes harnes, all the ȝoung cietezanis
With felloun brute, and noyis schoutis attanis
The febill agit faderis wo begon
Can plene and wepe, with mony ane piteous grone
In euery part the grete clamour, and cryis
In diuers opinionus, rais vp to the skies
Nane vthir wise, than as sum tyme we knaw
The flicht of birdis fordyanys, the thik schaw
Or than the rauk, vocit swannys in ane rabil
Soundand and southand, with nois lamentabill
Endlang the lemand stankis, and stremes clere
Of Padusa sa full of fyschis sere
Turnus that fand his time, so oportune
Now baldlie sais he, cietezanis haue done
To call ȝour counsell, takis auisement
Syttand at eis ilkane, say his entent
Carpis of pece, and ruse it now lat se
Quhen that thay ȝounder, inuadis ȝour cuntre
ȝour mortal fais enarmed, ȝou assale
Na mare he said bot stertis vp, sans fale
And of the cheif palice, ischit furth in hy
Thus carpand to the nobillis, stude him by
Go tite Volisus, to the banereris
Of the wolstanis, and thame that stanrdatis beris
Charge thame thare ensenȝeis, for to rais on hicht
And in thare armour addres, thare men to ficht
And ȝe Mesapus Coras, and ȝour broder
The horsmen all enarmed, ane and vthir
Conuoyis furth vnto the feildis brade
Ane part of the cietezanis, he said
Do stuf the entres, and the portis defend
Sum to the touris, and wall hedis ascend
The remnanent of al ȝour hale menȝe
Quhen I command, lat thame set on with mē
Anone ouer all the ciete, by and by
Vpoun the wallis ryn, thay vp in hy
The king Latine his counsal, full vnglaid
And grete materis, quhilkis he begunyng had
Left and deferrit, quhil ane vthir day
Trist in his mynd, and trublit of that delay
And mony wayis him self, he accusit
That he sa lang had sleuchit, and refusit
To resaif glaidlie, the troyane Enee
Repenting sore for wele, of his ciete
That he had not requirit hym, and draw
Or than to be his mauth, and son in law
Sum tho thare ciete enter for to kepe
Before the portis, delfis trinschis depe
Sum to the ȝettis weltis, wechty stanys
And sum grete geistis, and sillys for the nanis
The bais trumpet, wyth ane bludy soun
The signe of battel, blew ouer all the toun
The wallys than thay stuffyt, round about
With diuers sortis of mony, syndry rout
Bayth wyiffis barnis, chyldir men and page
Na kynde of state was, sparyt tho nor age
The hiest poynt nor lattir resistence
Callit euery wycht to labour, and defence
The quene also amata, furth can hald
And to the tempil, and pallas souerane hald
Borne in hir chare, and walking hir about
Of Matrouns, and nobil wemen ane rout
Offerandis and gyftys, brocht with hir scho had
Nixt hand hir went, Lauinna the made
The cause of al this harme, and woful tene
That doun for schame, did cast hyr lusty ene
The matrouns enteris in, the goddis presence
And smokis the temple, with swete vapour and sence
And reuthful vocis, warpis vp on hie
Als sone as thay, atteynit the entre
O thou sayd thay, Pallas armipotent
Tritonia clepit, made and president
Of batal and of weris, euery one
With thy virginal handis, breke anone
ȝone troiane Ryueris, wappinnis and his spere
Him self als tite, doune to the ground thou bere
Vnder our portis, and our wallis hie
Doun warp him dede, that we that sycht mych se

Turnus him self, als feirs as ony glede
Ful besely addressit on his wede
Desirus of the batall, and bergane
In til ane clois curace, rutiliane
Be than his body wele cubrasit had he
His birnest armour auful for to se
Wyth lymmes claspit, in platis gilt with gold
And hede al bare, ȝit as him self in wald
The dedely brand, he beltis by hys syde
And schynand al of bricht gold fast can glyde
Throw out the palice rial, here and thare
Reiosit in his mynd, as thocht he were
In ferme beleif, for til ouerset his fo
And on sic wise, can walkin to and fro
With hart hingand, on the ioly pyn
As sum time dois the coursere, stert and ryn
That brokin has his band, furth of his stall
Now gois at large, ouer the feildis al
And haldis towart the stedis in ane rage
Quhare meris walkis, in thare pastorage
Or than vnto the depe rinnand riuere
Quhare he was wont to drink the water clere
He sprentis furth, and ful proude waloppis hie
He strekand vp his hede, with mony ane ne
Out ouer his spaldis, and lang nek by and by
Hys lokerand mayne, schakand wantonly
Siclike this Turnus, semys quhare he went
And as he bradis furth apoun the bent
The made Camilla, cummys hym agane
Accumpanyit with hir, oistis wolstane
Before the portis, doun lichtis the Quene
Quham al the rout, has followit bedene
Discendand from thare horsis esely
Syne on sic wyse, this lady spak in hye
Turnus sayd sche, gif ony hardy wicht
May traist or ȝit assure in thare awyn mycht
I vndertak, and dar promys allane
To mache in feild, the oistis Eneadane
And baldly dar recounter in melle
All the hors men, of the tuskane menȝe
I the require, suffir me to assay
With my retinew, and thir handis tway
The first dangere in batal, or I stent
Byde thou behynd, on fute in the buschement
And kepe the wallis of this toune sche said
Turnus his ene, has fixit on this maid
That verely was, and auful for tose
Syne on thys manere, to hir, ansueris he
O thou virgine glory of Italie
Quhat thankis ȝeild, or rander the may I
Or quhat may I refer, to thy renowne
Bot sen thowart, to all thyng reddy boune
Surmonting, al in curage souerane
Now at thys tune, of sic laubor and pane
Grant me my part, sa that on athir syde
Betuix vs twa, the bargane be deuyde
Herk I sal schaw ȝou myne auise quod he
ȝone detestabil, and myscheous Enee
As that the rumoure, surelye has made kend
And als my spyis, schawis was thidder send
Ane certane hors men, licht armyt for the nanis
Has send before, for to forray the planis
Him self ascendis, the hie band of the hill
By wentis strate, and passage scharp and wil
Schape on our ciete, for to cum preuilye
Tharfor ane prat•ik, of were deuyse wyl I
And ly at wate, in quyet enbuschment
And athir p•this hede, or secrete went
In the how stake, be ȝounder woddis syde
Full dern I sal my men, of armes hyde
Set thou apoun, the horssit tuskane rout
Wyth pynsellis semblit, sammyn with ane schout
The stalwart Mesapus, with the sal go
The latyne barnage, and the brethyr two
That capitanis come, fra tyburtyne ciete
Wyth al thare ordinance, and hale menȝe
Tak thou the cure, with thaym to reule and stere
Alhale that riall army, into were
Thus sayd he, and with sic wordis at schorte
Mesapus to the fecht, he did exhort
And all his feris, syne euery capitane
And syne towartis, his aduersaris is gane
Thare lay ane vale, in ane crukit glen
Ganand for sticht to enbusche armit men
Quham wounder, narrow apoun athir syde
The bewis thik, hamperith and dois hyde
With skuggis derne, and ful obscure perfay
Quhar throw thare strekit, ane rod or ane strate way
Ane narrow peth, baith out gang and entre
Full scharp and schrewit passage wounder sle
Aboue the quhilk, apoun thy hill on hicht
Quhare men mycht spy about ane wel fare sycht
Thare lyis ane, plane, to the troianis vnknaw
Bot quha sa list, towart that stede to draw
It is ane stll•• place, and sobir herbry
Quhare oft in stail, or enbushment may ly
Quhidder men list, the bargane to abyde
Qwthir on the richt hand, or on the left side
Or on the hicht, debate thame for the •anys
And on thare fays, welt doun wechty stanis
Thidder ȝoung Turnus held and did discend
As he that al the passage, wel bekend
The place he tuke, and ful priue vnknaw
Liggis at wate, vnder the derne wod schaw

The mene sessoun, Latoneis douchter diane
Wythin hir sete, of heuynnis souerane
The swyft opys ane nimphe, ane of hir feris
Ane haly virgyne, of hie sort mony ȝeris
To hir callis, richt dolorus and vnglaide
And sichand sare, to hir sic wourdis sayid
O virgine dere, lo now Camylla gais
To cruel batel, agane her mortal fays
And al in vane, with hir into sic weris
Our wappynnys and our armour, with hir beris
I the declare, and certyfyis quod sche
Aboue al vthir, ful dere is sche to me
Na this lufe southly, is not commyn of new
Nor ȝit of lait, in dianis breist vp grew
And wyth ane hasty sueitnes mouit my sprete
Bot of auld kindnes, lang tyme vnfor lete
For quhen hir fader, Mechabus the kyng
Was throw inuy, expellit his ancient ryng
Of Priue run, and for the cruelte
Of his pepil fled, from that ciete
Wyth hym he bare, the ȝoung infant so dere
To be hys fallow in exile and playfere
And eftir hir moderis name, hait Casmilla
Camylla has clepit, ane lettie tane awa
Before him in his bosum, he hir bare
And socht vnto the wilsum holtis hare
His cruel fayis, with thare wappinnis kene
Him vmbeset, in al partis in tene
With armyt men, and wageouris, the wolstanys
So nere almoist, be lappit him attanis
Thare was na passage, quhare away to fle
For lo amyd the went, quhare ettillit he
Amasenus that riuere and fresche flude
Aboue the brayis, bullerit as it war wod
From the clouddis was brist, sic spate of rane
The riuer flowis, ouer the large plane
He dressand hym to swym, at the bank syde
For the luf of the ȝoung bab, moist nede abide
And for his dere birding, dreading sore
Ilk change in haist, did row in hys memore
And skars his sentence, into his mynde
His douchter, for to clois wythin the rynde
And stalwart sipplyne, or bark of Cork tre
For in his hand, the self tyme had he
Ane bustuous spere, percais baith stif and sture
As he that was, ane wourthy weriour
The schaft was sad, and sound and wele ybaik
I wymplit in his bark, tho did he taik
His ȝoung douchtir, and with his awne hand
Amyddis of this lance ful surlie band
Quhilk tasand with his richt hand, sone on hie
Vnto the heuine aboue, thus carpis he
O blissit made Latonia ouer al quhare
Of wylde forestis, the Inhabitare
I fader here professis, seruand to the
This tendir ȝoungling, bund vnto this tre
Fleand his fais, throw the sayes lo
Knyt to the schaft, laulie beseikis scho
Ressaue hir lady, and testify god wate
As thyne alhale, vnto the dedicate
Quhilk now thou seis, standis in dangere
Commyttit to the windis, and the aire
Thus sayd he, and anone with ane swak
His gardy vp has bendit, fer abak
And threw the spere, with al his force and mycht
The stremes soundit, of the schaftis flycht
Ouer this feirs riuer, to the forther bra
The fey vnsilly bab, ȝoung Camylla
Flaw knyt vnto this quhirlland schaft of tre
Bot this mechabus, quhen that he did se
The grete preis, of his fais him sa nere
Na langar duelt, bot swam throw the riuere
And cummyn to hys purpois, blyith and glaid
The spere anone, sa buklith wyth the maid
In presand vnto the thrynfald diane
Furth of the grissy swarde he had vp tane
Na rurale biggingys, nor ȝit na strang ciete
Wald hym ressaue, within thyr wallys hie
Nor thay wald him to herbry haue tane
His fers mynd, couth not subdew to nane
•o that in manere of hirdis, in pasturage
On wylde montanis, he wounit al his age
Quhare that hys douchter, amang bu••is rouk
In derne ••adis and mony sloggy o•k
Wyth milk he nurist, of the beistis wilde
And wyth the pappys, fosterit he hys chyld
Of sauage stude meris in that forest
Oft tymes he thare breistis mylkit and prest
Within the tendir lippis of his get
And fra the child mycht fute, to erd set
And wyth hyr solis, first did mark the ground
With dartis liene, and hedis scharplie ground
Hir fist, and hir handis chargit he
And at hir sulder buklit on has he
Ane propir bow, and ane litil arrow cace
And for hir goldin garland or hede lace
In stede eik of hir syde garmound of pall
Ouer hir suldderis, from hir nek doun with all
The grisly tygris skyn, of rent did hing
The self tyme ȝit sche bot tendir ȝoungling
Thir dartis, and the takillis swyft let glide
And oft about hir hede, the ilk tyde
Wald warp the stringis, of the stout staffe slyng
Quhare wyth fele syis, to ground dede wald sche ding
The cran of trace, or than the quhite swan
For not sche was, desirit with mony a man
And moderis fele, throw the townis tuskane
Desirit hir thare gude dochter in vane
For sche onlye ful ferme in hir entent
Of dyane goddes, of chaistite flude content
And list to hant euer in woddis with me
The dartis schutting, and loue virginite
Remanand incorrupt, and ane clene made
I wald forsoith at this tyme sche abade
And had not haistit, to sic cheuelry
For to molest the troyianis stout army
Bot that ane of my feris suld be
As sche that is oft, al tyme dere to me
Haue done anone now nymphe Opis sche said
Wyth wikkit fatis sen bestad is ȝone made
Thou slide doun, from the heuin and that in hy
The Latyne feildis thou wesy and espy
Quharein the woful batal and melle
To ane vnhappy chance, betaucht has sche
Tak thir dartis, and sone out of my case
That Ilk reuenge able, arrow thou out rase
Quha euer with wound dois hurt or violate
Hir haly body vnto me dedicate
Quhithir he be troiane or Italiane
All is elike, that he anone be slane
And with his blude, myne, offence dere by
My self thare eftir, the ruthful corps in hy
Amyd ane bois cloude, sal cary away
Vnspulȝeit of hir armour or array
And hir bigraue, reducit to hir cuntre
In sepulture, ful glorious said sche
Than Opis lichtlie, of the heuynnys glade
Throw out the skyis southand fast doun glade
Persand the are with body, all ouer schroude
Addekkit in ane wattry sabil cloude

During this quhile, the troyane power all
Approchis fast, towart the ciete wall
The tuskane dukis, and hors men routis alhale
Arrayit in batall, euery warde and stale
Ouer al the planis, brayis, the stampand stedis
Ful galȝeard in thare bardis, and werely wedis
Apoun thare strate born brydillis brankand fast
Now trypand here, now thare his hede did cast
The large ground worth grisly vnto se
Of stele wappinnis, and scharp spere hedis hie
And as the fyre al birnand schane the feildis
Of bricht armoure, hie helmes and braid scheildis
Aganis thaym anone, also apperis
The bald mesapus, vaileȝeand in weris
The agil latyne pepyl, wyth hym was
Ane duke Catellus wyth his brothir Coras
And eik the weing, or wolstan• pepil in feild
With the s•ou• wensche Camylla vnder scheild
And furth thay stroke, thare lang speris wele far
Drew in thare armes, wyth schaftis chargeit on fer
Tasit vp dartis, takillis and fleand flanis
The counter or first tocum, for the nanis
Ful ardent woix, and auful for to se
The men birnand, to Ioue in the melle
And furoure grew, of stedis sterand on stray
Now thay approcheing, sammyn in array
Wythin ane arrow, schot on athir syde
Syne made a•e litil stope, and stil did bide
Rasit vp ane schout, bad on thaym wyth ane cry
Quhil brute and clamour, fordynnyt the sky
Thare feirs stedis, for the bargane there
On athir half, thay mak ane werelike fere
And ther withal, attanis on euery sydis
The dartis and fleand, takillis glidis
As dois the schoure of snaw, and with that flicht
Dirkynnyt the heuynnys, and the skyis licht
Thirrenus tho ane, of the tuskane rout
And Aconteus, ane rutuliane ful stout
Togidder semblit, with thare speris ran
To preif the first fal, samyn man for man
Thay met in melle, with ane felloun rak
Quhill schaftis, al to schudderis with ane crak
To gidder duschis, the stout stedis attanis
That atheris counter, fruschit vthers banys
And Aconteus, like the thunderis blast
Smate from his sadil, an fer way was cast
Or lik ane stone, warpyt from the ingyne
That al to fruschit doun, he did decline
Wyth sic rebound, and rewyne wounder sare
That he his lyfe has sperplit in the are
Al suddanly, the Latynis tuke ane fray
And gaif the bak bedene, and fled away
Tharescheildis, ouer thare sulderis kest behynd
And to the toun spurris, als feirs as wynd
The troianis did persewing on the chace
And fast inuadis thaym prince Asillace
Quhen thay approchein, to the portis nere
The Latyne pepil, returnis al in fere
Thare wele danit hors, nekkis quhelit about
Syne gaif ane cry, and one thaym with ane schout
The tothyr party, than has tane the flicht
Leit ga the bridil, and fled in al thare mycht
Lyke as the flowand se, with fludis roude
Now ruschis to the land, as it war woud
And on the skellyis, at the coistis bay
Vp swakkis fast, the samyn wallis gray
And with his Iawpis, coweris in and out
The fare sandis, ouer the bay about
Now with farde swift gois, ebband fast abak
That with hys bullerand Iawis, and ouerswak
With hym he soukis, and drawys mony stane
And leiffis the strandis, schald and schaldis plane
The tuskane folk, the latynys on sic wyse
Vnto the ciete wallis, chasit twyis
And twyis thare self, did fle and gaif the bak
With scheildis, at defence, behynd thaym swak
Bot thare eftir, the thrid assay thay mak
The oistis samyn, ioned with an crak
That euery man has chosin him hys fere
And than forsoith, the granys men micht here
Of thaym that s•eruyng, and doun bettin bene
That armour wappinnis and dede corps bedene
And stedis thrawand, on the ground that weltis
Mydlit with men, quhilk ȝeild the goist and sweltis
Bedouin lay ful depe, in thare awin blude
The stoure entrestis, furius and wod
Orsilothus ane troiane, with al his fors
Drelsis hys lance, at ane Remulus hors
For hym to mete, he stude ane maner fere
The hede remanit, vnder the hors ere
The stede enragit, for the cruel dynt
And lawsus apoun hicht als fers as flynt
As he that was Impacient, of his wound
That Remulus doun weltis on the ground
Catillus ane of the brether tyberine
Yollas doun bet, and thare eftyr syne
The grete armynius wounder big of cors
Bot f•r bigger, of curage and of fors
Quhots hede and schulderis, nakit war and bare
And on his croun, bot lokkerand ȝallow hare
And thocht he nakit was and vode of gere
Na wound nor wappin mycht hym anys effere
Forganis the•speris, so bustuously blomyt he
That this Catillus stalwart schaft of tre
Throw girdis baith, his braid schulderis banis
And wyth the dynt stude, schakand al atanys
Transfixit so, and persit euery part
It doublis and renewis the mannis smart
The blaknyt dedlie blude, on athir syde
Furth ruschis out of werkand woundis wyde
The swerdis baithit, wox in bargane rede
Fele corps kelit in the feild fel dede
And caucht ane douchty end to swelt in ficht
By hurtis fele, for to mant•me the richt

The auful made Camylla the ilk tyde
Wyth cais of arrowis, caichit by hir syde
Amyd the slauchter and melle apoun hir fone
Proudly pransis like ane wynsche amazone
That for to hant, the bargane or assay
Hir rycht pap had cut and brynt away
And now the sowpil schaftis, baldlye sche
On athir side, thik sparpillis and lete fle
Now not I, irkit in batal, stich to stand
Ane stalwart ar, scho hintis in hir hand
Apoun hir schulderis, the giltin bow turcais
With dianis arrowis, clatterand in hir cais
And gif that so betid in to that flicht
Hir feris gaif the bak and tuke the ficht
In to the cais oft wald scho turne agane
And fleand with hir bow schute, mony ane flane
About hir went, hir walit stalwart feris
The made laryna, and tulla ȝoung of ȝeris
And Terpeia, that stoutly turnis and swakkis
With the wele stelit and braid billitax
Italianis borne quham the nobil Camylla
Had to hir louing and honour deput sa
To bene hir seruand in ganand tyme of pece
And in battel to stand by hir in preis
Like as of trace, the wenschis amazonis
Dynnys the flude thamodane for the nonis
As in thare armour do thay fecht
Outher about hypollita the wicht
Or by the werelike made Panthesille
Rolland hir cart of were to the melle
The woman routis baldly, with the assay
Wyth felloun brute grete reuery and de•ay
Furth haldis samyn, on the feildis sone
Wyth crukit scheildis, schapin lyke the mone
O thou sterne made Camylla, quhat sal I say
Quham first quham last, thou strake to erde that day
Or how faill corps in the batal stede
Thou layd to ground, ouerthrew, and put to dede
And with the formest, Ewmynius that was one
Son to Clyseus, quhais brode breist bone
With ane lang stalwart spere, of the fyr tre
Throw smyttin tyte, and peirsit sone has sche
He cauis ouer furth bokkis, stremis of blude
And with his teith, eik schortly to conclude
The bludy erde he bate, and as he sweltis
Apoun his wound oft writhit, tumlis and weltis
About this nixt scho, eikis vthir two
Loris, and ane pagasius also
On quhom the tane, that is to say loris
As that he fordwart stoupan was Iwis
To hynt his hors rene, that gan to founder
And the tothir present, to kepe him vnder
Furth straucht his febil arme, to stynt his fal
To ground togidder, ruschit ane and al
And to hir sine, the son of hyppotes
Amastous hate dede scho, adionit in pres
And lenand fordwart, on hir lance of tre
Terreas and herpa•itas, chasis sche
Persewand eik, ful bustuously anone
The bald Cromys, and strang Demophone
How fele dartis with her handis, kest this made
Als mony troianis to ground, dede scho layd
Ane Ornitus ane hunter, fer on raw
In armur and in cognissence vnknaw
Rade on ane coursour of apulȝe, throw the feild
His brade schulderis, wele cled and ou•rthelld
With ane ȝoung bullis hyde, newly of hynt
His hed couerit, to saif hym fra the dynt
Was with ane wolfis, hidduous gapand Iowis
Wyth chaftis brade, quhite teith and bustuous browis
To mak debate, he held in til his hand
Ane rurale club, or culmes in stede of brand
And quhare he went amyd, the routis on hye
Aboue thaym al, his hale hede men mycht se
Camylla him at myschefe, has vnset
Scho bare hym throw, and to the ground doun bet
Norna grete curage, forsoith was that no mycht
For al hys rout, tofore had tane the flicht
Bot forthir eik, thys forsaid Camylla
Wyth mynd vnfreyndly, can thir wourdis sa
Thou thirrene fallow, quhat wenyt thou to be
In woddis chasand, the wylde dere quod sche
The day is cummyn, that ȝour proude wordis hate
Ane womannis wappin, sal resist and debate
And not theeles, na litil renowne
From thens thou sal do turs, away with the
And to our faderis goistis, blithly schaw
That with Camyllais, glaue thou art ouerthraw
Incontinent this madin eftir thys
Slew Orsilothus, and ane that hate butis
Twa byggest men, of body and of banys
Of al the oist, and fallouschyp troyanis
Bot this ilk Butis, standand hir before!
Out throw the nek, did sche pers and bore
Betuix the hawbrek, and the helme on hye
In at hys hals, quhare sche dyd nakyt espye
For ouer hys left schulder, hang ane scheild
Bot this orsilothus fled hyr in the feyld
And gan to triūphe, with mony ane turnyng went
In cirkillis wide sche draue hym on the bent
With mony ane cours, and Iouk about about
Quhare euer he fled, sche followis in and out
And at the last, sche has ouertak the man
And throw his armour all, and his harne pa•
Hir braid pollax, rasit so on hie
With al hir fors and mycht, syne strikis sche
As he besocht, hir grace, with grete request
Sche doublit on hir dyntis, and so him prest
Wyth fell woundis, his hede has torte and rent
His harnes bait, ouer al his vissage went
And Awnus son, quhilk also awnus hate
On cais betid approche, in the debate
Towart this made, and als sone he hir saw
Abasit huffis, stil for drede and aw
Into the mont opennyus duelt he
Amang liguriane pepil, of his cuntre
And not forsoith, the lakest weriour
Bot forty man, and richt stalwart in stoure
So lang as fatis sufferit hym in ficht
To exerce prattikis Ieoperdy and slicht
This awnus, fra that wele persauit he
Na wai to fle, nor eschew the melle
Nor mycht eschape, the quene stud hym agane
Than he begouth assay, hir with ane trane
And with ane sle dissait thus first he sayd
Quhat honour is, till ane stout wensche or maid
For tyl assure and traift, in ane strang hors
Leif thy swift stede, and traist in thyne awyn fors
At nane auantage quhen thou list to fle
Licht on this plane, and hand for hand with me
Addres vs to debate on fute allone
Thare sal thou se, thare sal thou knaw anone
Quhom to thys wyndy glore vast and avantis
The honour, or with pane the louing grantis
Thus sayd he bot sche than als hate as fyre
Aggreuit sore inflammit in felloun Ire
Alicht and to hir mait the hors betaucht
At his desire anone on fute vpstraucht
With equale armour, bodin wounder licht
The drawin swerde in hand that schameful brycht
And vnabasit abaid, hym in the feild
Abulȝeit onlie, bot wyth ane qubite scheild
The ȝoung man wenyng with his sle dissait
He had begilit hir, with his consate
About his bridill turnit, but mare delay
And at the flicht sprent furth and brak away
And feil sydis let, his hors sydis feil
The scharp Irne spurris prik apoun his hell
O quod the made, thou fals liguriane
Ouer wantoun, in thy proude mynd al in vane
O bariant man, for not perfay quod sche
Has thou assayit, thy cuntre craftis sle
Dissaitfull wicht forsoith I to the say
Thy slicht and wilis, sal the not bere away
Nor hailskarth hyne do turs the hame fra vs
Vnto thy faderis hous, the fals awnus
Thus sayd the wensche, vnto this vthir syre
And furth sche sprent, as spark of glede and fyre
With spedy fute, so wiftly rinnis sche
By past the hors renk, and furth can fle
Before him in the feld, wyth grete disdene
And claucht anone, the coursere by the rane
Syne set apoun baldlie, quhare sche stude
And hir reuengit of hir fais blude
Als lichtlie as the happy gois halk, we se
From the hicht of ane rokit, pennakil hie
With swift wyngis, persewis wounder sare
The silly dow, hiech vp in the are
Quham fynale he chepis at the last
And lonkit in his punsis saris fast
Thristand his callouns, so throw hir entrallis
Quhil al the blude aboundly, furth ralis
And wyth hir beik, deplumand on al sydis
The licht downis vp, to the skyis glidis

The fader of goddis, and men wyth diligent ene
Has al hir dedis, vnderstand and sene
And setuate in his heuinlie hous on hie
Inducis and commuis to the melle
Tarch one of Tuskanis principal lord and syre
In braithful stoundis, rasit brym as fyre
So that amyd the ful mischeuus ficht
The grete slauchter and routis, takand the flycht
On horsbak, in this tarchone baldly draw
Wilful his pepil, to support and saw
Thewardis al, of euery nacioun
Wyth admoniciouns sere, and exhortacioun
And diuers wourdis, tyistis to fecht for schame
Clepand and calland, ilk man by his name
Quhil thay that dreuin war abak and chaist
Releuis agane to the bargane in haist
O tuskane pepil, how happinnis this sayd he
That ȝe sal euer, sa dullit and bowbardis be
Vnwrokin sic iniuris to suffir here
O quhat be this, quhow grete ene drede and fere
How huge dolfnes, and schameful cowardyse
Has vmbeset ȝour mindis, apoun sic wyse
That ane woman al one, and thus belyue
Apoun sic wise, sal skattir ȝou and dryue
And gar sa large routis, tak the flicht
Quhareto bere we, thir steil edgeis in ficht
Or quhat awalis to hald, in hand lat se
For nocht thir wappinnis, gif we ane wife sal fle
ȝe war not wount, to be sa liddir ilk ane
At nycht battellis, and werkis veneriane
Or quhare the bowand trumpet, blew the spring
At Bachus dance to go in, karelling
Syne go to feist, at tabil and sit at dieis
Se cowpis full of mony, danty meis
Thare war ȝour lust plesoure, and apetite
Thar was ȝour besy cure, and ȝour delite
Quhen that the happy spayman, on his gyse
Pronouncit the festuale, haly sacrifice
And se fat offerandis, did ȝou cal on raw
The banket amyd the derne, blissit schaw
And with that wourd, amydwart the melle
Reddy to sterf his hors, furth steris he
And awfully anone, with all his mane
Ruschit apoun venulus, stude him agane
And with his richt arme, can his fa enbrace
Sic wise as he did him, from his hors arrace
And with his huge strenth, sine did him cauth and lay
Before his breist, and bare him quyte away
The tuskanis rasit, ane clamour, to the sky
And Latinis al about thare, ene did wry
This tarchone ardent, as the fyrie leuin
Flaw furth swift, as ane foule vp towart heuin
Berand with him, the armour and the man
And fra his speris poynt, of brak he than
The stelit hede, and syne serchis all artis
Euir ilk entre, and all the opin partis
Quhare mycht he fynd, in to sic lityl stound
Ane place patent, to giue him dedis wound
And by the contrare, venulus, ful wicht
Maid al debait, and obstakle that he mycht
And can his hand oft syis, from his throte schop
With all his strenth, his violence to stop
Like as sum tyme, the ȝallow egil be s•icht
The eddir hint vp, and caryis on hicht
Syne fleand in hir fete, strenȝeis hir so fast
That of hir punsis, out throw hir skyn dois thrast
Bot the serpent woundit, and all to schent
ylowpit thrawis, and writhis with mony ane sprent
Hir sprutelit skalis vpset, grisly to se
With quhisland mouth, strekand hir hede on hie
Al thocht scho wreil, and sprinkil bent and skip
Euer the sarer this Erne, strenis his grip
And with his bowand beik, rentis greuously
Samyn with his wyngis, soursand in the sky
Nane vthir wise this trachon, turssis his pray
Throw out the tyburtyne routis, glaid and gay
The pepil tuskane quhilom, com fra lide
Seand the exampil, and prosper chance that tide
Of thare stout duke followis, his hardyment
And with ane rusche samyn, in the bargane sprent
Quhen as arnus, by his mortale fate
Vnto myscheuus dede, predestinate
Circulis at the wate, and espyis about
The swiftmadin Camyll of all the rout
In honest fate of armes, maist expert
And best betaucht, to schute or cast ane dart
He sekis by quhat wayis, or fortoun
To find the fassoun, and time oportune
Maist eselie this lady, tyll assale
And all the wentis, and renkis sans fale
Thys furious made held, mydwart the melle
The samyn gate, and passage haldis he
And priuely hir futesteppis did espye
And quhare scho did returne, with victore
Wyth fute bakwart, thrawart hir aduersare
This ilk Arnus, was ful reddy thare
And thiftwislie anone, the samin wise he
Withdrew his pais, and held on hir his G
Lurkand at wate, and spyand round about
Now is to cum, now that onset but dout
At euery part, this peuith man of were
And schuke in hand, his vnescheuabil spere

Perchance that tyde Coreus of grete estate
Ane spiritual man blissit and consecrate
That to Cibele, sum tyme preist had be
Ane wele lang space ȝound in the melle
Abulȝeit richely, and ful glorius schane
In pompus armour and array phrigyane
Furth drawis he the fomy, sterand stede
Wyth werelyke bardis, cled and souir wede
Of corbulȝe or leddir with gylt malis
Conchit with plate of stele, als thik as scalis
And he him selfe in broun sangume wele dicht
Aboue his vncouth armour, blomand bricht
Schaftes he schot, and takillis wrocht in crete
wyth latiane bow, nokkit wyth hornes mete
And clatterand by his schulder for the were
His ganȝe cais, and golden aublestere
The helme of gold, schane on the preistis hede
Of saffroun hew, betuix ȝallow and rede
was his ryche mantil, of quham the forbreist lappys
Ratlyng of brycht gold wyre, wyth gyltin trappys
Or cordis fyne, was buklyt wyth ane knot
Of nedil werk, al brusit was his cote
His hosing schone, of werk of barbary
In protrature, of subtil brusury
This man only, of all the mekill rout
The made Camylla, followis fast about
Quhiddir so it was, that troyane armour sche
List hing in tempil, for memore of trophe
Or than desirit this wantoun hunteres
In goldin attire, hir seluin to addres
Quhilk scho in feild, bereft hyr aduersare
Throu out the oist, onwerlie went all quhare
Blynd in desire, this troyane to assay
In womanlye appetite, ardent of this pray
This precious spulȝe, and array so proude
Quhare with as said is, was this preist yschroude
Thys foresaid Arnus, liggand at the wate
Seand this mayde, on flocht at sic estate
Chosis his tyme, that was most oportune
And towart hir, his dart addressit sone
With voce expres, his prayere thus made he
O bricht Appollo souerane god maist he
Of haly mont Sorattis, the wardane
Quham principally, we wourschip euery ane
Quhen to the furie, smoik of scence wefe
Bleis in the kendillit, byngis of fir tre
As we that wourschippis the, with obeysance
Be support of deuote, obseruaunce
Oft with our futesteppis, and our nakyt solis
Doun thringis feil hait, sundry and firy colis
Grant me fader almychty now I pray
With our wappinnis, thys schame to do away
I ask na trophe, nor the pompus wede
Of this made doun bet, or repulsit in dede
Nouthir bid I therof spulȝe, nor renoune
My vthir dedis syne, mot mak me boune
To report honour and laude eftir this
Bot at this time I bid, na mare I wys
Saif that this wensche, this vengeabil pest or traik
Be bet doun dede, by my wound and scharp straik
And syne that I may to my kynd ciete
Bot ony glore, returne alyfe quod he
Phebus him hard, and grantit to fulfyl
Of his asking, ane party at his wyl
Bot for the tothir part, soith to say
He lete do waif, with ane swift wynd away
Consentand, that he suld doun bete and sla
By haisty dede, the awful Camylla
Bot at his cuntre, hale skarth hame has brocht
Suld he him eftir, that he grantit nocht
And in the cloudy blastis of the sky
That voce and wourdis, flaw away in hy
So that als fast, as from his hand stound
Thrilland the are, his takill gaif ane sound
The routis can aduert, and takis tent
Turnaud thare sichtis, ilk wicht with ane blent
Towart the quene, ther lady thus Camyl
Bot scho nane hede, nor tent has tane thartil
Nouther of haisty mocioun, of the are
Nor ȝit the berrand sound, this flicht made thare
Nor ȝit persauit thes awful, schaft of tre
Discendand swiftly, fra the heuin on hie
Qhuhil that the lance hir smate and hurt perfay
Quhare that hir pap was schorne, and cut away
And wedgeit depe, within hir coist stude
Furth sowkis largely, of this madynnys blude
His complicis al samyn, in this nede
Stert to thare lady, in affray and dede
And sone thay claucht and lappit in thare armes
This quene that founderant was, for hir smert harmes
Bot first of al, for fere and fel affray
This arnus fled, ful fast and brak away
With blyithnes mydlit, hauand paneful drede
For he na langare durst into this nede
Assure for to debate him, with his spere
Na ȝit abide, the virginis wappin for fere
And like as that the wyld wolf in his rage
Knawand his recent falt, and grete outrage
Quhen that he has sum ȝoung grete oxin slane
Or than weryit, the nolehird on the plane
Tofore his fais, with wappinnis him persew
Anone is he, to the hie mont adew
And hid him selfe, fulfer out of the way
His tale that on his rig, before tymes lay
Vnder his wame lartis abasitly
And to the wod, can haist him intil hy
Nane vthir wyse, Arnus that fleyit wycht
Fled, and beliue withdrew him out of sicht
Content onlie, to gif the bak and fle
Amang the thikest preis, him hyd has he
And this Camylla steruand the ilk stound
The schaft has pullit of hir dedely wound
With hir awin hand, hot ȝit amangth banis
The scharp stele hede, fyxit to the rybbis remanis
In ane ful depe wound, and ane greuous sare
Al pale and bludeles, swarffis scho rycht thare
And in the deith closis, hir cauld ene
The rede cullour, vmquhile as purpure schene
Blak kynnyt and fadis, quyte out of hir face
Aud ȝaldand vp the goist, in the ilk place
Vnto ane of hir damicellis and ferys
Clepit acca that had bene mony ȝeris
Onlie maist traist, and wald in special
To Camylla, aboue the vtheris al
That knew albale, the secretis of hyr hart
Wyth quham hir thochtful curis, wald scho part
That tyme scho spak, and sayd on this manere
Acca acca, my leif sister dere
Vnto this hour, I hef done at my mycht
Bot now this dolorus wound sa has me dycht
That al thing dymmis and myrknys me about
Ga fast away, and hy the of this rout
Schaw Turnus, this my last commandis quod sche
Byd hym enter in fecht, in stede of me
And fra the ciete thyr troyanys dryue away
Adew for euer I haue no more to say
Samyn wyth that worde, the renȝeis slyp lete sche
And slayd to ground, not of fre volunte
Than the cauld deith, and last stoundys mortal
The sprete dyssoluyt from the corps ouer all
Hyr sowpyl crag, inclynand and nek bane
Bowyt down hyr hede, that was wyth deith ouertane
Furth sprent hir armes, in the dede thrawyng
And fra hir cast hir wappynnis, and armyng
The sprete of lyfe, fled murning wyth ane grone
And wyth dysdene, doun to the goistis is gone

Ane huge clamour, that dyd ryse on hycht
That semyt smyte, the goldyn sternys brycht
The bargant waxis mare cruel and hate
Quhare that the stout Camylla, doun was bete
For al the routys of the bald troyanys
The thirrene dukys, semblyt al atanys
And eik Euandrus, wardis of Archadis
Samyn in the pres, thare aduersaris inuadis
Bot Opys tho the nymphe, that wele thareby
By thrynfald dyane, sent was to espy
Sat ane lang space, apoun ane hyllys hycht
And vnabasyt, dyd behald the fycht
Syne thareftir on far scho, can espye
A myd quhare as the ȝoungkeris, rasis this cry
With schameful deith ouertane Camylla the made
Scho wepit sore, and plenand, thus scho said
Sobband full depe law from hir breist within
Alace virgine to mekill, and that is syn
To mekil all ouer, sa cruel punyssing
Has thou sufferit certis, for sic ane thing
Because thou has inforsit, withal thy mycht
For till ennoy the troianis, in this ficht
Quhat proffittis the, in buskis thyne allane
To haue seruit sa lang, this blyssit diane
Or by thy syde, or than on schulder hie
So lang ouer quaneris, to haue borne quod sche
And netheles, but honour in this stede
Thy quene has not the left, in poynt of dede
Nor this thy slauchter, but remembryng
Amang all pepill, sall not be nor menyng
Ne sall thou not, thy schame suff•r traist me
For to be tauld thou suld, vnwrokin be
Quha euer with wound, hes schent or violate
Thy fare body, to diane dedicat
He sail repent the time, that euer thou steruit
And with his deith aby, as he has seruit
Vnder the montane law, thare stude fute hote
Ane bing of erth, vpheit like ane mote
Contenyng the cauld assis, and birnt banis,
Of auld darcenus king, of laurentanis
Ouer helde with akin treis, and bewis rank
Thiddir this goddes, haistand doun the bank
Hir self has caryit, and thare huffis still
And from this knollis hicht, or litill hill
A bidis this ilk Arnus, till espy
And fra scho him perscauis, glidand by
In riche armour schynand, wounder brycht
And all in vane, proude wantoun gay and lycht
Quhy haldis thou awayward so quod sche
Dres thiddir mare thy futesteppis, towart me
Thou cummys hidder to pereis, and to sterue
And caucht deulie, as thot thou has deserue
Thy rewarde for Camyllais, dede perde
On dianis dartis, ha suld sic ane die
And with that worde, like ane stout wensche of trase
The swift gilt arrow, schuke out of hir case
And richt amouit, hir hornit bow has bent
Quharin anone the takill, vp is stent
Syne halis vp in Ire, and felloun haist
Quhill that the bow, and nokkis met almaist
And now handis raxit, hyt euery stede
Hard on the left neif, was the scharp stele hede
The string vp pullit, with the richt hand in fere
Went by hir pape, almaist vnto hir ere
Arnus anone, the mocioun of the are
Semyng with the quhisting, of the takill square
Persauit has, and eik the dint attanis
The dedely hede throw gird his body and banys
His feris all has him, forȝet allane
Quhare as he swelt, with mony ane wofull grane
And in ane vncouth feild, has left him dede
Bedouin with dust, and pouder will of rede
Syne opis with hir wyngis swift can fle
Aboue the skyes hicht, in the heuynnys hie•

The swyft army and aciyue, rout with this
Of Camylla fled first, the feild I wys
For thay had left thar lady, and capitane
The pissance hale, and oistis tyburtane
Affrayit all toḡiddir, gaif the flicht
The bak has tane athynas, bald and wicht
The chiftanis brak array, and went thare gate
The baneris left al blout, and dyssolate
Socht to warrand, on horsbak he and he
Frawart thare fais, and held to the ciete
For nane of thame so mate, and so agast
The feirs troianis, quhilk thaim assailȝeit fast
Vnto the dede, and myscheif did inuade
With wappinnis anys, to stintin made ane brade
Nor thame sustene, nor ȝit resist thay mycht
Bot all attanis, samyn tuke the flicht
And one chare wery schulderis, with grete schame
Thare big bowis vnbent, has tursit hame
And the stedis stout, with thare huffis sound
With swift renkis, dynlit the dousty ground
The blak stoure of pouder, in ane stew
Als thik as myst, towart the wallis threw
On the barmkin aboue, and the turettis hie
The wemen bet thare breistis, was reuth to se
Rasand attanis ane woful, wysely crye
Went to the sternes, and thirllit throw the sky
And quha mycht formest, with swift cours has thaim set
To breke in, at the opin patent ȝet
The routis of thare inemis, mixt ouer ane
Apoun thame ruschis and ouerthrowis mony ane
Nor thare eschepe thay not the wrechyt death
Bot in the portts ȝeildis vp the breith
Stekand amyd thare natiue wallis hie
And amang housis, quhar souir se mit thaim be
Ane pert closit the entre and the portis
And to thare feris nor ȝit nane vther resortis
The ȝettis listing opin, nor mak away
Nor thocht thay oft beseking thame and pray
Durst thame ressaue, within thare wallis square
Ane duleful slauchter onone, vprisis thare
Of thame in armis stude, the portis to defend
And thaim with glauis, war kelit and made ende
The son furth schet, that piete was to sene
Before thare wepand, woful faderis ene
Sum in the how fousye, war tumlit doun
Sa thik thame cummeris, the preis thrang to the toun
Sum haisty and vnwarly, at the flicht
Slakes thare brydillis, spurrand in all thare mycht
Can with ane ram rais, to the portis dusche
Like with thare hedis, the hard barris to frusche
The moderis eik, and women all bedene
Fra tyme Camylla, kelit hane thay sene
Knawand thare was, extreme necessite
With all debate stude, on the wallis hie
Sic tyme to do that tyme, and tuk in hand
The perfite lufe thame caucht, of thare kynd land
And al agast dartis, and stains doun threw
The sillis square, and hedis stingis ynew
And perkis grete, with brissillit endis and brount
Full haistely doun swakkis, dount for dount
And for defence, of thare kynde wallis hie
Offerit thame selfe, with the formest to de
In the mene quhile; as Turnus at the wate
Lay in the wod, fast by the passage strate
All the maist cruel tythingis, fillis his eris
For acca schawis to him, and all his feris
The huge effray, how the battall was gane
The wolstan oistis distroyit, and Camylla slane
Thare noysum fais, entressing furius rage
And by thare prosper martis, wasillage
Discomfirst al his oistis euery rout
That now the ciete, wallis stode in dout
He waxis brane in furoure bellical
So desirus of dedis, marcial
For the hard fatis, and strang mychtis hie
Of the grete Ioue, walo that so suld be
The hillis hicht he left, quhare that he lay
And from the dern, woddis went away
And skarslie was he passit, out of sicht
In the plane feild, cumyn al at richt
Quhen that the prince Enee, with al his men
Has enterit in, and passit throw the glen
And ouer the swyre, schawis vp at his hand
Eschep the derne wod, and wyn the cuin land
So that baith twa, with thare hale routis at last
In al thare spede held, to the ciete fast
And na lang space, thare oistis war in sounder
Bot that Enee, the feildis reik like tunder
Of dusty stoure persauit, ane fare way
And saw the Latyne rowtis ryde away
And fers Eneas, wirkare of his harmes
Turnus persauit, al so ryde in armes
The dynnynge of thare hors, fete eik hard he
Thare stamping sterage, and thare stedis ne
Incontinent, thay had to batal went
And in batal preuit, thare hardyment
Ne war on thame, the rosy phebus rede
His wery stedis had doukit, ouer the hede
Vnder the siremes, of the occeane se
Reducing the dirk nicht, thay mycht not se
Al hale declynit, had the dais licht
To tentys than before, the toun ilk wycht
Bowning to rest, al thay that war wythout
And deluys trynsch•• al the the wallys about.