Book XVI

Quhen Schir Edward, as I tald air,
Had discumfit Richard of Clair,
And of Irland all the barnage
Thris, throu his worthy vassalage,
And syne with all his men of mayne
Till Cragfergus wes cummyn agayn,
The gud Erll of Murreff, Thomas,
Tuk leiff in Scotland for till pas.
And he hym levit with a gruching,
And syne him chargit to the King,
Till pray him specialy that he
Suld cum in Irland him to se.
For, war thai bath in-to that land,
Thai suld fynd nane suld thaim withstand.
The Erll furth than his way has tane,
And till his schippes is he gane,
And salit out weill our the se,
In Scotland soyne arivit he.
Syne to the king he went in hy:
And he resavit hym gladsumly;
And sperit of his brotheris fair,
And of journeis that he had thair;
And he him tald all but lesyng.
Quhen the King had left spering,
His charge to the gud king tald he.
And he said, he wald blithly se
His brothir, and als all the effeire
Of that cuntre and of thar were.
A gret menyhe than gaderit he:
And twa lordis of gret bounte,
The tane the Steward Walter was,
The tothir, James of Dowglas,
Wardanis in his absens maid he,
For till manteym weill the cuntre.
Syne to the se he tuk his way;
And at Lowchryan in Galloway
He schippit, with all his menyhe;
Till Cragfergus soyne cummyn is he.
Schir Edward of his com wes blith,
And went down for to meit him swith,
And welcummyt him with gladsum cher:
Sa did he all that with him wer;
And specialy the Erll Thomas
Of Murreff, that his nevo was.
Syne to the castell went thai thar,
And maid thame mekill fest and far.
Thai sojournyt thair dayis thre
In gret myrth and in rialte.

King Robert, apon thiskyn wis,
In-till Irland arivit is:
And quhen in Cragfergus had he
With his men sojournyt dais thre,
Thai tuk to consell that thai wald,
With all thar folk, thar wayis hald
Throu all Irland, fra end to othir.
Schir Edward than, the Kingis brothir,
Befor in the avaward raid;
The Kyng him-self the reirward maid,
That had in-till his cumpany
The Erll Thomas, that wes worthy.
Thair wayis furthwarde haf thai tane,
And soyne are passit Inderwillane.
This wes in the moneth of May,
Quhen byrdis syngis on the spray;
Melland thair notys with sydry sowne,
For softnes of that sweit sesoune;
And levis on the branchis spredis,
And blomys bricht besyd thame bredis
And feldis florist ar with flowris
Well savourit, of seir colowris;
And all thing worthis blith and gay;
Quhen that this gud king tuk his way
To ryd furthward, as I said are.
The wardane than, Richard of Clare,
Wist the Kyng wes arivit swa,
And wist that he schupe for till ta
His way toward the south cuntre.
Of all Irland assemblit he
Bath burges and chevalry
And hobilleris and yhumanry;
Quhill he had neir fourty thousand.
Both he wald nocht yheit tak on hand
With all his fayis in field to ficht,
But umbethoucht him of a slicht;
That he with all that gret menyhe
Wald in a wode enbuschit be,
And prevely besyde the way,
Quhar at thar fayis suld pas away,
And let the vaward pas fer by,
And syne assemmyll hardely
On the reirward, with all thar men.
Thai did as thai devisit then.
In a wode thai enbuschit wer:
The Scottis hoost raid by thame nere;
For thai na schawing of thame maid.
Schir Edward weill fer forrouth raid
With thame that war of his menyhe;
To the reirward na tent tuk he.

And Schir Richard of Clare in hy,
Quhen Schir Edward wes passit by,
Send wicht yhomen, that weill couth schut,
To bikkir the reirward apon fut.
Than twa of thame that send furth war
At the wode-syde thame bykkirrit thar,
And schot emang the Scottis men.
The King, that had thar with him then
Five thousand wicht and ek hardy,
Saw thai twa sa abaundonly
Schut emang thaim, and cum so neir;
He wist richt weill, withouten weir,
That thai weill neir suppowal had.
Tharfor a bydding has he mad,
That no man suld be so hardy
Till prik till thame, but sarraly
Ryde reddy ay in-till battale,
Till defend gif men wald assale.
“For we sall soyne, I undirta,”
He said, “haf for till do with ma.”

Bot Schir Colyne Cammell, that ner
Wes by quhar thai twa yhomen wer,
Schutand emang thame hardely,
Prikit on thame in full gret hy,
And soyne the tane he has our-tane,
And with his sper him soyne has slayne.
The tothir turnyt and schot agayne,
And at a schot his hors has slayne.
With that the King come hastely,
And, in his gret malancoly,
With ane trunsione in-till his nave
To Schir Colyne sic dusche he gave,
That he dynnyt on his arsoune.
The King bad smertly tyt hym doune,
Bot othir lordis, that war him by,
Ameyssyt the King in sum party.
He said, “The breking of bydding
“Micht caus be of discomfiting.
“Weyn yhe yhon rebaldis durst assale
“Us so neir, in-till our battale,
“Bot gif thai had suppowale neir?
“I wat richt weill, forouten weir,
“That we sall have till do in hy;
“Tharfor luk ilk man be reddy.”
With that weill neir thretty and ma
Of bowmen com, and bykkyrrit swa
That thai hurt of the Kyngis men.
The King has gert his archeris then
Schute for till put thaim than agayne.
With that thai enterit in ane playne,
And saw arayit agane thame stand,
In four battellis, fourty thousand.

The king said, “Now, lordingis, lat se
“Quha worthy in this ficht sall be.
“On thame forouten mair abaid!”
So stoutly than on thame thai raid,
And assemblit so hardely
That of thair fayis a gret party
War laid at erd at thar meting.
Thar wes of speris sic bristing,
As athir apon othir raid,
That it a weill gret frusche has maid.
Hors com thair fruschand, hed for hed,
Swa that feill on the grund fell ded.
Mony a wycht and worthy man,
As athir apon othir ran,
War duschit ded doune to the ground;
The rede blude out of mony a wound
Ruschit in sa gret fusioune than,
That of the blude the stremes ran.
And thai, that wrath war and angry,
Dang on othir so hardely,
With wapnys that war bricht and bar,
That mony a wicht man ded wes thar.
For thai that hardy war and wicht,
And frontly with thar fayis can ficht,
Pressit thame formast for till be.
Thair mycht men cruell bargane se,
And hard battall, I tak on hand.
In all the weir of Irland
So hard ane fichting wes nocht seyne:
The-quhethir of gret victoris nynteyne
Schir Edward had, withouten wer,
In-till les than in-to thre yheir;
And in syndry battelis off thai
He vencust twenty thousand and ma,
With trappit hors richt to the feit.
Bot in all tymis he wes yheit
Ay ane for fyve, quhen lest wes he,
Bot the Kyng, in-to this melle,
Had allwayis aucht of his famen
For ane, bot he swa bar him then,
That his gud deid and his bounte
Confortit swa all his menyhe,
That the mast coward hardy wes.
For, quhar he saw the thykkest pres,
So hardely on thame he raid,
That ay about hym rowme he maid.
And Erll Thomas, the worthy,
Wes in all tymis neir hym by,
And faucht as he war in a rage;
Swa that, throu thar gret vassalage,
Thar men sic hardyment can tak,
That thai no perell wald forsak;
Bot thame abaundonyt so stoutly,
And dang on thame so hardely,
That all thair fayis afrayit war.
And thai, that saw weill, be thair fair,
That thai eschewit sumdeill the ficht,
Thai dang on thame with all thar mycht,
And pressit thame dyngand so fast,
That thai the bak gaf at the last,
And thai, that saw thaim tak the flicht,
Pressit thame than with all thar mycht,
And in thair fleying feill can sla.
The Kingis men has chasit swa,
That thai war scalit evirilkane.
Richard of Clare the way has tane
To Devillyng, in full gret hy,
With othir lordis that fled him by,
And warnyst bath castell and townys
That war in thair possessiownis.

Thai war so felly fleyit thar,
That, as I trow, Richard of Clar
Sall haf no will to faynd hys mycht
In battell, na in fors of fycht,
Quhill King Robert and his menyhe
Is duelland in-to that cuntre.
Thai stuffit strynthis on this wis;
And the King, that wes sa till pris,
Saw in the feild richt mony slayn.
And ane of thame that thar wes tane,
That wes arayit jolely,
He saw greit wondir tendirly,
And askit him quhy he maid sic cher:
He said him, “Schir, forouten wer,
“It is no wonder thouch I grete,
“I se feill heir fellit to fete,
“The flour of all north Irland,
“That hardyest wes of hert and hand,
“And mast doutit in hard assay.”
The King said, ‘Thou has wrang, perfay;
‘Thou has mair caus myrthis till ma,
‘For thou the ded eschapit swa.’

Rychard of Clare on this maner,
And all his folk, discumfit wer,
With few folk, as I to yhow tald.
And quhen Edward the Bruce so bald,
Wist at the King had fouchten swa,
With sa feill folk, and he thar-fra,
Micht no man se ane wrathar man.
Bot the gude King said till hym than,
That it wes in his awn foly,
For he raid sa unwittandly
So fer befor, and no avaward
Maid to thame of the reirward,
For, he said, quha on were wald ryde
In the vaward, he suld na tyde
Press fra his rerward fer of sycht;
For gret perell so fall thair mycht.
Of this ficht will we spek no mair.
The King, and all that with him war,
Raid furthwarde in-to bettir aray,
And neir to-giddir than ere did thai.
Throu all the land planly thai raid;
Thai fand nane that thame warnyng maid.
Thai raid evin forrouth Drouchyndra,
And forrouth Devilling syne alsua:
Bot to gif battale nane thai fand.
Syne thai went forthwarde in the land,
And sowth till Lynrike held their way,
That is the southmast toune, perfay,
That in Irland may fundyn be.
Thair lay thai dayis twa or thre,
And buskit syne agane to fare.
And quhen that thai all reddy war,
The King has herd ane woman cry,
He askit quhat that wes in hy.
“It is ane landar, schir,” said ane,
“That hir childyne richt now has tane;
“And mon leve now behynd us her,
“Tharfor scho makis yhon evill cher.”
The King said; ‘Certis, it war pite
‘That scho in that poynt left suld be;
‘For certis, I trow, thar is no man
‘That he ne will rew a woman than.’
His host all than arestit he,
And gert ane tent soyne stentit be,
And gert her gang in hastely,
And othir women till be hir by,
Quhill scho delyver wes, he bad;
And syne furth on his wayis raid;
And how scho furth suld caryit be,
Or evir he fure, than ordanit he.
This wes a full gret curtasy,
That sic a Kyng and swa mychty,
Gert his men duell on this maner
Bot for a full pouir laynder.
Northward agane thai tuk the way,
Throu all Irland thus passit thai,
Throw Conage richt to Devilling,
And throu all Myth, and Irell syne,
And Monester, and Lenester,
And syne haly throu Ullister,
To Cragfergus, forout battell;
For thar wes nane durst thame assale.
The kingis than of the Eryschrye
Come to Schir Edwarde halely;
And thair manrent till him ma,
Bot gif that it war ane or twa.
Till Cragfergus thai come agane;
In all that way wes no bargane,
Bot gif that ony punyhe wer,
That is nocht for till spek of her.
The Erische kyngis than evirilkane
Hayme till thar awne repar ar gane,
And undirtuk in all-kyn thyng
For till obeys till the biddyng
Of Schir Edward, that thar king call thai.
He wes weill set now in gud way
To conquest the land all halely;
For he had apon his party
The Eryschry and Ullister,
And he wes swa furth of his wer
That he was passit throu all Irland,
Fra end till end throu strynth of hand.
Couth he haf governit hym throu skill,
And fallowit nocht to fast his will,
Bot with mesour haf led his deid,
It wes weill lik, withouten dreid,
That he mycht haff conquerit weill
The land of Irland everilk deill.
Bot his outrageous succudry
And will, that mar wes than hardy,
Of purpos letit hym, perfay,
As I heir-eftir sall yhow say.

Now leiff we heir the nobill King
All at his eis, and his liking,
And spek we of the lord Douglas,
That left to kep the marchis was.
He gert get wrichtis that wes sle,
And in the hawch of Lyntoun-le
He gert thame mak a fair maner.
And quhen the housis biggit wer,
He gert purvay him richt weill thar;
For he thoucht for till make infair,
And till mak gud cher till his men.
In Rychmond wes thar wonnand then
Ane Erll men callit Schir Thomas.
He had invy at the Dowglas,
And said, gif that he his baner
Micht se displayit apon wer,
That soyn assemble on it suld he.
He herd how Dowglas thoucht to be
At Lyntoun-le ane fest till ma.
And he had wittyng weill alsua,
That the King and a gret menyhe,
War passit than of the cuntre,
And the Erll of Murref, Thomas.
Tharfor he thoucht the cuntre was
Febill of men for till withstand
Men that thame soucht with stalward hand:
And of the marchis than had he
The governale, and the pouste.
He gaderit folk about hym then,
Quhill he wes neir ten thousand men,
And wode-axis gert with hym tak;
For he thoucht he his men wald mak
Till hew doune Jedward forest cleyne,
That na tre suld tharin be seyne.

Thai held thaim furthward on thar way;
Bot the gud lord of Dowglas ay
Had spyis out on ilka syde,
And had gud witting that thai wald ryde,
And cum apon hym suddanly.
Than gaderit he richt hastely
Thame that he mycht of his menyhe.
I trow that than with hym had he
Fifty, that worthy war and wicht,
At all poynt armyt weill and dicht;
And of archeris a gret menyhe
Assemblit als with hym had he.
A place thar was thar in the way,
Quhar he wist weill thai wald away,
That had wode apon athir syde;
The entre wes weill large and wyde;
And as ane schelde it narrowit ay
Quhill that, in-till ane place, the way
Wes nocht a penny-stane cast of breid.
The lord of Douglas thidder yheid,
Quhen he wist thai war neir cumand,
And in a clewch on the ta hand,
All his archeris enbuschit he,
And bad thame hald thame all preve
Quhill that thai herd him rais the cry,
And than suld thai schute hardely
Emang thar fayis, and hald thame thar
Quhill that he throu thame passit war;
And syne with him furth hald suld thai.
Than byrkis on athir syde the way,
That yhoung and thik wes growand ner,
He knyt to-giddir on sic maner,
That men mycht nocht weill throu thame ryde.
Quhen this wes done, he can abyde
Apon the tothir half the way:
And Richmond in-till gude aray
Com rydand in the first escheill.
The lorde Dowglas has seyn him weill,
And gert his men all hald thame still,
Quhill richt at hand thai com thame till
And enterit in the narrow way.
Than with a schout on thame schot thai,
Cryand on hicht, “Douglas! Douglas!”
Than Richmonde, that rycht worthy was,
Quhen he has herd sa ris the cry,
And Dowglas baner saw planly,
He dressit him thiddir-ward in hy.
And thai come on sa hardely,
That thai throu thame maid thame gud way;
All at thai met till erd bar thai.
The Richmond borne doune thar was;
On hym arestit the Dowglas,
And him reversit, syne with a knyff
Richt in that place hym reft the liff.
Ane hat apon his helm he bare,
And that tuk Douglas with him thar
In taknyng, for it furrit was.
And syne in hy his way he tais,
Quhill in the wode thai enterit war.
The archeris weill has borne thame thar;
For weill and hardely schot thai.
The Inglis rout in gret effray
War set, for Douglas suddandly,
With all thame of his cumpany,
Or evir thai wist, war in thar rout,
And thrillit thame weill neir throuout;
And had almast all done his deid,
Or thai till help thame couth take hede.

And quhen thai saw thar lord wes slayne,
Thai tuk him up, and turnyt agayne
Till draw thame fra the schot away.
Than in ane playne assemblit thai;
And, for thar lord that thar wes ded,
Thai schupe thame in that ilke sted
For till take herbery all that nycht.
And than the Douglas, that wes wicht,
Gat wittering that ane clerk, Elys,
With weill thre hundreth enymys,
All straucht till Lyntoun-le war gane,
And herbery for thair host had tane.
Than thiddir is he went in hy,
With all thame of his cumpany,
And fand clerk Elis at the met,
And all his rout about him set.
And thai com on thaim stoutly thair,
And with suerdis that scharply schar
Thai servit thame full egyrly.
Thai war slayn doune so halely,
That thar weill neir eschapit nane;
Thai servit thame in sa gret wayne
With scherand swerdis and with knyvis,
That weill neir all lesyt thar livis.
Thai had ane felloune entremas,
For that surcharge to chargeand was!
Thai that eschapit thair throu cas
Richt till thar host thar wayis tais,
And tald how that thar men war slayne
So cleyne that neir eschapit nane.
And quhen thai of the host has herd
How that the Dowglas with thame ferd,
That had thar herbreouris all slayne,
And ruschit als thame-self agane,
And slew thar lord in-myd thar rowt,
Ther wes nane of thame all sa stowt,
That mair will had than till assale
The Dowglas; tharfor till consale
Thai yheid, and till purpos has tane
Till wend hamward, and haym ar gane;
And sped thame swa apon thair way,
That in Ingland soyne cummyn ar thai.
The forest left thai standand still;
Till hew it than thai had no will:
And specialy quhill the Dowglas
So neir hand by thair nychtbour was.
And he, that saw thame turn agane,
Persavit weill thar lord wes slane,
And by the hat that he had tane
He wist alsua weill; for ane,
That takyn wes, said him suthly,
That the Richmond commonly
Wes wount that furrit hat to were.
Than Dowglas blithar wes than ere;
For he weill wist that the Richmond,
His felloune fa, wes broucht to ground.

Schir James of Dowglas, on this wis,
Throu his worschip and gret empris,
Defendit worthely the land.
This poynt of weir, I tak on hand,
Wes undirstane so apertly,
And eschevit richt hardely.
For he stonayit, withouten weir,
The folk that weill ten thousand weir,
With fifty armyt men but ma.
I can als tell yhow othir twa
Poyntis, that weill eschevit weir
With fifty men; and, but all weir,
Thai war done swa richt hardely,
That thai war prisit soveranly,
Atour all othir poyntis of wer
That in thar tym eschevit wer.
This wes the first, that sa stoutly
Wes broucht till end weill with fifty.
In Galloway the tothir fell;
Quhen, as yhe forrouth herd me tell,
Schir Edward the Bruys, with fifty,
Vencust of Saint Johne Schir Amery,
And fifteene hundreth men be tale.
The thrid fell in-to Eske-dale,
Quhen that Schir Jhone the Sowlis was
The governour of all that plas,
That to Schir Androu the Herdclay
With fifty men withset the way,
That had thar in his cumpany
Thre hundreth horsit jolely.
This Schir Jhone in-to plane melle,
Throu hardyment and soverane bounte
Vencust thame sturdely ilkane,
And Schir Androu in hand has tane.
I will nocht rehers all the maner;
For quha sa likis, thai may heir
Yhoung women, quhen thai will play,
Syng it emang thame ilke day.
Thir war the worthy poyntis thre,
That, I trow, evirmar sall be
Prisit, quhill men may on thaim meyn.
It is weill worth, forouten weyn,
That thar namys for evirmar,
That in thar tyme so worthy war
That men till heir yheit has dantee
Of thair worschip and gret bounte,
Be lestand ay furth in lovyng:
Quhare he, that is of hevyn the king,
Bring thame hye up till hevynnis blis,
Quhar alway lestand loving is!

In-till this tyme that the Rychmond
Was on this maner broucht to ground,
Men of the cost of Ingland,
That duelt on Hummyr or neirhand,
Gaderit thame a gret menyhe,
And went with schippes to the se,
And toward Scotland went in hy,
And in the Firth com hastely.
Thai wend till haf all thar liking:
For thai wist richt weill at the King
Wes than fer out of the cuntre,
And with him mony of gret bounte.
Tharfor in-to the Firth com thai
And endlang it up held thai thar way,
Quhill thai, besyde Enverkethyne,
On west half, toward Dunfermlyne,
Tuk land, and fast begouth to reif.
The Erll of Fiff and the schirreff
Saw till thar cost schippes approachand:
Thai gaderit till defend thair land,
And ay forgane the schippis ay,
As thai salit, thai held thar way,
And thoucht till let thame land to tak,
And quhen the schipmen saw thame mak
Sie contenans in sic aray,
Thai said emang thaim all, that thai
Wald nocht let for thame land to ta,
Than to the land thai sped thame swa,
That thai com thair in full gret hy
And arivit full hardely.
The Scottis men saw thair cummyng,
And had of thame sic abasyng,
That thai all sammyn raid thame fra,
And the land letles leit thame ta.
Thai durst nocht fecht with thame, for-thi
Thai withdrew thame all halely;
The-quhethir thai war fyve hundreth ner.
Quhen thai away thus ridand wer,
And na defens begouth to schop,
Of Dunkelden the gude bischop,
That men callit Willyhame Syncler
Com with a rout in gud manere,
I trow on hors thai war sexty.
Hym-self wes armyt jolely,
And raid apon a stalward steid.
A chemeyr, for till heill his weid,
Above his armyng had he then;
And als weill armyt wes his men.
The Erll with the schirreff met he,
Awayward with thar gret menyhe:
And askyt thame weill soyn, quhat hy
Maid thame till turne so hastely.
Thai said, thair fais with stalward hand
Had in sic fusioune takyne land,
That thai thoucht thame allout to fele,
And thame to few with thame to dele.
Quhen the bischop herd it wes sa,
He said; “The King aucht weill to ma
“Of yhow, that takis sa weill on hand
“In his absens till wer the land.
“Certis, gif he gert serve yhow weill,
“The gilt spuris, richt by the heill,
“He suld in hy ger hew yhow fra;
“Richt wald with cowardis men did swa.
“Quha lufis his lord and his cuntre,
“Turne smertly now agane with me!”
With that he kest of his chemer,
And hynt in hand a stalward sper,
And raid toward his fayis in hy.
All turnyt with hym halely;
For he had thame reprevit swa,
That of thame all nane went him fra.
He raid befor thame sturdely,
And thai hym followyt sarraly,
Quhill that thai com neir approchand
To thar fais that had tane land.
And sum war knyt in gud aray,
And sum war set to the forray.

The gud bischop, quhen he thame saw,
He said; “Lordingis, but dreid or aw,
“Prek we apon thame hardely,
“And we sall haf thame weill lichtly,
“Se thai us cum but abaysing,
“Swa that we mak heir na stynting,
“Thai sall weill soyne discumfit be.
“Now dois weill; for men sall se,
“Quha lufis the Kyngis mensk to-day.”
Than all to-giddir in gud aray
Thai prekit apon thame sturdely.
The bischop, that wes richt hardy
And mekill and stark, raid forrouth ay.
Than in a frusche assemblit thai.
And thai that, at the first metyng
Of speris, feld so sair sowing,
Wayndist and wald haf beyn away;
Toward thar schippis in hy held thai,
And thai com chassand felonly,
And slew thame sa dispitfully,
That all the feldis strowit war
Of Inglis men that slayn wes thar.
And thai that yheit held unslayn,
Pressit thame to the se agane.
And Scottis men, that chassit swa,
Slew all that thai mycht our-ta.
Bot thai that fled yheit, nocht-for-thi,
Swa till thar schippis can thame hy,
And in sum bargis sa feill can ga,
And thair fais thame chasit swa,
That thai ourtummyllit, and the men
That war thar-in all drownit then.
Thar did ane Inglis man, perfay,
A weill gret strynth, as I herd say.
For quhen he chassit wes to the bat,
A Scottis man, that him handlyt hat,
He hynt than by the armys twa;
And, war him weill or war him wa,
He evin apon his bak hym flang,
And with hym till the bat can gang,
And kest him in, all magre his.
This wes ane weill gret strynth, i-wis.
The Inglis men, that wan away,
Till thair schippes in hy went thai.
And salit hayme, angry and wa
That thai had beyn reboytit swa.

Qwhen that the schipmen on this wis
War discumfit, as I devis,
The bischop, that so weill hym bare
That he all hertit that was thar,
Wes yheit in-to the fechting-sted,
Quhar that fyve hundreth neir wes ded,
Forouten thame that drownyt war.
And quhen the feld wes spulyheit bare,
Thai went all hayme to thar repare.
To the bischop is fallen faire,
That, throu his pris and his bounte,
Has eschevit sa gret journee;
The Kyng tharfor, ay fra that day,
Hym lufit, honorit and prisit ay,
And held hym in-to sic daynte
That “his awne bischop” him callit he.
Thus thai defendit the cuntre
Apon bath halfis the Scottis Se,
Quhill that the King wes out of land,
That than, as I have borne on hand,
Throu all Irland his cours had maid,
And agane to Cragfergus raid.
And quhen his brothir, as he war King,
Had all Erischry at his bidding,
And halely Ulcister alsua,
He buskit hame his way to ta.
Of his men that war mast hardy
And prisit of all chevelry,
With his brothir gret part left he,
And syne he went on-to the se.
Quhen thair levis on athir party
Wes tane, he went to schip in hy.
The Erll Thomas with him he had;
Thai rasit salys but abaid,
And in the land of Gallowa,
Forouten perell, arivit thai.