Lines 516–590

þanon Israhelum ece rædas
on merehwearfe Moyses sægde,
heahþungen wer, halige spræce,
deop ærende. Dægword nemnað
swa gyt werðeode, on gewritum findað
doma gehwilcne, þara ðe him drihten bebead
on þam siðfate soðum wordum,
gif onlucan wile lifes wealhstod,
beorht in breostum, banhuses weard,
ginfæsten god gastes cægon.
Run bið gerecenod, ræd forð gæð,
hafað wislicu word on fæðme,
wile meagollice modum tæcan
þæt we gesne ne syn godes þeodscipes,
metodes miltsa. He us ma onlyhð,
nu us boceras beteran secgað
lengran lifwynna. þis is læne dream,
wommum awyrged, wreccum alyfed,
earmra anbid. Eðellease
þysne gystsele gihðum healdað,
murnað on mode, manhus witon
fæst under foldan, þær bið fyr and wyrm,
open ece scræf. Yfela gehwylces
swa nu regnþeofas rice dælað,
yldo oððe ærdeað. Eftwyrd cymð,
mægenþrymma mæst ofer middangeard,
dæg dædum fah. Drihten sylfa
on þam meðelstede manegum demeð,
þonne he soðfæstra sawla lædeð,
eadige gastas, on uprodor,
þær is leoht and lif, eac þon lissa blæd;
dugoð on dreame drihten herigað,
weroda wuldorcyning, to widan feore.
Swa reordode ræda gemyndig
manna mildost, mihtum swiðed,
hludan stefne; here stille bad
witodes willan, wundor ongeton,
modiges muðhæl; he to mænegum spræc:
"Micel is þeos menigeo, mægenwisa trum,
fullesta mæst, se ðas fare lædeð;
hafað us on Cananea cyn gelyfed
burh and beagas, brade rice;
wile nu gelæstan þæt he lange gehet
mid aðsware, engla drihten,
in fyrndagum fæderyncynne,
gif ge gehealdað halige lare,
þæt ge feonda gehwone forð ofergangað,
gesittað sigerice be sæm tweonum,
beorselas beorna. Bið eower blæd micel!"
æfter þam wordum werod wæs on salum,
sungon sigebyman, (segnas stodon),
on fægerne sweg; folc wæs on lande,
hæfde wuldres beam werud gelæded,
halige heapas, on hild godes.
Life gefegon þa hie oðlæded hæfdon
feorh of feonda dome, þeah ðe hie hit frecne geneðdon,
weras under wætera hrofas. Gesawon hie þær weallas standan,
ealle him brimu blodige þuhton, þurh þa heora beadosearo wægon.
Hreðdon hildespelle, siððan hie þam herge wiðforon;
hofon hereþreatas hlude stefne,
for þam dædweorce drihten heredon,
weras wuldres sang; wif on oðrum,
folcsweota mæst, fyrdleoð golan
aclum stefnum, eallwundra fela.
þa wæs eðfynde Afrisc meowle
on geofones staðe golde geweorðod.
Handa hofon halswurðunge,
bliðe wæron, bote gesawon,
heddon herereafes, hæft wæs onsæled.
Ongunnon sælafe segnum dælan
on yðlafe, ealde madmas,
reaf and randas. Heo on riht sceodon
gold and godweb, Iosepes gestreon,
wera wuldorgesteald. Werigend lagon
on deaðstede, drihtfolca mæst.