Book X

Prologue

Hie Plasmatour of thyngis vniuersal
Thou reneware of kynd, that creat al
Incomprehensibil thy werkis ar to consaif
Quhilk grantit has to euery wicht to haif
Quhat thing maist ganis, vnto his gouernale
Quhow meruellus bene, diuisiouns, of thy gracis
Distribute so to ilk thing, in al placis
The son to schyne ouer al, and schaw his licht
The day to labour, for rest thou ordanit nicht
For diuers causis, schupe sere sessouns and spacis.
Fresche vere to burgioun, herbis and sueit flouris
The hate somer to nuris, corne al houris
And brede al kynd of foulis, fysche and beist
Heruist to rendir his frutis, maist and leist
Wyntir to snyb the erth, wyth frosty schouris
Thocht that thou nedit not, al thing thou wrocht
Bot to that fyne, thou made al thing of nocht
Of thy gudnes to be participant
Thy godhede na richer, nor ȝit mare skant
Nauthir now nor than, set vs wrocht of nocht
Thy maist supreme indiuisibil substance
In ane nature, thre persouns but discrepance
Rengand eterne ressauis accidence
For quhy thou art richt, at this tyme present
It at thou was, and euer sal but variance.
Sen our nature, god has to him vnyt
Hys godhede, incommyt remanis perfite
The son of god, hauand verray naturis twane
In ane persoun, and thre persouns al ane
In deite nature, maiestye and delite
The son the self thing with the fader is
The self substance the holy gaist I wys
Is with thaym bayth thre dis•unct personage
As was and salbe euer of ane age
Omnipotent ane lord, equale in blis.
Quhilk souerane substance, in gre superlatiue
Na cunnyng conprehend, ma nor discriue
Nouthir generis, generate is, nor dois procede
All ane begynnare, of euery thing but drede
And in the self, remanis eterne on liue
The fader of nane generat creat nor bore
His only son engeneris euer more
Not makis creatis, bot engendris al way
Of his substance, and al tyme of bayth tway
Procedis the haly gaist, equale in glore.
Of bayith from ane begynnyng procedis he
Sa bene the werkis, of the trinite
Maist excellent, and wounderful to consaif
ȝit thaym to traist, the mare merite we haue
That be na mans resoun preuit may be
The fader knawis him self, quhilk knawlege, spredis
Be generatioun, eterne that euer bredis
His son his word, and wisdome eternale
Betuix thir twa, is lufe perpetuale
Quhilk is the haly gaist, fra baith procedys
Not that the faderis, nature mynyst is
Of his substance, he generis hys son in blis
Ne so the son, of his kynd is ybore
That he ane parte, has therof and no more
Bot al he geuis hys son, and al is his
The ilk thing he him genis, that he remanis
This singil substance indefferentlie thus ganis
To thre in ane, and Ilkane of thay thre
The samyn thing, is in ane maieste
Thocht thir thre persouns, be seueral in thre granys
Like as the saull of man, is ane we wate
Hauand thre poweris, distinct and seperate
Vnderstanding resoun, and memore
Intelligence consideris, the thing before
Ressoun discernis, memor kepis the cons•ate
As thay bene in ane substance, knyt all thre
Thre persouns, regnis in ane deite
We may tak, als ane vthir similitude
Grosly the samyn purpois, to conclude
Flambe, hete, and licht, ben in ane fyre we se
Quhare euer the low is, hete and licht bene thare
And had the fire, bene birnand euermare
Euer suld the flambe engendrit, haue his licht
And of the birnand low, the flambis bricht
Perpetualy suld hete haue sprung, all quhare
So generis, the fadir, the soun with him eterne
From baith procedis, the haly gaist coeterne
Thus rude exemplis, and figuris may we gife
Thocht be his awin, creature to preife
War mare vnlyknes, than liknes to discerne
Freynd ferly not, na cause is to compleyne
All beit thy wit grete god, may not atteyne
For mycht thou comprehend, be thine engin
The maist excellent maieste, deuine
He mycht be repute, ane pretty god and mene
Consider thy ressoun, is so febill and lite
And his knawlege profound, and infinite
Consider how he is vnmensurabil
Him as he is to knaw, thou art not abill
It suffice the beleif, the Crede perfit
God is I grant in all thing, not excludit
Geuis all gudnes, and is of nocht denudit
Of him has all thing, part and he not mynnyst
Hale he is all quhare, not deuidit na fynyst
Without all thing, he is and nocht excludit.
O lord thy wayis bene, inuestigabill
Suet lord thy self, is sa inestimabil
I can write nocht, but wounderis of thy mycht
That lawit sa fer, thy maieste, and hicht
To be borne man, in til ane oxis stabill
Thou tuke mankynd, of ane vnwemmyt maid
Inclosit within, ane virgins bosum glaid
Quham all the heuynnis, mycht neuer comprehend
Angellis scheiphardis, and kingis thy godhed kend
Set thou in crib betuix, twa beistis was laid
Quhat infinite excellent, hie boute
Aboue thy werkis all, in wounderfull gre
Lord quhen thou man maid, to thyne a win ymage
That tynt him self, throw his fuliche dotage
Thou man become, and deit to make him fre
Maid thou nocht man, first president vnder the
To dant the beistis foulis, and fysche in the see
Subdeuit till him the erth, and all therin
Syne parradice grant it him, and all his kyn
•aj him fre will and power, neuer to dee
Enarmed him with ressoun, and prudence
Onlie bad him kepe, thyne obedience
And to him suld, all creaturis obey
Bittir was that frut, for his of spring and fey
Made deith vnknawin, befund and lyffe ga hence
Othyne Inestimabil luf, and cherite
Become ane thrall, to mak vs boyndis fre
To quykkin thy sclauis tholit schameful dede maist fell
Blilsit be thou virginall frute, that heryit hell
And payit the price, of the forbedyn tre
Thocht thou large, stremes sched apoun the rude
Ane drope had bene, sufficient of thy blude
Ane thousand warldis to haue redemyt I grant
Bot thou the will of mercy, wald nocht skant
Vs to prouoik to luf the and be gude
Ouer all this syne thy infinit god hede
Thy flesche and blude, luflye with wyne and brede
To be our lude of grace, in plege of glory
Thou last vs gaif, in perpetuale memory
Of thy passion, and dolorus panefull dede
Quhat thankis dew, or ganȝeild lorde benyng
May I maist synful, wrechit catife Inding
Render for this souerane, hie bounte
Sen body saul, and all I haue of the
Thou art my price, mak me thy pray conding
My makare, my redemare, and supporte
Fra quham all grace, and gud•nes cummys at schore
Grant me thy grace, my mysdedis till amend
Of this and all my werkis, to mak gude ende
This I beseik the lord thus I exhort
From the begynnyng, and end be of my muse
All vthir Ioue, and Phebus I refuse
Lat virgill hald his maumentis, till him self
I wourschip now thir ydole, stok nor elf
Thocht furth I write, so as myne auctor dois
Is nane bot thou the fader, of goddis and men
Omnipotent eternale, Ioue I ken
Onelie thy help fader, thare is nane vthir
I compt not of thir pagane, goddis ane futhir
Quhas power may not help, ane ha•tane hen
The scripture clepys, the god of goddis lord
For quhay thy mandmentis, kepis in accord
Bene ane with the, not in substance bot grace
And we our fader clepis the, in euery place
Mak vs thy sonnys, in cheryte but discord
Thou haldis court ouer christall, heuinnis clere
With angellis sanctis, and heuenlye spretis sere
They but ceissing thy glore, and louyngis syngis
Manifest to the, and patent bene all thingis
Thy spous and quene maid, and thy moder dere
Concord for euer myrth rest, and endles blis
Ne fere of hell, nor drede of dede thare is
In thy hie realme, nor na kind of Eunoye
Bot all welefare eis, and euerlast and Ioye
Quhais hye plesance lord, lat vs neuer mys.

Book X

On brede or this was warp, and made patent
On heuinly hald of god, omnipotent
The king of men, and fader of goddis all
Ane counsell or ane cessioun, made do call
Amang the spretis aboue, and goddis grete
Within the sternit heuin, and mylky sete
Quharfra amyd his trone, sittand full hie
Ouer all the erth, he mycht behald, and se
The troianis castellis, and the pepil latyne
Doun sat the goddis, in thare segeis dyuyne
The faldine ȝettis baith, vp warpit brade
Firste Ioue him selfe begouth, and thus he sayde
O heumlie wichtis, of grete power, and mycht
How is betid ȝour myndis bene so licht
That ȝour decretis fatall, and sentence hie
Retretit thus, and turnit bakwart suld be
Or quhy with frawart myndis, now of late
Agains ȝour ressonabill, orakillis ȝe debate
My will was not that the Italianis
In batall suld concur, contrar troianis
Quhat manere discord, be this that we se
Expres agane our inhabitacioun, said he
Quhat drede or reuerence, thaime or thayrs has mouit
To ryn till armes, and rais were contriuit
Or has sic wise, perswadit to bargane
With bludy wappinis rent, and mony slane
Haist not the sessoun, to preuoik nor preuene
Of battall cum, sal detfull tyme bedene
Herefor quhen the feirs burgh, of Cartage
To romes boundis, in thare fereful rage
Ane huge myscheif, and grete qualim send all
And thryll the hie montanis, lyke ane wall
Than war iust tyme, in wraith to mak debate
Than war it tyme to rug and reif thus gate
Now all sic thyngis leif, and decist said he
Glaidly and with one, mak freyndly amyte
Ane few wou•dis, on sic wyse Iupiter said
Bot not in quheyn wordis, him ansuere maid
The fresche goldin venus, O thou quod sche
Fader of all, of eternale pouste
Ringand aboue all men, and goddis eik
To the I cum, the reuthfully I beseke
Sen thare nane vthir, maieste bene ne glore
That in sic nede, may help vs to Implore
Thow seis how, with boist and felloun fere
She Rutulianis makis, grete deray and stere
And hew turnus pransand on semely stedis
Trouch out the oistis, rydis in stele wedis
And how orpit, and proudly ruschis he
Amyd the troyanis, by fauour of mars quod sche
The strench of wallis, nor the portis schet
May not saif troyanis, lo with in the ȝet
Amid the clois, muralȝeis, and pail
And doubyl dykis, how thay thame assail
Quhil the fowsyis of blude, rynnis on spate
Eneas absent of this, na thing wate
Quhidder gyf that thou, list suffir neuer mare
Thare sege skalit, nor tham fre of dangere
Behald agane about new troyis wall
ȝit bot begin to big, and not clois all
How enuiroun musteris, thare Inemyis
Ane vthir oist and sege, about thame lyis
And newlie lo, Tedeus son not far
From Aipois ciete, in to Calabar
The wery troyanis, mouis diomede
I feil agane my woundis, newly blede
And I thy blude thy get, and dochter schene
ȝit mortale wappinis, mon thole eik and sustene
Gif the troianis, but thy beneuolence
Or repugnant, to thy magnificence
Has socht vnto the coist, of Italy
Lat thame be punist, and thare cryme aby
Aud I sall soithlie, stand content for me
Thou mak thame na kynd, help nor supple
Bot gif thay followit haif, for there behuf
Sa feil respons, of the goddis abuse
With sindry admoniciouns, charge and redis
Of the infernale wichtis, and spretis that dede is
Than wald I knaw the cause, and resoun quhy
That ony mycht peruert, or ȝit bewry
Thy commaundementis, how or quharfore may thay
New fatis make, and the auld do away
Quhat nedis to rehers, quhow on the coist
Of Cicilly thare schippis, bri•t war loist
Or quharto suld I duell, to schaw ȝou thus
How be the god of tempest, Eolus
The rage and wyndis, s•nd war ouer all quhare
Or Iris cachit, throw cloudis of the are
Now mouit eik bene feyndlische wychtis affrayit
Before onelie that chance, was vnassayit
Bot now Alecto newlie, I furth sent
In to the vthir warld, that fell torment
With bachus furie, enragit by and by
Walk and throw, all cietes of Italy
Na thing I pans, on the empire quod sche
All thocht we hope had, that sic thing suld be
Quhen forton schew, therof sum apperance
Lat thame be victour, quham thou list to avance
And gif na realme, into this warld remanis
Quham the sterne spous, list gif to the troians
I the beseik of Troy, by the rewyne
Be that subuertioun reik and, huge pyne
Suffer that ȝing ascaneus, mot be
Sauff of all wappinnis and, of perrellis fre
And al the leist, in this ilk mortall stryffe
Suffir the neuo, to remane alyffe
As for Enee forsoith, I mak na care
Thole hym in vncouth, stremes as he was are
Be dryue and warpit, euery sey about
To follow furth in dangere, and in dout
Quhat cours, and went that fortoun lyft hym sent
Moist it pleis the fader, omnipotent
That I may bot defend, ȝone lytyll page
And hym wyth draw, from thi• fers weris rage
I haue in Cypar, the ciete Amathus
And the hye standand, burgh that hat paphus
And eyk the Ile, yclepit Cythera
The hallowit hald, als of Idalia
Quhare rendrit vp, all armes in that stede
Duryng hys age, he sobir lyffe may leid
And command eik wyth grete, fors and maistry
The burgh of Cartage, done thring Italy
Fra thyne sall na thyng, resist nor ganstand
Contrare cieteis of Tyre, or affrik land
Quhat profite, has it doun or auantage
Of troyis batall to haue, eschaip the rage
And throw amyd the Grekis, fyris eik
Haue fled away, and throu the seis haif seik
Sa feil dangeris by went, and ouer driue
Ouer streme and landis, gyf that thus belyue
Troianis has socht, tyll Italy tyll vpset
New troyis wallys, to be agane doun bet
Had not bene better, than in thare natyue hald
Haue sittin styll, amang the assis cald
And lattir Isillis, of thare kynd cuntre
Or barand sole, quhare troy was wont to be
Than thus from dede to dede, from pane to pane
Be cachit on, and euery day be slane
Restore I pray the, to thay wrechit wychtis
Panthus and Symoes, fludis quhilkis of richtts
Was wount to be, thare propir heritage
O fader suffir, the fey troyane barnage
To seik agane quhat, hard myschance befallis
To troy or Ilioun, with thare brokin wallis

The quene Iuno, than but mare abade
Prikkit with felloun furie, thus furth braid
Quhy dois thou to me, sais sche sic offence
Constrenyng me brek clois, profound silence
And with thy wourdis, quhare aire, was troy
Prouokis to publis, and schew myne hid ennoye
Quhat maner man, or quhilk of goddis lat se
Tomoue batale, constrenit has Enee
Or to Ingire him self, to Latyn kyng
As mortale fo, wythin his propir ring
I gyf the case, to Italie socht he
Of the fatis, by the auctoryte
Prouokand tharto, be the wyld dotage
Of wod Cassandra, in hir fury rage
Lat se for all this, gyf that anis in sporte
To leif his strenthis, we dyd him exhorte
Or for to put his lyffe, in ony dangere
To sale or submyt, him to wordis sere
Lat se gyf we causit, to walk at large
And tyll ane bab commit, the battellis charge
And gouernance, hale of his ciete wallis
Lai se gif we, how euer the chance befallis
Perswadit him to commoue, and stere
Our quiet pepil, with him to rays the were
Or to adione vp freyndschip, and ally
With tirrhene pepill, and folk of tuskany
Quhat god amouit him, with sic ane gaude
In his dedis to vse sic slicht, and fraud
Or quhilk of our hard poweris, wrocht sic thing
Quhare was Iuno, with al hir ladyis ding
Or quhare was scho also, quhen ȝister nycht
Iris was send doun, throw the cloudis bricht
Is this ane thing, full vnlesum but let
Thocht Italyanis, with flambis vmbeset
The newe ciete of Troy vprisand lo
And is not ful grete, dispite also
That in his natiue land, and faderis ring
Turnus remane or pretend to be king
Quham to the god, Pilumnus grantis
And haly Nymphie, Venilia moder I wys
Quhat thinkis thou leifsum, is that troianis in fere
Violence to make with brandis, of mortall were
Aganis Latynis, sic vncouth heretage
Till occupy, and subdew in bondage
And thare catall in spreith, to driue away
Quhat haldis thou leifsum, as I pray the say
From vtheris to withdraw, so thift wisly
Thare eld faderis, and maist tender ally
Or from betuix thare breist, and armes tway
Thare treuth plicht spous, for to reif away
To cum and beseik trewis, in strange landis
With syng or taking of peace, borne in thar handis
And netheles, to mak reddy for were
Puruay thare schippis, prouide armour and gere
To saif Enee, has thou not power and mycht,
From grekis handis, him to withdraw be s•icht
And set in stede of that man, licht as lynd
Outhir ane cloud or ane waist, puft of wynde
And eik thou may transforme, the schippis quod sche
In till as mony goddesis, of the se
Bot be the contrare rutulianis, of spring
We suld support, that is forbodin thing
Thy son Enee, mysknawing this deray
As thou allegeis is absent, now away
And quhat Iniuris, absent mot he remane
And ignorant, for ay of this bargane
Thou ha• paphos, thyne is Idalia
And thine mot be, the Ile of Cythera
Sen thou has all thir, at command and wyll
Lat vthir folkis in peace, and rest duell still
Quhare to assailȝeis, thou ane strang ciete
That has bene oft exercit, in melle
And list inuade pepil, with hartis kene
I can not fynd quhat occasiaun, ȝe mene
Haue we etlit the litill, Phrigiane gere
Doun from the ground, to welt ouer in to were
Quhidder was it we, or than Paris that faltit
Quhat wourthy troianis, by Greikis war exaltit
Quhat was the caus, that Ewrop, and Asia
To rais the were, in armes war sa thra
Aganis vtheris, and thare auld alliance
With thiftwis reif, to breik on sic mischance
Was I not gouernour, and cheif ledar thare
The time quhen that the troiane, adulterare
Vmbesegit the ciete, of spertha
And the Quene Elene reft, and brocht awa
Or quhidder Gif I euer, in that were
Miniserit dartis, or sic gere
Or ȝit that bargane stuffit, or bet lat se
With Cupidis blynd lust, and subtilite
Than had bene honest tyme, and ganand bayth
To haif prouidit, for thy freyndis skaith
Now all to late with thine, Iniust complantis
Aganis thou risis, and attayntis
For to warp out thy vane wourdis chiding
Quhilkis certis may auayle, the in na thinge
With sic like wourdis, Iuno fra end to end
Gan hir querrel sustene and als defend
And all the heuinly wichtis, did quhisper and roune
In opiniouns full diuers, vp and doun
Like as first or wyndis blast, we persaue
The slouth is hard, within the woddis waue
With frasing soundis, quhissilland ȝit vnknaw
Quharof cummys this brute, out throw the schaw
All thocht it be to marinaris, ane sing
Of wyndis blast, to follow sure taiknyng
The fader than omnipotent, maist hie
That ouer all thingis, has souerane maieste
Begouth to say, and quhen he spak all ceissit
The heuinlie hie hous of goddis, was peissit
The erthis ground schuke trymblyng for fere
And still but mouing, stude the heuynnys clere
The wyndis eik thare, blastis lounit sone
The sey calmyt his fludis, plane ab one
Ressaue quod he my sawis, and tak tent
And thir my wourdis, within ȝour myndis Imprent
Sen that algatis, ȝit may not sufferit be
Latinus confider with troianis, and Enee
Nor ȝit ȝe can not mak end, of ȝour debate
I sall me hald indifferent, the mene gate
And as for that, put ne diuersite
Quhidder so Italianis, or troianis thay be
How euer this day the fortoun, with thame standis
Bruke wele thare chance, and werd on athir handis
Lat eith of thame his hope, and fortoun sew
Quhidder so the fatis, has determyt of new
Troianis to be assegeit, with Italianis
To thare myscheif or wraik, of the troianis
Quhilkis with thrawart, admonitiouns so lang
Perauenture has errit, and gane wrang
Nowthir troianis, nor Italianis, freith will I
Lat athir of thame, thare awin fortoun stand by
And bruke thare werk, thay haue begun but fale
King Iupiter salbe, to all equale
The fatis sall prouide ane way, more abbill
And with that wourd for till hald, ferme and stabill
His godlie aith and promys, sworn has he
By stix Pluto, his brotheris se
Be that ilk pikky laik, with brays blak
And laithlie goulf, to kepe al that he spak
And till afferme his aith, at his liking
The heuinis al maid, trymble, for ane sing
Thus endit was the counsale, and alle done
Aud Iupiter rais, from his goldin trone
Quham heuinly wychtis, amyddis thame with ioy
Vnto his chymmes ryall, dyd conuoy

Duryng this quhile, all the Rutulianis stout
The ciete portis, lappit round about
For to doun bet, the troyanis euery syre
Inuiroun all the wallis, with hate fyre
Eneas barnage, that myscheuis huge
Thus vmbeset, and segit but refuge
Inclosit war but hope, to wyn away
And sobirly at defence, as thay may
On the hie touris hedis, stude on raw
Full thyn the circulis, of the wallyz law
Thay mannit about, for in the first front stude
Iasyus Imbrasis son, and eik the gude
Tymotes son of strang, Icetrane
And by thame also, the Asserratus twane
The eldare Tybrys, with Castor ful wroith
Brethir germane, to kyng Serpedone boith
Quham Claruz had, and Hemon feris twa
Followit from the hie, realme of Lyria
Ane Agmon of Larnessia, fast thareby
Presis with all the fors, in his body
Ane felloun stane, to welt the wallis till
Quhilk semyt to be, ane grete part of ane hyll
Na les of statur, na his fader Clytyus
Was he, or ellis his brothir Mnestheus
Wyth dartis thay assale, the ciete fast
And thay defend, with slungis and stane cast
Sum preis thik, the wyld fyre in to slyng
The arrowis flaw, spangand fra euery stryng
The dardane chyld, the ȝing Ascaneus
Pryncipall thocht, and cure of dame Venus
Amyd the routis, in couert quhare he ȝede
Thare mycht be sene, in his fresche lusty hede
Lyke as ane gem, wyth his brycht hew schinyng
Departis the gold, set amydwart the ring
Or in the crounell, picht or riche hingare
Quhilk dois the nek array, or the hede gere
And mare semely, than euoure bene to se
Craftely closit, wythin the box of tre
Or than amyd, the blak cerebynthyne
Growis by oratia, and as the gate d•is schyne
Hys curland lokkis, hang doun wele dek
About his schulderis, ouer his mylk quhyte nek
Ane circulet of pliabyl gold, so blyth
Aboue his baris, apoun his hede wele pycht
Thow Ismarus, of magnanymyte
Fulfyllit eik, thare men mycht the se
Vnwyttand venemous, schaftis the ilke tide
Addres dartis, and wirkis woundis full wyde
Cummyn of the gentyl blude, of Meony
In Lide contre, thou borne was fast by
The plentuous sulȝe, quhare the goldin riuere
Pattolus warpis, on ground the goldin vre clere
Reddy at hand, was Mnesteus wicht
Quham the renowne, of this ȝister nycht
For that he turnus, ouer the dikis draif
Full proude made in his curage, ouer the lai•
With him was Capis, thare also quham by
The towne Capna, is namit in champany
Thus athir party, into hard barganyng
Stude at debate, quhill Eneas the king
With al his feris, baycht day and myd nicht
Sclidis throw out, the salt fames licht
For eftir that, fra king Auander he
Departit was, as here aboue said we
And enterit in amyd, the tuskane tentis
The kinge he socht, and tald, him his ententis
His name to him rehersing, and his blude
And his desire fully, to conclude
Has schawin planely twichand quhat he socht
And quhat supple also, he with him brocht
And tald quhat army, proude Mezentius
Had conuenit, and how the bald Turnus
Sa violent and fers was, in his wyll
Exhorting him, to tak gud hede here •yll
And how vnstabill, was al warldis chance
All manues suretye, hyngand in ballance
And vnto this his request, and prayere
Adionit has on full, glaidly manere
Thare was na mare, delay bot Tarthon kyng
All reddy was to fulfyl, his likyng
Wyth moblys, and all riches at command
And vp can knyt, thare fordwartis and command
Of amyte, and perpetual ally
Than of the fatis, fre in thare nauy
At command of the goddis, pepyl tuskane
Ar enterit in thare schippis, euer Ilkane
Submytting thame, vntyll ane strang Duke
Eneas barge, than furth the viage tuke
Before the laif, as admirall of the floke
And in hir steuin karuin, full wele god wote
The Liouns, that the phrigiane armes bene
Aboue the quhilkis, porturit fare and grene
Was yda forest, to fugitiue troyanis
Thare best belouit freynd, wod and natiue wanys
In hir was set, the grete prince Eneas
That with him self, can mony thing compas
Twiching the chancis, of batale in that tyde
Pallas adionit, sat by his left syde
And he at hym, did wysely aske and spere
The cours and namis, of the sternes clere
Quhil in the styll heuin, schynis on the nycht
Now speris he franand, with all his micht
To knaw Eneas, wandring be the se
And how huge pane, he had on landis dre

ȜE musis now, sueit goddis Ithone
O pin and vnclois, ȝoure mont of Ilicone
Reuele the secretis, and in ȝour micht
Entone my sang, addresse my stile at rycht
To schaw quhat pissance, oistis and armye
At thys tyme from the boundis of tuskane
In fallowschip, come wyth the prynce Enee
And stuffit schippis of war set to the see
First prynce Massitus, cummys wyth hys rout
Into his barge, Tyrgris with stelit snowt
Souchand out throw the fludys quhare •e went
Ane thousand stout men of hys talent
Vndder him ledin, for the batal boun
From Clusyn come, vmquhyl that nobyl toun
And fra the tuskane ciete of Cosa
Bayth castyng dartis, and flamys vsit tha
Wyth arrow caissys, and vthyr quauerys lycht
And mortal bowys, buklyt for the fycht
Samyn furth salys, Abas and hym by
Hys barnage stude anarmyt rychely
His werelike schip, ouer the fludis ilkane
Of god Appollois, goldin statu schane
The ryche cyete, of Populonias
His natiue cuntre quhare of born he was
Sex hundreth men of armes in were expert
With hym was send, and the Ile in that part
Illa callit, within the tuskane se
Sa riche of steile, it mycht not waistit be
Thre hundreth eik, has send with him to pas
The third Capitane, wourthy Asilas
Of goddis eik, and men interpretoure
Of euery spaing craft, that knew the cure
Quhat the hart pipes, and beistis Intrallisment
Quhat signifyit the sternes, quhare thay went
Thare richt coursis aboue the henynis hye
And euery birdis vocis, wele knew he
And quhat betaikinnis, schynyng from the heuyn
Thir fyrie blaistis, or this thunderis leuyn
Ane thousand men, assemblit wyth him ledis
Wyth awful speris, and scharp grundin hedis
Quham the hetruscane, ciete Pisa gude
Inhabit first from Alpheus that flude
Send til obey him as thare capitane
Syne followis, eftir the semeliest of ane
Asture maist souir horsman, for to seik,
Of variant cullour was his armour eik
Thre hundreth walit men with hym he led
Al of ane wil, furth to the batal sped
Of folkis alhale, duelt in the cite swete
Of Agilyne vthir wyse callit Crete
And thay that duellis in thay feildis I wys
Endland the bankis, of flude Mynyonis
Or til ancient Pirgus, toun alsua
Or inhabitis, the ciete granissa
Ful contagius of pest, and grenous are
Suld I the pretermyt, sen thou was thare
I mene the Cignus, of Ligurianis
The cheif ledare, amang vthir capitanis
Ane of the maist forcy into batal stede
Ne wil I not forȝet fuld I be dede
The strang Cupanus with the few menȝe
Fra quhais tymbrel risis apoun hie
The lusty swannys, fetherem bricht and schene
The cryme and caus, of al ȝour woful tene
Was luf and amoris pompus array
Schroud in ȝour fedderis, cognissante al to gay
As that thay, tel quhil dolours Cignus
Made his complante, amang the skoggy bus
Of popil tre branchis, rising lang and square
Quharin the twa sisteris, transformyt ware
And gan bew Phaetoun, his best belouit
Quhil that he sang and playit, as him behuffit
The dolly tones, and layes lamentabil
Wyth sic regrat, to comfort and a stabill
His heuy amorus thochtis, and ennoyus
In quhite Canois soft plumes Ioyus
Become ouerhede, in liknes of ane swan
And led his age, na mare furth lik ane man
Bot tuke his flicht vp from the erth in hye
And with ane souchand voce socht in the sky
Hys son thys tyde, hauand his fallouschippis
Distribute equale, into sundry schippis
Amang the nauy, and the flote at large
With aris rowis furth, his bustuous barge
Clepit Centaurus, and ythandly syne he
Driuis throw fludis, of the stormy se
Byg of statur, stude he like to fecht
Boistand the streme, with ballast of huge wecht
And with his lange and lusty ballingare
Ouer slidis the depe fludis, in thare fare
The nobil Ocnus, from his natyue land
Ane fare army assemblit brocht at hand
Son of god tybris, the tuskane riuere
Beget apoun manthus, the lady clere
That was bayth Nymphe, and Prophetes
This Ocnus, was the ilk man, quhilk expres
Of Mantua, the ciete did he wall
And eftir his said moderis name, can cal
Mantua mychty, of auld ancistry
And forefaderis, bot hys genolagy
Was not of ane kinrent cummyn al
For that toun had thre clannis principal
And vnder euery clan, or trybe of thay
War owthir souir, famyllis twyis tway
Mantua eik, was cheif and principale hede
To al thyr pepyl wonyng, in that stede
Takand thare force, and hardiment ylkane
From the lynnage and nobil blude tuskane
Mezentius, throw his auld tyranye
Furth of his ciete, aganys him in hye
Fiue hundreth men, in armes maid to stere
Quham Minitius, the fresche rynnand riuere
That from the loth bennachus Ischis doun
And is ouerheildit al with redis broun
Has caryit to the brade seyis large
Within thare werely schip, and awful barge
Furth held the stout and degest Aulestes
Quhilk with grete strenth of rollaris in that preis
Rasyng thaym on thare choftis, for the nanys
The fludis smate, with hundreth airis atanis
Quhyl that the fomy stoure, of stremez lee
Vpwaltis from the brade Palmes of tre
The mekil houk hym bare was Triton callit
For in his forestam was the monstoure stallit
With watry trump, fleand the fludis gray
Quhare as sche salit men micht se hym aye
Wyth birssy body, porturit and visage
Al rouch of haris, semyng of cullage
In mannys forme, from his coist his croun
Bot from his bally, and thens fordwart doun
The remanent straucht, like ane fyschis tale
In similitude of Huddone, or ane quhale
Vnder the breist of this ilk byismyng thyng
The se wallis bokkand, makis mournyng
Sa mony walit capitanys, nobil men
In help of new troy, with schippis thryis ten
Slidis throw the salt stremes of the see
Wyth stelit steuynnys, and bowand bilge of tre

Be this declynit, was the dayis lycht
The mone in till ane wauerand carte of licht
Held rolling, throw the heuynnys middil warde
As Eneas the Troiane prynce, and larde
For thochtis mycht na wyse, his membris rest
Sa mony curis in his mynd he kest
Bot sat in propir persoun, and nane vthir
To stere his caruel, and to reule the rudder
And for to gyde the salis takand tent
Anone amyd his cours, thare as he went
Recounteris him, hys fallouschip in hy
Of nymphis, quham and his nauy
The haly moder, clepit cybelee
Made to becum, goddis in the se
Al samyn swam, thay hand in hand yfere
And throw the wallis, fast south and schere
Als feil in nowmer, nymphis throw the flude
As laitlye with thare stelit, steuynnis stude
Of troiane schippis, by the coistis syde
A weile fer way, as ouer the streme thay glide
Thare king thay knaw, and al in karoling
About his schip went circulet, in ane ring
Amangis quham in speiche, the maist expert
Cymodotea, to the wale astart
And with hyr rycht hand, can the est castell
Do grip anone, that al hir bak ilk dele
Aboue the sey wattir, dyd appere
Beneth the calmet stremes, fare and clere
Wyth hir lest hand, craftely swymmys sche
Syne of thys wyse, spekys to Enee
That of thys wounderus meruel, knew nathyng
Walkis thou, or not thou verray goddis ofspryng
Our prince and maister, Eneas now awaik
Takil thy schippis, and thy schetis slaik
We bene thy nauy, and thy flote quod sche
Bowit sum tyme of fir, and bich tre
Grew in the haly top, of mont Ida
And now as present, thou behald vs ma
Nymphes we bene, and salbe euermore
For as ȝone faythles Turnus, by the schore
Inuadit vs with glauis, and wyth fyre
On force constrenit, for the flambis schire
Thy cauilllis we, in sounder brak in hast
To seik throw the sey, as we war chaist
And than the moder, of goddis Cibeles
Hauing on vs compassioun, and piete
In this figure, has vs al translate
For euir mare, to be deificat
As goddesses, quhar•so vs likis best
Amang the fludis, for to leif and rest
Bot thy dere child ȝoung ascaneus stout
Besegeit is and closit, round about
With wallis foussy, and trynschis athir syde
Amid dartis or querellis fast dois glyde
And dreidful oistis, of sterne pepil latyne
By were enforsing, to distroy al thyne
Euandrus horsemen, clepit Archadianis
Mydlit samyn with he thrurianis
Quhen in thi help, thou sendis be the land
Thay placis now, quhare as thou gaif command
Can occupy, as biding the cunning
Bot turnus has determit, as certane thing
Grete garnisouns, to send betuix thaym sone
That ȝour oistis, sal not to giddir Ione
Get vp haue done, and sone in the mornyng
Al swyith as the brycht day begynnis to spring
Thy feris hale, thou first to harnes cal
And with thy scheild, inuisibil thare withal
Thy selfin schroud, quham mychty god of fyre
To the as ane maist souerane lord, and syre
Has wrocht and geuin, and with gold so bricht
The bordouris has ouergilt, and forgit at rycht
Gif thou beleiffis ocht, my sawis in vane
The licht of day to morne, I schaw the plane
Huge hepis sal behald, in feild doung doun
Of rutulianis, by occasioun
Thus sayd sche, and departand with ane skyp
Be hir rycht hand, schowis furth, the schip
As sche that was, in that craft rycht expert
And throw the wallis, on the tothir part
Glidis away, vnder the fomy seis
Als swift as ganȝe, or fedderit arrow fleis
That striuis for to pyngil for the wynd
The remanent, hyr followis fast behynde
Anchises son, the grete troiane Ene
Awounderis vnwitting, quhat thys suld be
And netheles his curage, dyd auaunce
With this ilk fatal, angurie or chance
Syne schortlie lukand, to the heuyn abone
On this manere can pray and maid hys bone
O blissit moder, of the goddis quod he
That hallowit art in the mont Ide
Quham to the toppis of the mont, Dyndymane
And eik the towris, and cyties mony ane
Wyth renȝeit Liouns, ȝokkit to the chare
Ful tendir bene, and hartlie euermare
Be ȝou in batal, now my president
Be my protectour, deuly takand tent
As thys orakle, be hastyt to our wele
O haly goddes, wyth happy fute of it seile
Cum and assist, to thy awayne troyanis
No more he spak, bot wyth that word atanys
And thare recounter our fais, or thay land
Quhilk as thay fyrst set, fute vpon the sand
Wyth slid to cummyng, half delem affray
Or thay thare futesteppis ferme, and tak array
Hap helpis hardy men, be myne awyse
That wele dare take on hand, stout interpryse
Thus said he, and tharwyth in his thocht
Deuysis quham, maist ganandly he mocht
Lede wyth hym to resist, and mete his fais
Or quham he suld, not from the sege vprais
Bot styll remane to ferme, and clois the toun
The wallis, and the trinschis Inuiroun.

In the mene sessoun, the troyane Enee
Begouth hys folkis, from thare schippis hye
On briggis and on plankis, set on land
Mony abade the ebbing, of the sand
Quhill the swarf fard wallis, abak dyd draw
Than in the schaldis, dyd thay lepe on raw
And sum wyth airis, into the coggis small
Entillit to land, bot tho amang thame all
The prynce Trachon, can the schore behald
Thare as him thocht, suld be na sandis schald
Nor ȝit na land birst, lippering on the wallis
Bot quhare the flude went ••yl, and calmyt al is
But stoure or bulloure, murmoure or mouyng
His steuynnis thidder stering, gan the kyng
And on this wyse, his feris dyd exhort
Now o ȝe walit floure, of were at schort
Bend vp ȝour airis stiche, and rais ȝour schippis
Haist ouer the flude, bere to the sch•re wyth skippis
And with ȝour stelit steuynnys ane and all
Thys ground vnfreyndly, to hys and Inimicall
Do chere and cheif in sunder, lyke ane stok
Lat euery barge, doprent hir self ane dok
Na force I not, in syc porte by his mene
To brek the schyp, sa we the land astene
Fra Trachon had thir wordis, said but mare
Hys feris stertis ilk man, tyl ane are
The stowrand fomy bargis, dyd rebound
In rowand fast, towart the latyne ground
Quhil that thare stammes, tuke the bankis dry
And thare kelis stak, in the slyke fast by
But ony harme, or dangere euery one
Bot so dyd not, vnto thy schyp Trachone
For in the schald sche stoppis, and dyd stand
Vpoun dry channell, or ane bed of sand
Ane lang tyme, all to schakin with the flude
Quhyl fynalye thare rokkand, as sche stude
To bristis sche, and riuis al in sounder
Warpit the men amyd the fame thare vnder
The plankis hechis, and many brokin are
That on the streme went, fletand here and thare
Made to thare landing grete impediment
And sliddry gar, so from the wallis went
That of thare fete, war smytin vp on loft
Bot fynalie al drounkit, and forwrocht
Thay saiffit war, and warpit to the coist
Than na delay of sleuth, nor fere nor boist
Withheld Turnus, bot wyth hys hale armye
Aganis troianis, by the coist of the se
He did array, al samynin that stound
The trumpettis blew, thare bludy werelike sound
And fyrst in signe, of gud luke in the weris
Gne the routis, of the lauboreris
Or rural husbandis, inuadis and ouerset
And has the latyne commouns, all hale doun bet
By slauchter fyrst, of thare chyftane Theron
Amang al vtheris, the byggest men of one
Quhilk set apoun Eneas, or he wyst
Bot he throw out his sydis, his swerd has thryst
Persu the stalwart, platit scheild of steil
And throw the schynand, hawbrak euery dele
The giltin mailȝeis, makis hym na stede
For in the coist he tholis, dynt of dede
Syne smate he Lythas, and him has al to lorne
That of his dede moderis, wame furth was schorne
And to phebus god, was consecrate
And was so chancy, in his ȝoung estate
That the swerd, eschapit by hys hap
Bot not at this tyme, so the dedis gap
And not for thens, this douchty Eneas
Kelit the doure and stalwart, Cisseas
And put to deith, the bustuous Gyas strang
That with hys burdoun, al the routis dang
Thare strenthy handis, helpit thaym na thyng
Nowthir Herculis wappinnis, nor armyng
Mycht thaym defend, nor ȝit thare sire that hecht
Melanpus, and companȝeoun was in fecht
To Hercules in his sare Iourneis feile
Quhil he in erth, was liffand and in hele
And lo as Pharon cryis, and doys roust
With haltand wourdis, and wyth mekle voust
Eneas threw ane dart, at hym that tyde
Quhilk as he gapit, in his mouth did glide
And thou also, the fey greke Tydone
Quhylk strangly luffit, thir ȝoung childer Ichone
As thou the ȝoung C•iteus did persew
Quhais ȝowng berd begouth, to spring of new
And was alhale thy new lust and desire
Be the rycht hand, of this ilk troiane syre
Thare had bene made end, of thy amouris grene
And wrechitly had lyne dede I wene
War not the brethir, of the clane phortanis
Apoun Eneas assemblit, al atanys
In nowmer seuin thay war, and dartis seuin
All samyn thay kest, forcy and fyrie leuin
Of quham sum did, but harme of vthir dere
Stot from the scheild his hewmond or hede gere
And sum that wald haue hyt his corps in hy
Venus his haly moder, choppit by
Than to the traist, Achatis said Enee
Reik me dartis, and casting speris sayd he
That in the Grekis bodyis, fixt stude
Quhilum in troyis planis, bedyit wyth blude
And my rycht hand, sal thraw thaym so ilkane
On rutulianis, that nane sal fle in vane
Ane bustuous schaft, with that he grippit has
And incontrare, his aduersaris can tais
Quhilk flaw toward Meonys fast by
Out throw the scheild platit wyth stele in hy
Duschit the dynt, and throw the Coislottis glidis
Out throw the coist, persing baith the sydis
Vnto him stertis, Alchoner his bruthir
To bere him vp, when that he saw him schuddir
Wyth his rycht arme, bot throw his gardy sone
The grundin hede, and bludy schaft ar done
Furht haldand the self, randoun as it went
The rycht arme, from the schuldir al to rent
Apoun the mankit sennouns, hingis by
As impotent quyte lamyt, and dedely
Than Nymptoure, furth of his brotheris corps
Ruggis the runseoun, and with al his fors
It swakkis at Enee bot he ne mycht
Had tyll atteyne nor wound the nobill knycht
ȝit wyth the dynt, the grete Achates thee
He hurt and strenȝeit, has ane lytil we
Wyth thys come Clausus, full of vassalage
Confiding in his ȝouth, and flurist age
The curitanys wyth him, brocht in the preis
And with ane lang stif spere, ane driopes
Smate in the hals, vnder the chyn sa sare
That hym bereft, was in the place richt thare
Bayth voce and spreith of lyffe, and that na wounder
For hys neke bane, and throt was carue in sounder
That doun he duschis, wyth ane felloun rerd
Quhyl that hys forehede, ruschit on the erd
And of his mouth, ane pietuous thyng to se
The lopperit bloude, in dedethraw vodis he
Thre vtheris syne, this ilk clausus has slane
Borne in to trace of the Clan Boriane
And thre come fra, the ciete of Idas
And vthir thre, of the ciete of Ismaras
Be diuers chancis, put he all to dede
Alesus hym recounteris, in that stede
And all the barnage, come from Aurunta
That cald ciete, and thame followis alsua
To that melle, the son of Neptunus
That is to knaw, the wourthy mesapus
Quhilk into hors men, craft was maist expert
Now presis this syde, and now ȝounderwart
To roll abak, and to expell in ficht
Thare aduersaris, and mak thame tak the flycht
Thus by the coist, Asonia that tyde
Hard wolx the batall, apoun athir syde
As thocht sum tyme, amyd the large are
The contrar wyndis, striuis here and thare
Wyth braythfull blastis, in thare equale mychtis
Nane lyst obey tyl vtheris, all so wycht is
Nowthir thay amang thame self, nor ȝit the cloudis
Nor ȝit the rageand seis, quhilk sa loud is
So that the bargane, lang standis in dout
Quha salbe vyctoure, and quha vnderlout
Sa forcely remanys, the elementis
Contrary vtheris, in thare awne ententis
Nane vthir wyse the troyane, oistis in feild
And latyne routis, ȝokyt vnder scheild
Metis in the melle, Ioned samyn than
Thay fewter fute to fute, and man to man

Bot quhen that Pallas, at ane vthir syde
Persauit his archade, army that tyde
In sic ane place, had takin land at ants
Quhare as ane burne, had warpit round stanis
And bussys wyth the brayis doune had bet
That thay war in sa hard myscheif ouerset
As men not vsit for to go, fecht on fute
And thane constrenit, knew nane vthir bute
For scharpnes of that stede, bot leif thare hors
That wele persauit he, how that on fors
Thay gaif the bak, and schupe to take the flicht
The Latynis followand, thame in al thare mycht
Than quhile with prayir now, with wourdis sowre
Thare curage he inflambis in the stoure
Quhilk manere hauyng soith as is the crede
As vther poyntit remedie, at sic ane nede
My feris sayis he, quhidder do ȝe fle
I ȝou beseik be ȝour grete renowne
And be ȝour forcy dedis done of auld
And be ȝour princes, fame Euander bald
And be the oistis, and mony victoryis
That ȝe in were, and batall wan fele syis
And be my gude beleif, and hope that now
Wyth hale confydence, quhilk restis fixit in ȝou
As to atteyne, vnto my faders glore
To vndertak, sic dedis done afore
Do neuer for schame, vnto ȝour self that lak
To lippin in spede of fute, and gyf the bak
Wyth swerdis dynt, behuffis vs perfay
Throw myddis our Inenyis, red our way
Quhare ȝounder sop of men, thikest in ane rout
ȝounder is the passage, quhare we moist wyn out
ȝounder ȝour nobyll cuntre, wyll ȝe pas
ȝone way to wend exhortis ȝour duke Pallas
Here is na power, of diuinite
Nor goddis mycht, ganstandyng vs quod he
Nane vthir bargane, haue we in thir fechtis
Bot agane dedely, and wyth mortall wychtis
Als mony mortall bodyis, here haue we
And als fele handis, to debate the melle
Behaldis how the sey, wyth abstekile grete
Iuclusis vs, and at our bak can bete
On land is left, vs here na place to fle
Quhat wald ȝe ryn to troy, out throw these
Thus sayd he, and furth wyth or he wald ceis
Amyd his feris, he ruschit in the preis
Quhare as the routis, thykkest was in stoure
And fyrst of vthir, to his fatall hour
Hym meis Lagus, ane Rutuliane
Qham first ouerrollit, with ane mekle stane
Throw gird his oist, syne with ane castin dart
Peirsing his rybbis, throw at the ilk part
Quhare bene the cupling of the rig bone
And the ilk schaft stak, in his corps anone
Pallas it Iogillit, and furth drew in hye
Quham ane Hibane, standing nere thare by
Wenit to haue caucht, bot the grip he falit
For as vnwar he stoupit, and deualit
Wod wroith for wo, of this myscheuus dede
Of his dere fallow, in this ilk stede
Pallas him keppit, sic wise on his brand
That all the blude vp to the hilt, and hand
Amyd his flaffand lungis, hid has he
On sic manere, that na man mycht it se
Syne pallas set apoun, Anthemolus
And Schenolus, that of the king rethus
Prince of marrubianis, ancient pepil bene
The quhilk Anthemolus, was that ilk I wene
Defoulit his faderis bed, incestuoslie
And had forlyne, his awin stepmoder by
And ȝe also stout gemmel, brether twa
Chylder and sonnis, vnto him Dawcia
Tymber I mene, and thy brothir Laryd
Amyd the feild, Rutulian did abide
ȝe war sa like, in forme and similitude
Na mycht discerne, betuix ȝou quhare ȝe stude
Quhilk maner errour, or sic misknawing
To fader and moder, is oft plesand thing
Seand thare childer, resembill ane liknes
Bot at this tyme, has pallas as I ges
Markit ȝou swa, with sic diference
That by his keil, ȝe may be knawin from thens
For sa stude with the tymber thou art dede
Euandrus swerd, has smyttin of thy hede
And thy richt arme, of smytin o Laryde
Amyd the feild, lyis the beside
And half lyifles thy fingeris war sterand
Within thy neif dois grip, and faik thy brand
Than schame and dolour, mydlit baytht ouer ane
Behaldis the pepill Archane euer ilkane
To the bargane, aganis thare, Inemyes
For Pallas wourdis, maid thare curage ryse
And eik for thay beheld, before thare ene
His dochty dedis, thay him loue and mene
For Pallas than, through gird Rhetus the king
As he on cace glaid, by on char fleing
Na mare space was, of tary na delay
That Ilus deith, prolongit that ilk day
For agane the Ilo, with fell fere
Pallas addressit had, ane stalwart spere
Rhetus s•ert in betuix, and caucht the dynt
As he one case was, fle and feirs as flynt
From the handis the most forcy, teweras
And thy broder Tyres, that by the was
Ouer weltis Rhetus, in dede thrawis attanis
And with his helis smat, the rutuliane planis
Tumblit from his hie cart, chargit quhare he sat
And on the ground, reboudis with ane s•wat
And lyke as sum tyme, in the someris drouth
Quhen windis rysis, in the north or south
In sere placis, the herde at hys desyre
Amang the scroggy, rammell settis the fyre
Vulcanus oistis, of brym flambis rede
Spredand on brede, vpblesis euery stede
Than he that set the kendlyng, glaid and gay
Behaldis how that the law, dois make deray
Blesand and crakand, wyth ane nyse reuery
Nor vthir wyse, the archadanis in hy
Al samyn socht in feild, with al thare mycht
And made debate, to help pallas in fycht
Bot the Elesus, kene in battal
Thame to recounter, ettlis to assale
And gan himself wele, schroud vnder his scheild
Syne manfully ruschit amyd the feild
Quhare that he slew ane lacone, and feris
And Demodotus efter, in the preis
As him strimanius, by the gorget gryppit
With his bricht brand, his richt hand he of quhippit
And Thoas syne, so smat apoun the hede
With ane grete stone, quhyll mixt of blude all rede
The harne poplit out of the harne pan
This ilk Elesus fader, as witty man
For till eschew, his sonnys fatis strang
Hid him preualy, the thik woddis amang
Bot fra the auld, Elesus lay to de
And ȝeildis vp the breith, with wawland E
The fatall sisteris, set to hand anone
And gan this ȝoung Elesus so dyspone
That by Euandrus wappinnis, the ilk stound
He destynate was, to caucht the dethis wound
Towart quham Pallas, bowned has full sone
And in his renk, on this wise made his bone
Now grant thou god, and fader Tybyrine
Gude chance and fortoun, to this hede of myne
The quhilk I tais, apoun this casting spere
That it may throw, Elesus body schere
And ȝone harnes cote armour, and spulȝe brycht
Quhilk now so werelie, schynis on ȝone knycht
Sall hing apoun ane, aik fast by the bray
The god his asking hard, as he did pray
For quhil Elesus, vnauisitlye
Cled with his scheild, Imaonis him by
That was to him his freynd, and fallow dere
His brist stude nakit, but armour or gere
Quharia he pallas, dedly schaft resauit
Bot Lasus wilfull, his syde to haue sauit
As he that was, ane grete part of the oist
And list not suffir, with sic fere nor boist
Or slauchter made, be Pallas and deray
That his companȝeouns, suld caucht mare affray
Ruschit in the me lle, and first in his tene
Slew Abas, that grete bargane did sustene
The thikest or rout, of all the preis
Thare as maist tary, was or he wald ceis
This lusus all to sparpellit, and inuadis
Doun beting war, the barnage of Archadis
Doun beting eik war, the Ethrurianis
And ȝe also feil bodyis, of troianis
That war not put by greikis, to vterance
Than all the oistis semblit, with spere and lance
The chiftanis all Ioned, with hale poweris
The hendmest wardis, swarmed all yferes
So thik in stale all, merrit wox the rout
One is mycht ony turne, his hand about
To weild his wappin, or to schute ane dart
Full douchteli• pallas, on the ta part
Enforcis him to greif, his fais that tyde
Lausus resistis, on that vthir syde
Thare age war not, fer indifferent
And of maist semelie stature, quhare thay went
Thay war excellent of bewtie, thay tway
Bot so it stude, that fortoun wele away
Wald nouthir suffir, to his realme resort
And netheles to mete, samyn at schort
As in to feild to preif, thare hardyment
The gouernour of heuin, omipotent
Lyst na way thole, for bilif eftar this
To athir of thame, thare dedly fatis I wys
To ane fer grete aduersare, remanis
As here anone dois, follow vnder anys

During this feruour, of the bargane sa
The haly nymphe, clepit Inturna
His brothir turnus, dyd monis and exhorte
To succour Lausus, and his folkis support
The quhilk Turnus, as in his spedy chare
The myd routis went sloppand here and thare
Beheld his feris debatyng wyth pallas
Lo now is tyme to desyst, and let pas
Al sic bargane quod he, ceis in hye
For I wyl set on pallas, enterly
Onelie to me, and to none vthir wycht
The victory pertenis, of sic ane knycht
Glaidlie I wald his fader, stude hereby
This interprise to derne, and to espie
Thus said he, and his feris at command
Vodit the feild, and al plane left the land
Than ȝoung pallas, seand rutulianis
Withdraw the feild sa swyith, and roume the planis
At the proude bidding, of the prince and kyng
Ameruellit ful gretely, of this thing
And ferlie can on turnus, to behald
Ouer al his bustuous body, as he wald
Rollyng his ene, and al his corps in hye
With thrawin luke, on fer begouth espye
Syne mouing fordwart, with sic wourdis on hye
To ansuere Turnus speich, thus carpis he
Owthir thou quod he, for ay belouit I sall
Of riche kinglie spulȝe, triumphale
Quhilk here I sal rent from mine aduersare
Or than sal be renownit euermare
Of ane excellent end, maist glorius
Do way thy boist, and mannance made to vs
For my fader, quham thou desiris besyde
Reputis all elike, quhow euer the chance betyde
And say and thus, amyd the plane furth flertis
The blude congelit, about archadane hertis
Turnus doun lepis, from his twa quhelit chare
And bownis fast towartis, his aduersare
Like as ane lioun from the hillis hicht
Amyd the vail, had scharply gottin ane sicht
Of sum proud bull, with his horn in the plane
Addressand him reddy to mak bargane
Cummis, bradand on the beist fast in ane ling
In sic like wise, Turnus to cunnyng
And quhen that pallas saw him, cum so nere
He mycht areik to him, ane casting spere
Formest he bownis to the ioynyng place
Gif so betid that fortoun, of hir grace
His Intirprise, for stout vndertakyng
Wald help him or support, in ony thing
As he that ȝoung was, and of strenth all out
Na wise compere to Turnus, sterne and stout
And to the grete goddis, in heuin abone
Apoun his maner prayand said he sone
I the beseik, thou mychty Hercules
Be my faderis gesning, and the ilk deis
Quhare thou strangeare, was ressauit to herbry
Alsist to me cum, in my help in hy
To performe this excellent, first iorneye
That turnus in the dede, thraw may me se
Sereif fra him, his bludy armour rede
And ȝaldand vp the breith, in the ilk stede
Mot with his eue behald, me him before
In hie triumphe, with our hand as victore
Grete hercules, the ȝoung man hard anone
And from the boddum of his hart did grone
Hydand his smert, for reuth of Pallas ȝing
Seand the fatis wald haue his ending
And for ennoy, salt teres all in vane
Furth ȝettis ouer his chekis, thyk as rane
Tho Iupiter his curage to astabil
Thus to his son spak wourdis amyabil
Til euery mortal wycht, perfay
Determyt standis, the fixit letter day
Ane schort and vnrecouerabil terme is set
Of lyfe quhen al moist nedlingis pay that det
But to prolong thare fame by nobil dedis
Fra vertuus werk, that cummis and procedis
How mony sonnis, and dere childer sayd he
Of goddis kyn, vnder troy wallis he
War done to dede, and brytnyt blude and bone
So that amang al vtheris Serpedone
My tender get my kyn, and blude lyis slane
Forsoith also I say, the in to plane
The finale fate, awatis turnus in feild
The date and me this, approchis of his eild
On this wise spak grete Iouie, to hercules
And with that wourd, dis ene towart the preis
On the rutulianis feild, addressis he
And the ilk stound, ȝoung Pallas lettis fle
Wyth mekil force, at turnus ane grete spere
And syne anone, his bricht brand byrnyst, clere
Hyntis furth of the scheith, to mak debate
The schaft flew towart turnus, and him smate
Apoun his schulder, aboue the gardyis he
That rysis vmaist thare upon we se
And throw the bordour, of the scheild sa peirsit
Quhil fynaly in sum dele, it reuersit
And hurt ane part of turnus, byg body
Than turnus smitin ful of felony
Ane bustuous larice, with grundin hede full kene
That lang quhile tasit, he in propir tene
Lete gird at pallas, and thus wise said he
Consider ȝounkere gife, ouer lancis be
Better of tempir, and mare penetratiue
And with that word, the schaft flew furth belyue
So that the scharp poynt, of the brangland spere
Throw out amyddis, of the scheild can schere
Persand sa mony platis, of irne and steile
And sa feil plyis, of bull hydis ilk dele
All samyn couchit, in his targate strang
The bustuous strake, throw al the armour thrang
Thats•yntis na thing at the fyne hawbrek
Quhil thorow the coist, thirllis the dedely prik
Pallas no schrynkand, for the mortall dynt
In vane the haitschaft, of his wound hynt
For all togiddir, by the samyn way
The blude and saul, passis hine bayth tway
Apoun his wound anone, he ruschis doun
Aboue him rang his harnes, with ane soun
And that vnfreyndly, erth i••micall
That in his deith, he suld not stryke nor call
As was the gise, with bluddy mouth bate he
Turnus apoun him stand and carpis on hie
O ȝe pepill of Archadie, takis tent
And my wourdis, do rehers end present
To king Euander sayand him planly
That his son pallas, to him send haue I
In sic array, as that he has deseruit
And of my gentrice wil, ȝe be preseruit
To all estate and honour, funerall
With sic solace pertenyng, beriall
Of tumb and of enterement, as efferis
Na liuil thing perfray, in to thir weris
Has him becoft, the freyndschip of Enee
And sayand thus, with his left fute has he
Pallas dede corps ouer weltit, or euer he stent
And syne about his sidis, sone has rent
His goldin girdill, passand ane grete dele
Quhare in was grauin, crafte lie and wele
Of Danais dochteris, the iniquite
How that the fyfty ȝoung men, shame to se
Was fully murdrit, on the fyrst nycht
As thay war spousit, to thare Ladyis brycht
The chalmeris porturit war, bespred with blude
Quhilk histories Euritioun, werkman gude
Had payntit wele, and wrochtful craftelie
In the wichty platis, of the gold massy
Of quhais spulȝe now, is Turnus glaid
Ioyfull and blyth, that it conquest had
O mannis mynd, so ignorant at all
Of thingis to cum, and changis quhilk may fall
Vpheit sone, in blynde prosperite
Can not be war nor mesure hald, with the
The time sal cum, quhen turnus sall perfray
Hate and warye this spulȝe, and this day
Desyring he mycht by, formekil thing
That he had neuer twichit pallas ȝing
About the corps assemlit, tho his feris
With mekill murnyng, and huge plente of teris
Apoun ane scheild pallas, body thay laid
And bare him of the feild, and thus thay said
O Pallas how grete doloure, and wourschip
To thy fader, and all his fellouschip
Sall thou rendir, and bring •ame said thay
This was to the in werefare, the first day
Quhilk first in batell, dressit the to go
The ilk for ay, has the bereft tharefro
And not the les, thy swerd leuis in planis
Grete hepis dede of the rutulianis

Tho name incertane, rumoure nor deming
Bot so uir bodword, come thare and warnyng
Vnto Eneas of this grete myschance
Schawand how that his folkis, stude in ballance
As bot ane litil distance, al from dede
The time requirit, for to seke remede
Ane succour troianis, quhilk had tane the flycht
Than as a wod lioun, ruschit he in the fycht
And all quhom he arekis nerrest hand
Wythout reskew, downe mawis with his brand
The bitand blade, about him inuyroun
Amyd the routis, reddis large roume
Enrageit and inflammyt, thus in yre
Throw out the oistis, turnus that proud syre
Quhilk had this new slauchter made socht he
Ay prentand in his mynd, before his E
The gudly Pallas was sa stout and ȝing
And the grete gentrice of Euander kyng
The chere and feist, hyme made but ane strangere
Perodour al thing, how and quhat manere
He was ressauit and tretit thankfully
Syne of his band, of freyndschip and ally
With aithis sworne, and interchangit handis
Remembring tho, his promyses and commandis
Amouit in his hete, or euer he stynt
Foure ȝoung men, quyk he has in handis hynt
That borne war, of the ciete hecht fulmon
As mony syne, he takin has anone
Bred and vpbrocht, besyde the flude vsens
Quham that he ettilles, for to send from thens
To Pallas like to walkis, and obsequies
To strow his funeral fire, of birnand treis
As was the gise, with blude of prisoneris
Eftir the auld rites, in to mortall weris
Syne hynt Eneas, ane Perrellus lance in hand
And it addressis fer furth, on the land
To ane magus that subtell, was and sle
And Iowkit in, vnder the spere as he
The schaft schakand flew furth, about his hede
And he Eneas, in that samyn stede
About the kneis, grippit humelie
With pietuous voce, syne thus begout to cry
Be thy dere faderis goist, I the beseik
And be that gude beleif, quhilk thou has eik
Of Ascaneus vprising, to estate
This silly saul of myne, sa faynt mate
Thou sauf to myne awne son, and fader dere
I haue a house riche, full of mobillis sere
Quharin bedeluin lyis, ane grete talent
Or charge of fyne siluer, in veschell quent
Forgeit and pounsit, wounder craftely
Ane huge wecht, of fynest gold tharby
Vncunȝete ȝit, ne neuir put in werk
Sa thou me saif, thy pissance is sa stark
The troianis glorie, nor thare victorye
Sall na thing change, nor dymynew tharby
Nor ane pure saule thus hingand, in ballance
May sic diuisioun mak, nor discrepance
Thus said this silly magus, all in vane
Quham to Eneas, answeris thus agane
Thy mony talentis of fyne siluer and gold
Quhilkis thou rehersand, here before has tald
Do keip vnto thy small childer, and airis
Late thame bruke wele, I consent it be tharis
All interchange, and ransonyng perfay
In this batal turnus, has done away
Now laitlie slaand ȝoung pallas alace
That reuthful harme, and that mischeuus cais
Felis baith Askaneus, and my faderis goist
For thay no litil thing perfay has lost
Thus sayand, by the helme him grippis he
With his left hand, and fast as he micht dre
Wryith doun his nek, quharm but mare abaid
His bludy brand, vp to the hiltis slade
Not ferthens, stude hemonides allane
Preist vnto phebus, ano thrinfald dyane
On quhais hedewymplit, haly garlandis
With thare pendentis, like to ane myter standis
His habit as the schene son, lemand lycht
And al his armour, quhite and birnist brycht
Quham Eneas assalit michtely
And can do chais out throw the feild in hye
That fleand stummerit, and to the ground went sone
The troiane prince, doun lowtis him abone
And with his brand him britnis, at deuise
In manere of ane offerand sacrifice
The large schadow of Eneas, in feild
Did hale the dede corps of this preist ouerheild
Serestus sortis vp, his armour gay
And on his schulderis, caryit has away
To hing as trophe, or signe victorial
To mars the god, quhilk Gradi•us is cal

Ceculus discendit, of Vulcanus blude
And vmbro eik, the stalwart chiftane rude
That come was, fra the montanis marciane
The bargane stuffis, reueland in agane
Bot Eneas discend, from Dardanus
Gane standis thame, full brym, and furious
And vnto ane hecht, auxurus in the feild
Of straik the left arme, all doun with the scheild
Quhilk had mad sum grete vant, spekand proudlie
Wenyng that in his sawis, by and by
Thare had bene grete effect, and hardyment
As thocht he wald extoll, in hys entent
Hys manhede to the heuyn, and starnes hie
And promyse to hym self, for hys bountie
Agyt Canois •aris, and lang proces of ȝeris
Now now he lyggis law, for al his feris
Syne baldly wyth, glayd curageas I ges
Agane Eneas, can tarquyntus dres
In schynand armour, wounder proud and gay
Of driop born, the nymphe or schyne may
To fawnus wynnyng, in the woddis grene
And to recounter Enee, inflamyt in tene
Kest hym selfin, bot the tothir but fere
Bure at him mychtely, wyth ane lang spere
Throw out his scheild of pais, and hawbrek fyne
And to the ground, can doun his hede declyne
All thocht he than, him humly besocht
And schupe to say mekil, al was for nocht
Hys pallat in the dust, bedowyne stude
And the body bathit, in the hate blude
Enee oue•weltis sayand, thir wourdis wyth all
Wyth troublit breist, and mynd Inimicall
Now ly thou thare, that wenit the so wicht
That thou was ferefull, vntyl euery wicht
Thy best belouit moder, sall the not haue
To erd as custome is, nor delf in graif
Na do thy bones, honour with syc cure
As thame to lay in faderis sepulture
Bot sall be left, to the wylde beistis fude
Or than the spate, wattir of this flude
Sall bere the, in the depe, and thareon raw
With emptiue throttis, sall thy banis gnaw
Thir sey monstouris, in thare wod rage
And lape thy blude, thare hunger to assuge
Syne but delay Antheus, and Licas
Quhhilkis that of Turnus, first warde ladaris was
Persewis he and also, Neuma bold
And Camerthes brycht schininge, al of gold
Son of the manly Wolstens, capitane
In all the fertill ground, ansoniane
The richest man, and king was this Wolstens
Of Amytles the ciete, of silence
And like as Egioun, the king of Gyandis
Quhilk had thay, ane hundreth armes & handis
And fifty mouthis of quham, the fyre did schyne
As he in to the battall, Gigantyne
Incontrare Iouis thunder, and fyre slaucht
With als mony drawin swerdis, faucht
Clatterand in bargane, with sa mony scheildis
The samyn wyse enrag•ing, throw the feildis
Went Eneas as victor, with ouer hand
Fra tyme that anys, bedyit his birnist brand
And wet he had, in hate rutuliane blude
So that also, in this ilk furie wod
He draif at Nypheus, amyd the breist bane
Set in his foure quhelit, chariote allane
Bot fra the hors on fer, did him espye
So grym of chere, stukand sa bustudusly
For fer they stert abak, and furth can swak
The duke Nipheus, wyde apon his bak
And brak away with the carte, to the schore
With stendis fell, and mony bray and snore
The self stound amyd, the preis fute hote
Lucagus enteris, into his chariote
With quhite hors drawand, wounder lustelie
His brother ligere, sittand nere him by
This ligere led the renȝeis, with his hand
Bot bald Lucagus, swakkis ane burnist brand
Eneas mycht not suffir, nor sustene
Of thame sic feruoure, in that felloun tene
Bot ruschit furth, and with ane grete spere
Forganis thame can, into sicht appere
Quham to this ligere carpis, apoun hie
Thou seis not Diomedis, stedis here said he
Nor ȝit Achilles chare, persauis draw
Thocht athir vniquest the in feild, we knaw
Nor ȝit the troiane, planis behaldis thou
The end of thy age, and of bargane now
Sall be maid in thir landis, on this ground
Sic wourdis vane, and vn semelie of sound
Furth warpis wyde, this ligere fulichelie
Bot the troiane baroun, vnabasitlie
Na wourdis pres, to render him agane
Bot at his fa let fle, ane dart or flame
That hit Lutagus, quhilk fra he felt the dynt
The schaft hinging, in to his scheild but stynt
Bad driue his hors, and char al fordwert streicht
As he that him addrest, to the feicht
And strekit furth, his left fute in to his chare
Bot sone Eneas spere, was reddy there
Beneth his schynand, scheild […] law
So that the grundyn hede, the ilk thraw
At his left flank or lisk perfit tyte
Quhill clare out ouer, the chariot is he sinyte
And on the ground weltis, in the dede thrawis
Quhom on this wise, with soure wordis and sawis
The pieteous Eneas, begouth to schyde
Lutagus sayd he, forsoith as at this tyde
Na slaw cours, of thy hors on weldy
Thy carte has rendrit, to thy Inemye
Nor ȝit nane vane wrinchis, nor gaistis quent
Thy chare constrenit, bakwart for to went
And magre thyne wythdraw, the fais grippis
But lo now of thy fre wyll, as thou skippis
Out ouer the quhelis, of thy carte god wa•
Leiffand the renȝeis, and hors al desolate
This beand said, the hors renȝeis he hynt
The tothir fey bruthir, or euer he stynt
Lap fra the cart, and lurkand pieteously
Vp heuand his bare handis, thus dyd cry
O troyane prynce, I lawly the beseik
Be thyneawne vertuis, and thewis meik
And be thy parentis, maist of renowne
That syc ane child, engendrit has as the
Thou spare this sylly, wofull saul at leyst
Haue reuth of me, and admyt my request
Wyth wourdis fele, as he thus gan requere
Enee at last on this wyse, made ansuere
Syc sawis war langayr, out of thy mynde
Sterff the behuffis, les than thou war vnkynd
As for to leif, thy brother desolate
All hym allane, na fallow the samyn gate
And tharewych all, the hirnys of his goist
He rypit wyth the swerd, amyd his coist
So tyl hys hart stonndis, the pryk of deith
He weltis ouer, and haldis vp the breith
Thys dardane prynce, as vyctour thys in were
Sa mony douchty corpis, has brocht on bere
Amyd the planis, ryddand large gate
As dois ane routand, ryuererede on spate
That for hys dyntis, wox hys fais agast
As for the ferefull, drumly thunderis blast
Quhyl fynalie Ascaneus, the ȝoung page
And the remanent, of troyane barnage
Quhilkis war as sayd is, besegeit in vane
Thare strenth has lesit and taken has the plane

The ilk stound, of his awin fre volounte
Ioue callis Iuno, and thus carpis he
O thou my sister germane, and my fere
My best belouit spous, maist leif and dere
Thyne opinioun, has not dissauit the
As thou beleiffit now, may thou not se
How venus dois sustene and fortyfye
Thy troyane routis, and pussance by and by
Nane actiue handis, nor stout myndis I mene
Nor bodyis reddy, all perrell to sustene
Haue thay, thou may se be experience
Quham to Iuno, wyth humyle reuerence
Ansueri• sueit, and maist gudlie husband
Quhare to list the renew, my sorow at hand
As careful wycht, that lykis not syc bourdis
All efferit of thy fatall, dredefull wourdis
I am bestad, bot war I now I wene
Als strangly belouit, as I sumtyme haue bene
Thocht ȝit god wa•e, accordit so to be
Baith to my honour, and thy dignite
I say war I belouit, as I was are
Thou Ioue almychty, rengand euermare
Suld not deny me, so sobir ane thyng
Bot that I mycht withdraw, at my lyking
Furth of the feyld Turnus, and him saif
Vnto his fader Dawnus, that ouer the laif
Belouit hym as ressoun, wald quod sche
Now sal he perische, and now sal he de
And sched his gentyl blude so pacient
In greuous panys, be troianis tort and rent
And neuer the les, his kyn original
Is renownit, of godlie flok rial
Discend of our sede, and heuynly clan
Fra god Pilumnus, to rekin the ferd man
And eik thou wat, ful oft with large hand
Wyth mony oistis, and rycht fare offerand
Thy tempillis, and thy altris chargit has he
In wourschip of thy mychtye maieste
The souerane king, of heuyn etheriall
In few wourdis, maid ansure thus at al
Gif thou askis me, respit or delay
Bot for ane tyme, or till ane certane day
Of thys euident deith, of Turnus ȝing
Desiring I suld grant the, sic ane thyng
Al thocht he mortal, be richt sone we knaw
I leif the to remoue him, and with draw
And from thys instant perrellis hard sate
Steil hym away, and gyde hym by thy gate
For sa long space, ȝit restis at wil of me
To lenth hys lyffe, quhilk I the grant quod he
Bot gif sa beis, that vnder thy requeist
Mare hie pardoun, lurkis I wald thou ceist
For gif thou wenys, that al the victorye
Of the batall, and chancis by and by
May be reducit, and alterit clare agane
Ane mysbeleue, thou fosteris al in vane
To quham Iuno, on this wyse sayd wepyng
Quhat harme mycht fall, thocht be sum takin or sing
Thow schew thy mynd, and grantit that quod sche
Quhilk by wourdis, of fatal destany
Now grounschis thou, to gif or to concede
That is to say, quhat force, thocht thou in dede
Woldest repreif, and ratyfy agane
That Turnus lyffe, ane lang tyme suld remane
Bot now approchis, to that Innocent knycht
Ane fereful end, he sal to dede be dycht
Or than my sawis, ar voyde of verite
And O wald god, that rather so suld be
That I dissauit war bot with fals drede
And that thou list, as thou has mycht in dede
Thy fatal promyssis, and thy statutis strange
In bettir purpois, to translate and change
Fra sche thir wourdis, had sayd the ilk tide
Doun from the heuin, sche lete hir selfin ••yde
Before her driuand, ane tempestuous wynd
And al about, before and eik behynd
Within ane cloude of myst, circulit clene
Sche throw the are, bownit furth thys Quene
Towart the Troyane oistis in the planys
And to the tentis, socht of Laurentanis
This goddes than, furth of ane bois cloude
In liknes of Enee, did schape ane schroude
Ane vode figure, but strenth or curage bald
The quhilk wounderus, monstoure to behald
With troyane wappinnis, and armour grathis sche
With scheild and helme, and tymbret set on hye
Be semblant, like Eneas godly hede
And thareto eikis, sche in euery stede
Quent fenȝeit wourdis, faynt, and counterfete
With voce but mynd, or ony vthir consate
And fenȝeis eik hir counterfete and pasis
Sic lik as that thay say, in diuers placis
The wrachis walkis, of goistis that ar dede
Or as the slepy dremes fra stede to stede
Fleand in sweuyn makis illusiouns
Quhen mennys mynd, oft in driuylling gronys
And all before the forefront of the feild
Rycht haltanlie as curagious vnder scheild
Musturis thys ymage, that wyth dartis kene
Aggreuit Turnus, and did him child in […]
Prouocand him, to bargane and to Ire
And Turnus tho als hate as any fire
This figure did inuade, and thare at he
In grete dispite, ane quhirland dart let fle
Bot this ilk schaddow, as sum dele addred
Turnit about, and gaif the bak and fled
Than Turnus wenyng Enee, had tane the flycht
And all awounderit, of that selcouth sycht
Wythin hys mynd, ane, vane comfort caucht he
And cryis loude, quhiddir fleis thou now Enee
Leif neuer for schame, thus desolate and waist
Thy new alliance, promist the in haist
Of lauinia the spousinge, chalmer at hand
And al this ilk regioun, and this land
Quhilk thou safer, has soucht out ouer the se
My richt hand sal the sauyn, gif quod he
With sic wourdis, he schoutand did persew
And ay the glymmerand brand, with schuke and schew
Na thyng persauand, how this myrth and blis
Away quyte with the wynd, bewaffit is
On cais thare stude, ane meikle schip that tyde
Hir wail Ioned, til ane sthore rolkis syde
Wyth plankis, and wyth briggis laid on land
The entre reddy graithit, wele thay fand
In the quhilk schip Osynus king I wys
Come laitely from the ciete of Clusis
Thiddir went this wrayth, or schado of Enee
That semyt all abasit, fast to fle
And hid hir derne, vnder hichis therin
Na slaware Turnus, haistis hym to ryn
That but delay, he spedis to this schip
Ran ouer the brig, and Inwyth burd can skip
And skars was enterit, in the fore castell
Quhen saturnus douchter, saw hir tyme befell
That sone the cabyl, in sonder smitis sche
And fra the schore, draif the schip throw the se
Bot Turnus absent, thus this samyn houre
Eneas serchis throw, amyd the stoure
And in his renk, quham euer he met lay dede
Full mony ane man, he kelit in that stede
And tharewyth all his lycht, and fenȝeit goist
Fra tyme the schyp was chargit, fra the coist
Na langer sekis, hirnes hyr to hyde
Bot flew vp in the are, the samyn tyde
And all desoluit, in ane dyrk cloud
The mene sessoun, can force of wyndis loud
Turuus fer furth, amid the depe se dryue
He dyd behald, about him tho belyue
All Ignorant, quhat wyse thys chance was wrocht
And of hys lyffe sauyng, nothing he roucht
Wyth handis Ioned vp, towartis the heuyn
Sic Wourdis he furth brade, wyth drery steuin
Almychty fader, of the heuinnys hye
As thou me reput, on sic wyse to be
Confusit in this schame, for myne offence
And wyl I suffir sic torment, and penance
Quhidder am I driue, or from quhens am I cummyn
Quhat maner eschewing or fleing haue I mummyn
In quhat estate, sall I returne agane
Sall I neuir se, the wallis laurentane
Or euir est my tentis, sall I se
Quhat may ȝone oist of men, now say of me
Quhilkys my querrel, and me followit to feild
Quhom now allace now fethtand vnder scheild
ȝounder schame to say, the harme so wikkitly
Reddy to myschevus, deith beleft haue I
Lo I behald, thaym fleand pail and wan
And heris the granyng of mony douchty man
In my defalt, falland fey to the ground
Quhat sal I do, allace the woful stound
Or quhilk land, thocht ane thousand tymes I steruit
May swelly me so depe, as I haue seruit
Bot O ȝe wyndis, rather haif mercy
On rolkis, and on craggis by and by
Do swak this schip sen here na erth I se
And haue of wrechit Turnus sum piete
Quhil of hys fre wil stad, on this manere
Beseikis ȝou, with al hart•te prayer
Do warp my body, in the schald vnkend
Fer furth in Cirtis, at the warldis end
Quhare Rutulianis, me neuer fynd agane
Sa that no fame, nor rumoure may remane
Efter my deith, of this schamful trespas
And sayand thus, in mynd he did compas
Ful mony chancis rolland to and fro
Quhidder gif he suld, for propir lake or wo
Into this furie, smyte him wyth hys brand
And thrist the bludy blade, in with his hand
Throw out his ribbis and sched his hart blude
Or than to swak hym self, amyd the flude
Swymmand to seik, the nerrest coistis bay
In feild agane, the Troianis to assay
Athir way to assay, thryis preissit has he
And thryis him styntis, Iuno Quene moyst hie
Hauand compassyoun, of this ȝoung man bald
And can assuage hys mind and hand withhald
Furth held the schip, slyda•d out ouer the studis
Wyth prosper wynd, and followand tyde sa, gude is
Quhil he is caryit, souirly throw the se
Tyll Ardea his faderis, auld cietie

Duryng this quhyle, in the fatis merciall
Mezentius mouit, wyth furoure bellicall
By instigatioun, of Ioue in that nede
Gan to the batall, in his place succede
And the troyanis to inuade, na thing sparis
That semyt proude, as al the feild war tharis
Than samyn to recounter, him attanis
Semblit the hale oistis, of Ethrurianis
And all assailȝeit, mezentius allone
Aganis ane man, thare routis euery one
Inflammyt all in malice, made persutis
And thik as hale schoure, schaftis at him schutis
Bot he lyke to ane ferme rolk, quhilk we se
Screkyt on lench, amid the large se
Situate agane the, rageand wyndis blast
And brym wallis, boldynnand wounder fast
From all that violence, dois hym self defend
And hale the force, sustenis to the end
Baith of the heuynnis, and bir of seis rage
Remanand vnremouit, ferme in his stage
Als sterne standis, menzentius in that stound
And fyrst he has fyllit, and laid to ground
Hebrus the son, of ane dolitaone
And him besyde, Licagus slew anone
And Palynus eik, accustumate to fle
Bot wyth ane stane, Licagus britnythe
Quhilk afane montane, semetane grete nuke
With quhom him on the visage, he ouertuke
And Palynus loch, Sennouns smate in tway
Made him sa slaw, he mycht not fle away
Thare armour syne, to lausus geuin has he
To were on his sulderis and croun on hie
The crestis set, the quhylk so rychely schane
He slew also Euancus ane troiane
And mynas syne, he kelis in the feild
Quhilum to Parys companȝeone, ane euin eild
Quham one ane nycht Theana, gude and fare
To hys fader Amytus, in troy bare
Quhen Hecuba, douchter of Cisseus
Dremyt sche was grete (the story tellys thus)
Wyth ane fyre brand, and the self nycht
Was deliuer of paris the fey knycht
Quhilk in his natyue ciete maid his end
Bot thare feildis laurentyne vnkend
With haldis now, the body of Mynas
So brym in stoure that stound, mezentius was
Like to the strenthy sanglere, or the bore
Quham houndis quest, with mony quhryne and rore
Doun driuing from the hychtis, made descend
Quhilk mony wynter to fore had him defend
In vesulus, the cauld montane hie
That is ouerheildit, wyth mony fir tre
Or than the bustous swyne fed wele that bredis
Amang the buskis rank of risp and redis
Beside the laik, of laurent mony ȝeris
Quhen that he, is betrappit fra hys feris
Amyd the hunting ralis, and the nettys
Standis at the bay, and vp the birsis settis
Graissand his tuskis, wyth austerne fyrie ene
With spaldis hard and harsk, awful tene
That nane of al the hunt mene thare present
Him to aggreue, has strenth or hardyment
Nor dar approcheing, wythin his bit •ere
Bot standand fer on dreich, wyth dart and spere
Assouerit of his reak, the beist assayis
With felloun schoutis, bustuous cryis and brayis
Nane vthir wyse, stude the tuskane rout
This stalwart knicht, Mezentius about
And thocht thay iust caus, had of wraith and fede
Thare was nane of thaym, durst hym put to dede
Nor curage had with drawin, swerd in hand
Hymtyl assayle, nor mach apoun the land
Bot wyth takillis, and casting dartis on fer
Thay warp at hym, but durst nane cum nere
And wyth huge clamour, him infestis that tyde
He vnabasit, about on euery syde
Behaldis girnand, ful of propir tene
And with his scheild, choppit by schaftis bedene
Furth of the ancient boundis, of chorit tho
Was cumming ane greik, quhilk clepit was Arto
That fugitiue, into his lusty hete
Had left his spousale treuth plicht, vncomplete
Quham as Mezencius, saw amyd the rout
Him greuand sore, as werioure sterue and stout
And saw the plesand plumes, set on hicht
Of his trymbrel, and eik the purpoure bricht
Quhilk of his treuth plicht, luf he bare in syng
Than like ane hungry Lyoun, rummissing
Constrenit by hys empty, rageand maw
The beistis dennys, circuland al on raw
Gif he on cais espies, ane swyft ra
Or the ȝoung hart, with springand tyndis twa
Ioyfull he bradis, theron dispituusly
Wyth gapeand goule, and vprysis in hy
The lokkeris, lyand in his nek rouch
And al the beistis bowellis, thrymlis trouch
Hurkilland thareon, quhare he remanit and stude
His gredy gammes, bedyis with the rede blude
On the samyn wyse, Mezentius rycht baldly
Mydwart hys fais rout ruschyt in hye
Doun smytis fey atroun, amyd the oist
That in the ded thraw, ȝaldand vp the goist
Smate wyth hys helys, the ground matalent
And brokin schaftis, wyth hys blude bysprent
Thys ilk Mezentius, eik dedenȝete not
Tosla Orodes, quhilk than was on flocht
That is to knaw, quhylk frawart him he went
And repute na wyse, as by hys entent
Sic an steand, to wound into hys bake
Vnwarnist, quhen he na defence micht make
Bot ran about, and met him in hys rais
Than athir man, assemblit face for face
Orodes was of prettik, mare al out
Bot the tothir in dedis of armes mare stout
That to the erth, ouerthrawin he has his fere
And possand at hym, wyth his stalwart spere
Apoun him set his fute and thus, he sayd
O now my feris beis, baith blyith and glaid
Lo ane grete partye, of this were but leis
Here lyis at erde, the douchty orodes
His feris samyn, rasit vp ane cry
Wyth Ioyus sound, in sygne of victory
And blew the prise triumphale for his deith
Bot this Orodes, ȝeldand vp the breith
Vnto Mezentius carpis thus on hye
Me vnreuengit, thou sall neuir victor be
For wele I wate, that sone I sal be wrokin
Na for al thy proude wourdis, thou has spokin
Thou sal not endure, into syc Ioy
Bot siclyke chancis, and sembland ennoy
Abidis the thocht, thou be neuir sa bald
The samyn feild, sall thy dede corps withhald
To quham Mezentius, smyland sayd in tene
Thou sal de first, quhat euer to me foresene
Or prouidit has almychty Ioue, quod he
Quham fader of goddis, and king of men clepe we
And sayand thus, the schaft the ilk thraw
Furth of his wound, and body did he draw
To Orodes the hard reist, dois oppres
The cald and Irny slepe, of deithis stres
And vp the breith, he ȝeld anone ful richt
Wyth ene closit, and euirlesting nycht
Cedicus al to trinschit, Alchatous
And Sacratoure, to ground laid Hydaspus
Rapo, ane Archade, has Partheneyus slane
And Orses wounder, big of blude and bane
And Mesapus kelit, the stout Clonyus
And Erithathes, with lithaonius
The formest lyggand, at the erd he ouer raucht
That by his hedstrang hors, ane fal had caucht
And lathaonius eik ane futeman he
Lichtit on fute, and slew in the melle
Aganis him then, went ane man of arge
Hate Lytyus bodyn, wyth spere and targe
And by the way, Valerus gud in nedis
Not inexpart, in douchty cldaris dedis
Recounterit him, and put him to the dede
Salius ane troyane, in the samyn stede
Atronius slew, and Nealtis expert
To schute the steand arrow, or casting dart
Quhilk inuadis, ane man or he be war
Slew Salyus wyth schot beand on far.

Thus aufull Mars, equale with his brand
He sorow rasit apoun, athir hand
Huge slauchter made was, and sere wonndis wyde
Thay kele and are bete doun, on euery side
That samin in the feild, thay fall in fere
Baith the victouris, and thay that vincust were
And nowthir partie wist, nowthir he nor he
To saif him self, or quhare away to fle
So that the goddes, in Iouyis heuinly hald
Had compassioun, and reuth for to behald
The wraith and Ire, of athir in the fichtis
That sic distres rang, amang mortall wichtis
Venus towart the troyane, side •uke tent
Aganis quham all, full matalent
Saturnus dauchter Iuno, that full bald is
Towart the partye, aduersare behaldis
And the paile furoure, of Thisiphone
Walkis wod wroith, amydwart the melle
Bot principale mez, all engreuit
With ane grete spere, quharewith he feil mischeuit
Went brangland, throw the feild all him allone
Als bustuous, as the hidduous orion
Quhen he on fu•e wod, throw the mekylse
Scherand the streme, with his schuldderis hie
Aboue the wallis, of the flude apperis
Or like ane anciant aik tre, mony ȝeris
That grew apoun sum mountane, •oppis hycht
Semand so hie, to euery mannis sicht
Quhilk thocht his rutis, sprede in the ground all sydis
His crop vpstracht, amyd the cloudis hydis
Siclike mezentius, musturis in the feild
Wyth huge armour, baith spere helme and scheild
Aganis quham Eneas, fast him hyis
Fra tyme amyd the rout, he hym espyis
The tothir vnabasit, al reddy thare
The cummyng of his douchty aduersare
Abydis stoutly fermyt in his force
And massalie vpstude, wyth bustuous cors
And mesurand with hys E, als large spayis
As he mycht thraw, ane casting spere thus sayis
My rycht hand, and this fleand dart mot be
Quhilk now I cais, as verray god to me
Assistyng to my schot, I you beseik
For I awow, and here promittis eik
In sing of trophe, or triumphale meith
My louyt son Lausus, for to cleith
With spulȝe, and al harnes rent quod he
Of ȝounder rubaris body, fals Enee
Thus sayd he, and fra his hand the ilk tyde
The casting dart, fast birrand lattis glyde
That fleand stlentis, on Eneas scheild
Syne staudand fer, on roume ȝonde in the feild
Smat wourthy Achores, the ilk thraw
Betuix the bowellis, and the ribbis law
Anthores ane of grete Hercules feris
That come from Arge, into his lusty ȝeris
Inherdand to Euander, the Arthade
And had his duellyng, and his residence made
In Palentyne ciete, Italiane
Vnhappely now liggis thus doun slane
All of ane wound, and dynt within the fycht
Addre•ssit was, towart ane vthir mycht
He deand he beheld the heuynnys large
And can behald his swete cuntre of arge
Than the reuthful Eneas kest his spere
Quhilk throw mezentius, armour dyd all schere
Throucht gird his arge platit thryis wyth stele
And throw the couchit lynnyng, euery dele
And thrynfald playis, of the bullis hydis
That law doun in his flank the dynt abydis
Bot it bereft him nowthir lyffe ne mycht
Eneas the quhilk was expert in ficht
Ioyfull quhen that, Mezentius blud saw he
Furth hynt hys swerd, that hang law by his the
And feruently, towart hys fa can pas
Quhilk for the dynt sum dele astonist was
Quhen Lawsus saw this auenture of were
He wepit wale sare, for hys fader dere
So wo begone, become thys lusty man
That salt teris, fast ouer hys chekis ran
Forsoith I sal not ouer slip in this stede
Thy hard myschance, lausus and fatale dede
And thy mayst douchty actis bellical
O fresche ȝoungkere, maist ding memorial
I sal rehers, gif ony fayth may be
Geuin to sa grete dedis of antiquite
With this Mezentius, menȝeit drew abak
Harland his leg quharin the schaft stak
That quhare he went, he beris ouer the feild
Hys Inemyis lance fast, fixit in his scheild
Betuix thaym ruschis in, the ȝoung lawsus
Amyd thare wappinnis, sterne and curageus
Him self has set for to sustene the fycht
Vnder Eneas richt hand rasit on hycht
That reddy was to smyte, ane dedely wound
Insteppis he, and baldlie the ilk stound
The bytand brand, vpheuit keppit he
And can resist, and stent the grete Ene
His feris followis, with ane felloun schout
Quhil that Mezentius, of the feild wan out
Defend and couerit, with his sonnys scheild
Thay cast dartis, thikfald thare lord to heild
Wyth schaftis schot, and flanys grete plente
Perturband thare feirs aduersare Enee
That al enragit, his souir targe erekkit
And thare vnder hym haldis, cloisly dekkit
And lyke as sum tyme cloudis, bristis attanis
The schoure furthȝettand of hoppand halestanys
That al the plowmen, and thare hynes in hy
Fleis of the croftis and feildis, by and by
And eik the trauelloure, ȝound vnder the wald
Lur kand withdrawys, to sum souir hald
Owthir vnder wattir brayis, and bankis dern
Or in sum craggis clift, or depe cauerne
So lang as that, the schoure lestis on plane
That he may quhen, the son schynes agane
Exerce hys Iournay, or his werk als fast
Siclike Ene wyth schot, and dartis cast
Was all ouer held, and vnbeset ilk syde
Quhill he the preis, of batall, styntis that tyde
And al thare force, sustenit and deray
Repreuand lawsus, thus begouth to say
And mannysand him, wyth brand of blude all rede
Quhiddir haistis thou, sa fast apoun thy dede
Or quhow dar thou, vndertak into ficht
Syc interpryse, quhilk is aboue thy micht
Thou art not wise, thy tendir hart quod he
And reuthfull mynd, all out dissauis the
Bot for al this ȝoung, Lausus then al hale
Wald no wyse ceis, Eneas to assale
Than heiar rais the wraith, and felloun Ire
Of the ilk manfull troyane, lordly syre
And eik the fatale sisteris, tho in dede
Had wymplit vp, this Lausus lettir threde
For so Eneas stokkis, his stiff brand
Throw out the ȝoungkere, hard vp tyl his hand
That swerd before, made mannysyng and boist
Throw gyrd that gentyl body, and his coist
His tergate peirsand, and hys armoure lycht
And eik his coit, of goldin thredis bricht
Quhilk his moder him span and to conclude
His bosum al has fillit of hait blude
Sone eftir is the spret, of lyffe furth went
Doun to the goistis law, with sad entent
And left the body dede, and hyne dyd pas
Bot quhen Anchises son, feirs Eneas
Beheld his vult, and contenance in deing
His swete vissage sua, in the dede thrawyng
Becummyn wan, and pale on dyuers wyse
He sychit profoundlye, owthir twis or thryis
And draif abak hys hand, and reuch has hynt
For sa into his mynd eftir the dynt
The ymage, of hys faderly piete
Emprentit was that on this wise said he
O doughty ȝinglyng, wourthy to be menit
Wourthy to be bewallit, and complenit
Quhat sal the reuthful, compacient Enee
For sa grete louabil dedis render the
Or quhat may he, the ȝelde sufficient
For sic naturale, and Inborne hardyment
Thyne armour quharof, sum tyme thou reiosit
With the I leif, for ay to be eniosit
Vnto thy parentis handis, and sepultre
I the beleif, to be entirit quod he
Gyf that sic manere, of tryumphe and coist
May do thame plesure, or ellis into thy goist
Bot thou vncilly chyld, sa wyll of rede
Do counfort here, wyth thy lamentabyl dede
That thou ouer machit art, and thus lyis slane
Be the gretest Eneas, handis twane
Syne he his feris, can repreif and chyde
That thay sa lang, delayit him besyde
Makand na haist, to bere his corps away
And he him self, betuix his handis tway
The dede body vp lyftis, fra the ground
That with rede blude, of his new grene wound
Besparkit had, his ȝallow lokkis brycht
That ayre was kemmyt, and addressit rycht

The mene sessoun his fader, with his feris
Doun at the flude syde of tyberis
Stanchit his woundis, with water by and by
Weschand the swete, and blude from his body
His helme of stele, besyde him hang wele ne
Apoun ane grane or branche, of ane grene tre
His vthir wechty harnes, gude in nede
Lay on the gers, besyde hym in the mede
His crafty chosen verlottis him about
And he ful sore woundit, all in dout
Stude lenand with his wery nek and bonis
Out ouer ane bowand tre, wyth sary grones
Hys wele kemmyt berde, hingand doun ful straucht
Vpon his breist, vntil his girdil raucht
And fele tymes, on Lausus menys he
Prayand ful oft, he micht him saufelie se
And mony messengeris, vnto him has send
To wythdraw hym the feild, and to defend
That he abyde, na langare in bargane
And schaw for hym, quhat, sorow his fader had tane
Bot than Lausus dede out of the feild
Hys woful feris, caryit apoun ane scheild
Wepand sa grete ane man, was brocht to ground
And disco•fest, wyth sa grislie ane wound
Mezentius mynd, and consait the ilk tyde
Suspekand the harmes, quhilkis war tho betyde
On fer considerit, the caus of thare murnyng
And on his canois hare, the dust can slyng
With mekil pouder, fylland his hasart hede
And baith his handis, in that samyn stede
Towart the heuin, vpheuis in ane fary
And he the goddis, and sternes fast did wary
Syne lenand on his sonnis corps, thus cryis
O my dere chyld, and tender get heir lyis
Had I sa grete appetite, and delyte
Vnto this wrechit lyfe, sa ful ofsyte
That I the sufferit, to entir in ony stede
Vnder our fays handis, and with thy dede
My lyfe is salsit, sa I thy fader here
Quhilk the begat, my onely son so dere
Suld I be saif, and leiffand eftir the
Throw thay, sa grisly woundis that I se
Allace vnto me, wrechit catyue thyng
Myne exile now at last, and bannassyng
Becummyn, is hard and vnsufferabil
The stound of deith, the panys lamentabil
Is depe ingrauyn, in myne hart vnsound
Now am I smytyn, wyth the mortal wound
I the self man, the caus was of thy dede
Wyth my trespas, my chyld in euery stede
Filit the glore, and honour of thy name
Thy hie renowne, bespottand wyth my schame
As I that was, by inuy and haitrent
Of myne awne pepil, with thare hale assent
Expellit has, my sceptre and my ryng
And was addettit, for my misdoing
Vnto our cuntre, to haue sufferit pane
I aucht and wourthy was, to haue bene flane
And to hane ȝeld, this wikkit saul of myne
Be all maner of torment, and of pyne
For till amend my offence, and feid
Ha now I leif allace, and thou art dede
ȝit want I not of men, the cumpany
Nouthir licht of lyffe, nor clerenes of the skye
Bot sone I sall thame leif, and part therfra
And sayand thus samyn, with mynd full thra
He rasit him vp, apoun his woundit the
And determyt, to reuenge him or de
For thocht the violence, of his sare smert
Maid him vnfery, ȝit his stalwart hert
And curage vndekyit was gude innede
He bad ga fethe Rhebus, his riall stede
Quhilk was his wourschip, and his comfort hale
And his support, his fais till assale
For by his hors, in euery grete iourney
Hame fra the feild, victor eschapitt he
Quham to Mezentius, but ony mare abayde
Seand the sted droupand, and sad thus sayd
Rhebus we twa, has le•fit lang yfere
Gif that to mortall wichtis, in this erde here
Ony tyme may be reput, lang of (quod he)
Outhir this day, beis thou reuengit with me
Of lausus dolorus deith, and wreik our schame
And sall vs victor, with the bringin hame
ȝone bludy spulȝe, and Eneas hede
Or gif na strenth, nor force into that stede
Will suffar ony way, that it be so
We sal in feild samyn, de baith two
For o thou moist forcy stede, my louit fole
I can no wise beleif, that thou may thole
To be at ony vtheris, commandment
Nor at the leist dedenete, gif I war schent
Tyl obey ony maister, or lord troiane
And say and thus, ful cowartlie anone
The stede bekend, held to his schoulder plat
And he at eis vpon his bak doun sat
And baith his handis fillit with dartis kene
With helme on hede, birnist bricht and schene
A bone the quhilk, his tymbret buklit was
Lyke til ane lokkerit mane, with mony fas
And into sic array, with swift cours he
Furth steris his stede, and draif in the melle
Depe in his hart, boldynnys the felloun sthame
Mixt with dolour, anger and defame
The feruent lufe, of his son ȝong of age
Can caching him, to the furius rage
Tharto also persuadis to the ficht
His hors wele knawin, his hardiment and mycht
And in sic po•nt, throwout the routis al
With mychty voce, thryis did Eneas call
Eneas hard him cry, and wele him knew
And glaid thareof, can towart him persew
And prayand sayis, the fader of goddis hie
And eik mychty appollo, that grant to me
Thou wald begyn the bargane on this land
To mell with me, and to meit hand for hand
Thus carpis he, and with sterne lause but tary
Furth steppis, for to mete his aduersary
Bot mezentius se, and him cummand
Cryit to him anone, and bad him stand
O thou maist cruell aduersare said he
Quhat wenis thou so to affray, and boist me
Sen thou my son, has me bereft this day
Quhilk was onlie, the manere and the way
Quharby thou mycht, ouercum me and destroy
Now sen that I haif tynt all warldly ioy
Nowthir abhor I the dede, to sterue in fecht
Nor rek I ocht, of ony goddis mycht
Desyst or ceis to boist me, or mannace
For I am cummin to de in this ilk place
Bot fyrst I bryng the, thir rewardis quod he
Wyth that word, at his fa ane dart lete fle
And eftir that, ane vthir has he cast
And syne ane vthir has he fixit fast
About hym prekand, in ane cumpas large
Bot al thir dintis, sufferit the goldin targe
Thryise on the left half, fast as he weir woud
About Eneas rade he quhare he stude
Thyk wyth his handis, swakkand dartis kene
And thryis this troiane prince, ouer al the grene
In tyl his stalwart, stelit scheild stekand out
Lyke ane hare wod, the dartis bare about
At last as he ennoyit, of thys deray
This Irksum trasing, Iowking and delay
And commerit, wox sa mony dartis in vane
Thus oft to draw furth, and to cast agane
As he that was machit that time but fale
Wyth hys fa men, in bargane Inequale
Quhilk ay was at ane auantage, and on flocht
Full mony thyngis, reuolwit he in thocht
Syne on that were man, ruschit he in tene
In the forehede, betuix the horsys ene
He kest his spere, with al his force and mycht
Vpstendit than the, stalwart stede one hicht
And with his helis, flang vp in the are
Doun swakkis the knycht, sone wyth ane felloun fare
Founderis fordwart, flatlingis on his spald
Ouerquhelmyt the man, and can hys feyld vnfald
Than the latynis, and eik pepil troianis
The heuynnis dynlyt, with ane schout atanis
Eneas gird aboue him, with ane braide
Hynt furt his swerd and forther thus he saide
Quhare is he now mezentius, sa sterne
Quhare is the stout feirs curage, of that berne
Quham to mezentius, this ilk prince tyrrhene
Fra that he mycht, alifting vp his ene
To se the heuynnys lycht, and draw his breith
And his richt mynd agane, recouerit haith
Thus answeris, O thou dispitefull fo
Quharto me chydis, thou reprochand so
And Mannassis me the to dede, by and by
Of my slanchter I thinke na velany
Nor on sic wise, here come I not on feild
That I stand aw to swelt, vnder my scheild
Nor I beleif na freyndschip, in thy handis
Nane sic trety, of sauthning nor commandis
My son Lausus, band vp with the perfay
Bot of ane thing I the beseik, and pray
Gif ony plesure may, be grantit or beild
Till aduersaris that lyis, vincust in feild
That is to knaw, suffir my body haue
Ane spulture and with erd, be by graue
I knaw about me standand, in this stede
My folkis bitter, haitrent and grete feid
Defend me from thare furour, I requere
And grant my corps besyde, my sonnys in fere
In to sum tumbe entirit, for to be
And sayand thus, knawand that he must de
Before his ene persauit the birnist brand
That throu his gorgeit went, from Eneas hand
Within his armour, schortlie to conclude
Furth bruschis the saule, with stremes grete of blude
Be this the sun declynit was almoist
So that the latynis, and rutilianis oist
Quhat for absence, of thare duke Turnus
And new slauchter, of bald Mezentius
Withdraw thame to thare resset in affray
And troianis went vnto thare rest quhil day