Lines 125–246

Scean scir werod, scyldas lixton,
gesawon randwigan rihte stræte,
segn ofer sweoton, oðþæt sæfæsten
landes æt ende leodmægne forstod,
fus on forðweg. Fyrdwic aras;
wyrpton hie werige, wiste genægdon
modige meteþegnas, hyra mægen beton.
Bræddon æfter beorgum, siððan byme sang,
flotan feldhusum. þa wæs feorðe wic,
randwigena ræst, be þan readan sæ.
ðær on fyrd hyra færspell becwom,
oht inlende. Egsan stodan,
wælgryre weroda; wræcmon gebad
laðne lastweard, se ðe him lange ær
eðelleasum onnied gescraf,
wean witum fæst. Wære ne gymdon,
ðeah þe se yldra cyning ær ge...
þa wearð yrfeweard ingefolca,
manna æfter maðmum, þæt he swa miceles geðah.
Ealles þæs forgeton siððan grame wurdon
Egypta cyn ymbe antwig;
ða heo his mægwinum morðor fremedon,
wroht berenedon, wære fræton.
Wæron heaðowylmas heortan getenge,
mihtmod wera; manum treowum
woldon hie þæt feorhlean facne gyldan,
þætte hie þæt dægweorc dreore gebohte,
Moyses leode, þær him mihtig god
on ðam spildsiðe spede forgefe.
þa him eorla mod ortrywe wearð
siððan hie gesawon of suðwegum
fyrd Faraonis forð ongangan,
oferholt wegan, eored lixan,
(garas trymedon, guð hwearfode,
blicon bordhreoðan, byman sungon),
þufas þunian, þeod mearc tredan,
on hwæl
Hreopon herefugolas, hilde grædige,
deawigfeðere ofer drihtneum,
wonn wælceasega. Wulfas sungon
atol æfenleoð ætes on wenan,
carleasan deor, cwyldrof beodan
on laðra last leodmægnes fyl.
Hreopon mearcweardas middum nihtum,
fleah fæge gast, folc wæs gehæged.
Hwilum of þam werode wlance þegnas
mæton milpaðas meara bogum.
Him þær segncyning wið þone segn foran,
manna þengel, mearcþreate rad;
guðweard gumena grimhelm gespeon,
cyning cinberge, (cumbol lixton),
wiges on wenum, wælhlencan sceoc,
het his hereciste healdan georne
fæst fyrdgetrum. Freond onsegon
laðum eagan landmanna cyme.
Ymb hine wægon wigend unforhte,
hare heorowulfas hilde gretton,
þurstige þræcwiges, þeodenholde.
Hæfde him alesen leoda dugeðe
tireadigra twa þusendo,
þæt wæron cyningas and cneowmagas,
on þæt eade riht, æðelum deore.
Forðon anra gehwilc ut alædde
wæpnedcynnes, wigan æghwilcne
þara þe he on ðam fyrste findan mihte.
Wæron ingemen ealle ætgædere,
cyningas on corðre. Cuð oft gebad
horn on heape to hwæs hægstealdmen,
guðþreat gumena, gearwe bæron.
Swa þær eorp werod, ecan læddon,
lað æfter laðum, leodmægnes worn,
þusendmælum; þider wæron fuse.
Hæfdon hie gemynted to þam mægenheapum
to þam ærdæge Israhela cynn
billum abreotan on hyra broðorgyld.
Forþon wæs in wicum wop up ahafen,
atol æfenleoð, egesan stodon,
weredon wælnet, þa se woma cwom.
Flugon frecne spel, feond wæs anmod,
werud wæs wigblac, oðþæt wlance forsceaf
mihtig engel, se ða menigeo beheold,
þæt þær gelaðe mid him leng ne mihton
geseon tosomne; sið wæs gedæled.
Hæfde nydfara nihtlangne fyrst,
þeah ðe him on healfa gehwam hettend seomedon,
mægen oððe merestream; nahton maran hwyrft.
Wæron orwenan eðelrihtes,
sæton æfter beorgum in blacum reafum,
wean on wenum; wæccende bad
eall seo sibgedriht somod ætgædere
maran mægenes, oð Moyses bebead
eorlas on uhttid ærnum bemum
folc somnigean, frecan arisan,
habban heora hlencan, hycgan on ellen,
beran beorht searo, beacnum cigean
sweot sande near. Snelle gemundon
weardas wigleoð, werod wæs gefysed,
brudon ofer burgum, (byman gehyrdon),
flotan feldhusum, fyrd wæs on ofste.
Siððan hie getealdon wið þam teonhete
on þam forðherge feðan twelfe
moderofra; mægen wæs onhrered.
Wæs on anra gehwam æðelan cynnes
alesen under lindum leoda duguðe
on folcgetæl fiftig cista;
hæfde cista gehwilc cuðes werodes
garberendra, guðfremmendra,
X hund geteled, tireadigra.
þæt wæs wiglic werod; wace ne gretton
in þæt rincgetæl ræswan herges,
þa þe for geoguðe gyt ne mihton
under bordhreoðan breostnet wera
wið flane feond folmum werigean,
ne him bealubenne gebiden hæfdon
ofer linde lærig, licwunde swor,
gylpplegan gares. Gamele ne moston,
hare heaðorincas, hilde onþeon,
gif him modheapum mægen swiðrade,
ac hie be wæstmum on wig curon,
hu in leodscipe læstan wolde
mod mid aran, eac þan mægnes cræft,
garbeames feng.