Lines 369–515

On feorhgebeorh foldan hæfde
eallum eorðcynne ece lafe,
frumcneow gehwæs, fæder and moder
tuddorteondra, geteled rime
mismicelra þonne men cunnon,
snottor sæleoda. Eac þon sæda gehwilc
on bearm scipes beornas feredon,
þara þe under heofonum hæleð bryttigað.
Swa þæt wise men wordum secgað
þæt from Noe nigoða wære
fæder Abrahames on folctale.
þæt is se Abraham se him engla god
naman niwan asceop; eac þon neah and feor
halige heapas in gehyld bebead,
werþeoda geweald; he on wræce lifde.
Siððan he gelædde leofost feora
haliges hæsum; heahlond stigon
sibgemagas, on Seone beorh.
Wære hie þær fundon, wuldor gesawon,
halige heahtreowe, swa hæleð gefrunon.
þær eft se snottra sunu Dauides,
wuldorfæst cyning, witgan larum
getimbrede tempel gode,
alh haligne, eorðcyninga
se wisesta on woruldrice,
heahst and haligost, hæleðum gefrægost,
mæst and mærost, þara þe manna bearn,
fira æfter foldan, folmum geworhte.
To þam meðelstede magan gelædde
Abraham Isaac. Adfyr onbran;
fyrst ferhðbana no þy fægenra wæs.
Wolde þone lastweard lige gesyllan,
in bælblyse beorna selost,
his swæsne sunu to sigetibre,
angan ofer eorðan yrfelafe,
feores frofre, ða he swa forð gebad,
leodum to lafe, langsumne hiht.
He þæt gecyðde, þa he þone cniht genam
fæste mid folmum, folccuð geteag
ealde lafe, (ecg grymetode),
þæt he him lifdagas leofran ne wisse
þonne he hyrde heofoncyninge.
Up aræmde Abraham þa;
se eorl wolde slean eaferan sinne
unweaxenne, ecgum reodan
magan mid mece, gif hine metod lete.
Ne wolde him beorht fæder bearn ætniman,
halig tiber, ac mid handa befeng.
þa him styran cwom stefn of heofonum,
wuldres hleoðor, word æfter spræc:
"Ne sleh þu, Abraham, þin agen bearn,
sunu mid sweorde! Soð is gecyðed,
nu þin cunnode cyning alwihta,
þæt þu wið waldend wære heolde,
fæste treowe, seo þe freoðo sceal
in lifdagum lengest weorðan,
awa to aldre unswiciendo.
Hu þearf mannes sunu maran treowe?
Ne behwylfan mæg heofon and eorðe
his wuldres word, widdra and siddra
þonne befæðman mæge foldan sceattas,
eorðan ymbhwyrft and uprodor,
garsecges gin and þeos geomre lyft.
He að swereð, engla þeoden,
wyrda waldend and wereda god,
soðfæst sigora, þurh his sylfes lif,
þæt þines cynnes and cneowmaga,
randwiggendra, rim ne cunnon,
yldo ofer eorðan, ealle cræfte
to gesecgenne soðum wordum,
nymðe hwylc þæs snottor in sefan weorðe
þæt he ana mæge ealle geriman
stanas on eorðan, steorran on heofonum,
sæbeorga sand, sealte yða;
ac hie gesittað be sæm tweonum
oð Egipte incaðeode
land Cananea, leode þine,
freobearn fæder, folca selost."
Folc wæs afæred, flodegsa becwom
gastas geomre, geofon deaðe hweop.
Wæron beorhhliðu blode bestemed,
holm heolfre spaw, hream wæs on yðum,
wæter wæpna ful, wælmist astah.
Wæron Egypte eft oncyrde,
flugon forhtigende, fær ongeton,
woldon herebleaðe hamas findan,
gylp wearð gnornra. Him ongen genap
atol yða gewealc, ne ðær ænig becwom
herges to hame, ac behindan beleac
wyrd mid wæge. þær ær wegas lagon,
mere modgode, mægen wæs adrenced.
Streamas stodon, storm up gewat
heah to heofonum, herewopa mæst.
Laðe cyrmdon, (lyft up geswearc),
fægum stæfnum, flod blod gewod.
Randbyrig wæron rofene, rodor swipode
meredeaða mæst, modige swulton,
cyningas on corðre, cyre swiðrode
sæs æt ende. Wigbord scinon
heah ofer hæleðum, holmweall astah,
merestream modig. Mægen wæs on cwealme
fæste gefeterod, forðganges weg
searwum æsæled, sand basnodon,
witodre fyrde, hwonne waðema stream,
sincalda sæ, sealtum yðum
æflastum gewuna ece staðulas,
nacud nydboda, neosan come,
fah feðegast, se ðe feondum geneop.
Wæs seo hæwene lyft heolfre geblanden,
brim berstende blodegesan hweop,
sæmanna sið, oðþæt soð metod
þurh Moyses hand modge rymde,
wide wæðde, wælfæðmum sweop.
Flod famgode, fæge crungon,
lagu land gefeol, lyft wæs onhrered,
wicon weallfæsten, wægas burston,
multon meretorras, þa se mihtiga sloh
mid halige hand, heofonrices weard,
on werbeamas. Wlance ðeode
ne mihton forhabban helpendra pað,
merestreames mod, ac he manegum gesceod
gyllende gryre. Garsecg wedde,
up ateah, on sleap. Egesan stodon,
weollon wælbenna. Witrod gefeol
heah of heofonum handweorc godes,
famigbosma flodwearde sloh,
unhleowan wæg, alde mece,
þæt ðy deaðdrepe drihte swæfon,
synfullra sweot. Sawlum lunnon
fæste befarene, flodblac here,
siððan hie on bugon brun yppinge,
modewæga mæst. Mægen eall gedreas
ða gedrencte wæron dugoð Egypta,
Faraon mid his folcum. He onfond hraðe,
siððan grund gestah godes andsaca,
þæt wæs mihtigra mereflodes weard;
wolde heorufæðmum hilde gesceadan,
yrre and egesfull. Egyptum wearð
þæs dægweorces deop lean gesceod,
forðam þæs heriges ham eft ne com
ealles ungrundes ænig to lafe,
þætte sið heora secgan moste,
bodigean æfter burgum bealospella mæst,
hordwearda hryre, hæleða cwenum,
ac þa mægenþreatas meredeað geswealh,
spelbodan eac. Se ðe sped ahte,
ageat gylp wera. Hie wið god wunnon!