Genesis A, lines 1363–1484

Him on hoh beleac heofonrices weard
merehuses muð mundum sinum,
sigora waldend, and segnade
earce innan agenum spedum
nergend usser. Noe hæfde,
sunu Lameches, syxhund wintra
þa he mid bearnum under bord gestah,
gleaw mid geogoðe, be godes hæse,
dugeðum dyrum. Drihten sende
regn from roderum and eac rume let
willeburnan on woruld þringan
of ædra gehwære, egorstreamas
swearte swogan. Sæs up stigon
ofer stæðweallas. Strang wæs and reðe
se ðe wætrum weold; wreah and þeahte
manfæhðu bearn middangeardes
wonnan wæge, wera eðelland;
hof hergode, hygeteonan wræc
metod on monnum. Mere swiðe grap
on fæge folc feowertig daga,
nihta oðer swilc. Nið wæs reðe,
wællgrim werum; wuldorcyninges
yða wræcon arleasra feorh
of flæschoman. Flod ealle wreah,
hreoh under heofonum hea beorgas
geond sidne grund and on sund ahof
earce from eorðan and þa æðelo mid,
þa segnade selfa drihten,
scyppend usser, þa he þæt scip beleac.
Siððan wide rad wolcnum under
ofer holmes hrincg hof seleste,
for mid fearme. Fære ne moston
wægliðendum wætres brogan
hæste hrinon, ac hie halig god
ferede and nerede. Fiftena stod
deop ofer dunum se drenceflod
monnes elna; þæt is mæro wyrd!
þam æt niehstan wæs nan to gedale,
nymþe heof wæs ahafen on þa hean lyft,
þa se egorhere eorðan tuddor
eall acwealde, buton þæt earce bord
heold heofona frea, þa hine halig god
ece upp forlet edmodne flod
streamum stigan, stiðferhð cyning.
þa gemunde god mereliðende,
sigora waldend sunu Lameches
and ealle þa wocre þe he wið wætre beleac,
lifes leohtfruma, on lides bosme.
Gelædde þa wigend weroda drihten
worde ofer widland. Willflod ongan
lytligan eft. Lago ebbade,
sweart under swegle. Hæfde soð metod
eaforum egstream eft gecyrred,
torhtne ryne, regn gestilled.
For famig scip L and C
nihta under roderum, siððan nægledbord,
fær seleste, flod up ahof,
oðþæt rimgetæl reðre þrage
daga forð gewat. ða on dunum gesæt
heah mid hlæste holmærna mæst,
earc Noes, þe Armenia
hatene syndon. þær se halga bad,
sunu Lameches, soðra gehata
lange þrage, hwonne him lifes weard
frea ælmihtig frecenra siða
reste ageafe, þæra he rume dreah
þa hine on sunde geond sidne grund
wonne yða wide bæron.
Holm wæs heononweard; hæleð langode,
wægliðende, swilce wif heora,
hwonne hie of nearwe ofer nægledbord
ofer streamstaðe stæppan mosten
and of enge ut æhta lædan.
þa fandode forðweard scipes,
hwæðer sincende sæflod þa gyt
wære under wolcnum. Let þa ymb worn daga
þæs þe heah hlioðo horde onfengon
and æðelum eac eorðan tudres
sunu Lameches sweartne fleogan
hrefn ofer heahflod of huse ut.
Noe tealde þæt he on neod hine,
gif he on þære lade land ne funde,
ofer sid wæter secan wolde
on wægþele. Eft him seo wen geleah,
ac se feonde gespearn fleotende hreaw;
salwigfeðera secan nolde.
He þa ymb seofon niht sweartum hrefne
of earce forlet æfter fleogan
ofer heah wæter haswe culufran
on fandunga hwæðer famig sæ
deop þa gyta dæl ænigne
grenre eorðan ofgifen hæfde.
Heo wide hire willan sohte
and rume fleah. Nohweðere reste fand,
þæt heo for flode fotum ne meahte
land gespornan ne on leaf treowes
steppan for streamum, ac wæron steap hleoðo
bewrigen mid wætrum. Gewat se wilda fugel
on æfenne earce secan
ofer wonne wæg, werig sigan,
hungri to handa halgum rince.
ða wæs culufre eft of cofan sended
ymb wucan wilde. Seo wide fleah
oðþæt heo rumgal restestowe
fægere funde and þa fotum stop
on beam hyre; gefeah bliðemod
þæs þe heo gesittan swiðe werig
on treowes telgum torhtum moste.
Heo feðera onsceoc, gewat fleogan eft
mid lacum hire, liðend brohte
elebeames twig an to handa,
grene blædæ. þa ongeat hraðe
flotmonna frea þæt wæs frofor cumen,
earfoðsiða bot. þa gyt se eadega wer
ymb wucan þriddan wilde culufran
ane sende. Seo eft ne com
to lide fleogan, ac heo land begeat,
grene bearwas; nolde gladu æfre
under salwed bord syððan ætywan
on þellfæstenne, þa hire þearf ne wæs.
þa to Noe spræc nergend usser,
heofonrices weard, halgan reorde: