Book IV

Prologue

With bemys schene, throw bricht Cytheria
Quhilk only schaddowist, amonge sterris lite
And thy blynd wyngit son, Cupido ȝe tua
Fosteraris, of birnyng carnale hete delite
ȝour Ioly wo, neidlingis moist I endite
Begynnyng with, ane fenȝeit faynt plesance
Continewit wyth lust, and endit wyth pennance.
In fragil flesche, ȝour febill sede is saw
Rutid in delyte, welth and fude delicat
Nurist with sleuch, and mony vnsemly saw
Qhuare schame is loist thar spredis ȝour burgeous hate
Oft to reuolue ane vnleful consate
Ripis ȝour perellis, frutis and vncorne
Of wikkit grane, how sal gude schaif be schorne.
Quhat is ȝour force, bot febling of the strenth
ȝour curius thochtis, quhat bot musardry
ȝour fremmit glaydnes, restis not ane houris lenth
ȝour sport for schame, ȝe dar not specifye
ȝour frute is bot, vnfructuous fantasye
ȝour sory Ioyis, bene bot Ianglyng and Iapis
And ȝour trew suandis, silly goddis apis.
ȝour sueit myrthys ar myxt wyth byttirnes
Quhat is your drery game and mery pane
ȝour werk vnthrift, ȝour quiet is restles
ȝour lust lyking in langour to remane
Frendschyp torment, ȝour trayst is bot ane trane
O luf quhydder art thou Ioy, or fulyschnes
That makys folk, so glayd of thayr dystres.
Salomons wit, Sampsoun thou reuist his force
And Dauid thou berest, his prophecy
Men sayis thou brydillit Aristotell, as ane hors
And crelit vp the floure af Poetry
Quhat sall I of thy mychtis, notify
Fare vele, quhare that thy lusty dart assalis
Wit, strenth, riches, na thinge bot grace aualis
Thou chene of luf, a benedicite
How hard strenȝes, thy bandis, euery wicht
The god aboue, for his hie maieste
With the ybound, law in ane maid did licht
Thou vincust, the strang gyand of grete mycht
Thou art mair forcy, than the dede sa fell
Thou plennyst parradyse, and thou heriit hell
Thou makis febil wicht, and thou lawest hie
Thou knytus freyndschip, quhare thare be na parage
Thou Ionatha confiderit, with Dauye
Thou dantit Alexander, for all his vassalage
Thou fes•ynnyt Iacob, fourtene ȝeris in bondage
Thou teichit herculis, go lerne to spyn
And eik dionire his mais, an• ilioun skyn
For luf Narsissus, perist at the well
For luf thou steruist, moist douchty achill
Theseus for luf, his fallow socht to hell
The snaw quhite dow, oft to the gray maik will
Allace for luf, how mony thame •elf did spill
Thy fury luf, moderis, tacht for dispite
Fyle handis in blude, of ther ȝing childrin lite
O lord quhat writis myne autor, of thy force
In his georgikis, how thy vndantit mycht
Constrenis sum tyme, so the stonyt hors
That by the sent, of ane mere fer of sycht
He bradis brayis anon, and takis the flicht
Na bridill may him dant, nor bustuous dynt
Nor bra hie roche, nor brade fludis stynt
The bustuous bullis, oft for the ȝoung kye
With horne to horne, wirkis other mony wound
So rummesm, with mony law and cry
The feildis all doith, of thare routing resound
The meik hartis, in belling oft ar found
Mak feirs bargane, and rammys togiddir ryn
Baris thuite tuskis, and fretis otheris skyn.
The reuchfull smert, and lamentabil cais
Quhilk thare he writis, of leander ȝing
Quhom for thy luf hero, allace allace
In feruent flambe of hait deisire, bitnyng
By nychtis tyde, the heuynnys loude thundring
And all with storme, troublit the seyis flude
Betand on the rolkis, and routand as it war wod
Set he him not to swym, ouer weil away
The firth betuix sescos, and abidane
In Ewrop and in Asia, cieteis tua
His fader and moder, mycht him not call agane
O god quhar thare, was he tyat and slane
And quhen his luf, saw this mischeif attains
Out ouer the wall scho lap, and brak hir banys.
Lo how venus, can hir seandis acquite
Lo how hir passiouns, vnbrillis all thare wit
Lo how thay tyme thame selfe, for schort delite
Lo from all grace, to myscheif thay flit
Fra weill to sturt, fra pane to dede and ȝit
Thare bene bot fewe exampill takis, of other
Bot wilfully fallis in the fire, leif brother.
Be neuer ouerset, myne auctor teichis so
With lust of wyne, nor werkis veneriane
Strife and debait engeneris, and feil has slane
Thay febil the strenth, reuelis secrete boith tuo
Honest proues, drede, schame and luke ar gane
Quhare thay habound, attempir thame for thy
Childir to engendir vse venus, and not in vane
Hant na sorfet, drink not bot quhē thou art dry
Quhat is this luf, nyce luffaris as ȝe mene
Or fals discait, fare ladyis to begyle
Thame to defoule, and schent ȝour self betuene
Is all ȝour liking with many subtell wile
Is that trew luf, gude faith and fame to fyle
Gif luf be vertew, than is it lefull thing
Gif it be vice, it is ȝour vndoing.
Lust is na luf, thocht ledis like it wele
This furious stamb of sensualite
Ar nane amouris, bot fantasyze feil
Carnale plesance, but sicht of honeste
Hatis him self forsoith, and luffis not the
Thare bene tua, luffis, perfyte and imperfyte
That ane is lefull, that vther foule delyte.
Lufis ane kindely passioun, engendrit of hete
Kendillit in the hart ouerspredand, all the cors
And as thou seis sum persoun, waik in sprete
Sum hate birnyng, as ane vnbridillit hors
Like as the pacient has hete, of our grete fors
And in ȝoung babbyis, warmnes insufficient
And to aget failȝeis, and is out quent
Rycht so in luf, thou may be excessiue
Inordinately luffand, ony creature
Thy luf also, it may beinfectiue
To luf thyne awne, and gif of vtheris no cure
Bot quhare that it is rewlit, by mesure
It may be liknit, till ane hale mannis estate
Intemperate warmes, nouthir to cald nor hate
Than is thy luf inordinate say I
Quhen any creature mare than god, thou luffis
Or ȝit luffis ony to that fyne, quhareby
Thy self or thame, thou frawertis god remouis
For till attempir, thy amouris the behuffis
Luf euery wicht for god, and to gud end
Theme be na wise to harme bot to amend
That is to knaw luf god, for his gudenes
With hert hale mynd, trew seruice day and nycht
Nixt lufe thy self, eschewand wikkitnes
Luf syne thy nychtbouris, & wirk thame na vnricht
Willing at thou and thay, may haue the sicht
Of heuynnys blys, and tyist thame nocht ther fra
For and thou do, sic luf dow nocht ane stra
Faynt luf but grace, for all thy fenȝeit layis
Thy wauntoun willis, ar verray vanyte
Graceles thou askis grace, and thus thou prayis
Haue mercy lady, haue reuch and sum piete
And scho re•thles, agane rewis on the
Here is na peramouris fund, bot all haterent
Quhare nouthir to weill, nor resoun tak thai tent
Callys thou that reuch, quhilk of thar selfe ne rekkis
Or is it grace, to fall fra grace, na na
Thou seikis mercy, and thar of myscheif makis
Renowne and honour, quhy wald thou driue away
Ane brutell appetite, makis ȝoung fulis foruay
Quhilk be resoun, list nocht thare heit refrane
Haldand opinioun, dere of of ane borit bane.
S•yis not ȝour sentēce, thus skant worch ane fas
Quhat honeste or renowne, is to be drain
Or for to droup, like ane fordullit as
Lat vs in ryot, leif in sporte and gam
In venus court, sen born thare to I am
My tyme wel sall I spend, wenys thou not so
Bot all ȝour solace, sall returne in gram
Sic thewles lustis, in bittir pane and wo
Thou auld hasard, leichoure fy for schame
That slotteris furth euermare, in sluggardry
Out on the auld trat, agit wyffe or dame
Eschames ne time, in roust of syn to ly
Thir venus werkis, in ȝoutheid ar foly
But in to eild, thay turne in fury rage
And quha schameles, doublis thare syn ha fy
As dois ther vantouris, owthir in ȝouch or age
Quhat nedis awant, ȝou of ȝour wikkitnes
ȝe that delytis allane in velanis dede
Quhy glore ȝe in ȝour awin vnthriftines
Eschame ȝe not rehers and blaw on brede
ȝour awin defame, hawand of god na drede
Na ȝit of hell prouokand vtheris to syn
ȝe that list of ȝour palȝardry neuer blyn
Wald god ȝe purchest, but ȝoure awin mischance
And ware na banereris, for to perys mo
And grant sum time, ȝe turne ȝou to pennance
Refrenyng lustis inordinat, and cry ho
And thair affix ȝour luf, and myndis so
Quhare euer is, veiray ioy without offence
That all sic beistly, fury ȝe lat go hence
Of brokaris and sic baudry hou suld I write
Of quham the fylth stynketh, in goddis neis
With venus hen wyiffis, quhat wyse may I flyte
That straykis thir wenschis hedes them to pleis
Douchter for thy luf, this man has grete diseis
Quod the bismere, with the slekit speche
Rew on him, it is merit his pane to meis
Sic pode makrellis, for lucifer bene leche
Eschame ȝoung virgins, and fair damycellis
Furth of Wedlok, for to disteyne ȝour kellis
Traist not all talis, that vantoun wowaris tellis
ȝou to defloure, purposyng and not ellis
Abhore sic price or prayer, wourschip sellis
Quhare schame is loist, quyte schent is womanhede
Quhat of beute, quhare honeste lyis dede
Rew on ȝour self ladyis, and madynnys ȝing
Grant na sic reuch, for euer may caus ȝou rew
ȝe fresche gallandis, in hate desire byrnyng
Refrene ȝour curage, sic peramouris to persew
Ground ȝour amouris, on cherite all new
Found ȝou on ressoun, quhat nedis mare to preche
God grant ȝou grace in luf, as I ȝou teiche
Fy on dissait, and fals dissimulance
Contrar to kynd, with fenȝeit chere smyling
Vnder the cloik, of luffis obseruance
The vennom of the serpent, reddy to styng
Bot all sic crymis, in luffis caus I resing
To the confessioun, of morall Iohne gouer
For I mon follow, the text of our mater
Thy double wound of dido, to specifye
Imeyne thyne amouris, and thy funerale fate
Quha may endite, but teris with ene dry
Augustyne confessis him self, wepit god wate
Reding thy lamentabill end, misfortunat
By the will I repit, this wers agane
Temporall Ioy endis, with wo and pane
Allace thy dolorus cais, and hard mischance
From blys to wo, fra sorow toury frage
Fra nobilnes, welth, prudence and temperance
In brutell appetit, fell and wilde dotage
Dantar of affrik, quene founder of cartage
Vmquhile in riches and schynyng glore ringing
Throw fuliche lust, wrocht thyne awin vndoing
Lo with quhat thocht, quhat bitternes and pane
Luf vnsilly bredis, in euery wicht
Quhou schort quhiule, dois his schort plesance remane
His restles blis, how sone takis the flicht
His kyndnes alteris in wraith, within ane nycht
Quhat is bot torment, all hys lang sumfare
Begun with fere, and endit in dispare.
Quhat sussy, cure and strange ymagyning
Quhat wayis vnlefull his, purpois to atteyne
Has this fals lust, at his first begynnyng
How subtell wilis, and mony quiet mene
Quhat slicht dissait quentlie to flat and fene
Syne in ane thraw, can not him selfyn hyde
Nor at his first estate, no quhile abide
Thou swelth deuourare, of tyme vnrecouerabill
O lust infernale, furnes inextinguibill
Thy self consuming, worthis insaciabill
Quent fendis net, to god and man odibil
Of thy triggettis, qhuat toung may tell the tribyll
With the to wrestil, thou waxis euermare wicht
Eschewe thyne hant, and mynnis sall thy mycht
Se how blynd luffis, inordinate desire
Degradis honour, and ressoun dois exile
Dido of Cartage, floure and lampe of tyre
Quhais he renoune, na strenth nor gift mycht fyle
In hir faynt lust, so mait within schort quhile
That honestye bayth, and gude fame war adew
Syne for disdene, allace hir selfin slew
O quhat aualit thy brute, and glorious name
Thy nobyll tressour and werkis infinyt
Thy cyeteis beilding and thy riall name
Thy realmes conquest, welefare and delyte
To ••ynt all thinge sayf thyne awne appetite
So was in luf thy frawart destany
Allace the quhile thou knewe the strange Enie
And sen I suld thy tragedy endite
Here nedis none vthir, inuocacyon
Be the command, I lusty ladyis quhit
Be war with strangearys of vncouth natyoun
Wirk na sic wounderys to thare dampnatyoun
Bot til attyne wylde amouris, at the thay lere
Thy lusty pane, begouth on thys manere

Book IV

Be this the quene, with heuy thochtis vnsound
In euery vane nurissis, the grene wound
Smytyn so deipe, with the blud fyre of luf
Hir trublit mynd, gan fra all rest remuf
Compassing, the greate prones of Enee
The large wourscip, feil syis remembris sche
Of his lynnage and folkis foray present
Deip in hir breist, was his figure prent
And all hys woundis, flixt that for besy thocht
None eis hir membris, nor quiet suffir mocht
The nixt day following, with his lampe bricht
As Phebus did the ground, or erth alicht
Eftir the dawning, the donk nychtes cloud
Chasit from the sky, and the are new schroud
Full euill at eis, quhen dido on this kynd
Spak to hir sister, was of the samyn mynd
My sister an, quhat sweuynnis be their quod sche
Quhilk me affrayis in sic perplexite
Quhat be this grete new gest, or straunger
In to our realme latlie, is dreuin here
How wyse in speche, and in his commoning
He schewis him selfe, O God quhat wounder thing
How stout in curage, In were how vailȝeand
I trow sister, and I vnderstand
My opinion is nane, vncertayne thing
Thay bene sum lynnage, of verray godis of spring
For drede all wayis, and schamefull couardice
Degenerit wichtis, and boubartis notyfyis
Allace quhat wounder, fatail auenturis
Has him beuauit, quhat trauell pane and curis
How huge batallis, be him eschewit tald he
Now certis, war it not determyt with me
And fixit in my mynd, vnmouably
That to no wycht, in wedlok me lyst I
Cuppyl nor knit, sen my first loue is gone
By deith disseuerit, and left me alone
War not also, to me is displesant
Genyus chalmer, or mateymonye to hant
Perchance I migh be vincust, in this rage
Throw this ane cryme, of secund mariage
Annas I grant to the sen the diceis
Of my sory husband Sycheus, but leis
Quhare that our hous, with broderis deid was sprēt
Onlie this man, has moued mine entent
And he my mind, Inducit to foruay
In knaw and felis, the wenys and the way
Of the auld fyre, and flamb of luffis hete
Bot rather I desyre baith cors and sprete
Of me, that erth swelly law adoun
Or than almythty Iouy, with thunderis sown
Me smite full deip, vnto the schadois derne
Amang pail goistis, of hellis hole cauerne
In the profund pyt of deich, and derk nicht
Or I becum, sa wretchit schamefull wicht
That I my honeste, file or womanhede
Or brek ȝour lawis, na quhill I be dede
He that me first, to him in wedlok knit
My first floure of amouris tuke, and ȝit
For euermare with him, he sall thame haue
And he moist kepe thame with him in his graue
Thus saiand the bricht teris, anon furth brist
And fillit all hir bosum, or scho wist
Annes answerd of thou say mot I thrife
To thy sister derrar, than hir awne lyfe
Quhidder gif thou wolt, allane in wedohede
Euer murnand thus, waist away thy ȝouthed
Nor ȝit the confort, of sueit children thou knawis
Nor the plesour felis, of venus lawis
What wenys thou, assis cald and gaistis in graue
Of all sic waling, ony feist sall haue
In case that in thy dule, afore thir days
Thy lord new dede the list inclyne na wayis
Nouthir prince nor duke, to take as for husband
Suppois thou lithtliit thame, of libie land
Hyarbas kyng, and vthir heris all
Quhilks in the riche fulȝe, triumphal
Of Saffrik boundis, dwelling wid whare
Quhat wilt thou als, debating euermare
Aganis this likand luf cummis of pleasance
Consideris thou not and has in remembrance
Amyddis quhais ground, here thou remanis
On this hand cieteis of getulianis
Ane kynd of pepill, Inuincibil in batell
Here the vndantit folk of Nvmyda duell
And on that vthir part, vmbeset I wys
We ar with bustuous, vnfrendlie Sirtis
And ȝonder the desert regioun, alsua
Ay full of thrist, on barant libia
And widequhare thens, the wylde pepil of berchay
The weris mouyng from tyre, quhat sal I say
And the gretbrag, and mannance of our brothir
Be dispositioun of goddis, I wene non vthir
And by the puruiance, of Iuno to our supple
Thir troiane schippis, by prosper wind ouerse
Has thiddir set, thare coursis fortunate
O sister myne, consider in quhat estate
This ciete, quhilk thou buildis sal vp rise
Persaue how that this realme may on sic wise
Bene vph•it, throw sa nobil ane mariage
Behald how mekill, the glory of cartage
Sall be extollit, and encres in euery thinge
Throw help in armis, of the troianis of spring
Quharfore the nedis, beseik goddis of thare grace
With sacrifice, to be fauorabill in this case
Do set all hale, thy cure and diligence
Causinge him to make, with the residence
And fenȝe caus, to tary him and with hald
So lang as thus, during, the wynter cald
The sey rageis, throw watery orione
And quhill the stormes be ouer blawin and gone
And quhill his schippis, with the tempest schaik
Be bet, bid spare nouthir, elm nor aik

With thyr wourdis, the sprete of Dido quene
The quhilk to fore, in luf was kendelit grene
Now all in fyre, the flambe of luf furth blesis
Hir dout sum mynd, with gud hope so scho es•s
That all the schame, and drede was blak away
And to the tempill, furth ȝede thay baith tuay
Efter the Serymonis, of thare pagane gise
Beneuolence, and gude luk sundry wise
Thay seking, and thay serche at ilk altare
And twinteris walit, for sacrifice here and thare
Thay briknit, and sum in honour did addres
Of the law leader, Ceres the goddes
To Phebus, and to Bachus part also
But principally, vnto the quene Iuno
Quhilk haith in cure, the band of mariage
Him selfe moist gudlie, quene dido of cartage
Held in hir richt hand ane coup full of wyne
Betuix the hornes tua, furth ȝet it syne
Of ane vntamyt ȝoung quy, quhite as s•aw
And vthir quhilis, walde scho raik on raw
Or pas tofore, the altaris with fat offerandis
By chargit ful, and oft with hir awyn handis
Renew and bet, the sacrifice all day
And riche giftis, gif troyans and wald ay
The beistis coistis, as they bowellit were
And thare entrellis, beheld flekker and stere
According the auld vsage, to that effect
Sum augury persaif, or gud espect
O welaway, of spaymen and diuinis
The blynd myndis, quhilk na way diffinis
The force na strench of luf with his hard bands
Quhat avalit thir sacrificis, or offerands
Quhat helpis, to vesy tempillis in luffs rage
Behald vnhappy Dido, quene of Cartage
In this mene sesoun, Birnand hate as glede
The secrete wound, depe in hir mynd gan sprede
And of hete amouris, the subtell quent fyir
Waystis and consumis, merch banis and lire
Ouer all the ceite, anrageit scho here and thare
Wandris, as ane stirkin hynd, quham the stalkar
Or scho persaif, for fer betis with his flame
Amyd the woddis of Crete, and lattis remane
The brade hede vnknaw, the beist was hit
Scho skippin furth, as to eschew the byt
Gan throw the forest, fast and grauis glide
But euer the dedly schaft, stikkis in hir syde
Sum tyme the quene, Enee with hir did lede
Throw out the wallis, vnto euery stede
Tressour all, and riches of Sydony
Schawing to him, and offerit all reddy
The ciete of Cartage, at his commaundement
Begin scho wald, to tell furth hir entent
And in the mydworde stop, and halde hir styll
And quhen the euin com, it was hir wyll
To seik wayis him to feist, as scho did are
And half myndles againe, scho langis sare
For tyll enquire, and here the sege of troye
And inane stare, him behaldis for Ioye
Efter all was vodit, and the lycht of day
And mare and mare, the mone quenchit away
And the declynyng, of the sterris bricht
To slepe and rest, perswadis euery wycht
Within hir chalmer, alone scho langs sare
And thocht all vaist, for laik of hir luffare
Amyd ane woid bed, scho hir laid adoun
And of him absent, thinkis scho heits the sdun
His voce scho heris, and him behaldis sche
Thocht he god wate, fer from hir present be
And sum tyme wald scho, ascaneus the page
Caucht in the fygure, of his faders ymage
And in hir bosum brace, gyf scho tharby
The luf vntellibyl, mycht swik or satify
The werke and wallis begun, & not vpbrocht
The ȝoungkeris dedis of armes, exhorts nocht
Nothere fortres, nor turets sure of were
Now graith they mare, for all the werk but were
Ceis and is stoppit, bayth of penakillis hye
And big towris, semyt to rise in the skye

Als swith as Iuno, with sic malice ouer tane
Persanit hir dere fryend that remeid was nane
Nouthir fame, nor honour, the rage resist micht
Saturnus douchter, wyth sic wordes on hicht
Begouth to carp vnto, venus I wys
Ane huge honour, and laud, ȝe sall of this
Report, and richt large spulȝe bere away
Thou and thy chyld forsoith, quod sche bayth tway
O lord how grete power, and notabil mycht
Gif that of tua hie goddis, throw the slycht
Ane silly woman, sall ouer cummyn be
Not so I wys hast thou, dissauit me
Bot that I knaw thou had, in fere and drede
Our cite and held the lugeing, suspect in dede
Of our renowned hie burg, of cartage
Bot on quhat wyse sall, ceissing all this rage
Or now quhatnedis, sa grete stryf, and contake
For rather perpetual pece lat, vs make
And knyt vp band of marage, thare tyl
Sen thou has gotten, all thy hartis wyl
For Dido birnis in hate luf, al attanis
The brim fury glydis, thorow out hir banis
Lat vs thir pepill to vs commoun for thy
Be frendlie fauouris, gouerne equaly
So that it lesum be dido remane
In spousage bound and serf, ane lord troiane
And suffir tyrianis, and all liby land
Be gifin drowry, to thy son in hand
Than venus knawing, hir spech of fenȝeit mynd
To that effect, scho mycht the troiane kind
And weris to cum, furth of Italy alsua
With hald and kepe from boundis of libia
Answerd and said, quhat wik kit wicht wald euer
Refusit sic proffer, or ȝit with the had leuer
Contend in batal, or stand at debate
Gif that as thou, rehersis the dede algate
Als soueralie mycht, follow fortunabill
Bot I offer me, les the fatis vnstabill
Nor Iupiter consent not, •e aggre
Bot that ane ciete, to tyrianis suld be
And ilk to folkis, from troy in vayage cummyn
Or list apprese, thay pepill all and summyn
To giddir myddill, or Ione in lyig or band
Thou art his spous, to the to tak on hand
Is lefull with requeist, his mynd to assay
Pas on before, I follow the perfay
Thane Iuno quene, sic answer mad agane
This laubour I tak on hand, all myne allane
Bot on quhat wise, sene time is couenabill
The fassioun how this stant to do, maist able
Her at schort wordis, that point I sall ȝou say
Eneas and vnsilly dido, baith tuay
To forest grathis in hunting, furth to wend
To morrow als fast, as tytan dois ascend
And ouer the warld, gan his bemes spred
Quhen that the range, and the fade on brede
Dynnys throw the grais, sercheing the woddis wyde
And sutis the glen, on euery syde
I sall apoun thame, ane myrk schoure doun skale
Of weit and wynd mydlit, with felloun hale
And all the heuin, with thunderis blast sa stere
That all thare fallouschip, fal with drawe for fere
Enclosit with ane myst, als dark as nycht
Dido and eik the troiane duk, sall rycht
Alanerly, bot be thame selfyn twane
To gidder sall entir, in ane caue of stane
Thare sall I be reddy, and but delay
Gif thare mynd be ferme, thareto the ilk day
In souir wedlok, I fall conione hir thare
And be his proper spous, for euermair
Apoun this wise, thar wedding salbe wrocht
A fermis all her will contraryng nocht
O Cytherone venus, the goddes bricht
Lauchand scho fund, had so contriuit ane slycht

Furth of the sey, with the dawing springis
As Phebus rais, fast to the ȝettis thringis
The chois gallandis, and huntmen thaym befyde
With ralis, and with nettis strange and wyde
And hunting speris stif with hedis brade
From massiling horsmen, thik hidder rade
With rynnyng hundis, ane fule huge sort
Nobillis of cartage, hauing at the port
The quene awatis, that lang in chalmer duellis
Hir feirs stede, stude stamping reddy ellis
Guyppand the fomy goldin bit, gingling
Of goldin pall, wrocht hir riche harnessing
And sche at the last, of palice ischit out
With huge menȝe, walkyng hir about
Lappit in ane brusit mantill, of sydony
With gold and Perle, the bordour al bewry
Hingin by hir syde, the cais with arrowis ground
Hir bricht tressis, Inuoliut war and wound
In til ane queif, of fyne golde wyren threde
The goldin buttouns, claspit hir purpour wede
And furth sche passit, wyth al hir company
The troiane pepill, forgaderit by and by
Ioly and glaid, the fresche ascaneus ȝing
Bot fyrst of all mayst gudly hymself thar kyng
Enee gan entir, in fallouscip but dout
And vnto thaym, has Ionit his large rout
Like quhen appollo, list depart or ga
Furth of wyntring, the realme of Lisia
And leif the flude exanthus, for ane quhile
To vesy delos, his moderis land and Ile
Renewand ringis, and dansis mony ane rout
Mixt togiddir, his altaris standing about
The pepil of Crete, and thaym of driopes
And eik the payntit folk, agathirtes
Schowtand on thair gyse, wyth clamour and vocis hie
Apoun the top, mont Cynthus walkis he
His waiffand haris, sum tyme doing doun thryng
Wyth ane soft garland, of laurer sweit smellyng
And vmquhyle thaym, gan balmyng and anoynt
And into gold, addres at ful gud poynt
His grundin dartis, clatterynge by hys syde
Als fresche als lusty, did Eneas ryde
With als grete bewte, in his lordly face
And eftir thay ar cummin, to the chace
Amang the montanis, in the wyld forest
The rynnyng houndis, of cupplis sone thay kest
And ouer the clewis, and the holtis belife
The wylde beistis, doun to the dale thay driue
Lo thare the rais, rynnyng swift as fyre
Dreuin from the hichtis, brekis out the swyre
Ane vthir part, syne ȝounder mycht thou se
The heirdys of hartis, wyth thare hedis hie
Ouer spynnerand, wyth swyft cours the plane vale
The hepe of dust, vpstourand at thare tale
Fleand the houndis, lewand the hie montanis
And ascaneus the chyild, amyd the planis
Ioyus and blyth, hys s•erting stede to assay
Now makis his renk, ȝounder and now thys way
Now prekis furtth by thir, and now by thame
Langing amang, faynt frayit beistis vntame
The fomy bare, doun from the hillis hicht
Or the dun Lioun, descend recounter he mycht
In the mene quhile, the heuynnys all about
With felloun noyis, gan to rummyll and rout
Ane bub of weddir, followit in the tale
Skalis thyr newis, est weist, north, and south
Hir cours anon, but langer tarying
Addres sche vnto, Hyarbas kyng
With hyr sawis, his mynd inflambing as fyre
Pro••cand hym to wraith, and felloun Ire
To Amon he was, son beget Alsua
Aponn the made, reuyst garamantida
Within his rage realmes, huge and brade
Ane hundreth tempillis, to Iupiter he maid
Ane hundreth altaris, quhareon the walkrife fyre
He dedicat all times, Birnand schire
Set wachis in honour, of god perpetually
Of beystis blude, the fat ground neuer dry
Strowit with garlands, and flonris of dyuers kind
This ilke kyng, wod, wraith, halfe out of mynd
And for the schrewit rumouris, sore amouit
In presens of the goddis, quhilks he louit
Before the altare, to Iupiter as thay say
He vand vp handis, deuoitly thus can pray
Almighty Ioue, quod he quham to feilsyis
On brusit beddis, he feist and sacrifyce
Of Maurusia, the pepill hantis thus
Offering to the, the honour of bachus
Consideris thou this, or quhidder father gif we
For nought the dredis, quhen thou lattis thunder sle
Or gif thi fyreslautht, the blind clouddis within
To fley our myndes in vane, makis noyis and dyn
ȝone woman lait exile, and vacabound
Come to our boundis, that by pryce bocht the gound
Ane lytill vyllage to byg, and quham to we
For to manur, gaif the strand of the se
Quham to our lawis, and statutis we gart mak
Our marage, gan lychtly and for saik
And in hir regne, has tane Enee for lord
And thou that secund Paris of ane, accord
With his vnwourthy sort, skant half men bene
Aboue his hede, and halffettis wele besene
Set like ane myter, the foly troyane hart
His hare anoyntit, wele prunȝet vnder that
By reif mantemes hir, that suld ouers be
Because vnto, thy tempillis dayly we
Brynges offerandis, and in vane hallowis thy name
With sic wourdis, king Hyarbas at hame
Makand his prayeris, and grippand the alter
Him hard anone, almychty Iupiter
And his ene turnis, towart the riall wallis
Of cartage, and their luffaris, quhilk so fallis
At thay thare fame, and gude renowne forȝet
Syne thus sayd, to mercurius but let
And with sic maner, charge gan him direct
Pas sone in hast, graith thy wyngis in effect
Slide with thy fedderom, to ȝone troyane prince
Quhilk now in cartage, makis residence
Geuand na cure, of cieteis of Italie
To him I grantit, by fatall destany
Do here my message, swiftlye throw the skyes
Say to hym thus, my wordis on sic wyse
His derest moder, promyst vs not that he
Of his gyding, sa faynt ane mane fuld be
Nor for sic causis, him delyuerit twyis
Furth of the grekis handis, his Enemys
Bot that he suld haue bene wyis, sage and graif
Hie senȝeoryis, and grete empire to ha•f
And Itale dant, quhilk brandisis in battal
And by his dedis, declare and cleirly tell
Him cumin of tu•trus, hie genology
And to subdew, the warldis monarchy
Of sa grete thingis, thoch na wourschip him steris
Nor for his honour lyst, not labour as efferis
ȝyt than the fader, aucht na wise to inuy
That Ascaneus, bruke romys seniȝeory
Spere quhat he beildis, or how that he dar duel
Amang ane pepill, salbe his Inemyis fell
His linnage to cum, in Italy forȝetys he
And geuys na compt, of liuyne the cuntre
Bid hym make sail, this is all in effect
Thidder in our message, thus we direct
Said Iupiter, and mercury, but are•st
Dressit to obey, his grete faders behest
And first vntill, his fete fast buklit he
His goldin wyngis, quhare with he dois fle
Quhen so him list, abone the fluds on hicht
And on the erd, with grete fard and swyft flycht
Syne tuke his wand, quhare with as that I tel
The paill saulis, he cauchis out of hell
And vthir sunt, thare with gan schete ful hot
Deip in the soroufull, griflie hellis pot
Quharewith he makis folk slepe, magre thare heid
And reiffis fra vthir, all sleip and to the deid
Closis their ene, and brekis the stringis tua
Throw help tharof, he chasis the wyndis awa
And trubly cloudis, diuidis in ane thraw
Tho furth he fleis, tyl at the last he saw
The hie top and sydes, brade and euin
Of hard atlas, be ring on his crown the heuin
The misty cloudis, his hede about
Quhareon of firren treis, stand mony rout
Wyth wynd and storme, full oft to schaik and blaw
His schulderis beildit, with new fallin snaw
Furth of the chyn, of this ilk hasard auld
Grete studis Ischis, and styf Ise schokillis cald
Doune from his sterne, and grisly berd hyngis
Here first mercure, with heuenly schinand and wingis
Gan areist, and with hale farde fro thens
Vnto the sey fludis, made his discens
Lyke till ane foule, that endlang the coist syde
About the strandis, of fysche plenteous and wyde
Fleis by the wattir, strummand the fludis law
Betuix the heuin and erch, the samyn wyse flaw
Mercurie clepit, the child Cillineus
Discending from his moder, grantschir thus
The sandy coistis, and desertis of liby
And eik the wynges, peirsyng by and by
And with the wyngit solis, of his feit
As he of cartage fyrst, tred on the strete
Eneas found and towris, he gan espy
And garrand bild, new lugeingis besely
Belt he was with, ane swerd of mettell brycht
Of Quham the skabert, of broun Iaspe was picht
His riche arrey, did ouer his schulders hyng
Bet on ane purpour claith, of tyre glitteryng
Fetusip stekit, with prinnyt goldin, thredis
Of mychty Didois gift, wrocht all his wedis
Mercury recounteris him, and said anone
Of Cartage now, the proud wallis of stone
Thow foundis quod he and biggis, at all deuyse
Ane ciete exercit, in ane wyiffis seruice
Thy awin materis, and realme, forȝetting allace
Hidder vnto the, from his bricht heuinly place
The gouernour of godis, has me sent
Quhilk rulis at wyl, erd, heuin, and element
He bad me throw the skyis bare, this charge
Quhat beilds thou here, in ly•ic or cartage
Or to quhat fine, or beleue, takis on hand
To waist thy time, into this fremmit land
Gyf that na law, na honour moue the list
Of sa hie thinges, as are to the promyst
Nor thy selfin, thou wil not occupy
To purches thin awin, renowne ne glory
ȝit than hehald, Ascaneus vp waxin
And the grete hope of his sede and of spryng
Quham till the realme, and kinrik of Itale
With romes boundis, bene destynate sans fale
On sic wyse thus carpys mercurius
And in the myddys of his sermond thus
He vanyst fer away, I wat neuir quhare
Furth of this mortal sycht in the schire are.

Bot than half mad and doun stude als
Vp stert hys hare the voce stak in hys hals
Sare he langis to fle, and to depart
And that sueit cuntre on the tothir part
To leif ful laith, was hym or go at large
Astonist he was to sit, so hie ane charge
Or disobey the gret goddis beheist
Allace quhat suld he do, vneis he wyst
Or with quhat wourdis, suld he now assay
The amouris quene, for to require or pray
Or on quhat wyse his tale he mycht begin
Baith to and fra, compasing his breist wythin
Ful purpois, for euery part about
And at the last, thus as he stude in dout
This resun hym semyt, fynely the best
He callis to him mynyscheus, and sergest
And strand Cloanthus, and bad thay suld in bye
Do graith his schippis, and nauin secretely
And gadder his folkis towart the coist togidder
Armour and al thing necessare bryng thidder
And to dissemmil, gif any askis quhy
Thay thus addressit, thare gere so suddanly
Him self he sayd, the mene quhile suld assay
To purches leif, to go and pas away
And wat his tyme to speik therof, maist habil
Quhen that the Quene Dido maist honorabit
Schuld not beleif, sa sone be couth depart
Nor sa gret luf, disseuer be na art
At his command, thay al gladlye furth went
And besylie begoouth, spede his entent
Bot sone the quene, persauit al thys slycht
Quhay may begile, ane luffare day or nucht
Thare departyng, at hand first sche aspyis
Dreding al soner thingis, as is the gise
Of euery luffare, al time to stand in fere
This ilk cursit fame, we spak of ere
Bare to the amouris quene, noyis and gan roune
The schips ar grathād, to pas thay mak thā boune
Quharfor impacient, and myndeles in hir rage
Sche wiskis wyld, throw the toun of Cartage
Sic wife, as quhen thir nunnys of bachus
Ruschis and relis, ouer bankis brayis and bus
Quhen euery third ȝere, on thare pagane wys
Thare goddis feist, thay hallow with loud cryis
That al the nicht, the mont of Cytherone
Resoundis of thare clamour, quhare thay gone
And at the last ȝit thys, of hir frewill
Efter lang musing, sche spak Eneas tyl
With dissimilance, wenyt thou vnfaithful wicht
Thou mycht haue hid fra me, sa fals ane slicht
And myne vnwitting, steile furth of my land
That nouthir our grete luf, promys, nor rycht hand
Geuin me vmquhile, may the here withhald
Nor cruell deith, of Didois cors so cald
Gif thou depart, and forthir quhat wald thou do
In wynter sesoun, preis graith thy nauy so
And the addres, to pas throu the voyd se
Myd tyme, quhen stormes and wyndis blow maist hie
Art thou sa cruel, I put the cais also
That to nane vncouth landis, thou list go
Nouthir to fremmyt place, nor stedis wyl
Bot at auld troy, war ȝit vp, standand stil
Aucht thou ȝit, than leif this weilfare and ioy
And in sit perell, seik throw the sey to Troy
Quhat wyl thou fle, frame allace allace
Be al theyr teris, trigland ouer my face
And be that richt hand, vmquhile thou me gaif
Sen to my self, not ellis left I haif
Now wretchit catiue, be out treuth plichting eik
And be our spousage, begynnyng I the beseik
Gif euir ony thanke, I deseruit toward the
Or ocht of myne, to the was leif, quod sche
Haue mercy of our lynnage, reddy to spil
Gif tyme remanis, ȝit thou here prayeris wil
Thys fremmit mynd, I pray ȝou do away
For the I haif bene hatit, this mony ane day
Wyth al the pepil of affrik, and wich the King
That rulis the land of Mumyda, and ring
For the myne awin tirrianis, ar with me wraith
For the is womanhed, went and wourschyp baith
And my fyrst fame, laude and eik renownye
Quhar by I was rasyt, to the sternes hye
Reddy to de, and my selfyn to spil
My swete gest, quham to thou leyf me wyll
My gest ha god, quhen al thyng now in vane is
Quhen of my spous, nane vthir name remanys
Bot quharte suld I, my dede langer delay
Sal I abyde, quhill thou be went away
And quhil mi awin brothir, Pigmalioun
Bet doun the wallis, of mi ciete anone
Or sterne hyarbas, kyng of getulie
Leid me away, into captiuite
Bot at the leist, tofore thy way fleing
Had I ane child, consauit of thy of spring
Gif I had ony, ȝoung Eneas small
Before me for to play, within my hall
Quhylk representit, be similitude thy face
Than semyt I not, thus wyse allace allace
Aluterlie dissauit, or dissolate
Thus sayd the quene Dido, in febil estate
Bot apoun Iouis message, ferinlye he
Stude musing so, he mouit not ane E
Refrenit his wil, hidand in hart hys thocht
And at the last, thir few wordis has furth brocht
O gentill quene, that sall I neuir deny
The gud dede, and desert is mare wourthy
That thou with wourdis, or toung may expreme
Nor it sal neuir me irk, nor ȝit missene
The wourthy Dido, to hald thy fresche memory
Sa lang as that my self, remember may I
Or quhill the sprete of lyfe, thys body steres
As the matir requiris, ane litill heris
I purposit me not, for to hide thistuisly
My vayage, nor as ȝe wene secretely
Away to steil, quhat nedis ȝou sa to fene
For I pretendit neuir, be na mene
Wyth ȝou to make, the bande of mariage
Nor in that ȝoik, na frendschip in Cartage
ȝit come I enuir, bot gif the fatis but pleid
At my plesure, sufferit me life to leid
At my fre wil, my workis to modify
The ciete of Troy, than first a gane suld I
Restore, and of our dere frendis remanis
Gaddir togiddir, and to the vincust troianis
Repare al with my haudis, agane the wallis
And beild vp priamus palice, that now fallis
Bot sin Apollo, clepit Geyneus
Grete Italie to seik, commandis vs
To Italie eik, Oractis of Licia
Amonist vs, but mare delay to ga
Thare is my lust, now and delyte at hand
Thair is my cuntre, and my natiue land
Gif the, of Cartage the burgh and towris sa
Quhilk art ane woman of phenicia
And the aspect of cieteis, aff•icane
Delitis, and with haldis here to remane
Quhat wrang is it, caus of inuy, or schame
Thocht troianis seik, to Italie for thare haine
Or is it not, als lesiun and ganand
That fynalie, we seik to vncouth land
Als oft as day is gane, and the dirk nycht
With hir douk schaddow, hydis of the erth the sicht
Als oft as shynyng sternes, dois vpryse
My faderis goist anchises, als oft syse
Into my slepe, manissis me therto fast
And als his ferful ymage, dois agast
And in likewyse, the child ascaneus
Quhais dere heid suffir iniuris, is hard to vs
Quhom of the realme of Italy, I defraude
And fra the ground, to him promist withhaude
Be athir of our hedis, this I swere
Now laitly, eik of goddis the messingere
From hie Iupiter, in hasty message sent
Doun throw the air, brocht the ilk commandment
On fare day lycht, myne awin self did I se
Mercurie the god, entir in this ciete
And his wourdis, with thir same eris hard I
With thi complantis, ony langar for thy
Lat be to vex me, or thy self to spill
Sen I seik not to Italie, with fre wyll.

Dido aggreuit ay, quhil he his tale tald
Wyth acquart, luke, gan toward him behald
Rollyng vmquhile hir ene, now here now thare
Wyth sycht vnstabill wauerand, ouer al quhare
And all enragit thir wordis, gan furth brade
Nouthir was ane goddes thy moder as is said
Nor ȝit king Darnanus, cheifstok of thy kyn
Thow treules wicht, bot of ane cauld hard quhyn
The clekkit that horribil mont Cawcasus hat
Thou schowkit neuir womannis breist, wele I wat
Bot of sum cruell tygere, of Araby
The pawpis the fosterit, in the wod hircany
To quhat effect suld I him langar persuade
Or quhat better may I beleue, than he has said
Quhidder gif he murnit, quhen we wepit & walit
Quhidder gif he sterit his ene, as ocht him alit
Quhidder gif he for reuch furth ȝet anis ane tere
Or of his luf had piete. Na not to ȝere
How sal I begin quhat first, quhat last to say
Now nouthir gretest Iuno, wallaway
Nor Saturnus son, hie Iupiter with iust ene
Has our quarell considerit, na ouer sene
For no quhar now faith, nor lawte is fund
I ressauit him schip brokin, fra the sey ground
Wilsum and misterful, of al warldis thyng
Syne myndeles maid him, my fallow in this ring
His nauy loist reparellit I but fale
And his feris fred from the deith alhale
Allace enrageit or enchantit am I
Quhen now Appollo with his sossorye
And quhilis he sais the cauillis of Licia
And quhilis fra Iupiter, sent doun alsua
The messingere of goddis bryngis throw the skyis
So fereful charge and command on thys wise
Lyke as the goddis aboue not ellis wrocht
Bot on thy passage, war al thare cure and thocht
Nouthyr wil I hald the, nor thy wordis contrare
Pas on thy way, towart Italie now fare
Seik throw the fludis, wyth wyndis to that ringe
Forsoith gif reuthful, goddis may ony thyng
Amyd thy way, I traist on rowkis blak
Thou sal dere by, thy treuth thou to me brak
And clepe oft my rycht name, Dido Dido
Wyth fyre infernale, in myne absence also
I sal the follow, and fra the cald dede
Reyf from my membrys, thys saul in euery stede
My goist sal be present, the to aggrise
Thou sal vnwourthy wicht apoun thys wyse
Be punyst wele, and tharfor wald I here
The fame therof sal cum vnto my ere
Vnder the erth amang the shaddois law
And thys spokin hir sermond with the ilk saw
Brak sche in iwane, ful dolorus in hir thocht
The lycht sche fled, and als fast as sche mocht
Turnis frawart hym, and wiskis of hys sycht
Onsere materis leifand hym, pensife wycht
And purposyng to haue sayd mony thyngis
The damysellys fast to thare lady thryngis
That was in dedly swoun plat for dispare
Vp thay hir hint, and to hir chalmer bare
Quhilk was of marbil wrocht and in hir bed
Laid soiftlie doun apoun riche tapettis spred
Bot ȝit al thoch the reuthfull Eneas
The dolorus Quene, to meis ful besy was
To do hir comfort, and hir discis to swage
And with his wourdis, returne hir sayd curage
Bewaling meikill hir sorow, and distres
Perplexit in mynd, be grete luf netheles
The command of the goddis, by and by
He execute, and vesyis his nauy
Than beselie the troianis fel to wark
And mony grete schippis, ballingare and bark
Langis the coist broicht in, and bet ful wele
Now flletis the meikle hulk, with tallonit keile
The burgeonit treis, on burde thay bring for aris
Weltis doun in woddis grete, maistis and nathyng sparis
Sauffing half vnwrocht, so ythand thay war fare boun
Rynnyng here and thare, and wending fast of toun
ȝe mycht haue sene, thaym haist like Emotis grete
Quhen thay depulȝe, the mekil bing of quhete
And in thare byik, it caryis al and sum
Prouiding for the cauld wynter to cum
The blak swarme, ouer the feildis walkis ȝerne
Tursand throw the gers thair pray, to hiddillis derne
Sum on thare nek, the grete cornes vpwrelis
And ouer the furris, besely therwith spelis
Sum constreynyng the vtheris, fast to wirk
And som the slouthful chaistis, that thocht Irk
Of thare laubour, quhill euery rode and went
Wox of thare ythand werk hait, quhare thay went.

Quhat thocht, thou now Dido, seand thir thyngis
How mony sobbis, gaif thou and womentyngis
Quhen thou out of thy castell, from the hicht
The large coistis beheld, thus at one sycht
Ouer spred with troianis, in feruent besines
Gan spedely, for thair viage addres
And of thair clamoure, before thyne ene did se
Dyn and resoundyng, al the large see
O witles luf, quhat may be thocht or do
That thou constrenis not, mortal myndis therto
Sche is compellit, to fal agane to teris
And Eneas assay, with new prayeris
And condiscend, hir hert for to submit
Vnto the strench of luf, thus anys ȝit
Les sche vnwer, but caus hir deith puruayit
Hir list na thyng, behynd leif vnassayit
Till hir sche gan, hir sister call in hy
Annas quod sche, thou seis how be sely
Ouer al the coist, for this vyage hayist they
And now the wynd blawis wele, to sale away
The maryneris glad, layis schippis vnder croys
O sister in tyme, couth I haif trowit thys lois
And sa grete dolour, I had prouidit but were
That this displesure, suld haue bene eith to bere
And neuertheles, for me vnhappy wicht
Do this ane thing, Annas wyth al thy mycht
Sen ȝone ilk faithles man, dere sister the
Was wount to cheris, and hald in grete deynte
And als his secretis vnto the reuele
His sweit entres, sum tyme thou knew ful wele
Nane but thou only the tyme of his cumming
Pas on sister in my name and thys ane thing
Sa lawlie to my proude fa, and declare
That in the porte of alida I neuer sware
Wyth the grekis the troianis to distroy
Nor I na uauy send to the sege of troy
Nor ȝit his fader Anchises graue schent
I nouthir the muldis nor banis therof rent
Quhy dois he refuse my wourdis and prayers
To lat entyr in hys dul vncredybleeris
Quhidder haistis he so fast, from his behufe
Beseik him grant, vntill his wretchit lufe
This lattir reward, sen all gatis he wyl fle
Tary quhyll wind blaw, soft and stabyl se
His auld promyse, na mare wil I him craif
Nor band of wedlok, quhilks he hes dissait
Nor ȝit him pray, go not tyll Italie
To leif fare realmes, vnto hym destanye
Ane lytil delay I aske, but vthir eis
Ane space my furour, to assuage and meis
Quhill that my frawart fortun, and estate
Of my beleif schaw me, I am frustate
And teich me for to murne, mare paciently
This lattir gift, at hym onlie aske I
Haue mercy sister, of thy sister dere
Quhilk seruice quhen thou done, has for owtin were
I sall the recompens, wele twenty fald
And quhill my dede the samyn, in memor hald
Wyth sic like wordes, hir request scho maid
Hir supplicatioun with teris, ful vnglaid
Reportis hir syster, and ansuere brocht agane
How al hir prayeris, and desyre was in vane
For al thare weping, mycht not anis stere
Nane of thir wordes, likis him to here
Thoch he of nature was tretabyl, and courtes
The fatis war contrare, thare desyre neuer theles
And his bening eris, the goddis dittit
That of thare asking, thare was not admittit
And like as quhen, the aycient aik tre
Wyth his big schank, be north wynd oft we se
Is ouerset to bete him doun, and ouerthraw
Now here now thare, with the fell blastes blaw
The southand bir, quhisland amang the granis
So that the hiest bransches, all attanis
Thare croppis bowis, towert the erth als […]
Quhen with the dynt the maister, stok schank is shiyte
And netheles the ilk tre, fixit fast
Stikkis to the rochis not doun, bet with the blast
For quhy als fer, as his crop hie on brede
Strekis in the arc, as fer is rote dois sprede
Deip vnder erth, towert the hell adoun
The samyn wyse, was this gentil baroun
Now here now thare, with wordis vmbiset
And his stout breist, full of thochtes hate
Of reuth and amouris, full of perturbance
Bot euer his mynd, stude ferme for any chance
Vnmouit quhare, hys first purpos was set
That all for nocht, the teris war furth ȝet
Than soiftlie, the fare dido all affrait
Stand fatis contrare efter, her deith prayit
Sho […] of hir lyfe, or to tak tent
For to behald, the heuynnys firmament
Tharfor in takin hir purpos, to fulfyll
And leif the licht of lyfe, as was hir wyll
As on the altaris, birnand full of sence
The sacrifice scho offerit, in hir presens
Ane grisly thing to till scho gan behald
In blak adill the hallow, watter cald
Changit in the altare, furth ȝet wynis gude
Onon returnit, in to laithlie blude
Thys visioun to nane, scho reuele wald
Nor ȝit to due, hir sister it tald
In wourschip eik within, hir palice ȝet
Of hir first husband, was ane tempill bet
Of marbill, and hald in ful grete reuerence
With snaw quhite bendis, carpettis and ensence
And f•stuall burgeouns, arrayit in thare gyse
Tharin was hard, vocis speche and cryes
Of hir said spous, clepand hir full loude
Euer quhen the dirk nycht, did the erde schroude
And oft with wyld scryke, the nycht oule
Hie on the rufe allane, was hard ȝoule
With langsum voce, and ane full pietuous bere
And eik began, the ferefull sawis sere
Of the diuinis, with terribyl mony singis
Affrayit hyr by mony, grisly styngis
And in hir sleip wod, wraich in euery place
Hyr semyt cruell Eneas, can hir chace
And euir hyr thocht, scho was left all allane
And but cumpany mony, fer waye had gane
To seik hyr folkis, in ane wylsume land
Lyke kyng Pentheus, in his wod rage dotard
Thocht he beheld grete routis, stand in stare
Of the Ewmynides, furies infernale
And in the lift tua sonnys, schinand clere
The ciete of thebes, can double to him appere
Or like Orestes son, of agamemnone
On theatries, in fa••is mony one
Roupit and singin, how he his modir fled
Wyth fyre brandis, and blak serpentis ouercled
And saw the furyis, and griflie goddis fede
Sittand in the tempil porte, to wrayk hyr dede

Thus quhen Dydo, had caucht thys frencssy
Ouer set with sorow, and syt fantasy
And determyt fermly, that scho wald de
The tyme quhen, and maner how it suld be
Compassyng in hyr breist, but mai• abade
Vnto hyr dolorus, syster thus scho sayd
Hyr purpois by hyr vysage, dissumland
Schawing by hyr chere, gude hope and glaid semblan•
Sister germane, quod sche away ȝour smart.
Be of ȝour sisteris, weilfare glaid in hert
I haue the way fundin, quharby ȝone syre
Sall be to me rendrit, at my desire
Or me deliuer, from his luf all fre
Nere by the end, of the grete octiane se
Thare as the son declinis, and gois doun
At the fyrde side, of E•hiope regioun
Ane place thare is, quhare that the huge atlas
On schuldries rollis, the round spere in compas
Full of thir lemand sternes, as we se
Thare duellis sister, as it is schewin to me
Ane haly nun, ane full grete prophetes
Born of the pepill, of massilyne I ges
And wardane of the riall tempill, thay sa
Set in the garding, hecht hespirda
And to the walkry•, dragoun mete gaif sche
That keping, the goldyn appillis in the tre
St•ynkland to him the wak hony swete
And sleperye ches•owe, sede to walkin his sprite
This woman hechtis, with hir enchantmentis
From luffis bandis to lous all thare ententis
Quham so hir list, and bynd vther sum also
In langsum amouris, vehement pane and wo
The rynnyng studis thare wattir stop gan scho mak
And eik the sternes, turne that cours abak
And on the nycht, the dede gaistis assembil
Vnder thy seit the erd rair, and trymbil
Thou moi•• se throw hir, Incantatioun
And from the hillis treis discending doun
To witnes the grete goodis, draw I heire
And thy s••it hede myne […] sister dere
Agane my will full sare, constranit am I
Art magik to exerce or […]
Rycht secretely, in to our inner clois
Vnder the oppin sky, to this purpois
Pas on, and of treis, thou mak ane bing
To be ane fyre, and thayr apoun thehing
ȝone mannis swerd, quhilk that wickkit wicht
Left stikand in our chalmer, this hender nycht
His coit armour, and vthir clethyng all
And eik that maist wretchit, bed coniugall
Quhar in I perischit, and was schent allace
For so the religionis, commandit ha•e
For to vndo, and distroy all maner thing
Quhilk may ȝone warnt man, to memor bring
This sad sche, held hir toung and thare withall
Hyr vysage vox als pale, as ony wall
Thocht Annas wenit not, hir sister wald
Graith sacrifice, for hir dede body cald
Nor that sic fury, war in hir breist consa•t•
For by na ressoun, dred scho nor parsauit
No more displesoure, nor harmes apperand
Than for Sicheus dede, hir first husband
Tharfore scho has, hir command done ilk dele
Bot quhen the grete bing, was vpbeildit wele
Of aik, treis, and fyrren sthydis dry
Wythin the secrete cloys vnder the sky
The place wyth flourys, and garlandis stentys the quene
And crounys about wyth funeral be wys grene
Aboue the mowe, the foresaid bed was maid
Quharin the fygure, of Enee scho layd
Hys clethyng, and his swerd that he had left
Remembring weil, the thing that followit eft
Feyl terys stude, about the fyre funeral
And the religious nun, with har doun skail
Thre hundreth goddis with hir mouth ropyt sche
Nerbus the grislye of the deyp hellis se
Chaos, confoundare, of elementes alsua
and the thrynfald goddes, proserpina
The thre fyguris, of the virgine Dione
And euer the wattir sttrinkillis scho anone
Counterfete to be of, Auernus the well
Quhilk loth is situate, at the mouth of hell
Springand herbis, eftir the cours of the mone
War socht and with brasin, hukis cuttit sone
To gett hare mylky sop, and vennom blak
They seik also, and out can rent and tak
The lomp betuix, the new born follis Ene
And fra the moder, berest the luf sa grene
The quene hir self, fast by the altare standis
Haldand the melder, in hyr deuote handis
Hyr ta fute bare and the bandis, of threde
Not fessmyng, bot hung by hyr lous wede
And remembring scho was, in point to de
The goddis, all vnto witnes drew sche
The sternes and planetis, gidaris of fatis
And gif thare ony deit, be that watis
Or persauis luffaris, mequale of behest
To haue in memor hir, iust caus and request

The nicht followis, and euery wery wicht
Throw out the erd has, taucht anone richt
The sound plesand slepe, thame likit best
Woddis and regeand seis, war at rest
And the sternes thar myd coursis, rollis doun
Al the feilds still othir, but noyis or soun
All beistes and byrdis, of diueris cullours sere
And quhat sumeuer, in the brade lochis were
Or amang buskis harsk, leyndis vnder the spray
Throw michtis scilene, slepit quhare thay lay
Musing thare besy thocht, and curis smert
All irksum labour forȝet, and out of hert
But the vnrestles fey sporte, did nocht so
Of this vnhappy Phenissane, Dido
For neuer mare, may scho sleip ane wink
Nor nichtis rest, in ene, nor breist lat sink
The heuy thochtis, multiplyis euer on ane
Skang luf beginnis, to rise and rage agane
The felloun stormes, of ire gan hyr to schaik
Thus finalie, scho out bradis allaik
Rolling allane, sere thingis in hir thocht
Ha quhat do I, quod scho all is for nocht
Sall I thus mokkit, and to hething driue
My first luuaris agane, assay beliue
Or sall I lawly, sum lord numydiane
Pray and beseik, of mariage now agane
Quham I sa oft lichtlyit, to spous or this
Nay wil I not, quhat sall I than I wis
Follow the troiane nauy, in strange landis
And reddily obey, all thare commandis
I hope it sall proffit, na lytil thing
My grete help done thame, suppowelling
For amang kind folkis, this is na drede
Weil is remembrit, the auld thankful dede
But thocht in cais, to do this war my wil
Quha wald me suffir, my purpois to fulfill
Or inthare proude schippis, me ressaue
Thus dreuing to hething, and all thy grace biwaue
Tynt woman allace, beris thou not ȝit in mynd
The manswering, of fals Leamedonis kynd
And mareattour, quhat ettill for to do
Ane quene allane, to steil away thus lo
Accompanyed, bot with mery marineris
Or than, with all my tirrianis as efferis
And all my power, assemblit me about
O• schypburd entyr, with all that huge rou•
Quhylk of Sydome, skarsly draw I mycht
Sal I thame cache, agane ouer seyis lycht
Byd tham mak sail anone, and ane new rays
Na rather de, as thou deseruit has
And wyth ane swerd, mak of this dule ane end
O syster germane, thou me fyrst taucht and bend
Allace the quhyle, and offerit me to my foo
Thou wyth thyr harmes, ouer chargit me also
Quhen I fell fyrst into this rage, quod sche
Bot so to do, my teris constrenyt the
Was it not lefull allace, but cumpany
To me but cryme, allane in chalmer to ly
Or leid my lyffe, like to thir beistis wylde
And not bene thus, wyth thochtis or harmes fylde
Allace vnkepit is, the trew couenand
Hecht to Sythens, oft syis my first husband
Sic grete complantis, from hir breist birst can
Bot Eneas, souer to depart or than
And all his nedeful thingis, graichit by and by
Heich in his est schyp, slepand sound can ly
Quham to in visioun, the samyn, god did appere
In sic lyke figure, as that he did ere
Vnto Mercurius, like in all fassoun
Baych cullor of visage, and of vocis soun
In forme of ane ȝoungkere, with membris fare
Plesand of chere, ȝallow glitterand hare
Him thocht agane, he monist on this wise
Son of the goddis, how is this here thou lyis
Quhat may thou, vnder sa grete danger slepe
And al foruayit, takis nothyr cure nor keip
For to behald, quhat perellis about the standis
Nor harknis, the fare wyndis blawis of landis
Scho (quham thou knawis within hir breist full hate)
Soroufull vengeance, compassis and dissate
And certanly, determyt for to de
In diuerse stouris of ire, brandissis sche
Quhy will thou not, fle spedely by nycht
Quhen for to haue, thou has lasere and mycht
Thou sall anone behald the seyis large
And vmbeset, with toppit schip and barge
The ferefull brandis, and blessis of hate fyre
Reddy to birn, thy schippis lemand schire
And all the coist, beliue of flambis scald
Gif auqill to morow, tary in this land thou wald
Haue done, sped hand, and mak na mare delay
Variabil and changeabill thinges, bene women ay
And sayand thus, in to the dirk nycht
He gan him hide, and vanist out of sight
Eneas of this haisty, visioun afrayit
Gan stert on fute, and fast his feris assayit
Awalk anone, get vp my men in hy
Cyte to ȝour wardis, span airis besely
Schaik doun the falis, sone and let vs wend
From the hie heuin, the god agane is send
Lo spurrand vs, to haist and fle away
And biddis smyte, the twyne cabill in tway
O blissit wicht, quhat god that euer thou be
We sall obey, thy charge and follow the
And thy commaundment, fullfill agane blychtlie
Deseking the, assist till vs freindlie
Help and support, with prosper influence
The heuin and stremes, dres our vyage hens
And with that word, his scherand swerd als tyte
Hent out of scheith, the cabill in tua gan smyte
Thy samin maner, of haist, taucht all the laief
Thay hurle away ankeris, vphynt and raif
Left the coistis desert, of athir sydis
The stabill sey, vnder the schippis sidis
The stoure of fame, vpwelt thay egirly
And swepis ouer, the haw flude in hy

Be thys aurora, leuand the purpour bed
Of hir lord Tyton, heich the erd ouer spred
With new daies licht, and quhen the quene
The first greking, of the day has sene
And fra hir hie windois, gan espy
With bent sail, raryand furth the nauy
The coistis and the schore, all desolat
Behaldis eik, but outher schip or bate
Hir fare quhite breist, thare as scho did stand
Fele times smat scho, with hir awin hand
And ryffand hir bricht haris, pietuously
Iupiter (quod scho) sall he depart ha fy
And lefull till, ane wauyngour straungere
Me and my realme, betrumpe on thes manere
Sall not my menȝe, to harnes ryn in hy
Ouer all the town, and follow besely
Spede tak ȝour schippis, on burd fast to the rade
Haist sone and cast, on thame fire and blasis brade
Schute dartis thik, & quhel tham, with ȝour glauis
Quhat said I, or how am I now thou rauis
Quhat wodnes fey dido, mouis thy mynd
Sa till haif done, than had bene mare ganand
Quhen thou him gaif, the scepture of thy land
Ha now behald, his grete proues quod sche
His reuthfull piete, and hart is not ȝone he
Quham as thay say, the goddis of his land
In his nauy carus, ouer sey and sand
Is not ȝone he, quham on his schulderis thay say
For reuth his agit fader, bare away
Mycht I not caucht, and rent in pecis his corce
Syne swak the gobbettis, in the fey by force
Of him and al his fallowis wil I mocht
And eik ȝone som Ascaneus, I mycht nocht
Haue trynschit, with ane swerd and maid ane mais
To his fader therof, to eit at deis
Forsoith in cais, the auenture of battall
Had bene doutsum, wald god it war assale
Quham sall I drede, now reddy for to de
Wald god I mycht, in ȝone nauy I se
The hait fyre brandis, set on euery bore
Fil all with flambis rede, and forthermore
Bayth fader and son, with hale generatioun
That I had brynt, dystroyit and brytnyt doun
And thaym aboue, syne dede my self had lade
And thou bricht son, that with thy bemes glaid
All erdly laubour, clengis circuland about
And thou Iuno, mediatrice but dout
Of al thir heuy thochtis, and wele thair knawis
And thou proserpyne, quhilk by our gentil lawis
Art rowpit hie, and ȝellit loude by nycht
In forkit wayis, with mony mudy wicht
And ȝe infernale furies, that wrekis al wrang
And ȝe goddis eik, quham now amang
Dido standis reddy, to cum in point to de
Bessaue thir wordis, quhilkis I sall say quod sche
Withdraw fra hyne, ȝour grete mychtis quharby
Schrewis aucht be punyst, for thair crimes & not I
And thair our prayeris, accept, we ȝou beseik
Gif it be necessare, and determyt eik
ȝone wikkit hede, in portis of Itale
To enter and cum, or to thy boundis sall
And gif the fatis and Ioue, will it be so
And has decretit finallie hidder go
ȝit at the last, thare mot he be assale
With hardy pepill, ay trublyt in battale
By force of armes expellit his boundis eik
Fer from Ascaneus, constrenit, I beseik
Helpe and supple, and als that he be hald
Fele cairful corsis, of his folkis dede and cald
And quhen also, him self submittit has he
Vnder pece and lawis of iniquite
That he bruke nowthir realme, nor gud life lede
Bot fall fey or his day, and sone be dede
And ly vnerdit, in the middis of the sandis
This I beseik ȝou, hafand vp my handis
Thys is my lattir wourd, that I conclude
Furth ȝettand it, togiddir with my blude
And forther more, O ȝe my tirrianis
Quhilk now in affrik, and cartage remanis
ȝone Clan, with thare successioun, and kynrede
Persew with haitrent, perpetual and muaide
Vnto my asking, grant ȝit, this ane gift quod sche
Neuer luf, nor peace, betuix ther pepil be
Of our leuingis, sum reuengeare mot spring
With fyre, and swerd, to persew and doun thring
The labouraris, discend from dardanus
Now fra thynefurth, all that succedis to vs
Quhen thay may fynd tyme, with strench and mycht
Battall to battall, mot thay debait in fycht
Thir coistis mot be to tharis, contraray
And to thare stremes, or seyis frawart I pray
Thare of spring eik, amang thaym selfe mot debast
Thus said sche, and with thir wordis godwat
Hir fent sprete, in al partis writhis sche
Sekand the way, als sone as it mycht be
For to bereif hir self, the irksum lyfe
Tho callis scho to bir, Barten belif
Nuris vmquhile to Sychey, hir husband
For hir awin nuris, in hir natyue land
Was beryit in to assis, broun or than
Derenuris (quod scho) my syster An
Bid hir in haist, with water of ane flude
Hir body strynkill, the beistis and the blude
And clengeing greth, scho knawis with hir bringe
Se on this wise, sche can forȝet nething
And thou thy self, thy halffettis eik array
With haly garland, will is to assay
And now performe, the sacrifice on hy
That vnto Pluto, deuly begun haue I
To mak ane ende, of my dollorus thochtis all
And birn ȝone troianis statew, in flambe funerall
Thus said Dido, and the tothir with that
Hicht in furth with slaw, pase lik ane trat

Bot now the haisty, egir, and wild dido
In to hir cruell purpois, enragit so
The bludy ene, rolling in hir hede
Wan and full pale, for fere of the nere ded
With chekit, freklit, and all with teris by sprent
Quaking throw drede, ruschit furth or scho wald stent
Into the inner wardis, of hir place
As wod woman, clam on the bing allace
And forth scho drew, the troiane swerd fute hate
Ane wappon, was neuir worth for sic ane nate
Als sone as scho behold Eneas clething
And eik the bed bekend, ane quhile weping
Scho musing in hir mynd, and syne but bade
Fel in the bed, and thir lastwordis said
O fueit habit and likand, bed quod sche
Sa lang as god list suffir, and destanye
Ressaue my blude, and this saule that on flochtis
And me delyuer, from thyr heuy thochtis
This lang I leuit haue, and now is spent
The terme of lyf, that fortoun has me lent
For now my grete goist, vnder the erd mon go
Ane riche fare ceite, haue I beild also
Myne awin werk, and wallis behald haue I
My spous workin, of my brother ennemy
Fra him he bereft his treasour, and quit him wele
Happy allace, ouer happy and ful of sele
Had I bene onlye, gif that neuir nane
At our coist had arriuit, schip troiane
And sayand this hir mouth, fast thristis sche
Doun in the bed vnworkin, sall we de
De vs behuffis scho said, and how behald
And gan the scharpe swerd, to hir breist vphald
ȝa thus thus likis vs sterue, and to depart
And with that wourd, draue hir self to the hart
Now lat ȝone cruell troiane swelly and se
This our funerall fyre, fra the deipse
And our deith turs, with hym fra cartage
This takin of myscheif, in his vayage
Quod scho, & thare with gan hir serwandis behald
Hir falling, and slikkit on the Irne cald
The blude out bullerand, on the nakit swerd
Hir handis furth sprēt, the clamour than and rerd
Wen to the toppis, of the large hallis
The noyis ran wyde out, ouer the ciete wallis
Smate all the toun, with lamentabill murnyng
Of greting gouling, and wifflie womenting
The ruffis did resound bray, and rare
Quhil huge bewalling, all fordynnyt the are
Nane vthir wise, than thocht takin and doun bet
War all cartage, and with Innemyis ouer set
Or than ther natiue ciete, the toune of tyre
In furious flambe kendlit, and birnand schire
Spreddand fra thak, to thak, baith but and ben
Als wele ouer tempillis, as housis of vihir men
Hir sister An, spretles almaist for drede
Herand sa fereful confluens hidder spede
With nalis rywand reuthfully hir face
And smytand, with neiffis hir breist allace
Fast ruschit throw the myddis of the rout
And on ther thrawand with mony spreith and schout
Callis be name sister, germane quod scho
Och was this it, thou fenȝeit the to do
Has thou attemptit me with sic dissait
This bing of treis, thir altaris and syris haite
Is this the thing, thay haif vnto me dicht
Quhat sall I first compleyne, now desolate wicht
O dere sister, quhen thou was redy to de
Ach quhy has thou safer dispisit me
As to refuse thy sister, with the to wend
Thou suld haif callit me to the samyn end
That the ilk sorow, the samyn swerd baith tu•
And the self houre, mycht haif tane him awa
This funerall fyre with thir handis biggit I
And wyth my voce did on our goddis here cry
To that effect, as cruell to be absent
Thou beand thus sa dulefully here schent
Sister allace, with my counsell haif I
The and my self, and pepill of sydony
The heris all, and eik thy fare ciete
Distroyit and vndone fo•ay quod sche
Fethe hidder sone the well wattir lew warme
To wesche hir woundis and hald, hir in my arme
Syne with my mouth, at I may souk and se
Gif sprete of lyfe, left in hir body be
This sayand scho the bing, ascendis anone
And gan embrace half, dede hir sister germane
Culȝeand in hir bosum, and murnand ay
And with hir wympil, wypit the blude away
And scho agane Dido, the dedly quene
Preissit for to vplift hir, heuy Ene
Bot therof fallis, for the grislye vound
Deip in hir breist gapis wide, and vnsound
Thrys scho hir self rasit vp to ryse
Thryis on hir elbok lenys, and als feile syise
Scho fallis bakwart, in the bed agane
With ene rolland, and twinkland vp full fane
Assayis scho to espie, the heuinnys licht
Syne murmuris, quhen scho therof gat ane sicht
Almychty Iuno, hauand reuth by this
Of hir lang sorow, and tarysum dede I wys
Hir maide Iris, from the heuin has send
The thrawand saull, to lous, and make ane ende
Of all the Iuntturis, and lethis of hir cors
Because that nouthir, of fatis throw the fors
Nor ȝit be naturale, dede perischit sche
Bot fey in haisty, furour inflammyt hie
Before hir day, had onuyslye hir self spilt
Or that proserpyne, the ȝallow haris gilt
From hir fortop bireft, or doublit hir hede
Vnto the stigean, hellis flude of dede
Tharfore dewy Iris, throw the heuyn
With hir saffroun wingis, flaw full euin
Drawand quhar scho, went forgane the son clere
Ane thousand cullouris, of diuers hewis sere
And aboue Didois, hede arest can
I am commandit said scho, and I man
Vnto this hare, to Pluto consecrate
And lous the saul out of this mortall state
This sayand with richt hand, has scho hynt
The hare and cuttis in tua or that scho stynt
And thare with all, the naturale hete out quent
And with ane puft of end, the lyfe furth went