Lines 247–368

þa wæs handrofra here ætgædere,
fus forðwegas. Fana up gerad,
beama beorhtost; bidon ealle þa gen
hwonne siðboda sæstreamum neah
leoht ofer lindum lyftedoras bræc.
Ahleop þa for hæleðum hildecalla,
bald beohata, bord up ahof,
heht þa folctogan fyrde gestillan,
þenden modiges meðel monige gehyrdon.
Wolde reordigean rices hyrde
ofer hereciste halgan stefne,
werodes wisa wurðmyndum spræc:
"Ne beoð ge þy forhtran, þeah þe Faraon brohte
sweordwigendra side hergas,
eorla unrim! Him eallum wile
mihtig drihten þurh mine hand
to dæge þissum dædlean gyfan,
þæt hie lifigende leng ne moton
ægnian mid yrmðum Israhela cyn.
Ne willað eow andrædan deade feðan,
fæge ferhðlocan, fyrst is æt ende
lænes lifes. Eow is lar godes
abroden of breostum. Ic on beteran ræd,
þæt ge gewurðien wuldres aldor,
and eow liffrean lissa bidde,
sigora gesynto, þær ge siðien.
þis is se ecea Abrahames god,
frumsceafta frea, se ðas fyrd wereð,
modig and mægenrof, mid þære miclan hand."
Hof ða for hergum hlude stefne
lifigendra leod, þa he to leodum spræc:
"Hwæt, ge nu eagum to on lociað,
folca leofost, færwundra sum,
hu ic sylfa sloh and þeos swiðre hand
grene tacne garsecges deop.
Yð up færeð, ofstum wyrceð
wæter wealfæsten. Wegas syndon dryge,
haswe herestræta, holm gerymed,
ealde staðolas, þa ic ær ne gefrægn
ofer middangeard men geferan,
fage feldas, þa forð heonon
in ece tid yðe þeahton,
sælde sægrundas. Suðwind fornam
bæðweges blæst, brim is areafod,
sand sæcir spaw. Ic wat soð gere
þæt eow mihtig god miltse gecyðde,
eorlas ærglade. Ofest is selost
þæt ge of feonda fæðme weorðen,
nu se agend up arærde
reade streamas in randgebeorh.
Syndon þa foreweallas fægre gestepte,
wrætlicu wægfaru, oð wolcna hrof."
æfter þam wordum werod eall aras,
modigra mægen. Mere stille bad.
Hofon herecyste hwite linde,
segnas on sande. Sæweall astah,
uplang gestod wið Israhelum
andægne fyrst. Wæs seo eorla gedriht
anes modes,
fæstum fæðmum freoðowære heold.
Nalles hige gehyrdon haliges lare,
siððan leofes leoþ læste near
sweg swiðrode and sances bland.
þa þæt feorðe cyn fyrmest eode,
wod on wægstream, wigan on heape,
ofer grenne grund, Iudisc feða
on orette on uncuð gelad
for his mægwinum. Swa him mihtig god
þæs dægweorces deop lean forgeald,
siððan him gesælde sigorworca hreð,
þæt he ealdordom agan sceolde
ofer cynericu, cneowmaga blæd.
Hæfdon him to segne, þa hie on sund stigon,
ofer bordhreoðan beacen aræred
in þam garheape, gyldenne leon,
drihtfolca mæst, deora cenost.
Be þam herewisan hynðo ne woldon
be him lifigendum lange þolian,
þonne hie to guðe garwudu rærdon
ðeoda ænigre. þracu wæs on ore,
heard handplega, hægsteald modige
wæpna wælslihtes, wigend unforhte,
bilswaðu blodige, beadumægnes ræs,
grimhelma gegrind, þær Iudas for.
æfter þære fyrde flota modgade,
Rubenes sunu. Randas bæron
sæwicingas ofer sealtne mersc,
manna menio; micel angetrum
eode unforht. He his ealdordom
synnum aswefede, þæt he siðor for
on leofes last. Him on leodsceare
frumbearnes riht freobroðor oðþah,
ead and æðelo; he wæs gearu swa þeah.
þær forð æfter him folca þryðum
sunu Simeones sweotum comon;
þridde þeodmægen (þufas wundon
ofer garfare) guðcyste onþrang
deawig sceaftum. Dægwoma becwom
ofer garsecge, godes beacna sum,
morgen mæretorht; mægen forð gewat.
þa þær folcmægen for æfter oðrum,
isernhergum. An wisode
mægenþrymmum mæst, þy he mære wearð,
on forðwegas folc æfter wolcnum,
cynn æfter cynne. Cuðe æghwilc
mægburga riht, swa him Moises bead,
eorla æðelo. Him wæs an fæder,
leof leodfruma, landriht geþah,
frod on ferhðe, freomagum leof.
Cende cneowsibbe cenra manna
heahfædera sum, halige þeode,
Israela cyn, onriht godes,
swa þæt orþancum ealde reccað
þa þe mægburge mæst gefrunon,
frumcyn feora, fæderæðelo gehwæs.
Niwe flodas Noe oferlað,
þrymfæst þeoden, mid his þrim sunum,
þone deopestan drencefloda
þara ðe gewurde on woruldrice.
Hæfde him on hreðre halige treowa;
forþon he gelædde ofer lagustreamas
maðmhorda mæst, mine gefræge.