Book XVII

The lordis of the land wes fayne
Quhen thai wist he wes cummyn agane,
And till him went in full gret hy,
And he resavit thame richt gladly,
And maid a fest and gladsum cher.
And thai so wondirly blith wer
Of his come, that na toung mycht say;
Gret fest and fair till him maid thai.
Quhar-evir he raid, all the cuntre
Gaderit in daynte him to se.

Gret gladschip than wes in the land;
All than wes wonnyne till his hand;
Fra Redis Swyr till Orkynnay
Wes nocht of Scotland fra his fay,
Outaken Berwik it allane.
That tyme thar-in wonnyt ane,
That capitane wes of the toune.
All Scottis men in suspicioune
He held, and tretit thame richt ill;
He had ay at thame hevy will,
And had thame fast at undir ay.
Quhill that it fell, apon a day,
That a burges, Sym of Spaldyng,
Thoucht it wes richt ane angry thing
Ay swagat till reboytit be;
Tharfor in-till his hert thoucht he,
That he wald slely mak covyne
With the marschall, quhais cosyne
He had weddit on-till his wiff;
And as he thoucht he did beliff.
Letteris till him he send in hy
With a trast man all prevaly;
And set hym tym to cum a nycht
With ledderis and gud men and wicht,
Till the Kow-yhet all prevely;
And bad him hald his trast treuly,
And he suld meit thame at the wall;
For his wach thar that nycht suld fall.
Quhen the marschall the letteris saw,
He umbethoucht him than a thraw;
For he wist, be him-selvin he
Micht nocht of mycht na power be
For till escheve so gret a thing:
And gif he tuk till his helping,
Ane or othir suld wrethit be.
Tharfor richt till the King yheid he,
And schawit him betuix thai twa
The lettir and the charge alsua.
Quhen that the King herd that this trane
Wes spokin in-to sic certane,
That him thoucht thar-in na fantys,
He said him; “Certis, thou wroucht has wis,
“That thou discoverit first till me;
“For gif thou had discoverit thee
“Till my nevo, the Erll Thomas,
“Thou suld disples the lord Douglas;
“And him alsua in the contrer.
“Bot I sall wirk on sic maner,
“That thou at thine entent sall be,
“And have of nane of thame magre.
“Thou sall tak kep weill to thi day,
“And with thame that thou purches may
“At evin thou sall enbuschit be
“In Duns park; bot be preve.
“And I sall ger the Erll Thomas,
“And the lord alsua of Dowglas,
“Athir with ane quheyne of men,
“Be thair till do as thou sall ken.”

The marschall than but mair delay
Tuk lief, and held on furth his way;
And held the spek preve and still,
Quhill the day that wes set him till.
Than of the best of Lowdyane
He with him till his trist has tane;
For schirreff thar-off than wes he.
Till Duns park with his menyhe
He come at evyn all prevely.
And syne, with a gude cumpany,
Soyne eftir come the Erll Thomas,
That wes met with the lord Douglas.
A richt fair cumpany thai war,
Quhen thai war met to-giddir thar.
And quhen the marschall the covyne
Till bath the lordis, lyne be lyne,
Had tald, thai went on furth thar way;
Fer fra the toune thar hors left thai.
Till mak it schort, swa thai wroucht than
That, but seying of ony man,
Outane Sym of Spaldyne allane,
That gert the deid be undirtane,
Thai set thair ledderis to the wall,
And, but persaving, com up all;
And held thame in ane nuke preve,
Quhill at the nycht suld passit be.
And ordanit that the mast party
Of thair men suld gang sarraly
With thar lordis, and hald a staill,
And the remanand suld all haill
Scaill throu the toun, and tak and sla
The men that thai mycht our-ta.

Bot soyn thar ordinans brak thai;
For, als soyn as it dawit day,
The twa part of thair men and ma,
All scalit, throu the toun to-ga;
Sa gredy war thai till the gude,
That thai ran richt as thai war woude,
And sesit housis and slew men.
And thai that saw thair fais then
Cum apon thame suddanly,
Throu-out the toun thai rasit the cry,
And schot to-gidder heir and thair:
And ay, as thai assemblit war,
Thai wald abyde and mak debat.
Had thai beyn warnyt, weill I wat,
Thai suld haf sald thair dedis der;
For thai war gud men, and thai wer
Fer ma than thai war at thame soucht;
Bot thai war scalit sa at thai moucht
On na maner assemblit be.
Thar wes gret melleis twa or thre;
Bot Scottis men so weill thame bar
That thair fais ay ruschit war;
And cumrayit at the last war swa
That thai haly the bak can ta.
Sum gat the castell, bot nocht all;
And sum ar slyddin our the wall,
And sum war in-to handis tane,
And sum war in the bargane slane.
On this wis thame contenit thai,
Quhill it wes neir noyne of the day;
Than thai that in the castell war,
And othir that fled to thame thar,
That war a richt gret cumpany,
Quhan thai the baner saw sympilly
Swa standand, stuffit with sa quhoyn,
Thar yhettis haf thai opnyt soyn,
And yschit on thame hardely.
Than Erll Thomas, that wes worthy
And als the gude lord of Douglas,
With the few folk that with thame was,
Met thame stoutly with wapnys seir;
Thar men mycht se, that had beyn neir,
Men abaundoune thame hardely.
The Inglis men faucht cruelly,
And with all mychtis can thame payne
Till rusche the Scottis men agane.
I trow thai had swa done, perfay,
For thai war fewar far than thai,
Gif it ne had beyn ane new maid knycht,
That till his name Schyr Wilyhame hicht
Of Keth, and of the Gawlistoune
He hecht, throu difference of sur-noune,
That bair him sa rycht weill that day,
And put him till sa hard assay,
And sic dyntis about him dang,
That, quhar he saw the thikast thrang,
He prikit with sa mekill mycht,
And sua enforsaly can ficht,
That he maid till his menyhe way:
And thai that neir war by him ay
Dang on thair fayis sa hardely,
That thai haf tane the bak haly
And till the castell held thair way.
And at gret myscheiff enterit thai,
For thai war pressit thair so fast,
That thai feill lesit of the last;
Bot thai that enterit, nocht-for-thi,
Sparit thair yhettis hastely;
And in hy to the wallis ran,
For thai war nocht all sekir than.

The toune wes takyn on this wis
Throu gret worschip and hye empris;
And all the gud that thai thar fand
Wes sesit smertly in-till hand.
Vittaill thai fand in gret fusionne,
And all that fell till stuff of toune;
That kepit that fra distroying,
And syne has word send to the King.
And he wes of that tithing blith,
And sped him thiddirward full swith.
And as he throu the cuntre raid
Men gaderit till him, quhill he had
A mekill rout of worthy men.
And the folk that war wonand then
In-till the Mers and Tevidaill,
And in the Forest als all haill,
And the est end of Lowdiane,
Befor that the King com, ar gane
To Berwik with a stalward hand,
That nane that wes that tyme wonand
On yhond half Tweid durst weill apeir.
And thai that in the castell weir,
Quhen thai thair fais in sic plente
Saw forrouth thame assemblit be,
And had na hope of reskewyng,
Thai war abasit in gret thing.
Bot thai the castell, nocht-for-thi,
Held thai fiff dayis sturdely,
Syne yhald it on the sext day,
And till thair cuntre syne went thai.

Thus wes the castell and the toune
Till Scottis mennys possessioun
Broucht: and soyn eftir the King
Com ridand with his gadering
Till Berwik; and in the casteill
He herbryit is, bath fair and weill
And all his gret lordis hym by.
The remanand all comonly
Till herbry in the toun ar gane.
The King has than till consell tane,
That he wald nocht brek doune the wall,
Bot castell, and the toune with-all,
Stuff weill with men and with vittaill
And alkynd othir apparaill
That mycht availl, or yheit mysteir
Till hald castell or toune of wer.

And Walter, Steward of Scotland,
That than wes yhoung and avenand,
And sone-in-law wes to the King,
Had sa gret will and sic yharnyng,
Neirhand the marchis for till be,
At Berwik to yhemsall tuk he;
And resavit of the Kyng the toune,
Bath the castell and the dungeoune.

The king gert men of gret nobillay
Ryde in-till Ingland for till pray,
That broucht out gret plente of fee;
And sum cuntreis trewit he
For vittale, that in gret foysoune
He gert bring smertly to the toune,
Swa that bath toune and castell war
Weill stuffit for ane yheir and mair.
The gude Steward of Scotland then
Send for his frendis and his men,
Quhill he had with him, but archeris,
But burges and botoblesteris,
Fiff hundreth men wicht and worthy,
That armys bar of ancistry.
Johne Crab, a Flemyne, als had he,
That wes of gret subtilite,
Till ordane till mak aparale
For till defend and till assale
Castell of wer or than cite,
That nane slear mycht fundin be.
He gert engynis and trammys ma,
And purvait grec fyre alsua;
Spryngaldis and schotis on seir maneris
That till defend castell afferis,
He purvait in-till full gret wane.
Bot gynis for crakkis had he nane;
For in Scotland yheit than, but wene,
The oys of thame had nocht beyn sene
And quhen the toune apon this wis
Wes stuffit, as I heir devis,
The nobill King his way has tane
And ryddin toward Lowiane.
And Walter Steward, that wes stout,
He left in Berwik with his rout,
And ordanit fast for apparaill
Till defend gif men wald assaill.

Qwhen till the King of Ingland
Wes tald how that, with stalward hand,
Berwik wes tane, and stuffit syne
With men and vittale and armyne,
He wes anoyit gretumly;
And gert assembill hastely
His consale, and has tane to rede
That he his host wald thiddir leid,
And, with all mycht that he mycht get,
To the toune ane assege set,
And gert dik thame so stalwardly,
That, quhill thame likit thair to ly,
Thai suld fer out the traster be.
And gif the men of the cuntre
With strynth of men wald thame assale,
At thair dykis in-to battale,
Thai suld avantage have gretly,
And thouch all suth, for gret foly
War till assaill in-to fechting
At his dikis so stark a thing.
Quhen his consell on this maneir
Wes tane, he gert bath fer and neir
His host haly assemblit be:
A gret folk than with him had he.
Of Lancister the Erll Thomas,
That syne wes sanctit, as men sais,
In-till his cumpany wes thar,
And all the erllis als that war
In Ingland worthy for to ficht,
And baronis als of mekill mycht,
With him to that assege had he:
And gert the schippes by the se
Bring schot and othir apparale,
With gret warnysing of vittale.
To Berwik with all this menyhe,
With his bataillis arayit, come he;
And till gret lordis, ilkane syndri,
Ordanit ane felde for thar herbry.
That men mycht se soyne palyheonis
Be stentit on syndry fassownys,
So feill that thai a toune maid thair
Mair than bath toune and castell war.
On othir half syne, on the se,
The schippis com in sic plente,
With vittale, armyng, and with men,
That all the havyn wes stoppit then.

And quhen thai that war in the toune
Saw thair fais in sic foysoune
By land and se cum sturdely,
Thai, as wicht men and richt worthy
Schupe thame for till defend thar stede,
That thai in aventur of dede
Suld put thame, or than rusche agane
Thar fais; for thair capitane
Tretit thame sa lusumly,
And thar-with-all the mast party
Of thame that armyt with hym wer,
War of his blude and sib him ner,
Or ellis thai war his allye.
Of sic confort men mycht thaim se,
And of sa richt fair contenyng,
As nane of thame had abasing.
On dayis arayit weill war thai,
And on the nycht weill wachit ay.
Weill sex dais thai swa abaid,
That thai na full gret bargane maid.

In-till this tym that I tell here,
That thai withouten bargane wer,
The Inglis-men sa closit had
Thar host with dikis at thai maid,
That thai war strynthit gretumly.
Syne with all handis besaly
Thai schupe thame with thar apparale
Thame of the toune for till assale.
And of our Ladeis evin Mary,
That bare the byrth that all can by,
That men callis hir Nativite,
Soyn in the mornyng men mycht se
The Inglis host arme thame in hy,
And display baneris sturdely;
And assemmyll till thar baneris
With instrumentis on seir maneris,
As scaffaldis, ledderis, and coveryngis,
Pykis, howis, and ek staff-slyngis;
Till ilk lord and his battale
Wes ordanit quhar he suld assale.
And thai within, quhen that thai saw
That menyhe raynge thame swa on raw,
Till thar wardis thai went in hy,
That war stuffit rycht stalwardly
With stanys, schot, and othir thing
That nedit till thair defending:
And in-to sic maner abaid
Thair fais that till assayl thame maid.

Quhen thai without war all redy,
Thai trumpit till ane sawt in hy;
And ilk man with his apparale,
Quhar he suld be, went till assaile.
Till ilk kyrneill that wes thair
Archeris till schute assignit war.
And quhen on this wis thai war boune,
Thai went in hy toward the toune,
And fillit dykis richt hastely,
Syne to the wallis hardely
Thai went with ledderis that thai haid;
Bot thai so gret defens has maid,
That war abovin apon the wall,
That oft ledderis, and men with-all,
Thai gert fall flatlynges to the grounde.
Than men mycht se in litill stound
Men assalyheand richt hardely,
Dressand up ledderis douchtely,
And sum on ledderis pressand war;
Bot thai that on the wall wes thar
Till all perellis can abandoune
Thame, till thair fais war doungyn doune.
At gret myschef defendit thai
Thair toune; for, gif we suth sall say,
The wallis of the toune than wer
Sa law, that a man with a sper
Micht strike ane othir up in the face.
And the schot als so thik thar was
That it wes wonder for till se.
Walter Steward, with a menyhe,
Raid ay about, for to se quhar
That for till help mast myster war:
And quhar men pressit mast, he maid
Succoure till his that myster had.
The mekill folk that wes without
Haid enveronyt the toune about,
Swa that na part of it wes fre.
Thar mycht men the assailyheouris se
Abandoune thame richt hardely;
And the defendouris douchtely
With all thar mychtis can thame payne
Till put thair fais fors agane.

On this wis thame contenit thai
Quhill noyne wes passit of the day.
Than thai that in the schippes war
Ordanit a schip with full gret far
Till cum with all hir apparale
Richt to the wall, for till assale.
Till myd-mast up thair bat thai drew,
With armyt men tharin inew:
A brig thai had for till lat fall
Richt fra the bat apon the wall.
With bargis by hir can thai row,
And pressit thame full fast to tow
Hir by the brighous to the wall:
On that entent thai set thame all.
Thai broucht hir quhill scho com weill neir:
Than mycht men se on seir maner
Sum men defend, and sum assale
Full besaly with gret travale.
Thai of the toune so weill thame bare,
That the schipmen sa handillit war,
That thai the schip on na maner
Mycht ger cum till the wall so neir,
That thar fall-brig mycht reik thar-till,
So lang abaid thai fechtand still
Quhill that scho ebbit on the ground;
Than mycht men, in a litill stound,
Se thame be fer of war covyne
Than thai war eir, that war hir in.
And quhen the se wes ebbit sa,
That men all dry till hir mycht ga,
Out of the toune yschit in hy
Till hir a weill gret cumpany,
And fyre till hir has kendlyt soyne:
In-till schort tyme swa haf thai done,
That thai in fyre has gert hir bryn.
And sum war slayn that war hir in,
And sum fled and away are gane.
Ane engynour thair haf thai tane,
That sleast wes of that mister
That men wist outhir fer or ner;
In-to the toun syne enterit thai.
It fell thame happely, perfay,
That thai gat in so hastely;
For thar come a gret cumpany
In full gret hy up by the se,
Quhen thai the schip saw byrnand be.
Bot or thai com, the tothir war past,
The yhet thai barrit and closit fast.
That folk assalyheit fast that day,
And thai within defendit ay
On sic a wis, that thai that war
With gret enfors assalyheand thar
Mycht do thar will on na maner.
And quhen that evynsang-tym wes neir,
The folk without, that wer wery,
And sum woundit full cruelly,
Saw thame within defend thaim swa;
And saw it wes nocht eyth till ta
The toune, with sic defens wes maid
By thaim, that it in stering had.
The host saw that thar schip wes brynt,
And of thame that thar-in war tynt,
And thar folk woundit and wery;
Thai gert blaw the retret in hy.
Fra the schipmen reboytit war,
Thai let the tothir assale no mar;
For throu the schip thai wend ilkane
That thai the toune weill suld haf tane.
Men sais that ma schippis than swa
Pressit that tyme the toune till ta;
Bot for that thar wes brynt bot ane,
And the gynour tharin wes tane.
Now heir tharfor mencione maid I
Bot off a schip all anerly.

Qwhen thai had blawen the ratret,
Thai folk, that tholit had panys gret,
Withdrew thame haly fra the wall;
The assalt haf thai levit all.
And thai within, that wery war,
And mony of thame woundit sar,
War blith and glad quhen at thai saw
Thair fais swagat thame withdraw.
And, fra thai wist suthly that thai
Held to thair palyheonys thair way,
Thai set gud wachis to thar wall;
Syne to thar innys went thai all,
And esyt thame that wery war.
And othir, that war woundit sar,
Had lechis gude forsuth, I hicht,
That helpit thame as thai best mycht.
On athir syde wery war thai;
That nycht thai did no mair perfay.
Fiff dayis thar-eftir thai war still,
That nane till othir did mekill ill.

Now leiff we thir folk heir liand
All still, as I haf borne on hand,
And turn the cours of our carpyng
Till Schir Robert the douchty King,
That assemblit bath fer and neir,
Ane host, quhen that he wist, but weir,
That the king swa of Ingland
Had assegit with stalward hand
Berwik, quhar Walter Steward was.
Till purpos with his men he tais,
That he wald nocht sa soyne assale
The King of Ingland with battale,
And at his dykis specially,
For it mycht weill turn to foly.
Tharfor he ordanit lordis twa,
The Erll of Murreff wes ane of tha,
The tothir wes the Lord Dowglas,
With fyftene thousand men to pas
In Ingland, for till burn and sla,
And swa gret ryot thar till ma,
That thai that lay segande the toune,
Quhen thai herd the distructione,
That thai suld in-till Ingland ma,
Suld be sa dredand, and sa wa
For thair childir and for thair wiffis,
That thai suld dreid suld leis thar liffis,
And thar gudis alsua, that thai
Suld dreid than suld be had away,
That thai suld leif the sege in hy,
And wend to reskew hastely
Thair gude, thair frendis, and thair land.
Tharfor, as I haf borne on hand,
Thir lordis send he furth in hy;
And thai thair way tuk hastely,
And in Ingland gert byrn and sla,
And wroucht tharin so mekill wa
As thai forrayit the cuntre,
That it wes pite for to se
Till thame that wald it ony gude,
For thai distroyit all as thai yhude.
So lang thai raid distroyande swa,
As thai traversit to and fra,
That thai ar cummyne till Repoune,
And distroyit haly that toune.
At Burrow-brig syne thar herbry
Thai tuk, and at Mytoun thar-by.

And quhen the men of that cuntre
Saw thar land sa distroyit be,
Thai gaderit, in-till full gret hy,
Archeris, burges, with yhemenry,
Prestis, clerkis, monkis, and freris,
Husbandis, and men of all mysteris,
Quhill at thai sammyn assemmyllit war
Weill tuenty thousand men and mair.
Richt gud armyng eneuch thai had.
The archbischop of York thai maid
Thair capitane; and to consale
Has tane, that thai in playn battale
Wald assale the Scottis men,
That fer fewar than thai war then.
Than he displayit his baneir,
And othir bischoppes, that thar wer,
Gert display baneris alsua.
All in a rout furth can thai ga
Toward Mytoune the reddy way;
And quhen that Scottis men herd say
That thai war till thame cumand neir,
Thai buskit thame on thar best maneir,
And delit thame in-till battellis twa.
Dowglas the vaward he can ma;
The reirward maid the Erll Thomas,
For chiftane of the host he was.
And, sua ordanit in gude aray,
Toward thair fais thai held their way.
Quhen athir had of othir sicht,
Thai pressit on bath halfis to ficht.
The Inglis men com on sadly
With gud contenans and hardy,
Rycht in a frount with a baner,
Quhill thai thair fayis com so neir,
That thai thar visage weill mycht se.
Thre sper-lynth, I trow weill, mycht be
Betuix thame, quhen sic abasing
Tuk thame, but mar, in-to a swyng,
Thai gaf the bak all, and to-ga.
Quhen Scottis men has seyn thame swa
Affrayitly fle all thar way,
In gret hy apon thame schot thai,
And slew and tuk a gret party.
The laiff fled full effrayitly
As thai best mycht, to seik warrand.
Thai war chassit so neir at hand,
That weill ane thousand deit thar;
And of thaim yheit thre hundreth war
Prestis, that deit in-to that chas.
Tharfor that bargane callit was
“The Chaptour of Mytoune;” for thare
Slayn sa mony prestis ware.

Qwhen thir folk thus discumfit was,
And Scottis men had left the chas,
Thai went thame furthwarde in the land
Slayand, distroyand, and byrnand,
And thai that at the sege lay,
Or it wes passit the fift day,
Had made thame syndry apparale
To gang eftsonis till assale.
Of gret gestis ane Sow thai maid,
That stalward heling owth it had,
With armyt men enew thar-in,
And instrumentis als for to myne.
Syndry scaffaldis thai maid with-all,
That war weill hyar than the wall,
And ordanit als that by the se
The toune suld weill assalyheit be.
And thai within, that saw thame swa
So gret apparale schap till ma,
Throu Crabbis consale, that wes sle,
Ane cren thai haif gert dres up hey
Rynand on quhelis, that thai mycht bring
It quhar neid war of mast helping.
And pik and ter als haf thai tane,
And lynt and hardis with brynstane,
And dry treis that weill wald brin;
And mellit syne athir othir in:
And gret flaggatis tharof thai maid,
Gyrdit with irne bandis braid.
Of thai flaggatis mycht mesurit be
Till a gret tunnys quantite.
Thai flaggatis byrnand in a baill
With thair cren thoucht thai till availl.
And gif the Sow come to the wall,
Till lat thame byrnand on hir fall,
And with ane stark cheyne hald thame thar
Quhill all war brint up that thar war.
Engynys alsua for till cast
Thai ordanit, and maid redy fast,
And set ilk man syne till his ward.
And Schir Walter, the gude Steward,
With armyt men suld ryde about,
And se quhar at thar war mast dout;
And succur thar with his menyhe.
And quhen thai in-to sic degre
Had maid thame for thair asaling,
On the Rude-evyn, in the dawing,
The Inglis host blew till assale.
Than mycht men with ser apparale
Se that gret host cum sturdely;
The toune enveremyt thai in hy,
And assalit with sa gud will,
For all thair mycht thai set thar-till,
That thai thame pressit fast of the toune.
Bot thai, that can thame abandoune
Till ded, or than till woundis sare,
Sa weill has thame defendit thare,
That ledderis to the ground thai flang,
And with stanys so fast thai dang
Thair fais, that feill thai left lyand,
Sum ded, sum hurt, and sum swonand.

Bot thai that held on fut in hy
Drew thame away deliverly,
And skunnyrrit tharfor na-kyn thing,
Bot went stoutly till assalyng.
And thai abovin defendit ay,
And set thame till so harde assay,
Quhill that feill of thame woundit war:
And thai so gret defens maid thar,
That thai styntit thair fais mycht.
Apon sic maner can thai ficht,
Quhill it wes neir noyne of the day;
Than thai without, in gret aray,
Pressit thair Sow toward the wall;
And thai within weill soyne gert call
The engynour that takyne was,
And gret manans till him mais;
And swoir that he suld de, bot he
Provit on the Sow sic sutelte,
That he to-fruschyt hir ilke deill.
And he, that has persavit weill
That the dede wes weill neir hym till,
Bot gif he mycht fulfill thar will,
Thoucht that he all his mycht wald do;
Bendit in gret hy than wes scho,
And till the Sow wes evin set.
In hye he gert draw the cleket,
And smertly swappit out the stane
That evyn out-our the Sow is gane,
And behynd hir a litill we
It fell, and than thai cryit hey
That war in hir, “Furth to the wall.
“For dreidles it is ouris all!”
The engynour that deliverly
Gert bend the gyne in full gret hy,
And the stane smertly swappit out:
It flaw out, quhedirand, with a rout,
And fell richt evin befor the Sow.
Thair hertis than begouth till grow;
Bot yheit than, with thair mychtis all,
Thai pressit the Sow toward the wall,
And has hir set thar-to juntly.
The gynour than gert bend in hy
The gyne, and wappyt out the stane,
That evin toward the lift is gane,
And with gret wecht syne duschit doune
Richt by the wall, in a randoune,
And hyt the Sow in sic maner,
That it, that wes the mast summer
And starkast for till stynt a strak,
In-sundir with that dusche he brak.
The men ran out in full gret hy,
And on the wallis thai can cry,
That thair Sow ferryit wes thair.
Johne Crab, that had his geir all yhar,
In his fagattis has set the fyre,
And our the wall syne can thame vyre,
And brynt the Sow till brandis bair.
With all this, fast assalyheand war
The folk without with felloune ficht,
And thai within with mekill mycht
Defendit manfully thar stede,
In-till gret aventur of dede.

The schipmen, with gret apparale,
Com with thair schippes till assale,
With top-castellis warnist weill,
And wicht men armyt in-till steill.
Thair batis up apon thair mastis
Drawyn weill hye and festnyt fast is,
And pressit with that gret atour
Toward the wall, bot the gynour
Hit in ane espyne with a stayne,
And the men that war thar-in gane,
Sum dede, sum dosnyt, come doun wyndland.
Fra thine-furth durst nane tak on hand
With schippes pres thame to the wall.
Bot the laiff war assalyheand all
On ilka syde sa egyrly,
That certis it wes gret ferly,
That thai folk sic defens has maid,
For the gret myscheif that they had.
For thair wallis so law than weir,
That a man richt weill with a sper
Micht strik ane othir up in the face,
As eir befor tald till yhow was.
And feill of thame war woundit sare,
And the layf so fast travaland war,
That nane had tume rest for till ta,
Thair adversouris assailyheit swa.

Thai war within sa stratly stad
That thar wardane, that with him had
Ane hundreth men in cumpany
Armyt, that wicht war and hardy,
And raid about for till se quhar
That his folk hardest pressit war,
To relief thame that had mister,
Com syndry tymes in placis ser
Quhar sum of the defensouris war
All dede, and othir woundit sare;
Swa that he of his cumpany
Behufit to leiff thair party:
Swa that, be he a cours had maid
About, of all the men he had
Thar wes levit with him bot ane,
That he ne had thame left ilkane
To releve quhar he saw mister.
And the folk, that assalyheand wer
At Mary-yhet, to-hewyn had
The barras, and a fyre had maid
At the draw-brig, and brynt it doune;
And war thringand in gret foysoune
Rycht to the yhet ane fyre till ma.
Than thai within gert smertly ga
Ane to the wardane, for till say
How thai war set in hard assay.
And quhen Schir Walter Steward herd
How men sa stratly with thame ferd,
He gert cum of the castell then
All that war thar of armyt men,
For thar that day assalyheit nane,
And with that rout in hy is gane
To Mary-yhet, and till the wall
Is went, and saw the myscheif all:
And umbethoucht him suddandly
Bot gif gret help war set in hy
Thar-to, thai suld burne up the yhet
That fra the wall thai suld nocht let.
Tharfor apon gret hardyment
He suddanly set his entent;
And gert all wyde set up the yhet,
And the fyre that he fand thar-at
With strinth of men he put away.
He set him in full hard assay;
For thai that war assalyheand thar
Pressit on hym with wapnys bair,
And he defendit with all his mycht.
Thar mycht men se a felloune sicht,
With staffing, stoking, and striking.
Thar maid thai sturdy defending;
For with gret strynth of men the yhet
Thai defendit, and stude thar-at,
Magre thair fais, quhill the nycht
Gert thame on bath halfis leif the ficht.

Thai of the host, quhen nycht can fall,
Fra the assalt with-drew thame all,
Woundit, and wery, and forbeft.
With mate cher the assalt thai left,
And till thar innys went in hy
And set thar wachis hastely.
The laif thame esit as thai mycht best;
For thai had gret myster of rest.
That nycht thai spak al comonly
Of thame within, and had ferly
That thai sa stout defens has maid
Agane the gret assalt thai had.
And thai within, on othir party,
Quhen thai thair fayis so halely
Saw thame withdraw, thai war all blith,
And wachis has ordanit swith;
And syne ar till thar innys gane.
Thar wes bot few of thame wes slaine,
Bot feill war woundit wikidly,
The laiff our mesur war wery.
It wes ane hard assalt, perfay,
And certis, I hard nevir say
Quhar quheyn men mair defens had maid,
That swa richt hard assalyheing had.
And of a thing that thair befell
I haf ferly, that I of tell;
That is, that in-till all that day,
Quhen all thair mast assalyheit thai,
And the schot thikkest wes with-all,
Women with child and childir small
In arme-fullis gaderit up, and bair
Till thame that on the wallis war
Arowes, and nocht ane slayne wes thar,
Na yheit woundit; and that wes mar
The myrakill of God Almychty,
And to nocht ellis it set can I.

On athir syde that nycht thai war
All still, and on the morne, but mar,
Thar come tithandis out of Ingland,
Till thame of the host, that bare on hand
How that by Borrow-brig and Mytoune
Thair men war slayne and dungin doune;
And at Scottis-men throu-out the land
Raid yheit byrnand and distroyand.
And quhen the King has herd this taill,
His consell he assemblit haill,
Till se quhethir farar war him till
Till ly about the toune all still,
And assaill quhill it wonnyne war,
Or than in Ingland for till fare
And reskew his land and men.
His consell fast discordit then;
For Southren men wald that he maid
Arest thar, quhill he wonnyn had
The toune and the castell alsua.
Bot Northir men wald no-thing swa,
That dred thar friendis for till tyne,
And mast part of thar gudis syne
Throu Scottis mennys cruelte;
Thai wald he leit the sege be
And raid for till reskew the land.
Of Longcastell, I tak on hand,
The Erll Thomas wes ane of thai
That consalit the King hame to ga.
And, for that mair enclynit he
Till the folk of the south cuntre
Than till the northir mennys will,
He tuk it to sa mekill ill
That he gert turs his geir in hy,
And with his batall halely,
That of the host neir thrid part was,
Till Ingland hame his way he tais.
But leiff he hame has tane his gat:
Tharfor fell eftir sic debat
Betuix him and the King, that ay
Lestit quhill Androu Herdclay,
That throu the King wes on him set,
Tuk hym syne in-to Pomfret,
And on the hill besyde the toune
Strake of his hede but ransoune;
Tharfor syne drawin and hangit wes he,
And with him weill a fair menyhe.
Men said syne eftir, this Thomas,
That on this wis maid martir was,
Was sanctit and myraclis did,
Bot envy syne gert thame be hid.
Bot quhethir he haly wes or nane,
At Pomfret thusgat was he slane.
And syne the King of Ingland,
Quhen that he saw hym tak on hand
Till pass his way sa oppinly,
Hym thoucht it wes perell to ly
Thar with the laiff of his menyhe;
And his harnas tursit has he
And in-till Ingland hame can far.
The Scottis men, that distroyand war
In Ingland, herd soyne tell tithyng
Of this gret sege the departing.
Tharfor thai tuk westward the way,
And by Carlele hame went ar thai
With prayis and with presoneris,
And othir gudis on seir maneris.
The lordis till the King ar gane,
And the laiff has thar wayis tane;
Ilk man till his repair is gane.
The King, iwis, was woundir fayne
That thai war cummyn haile and feir,
And at thai sped on sic maner,
That thai thair fais discumfit had,
And, but tynsale of men, had maid
Reskowris to thame that in Berwik
War assegit richt till thar dik.
And quhen the Kyng had sperit tithand
How thai had faryne in-till Ingland,
And thai haf tald hym all thar fair,
How Inglis men discumfit war,
Richt blith in-till his hert wes he,
And maid thame fest with gammyn and gle.

Berwik wes on this maner
Reskewit, and thai that thar-in wer.
He wes worthy ane prince till be,
Throu manheid and subtilite,
That couth throu wit sa hye a thyng,
But tynsale, bryng till gude ending.
Till Berwik syne the way he tais:
And quhen he herd thar how it was
Defendit swa richt apertly,
He lovit thame that war thar gretly.
Walter Stewardis gret bounte
Atour the laif commendit he,
For the richt gret defens he maid
At the yhet, quhar men brynt had
The brig, as yhe herd me devis.
And certis he wes weill till pris,
That sa stoutly with playne fecthing
At oppyn yhet maid defending.
Mycht he haf lifit quhill he had beyne
Of perfit elde, withouten weyne,
His renoune suld haf strekit fer.
Bot dede, that wachis ay to mar
With all hyr mycht waik and worthy,
Had at his worschip gret invy;
That in the flour of his yhoutheid
Scho endit all his douchty deid,
As I sall tell yhow forthirmar.
Quhen the King had a quhill beyne thar
He send for masonis fer and neir,
That sleast wes of that misteir,
And gert weill ten fute hye the wall
About Berwikis toune our all.
And syne soyne toward Lowdyane
With his menyhe his gat has gane;
And syne he gert ordane in hy
Bath armyt men and yhemanry
In-till Irland in hy till fair
Till help his brothir that wes thair.