Genesis A, lines 1485–1614

"þe is eðelstol eft gerymed,
lisse on lande, lagosiða rest
fæger on foldan. Gewit on freðo gangan
ut of earce, and on eorðan bearm
of þam hean hofe hiwan læd þu
and ealle þa wocre þe ic wægþrea on
liðe nerede þenden lago hæfde
þrymme geþeahtne þriddan eðyl."
He fremede swa and frean hyrde,
stah ofer streamweall, swa him seo stefn bebead,
lustum miclum, and alædde þa
of wægþele wraðra lafe.
þa Noe ongan nergende lac
rædfæst reðran, and recene genam
on eallum dæl æhtum sinum,
ðam ðe him to dugeðum drihten sealde,
gleaw to þam gielde, and þa gode selfum
torhtmod hæle tiber onsægde,
cyninge engla. Huru cuð dyde
nergend usser, þa he Noe
gebletsade and his bearn somed,
þæt he þæt gyld on þanc agifen hæfde
and on geogoðhade godum dædum
ær geearnod þæt him ealra wæs
ara este ælmihtig god,
domfæst dugeþa. þa gyt drihten cwæð,
wuldris aldor word to Noe:
"Tymað nu and tiedrað, tires brucað,
mid gefean fryðo; fyllað eorðan,
eall geiceað. Eow is eðelstol
and holmes hlæst and heofonfuglas
and wildu deor on geweald geseald,
eorðe ælgrene and eacen feoh.
Næfre ge mid blode beodgereordu
unarlice eowre þicgeað,
besmiten mid synne sawldreore.
ælc hine selfa ærest begrindeð
gastes dugeðum þæra þe mid gares orde
oðrum aldor oðþringeð. Ne ðearf he þy edleane gefeon
modgeþance, ac ic monnes feorh
to slagan sece swiðor micle,
and to broðor banan, þæs þe blodgyte,
wællfyll weres wæpnum gespedeð,
morð mid mundum. Monn wæs to godes
anlicnesse ærest gesceapen.
ælc hafað magwlite metodes and engla
þara þe healdan wile halige þeawas.
Weaxað and wridað, wilna brucað,
ara on eorðan; æðelum fyllað
eowre fromcynne foldan sceatas,
teamum and tudre. Ic eow treowa þæs
mine selle, þæt ic on middangeard
næfre egorhere eft gelæde,
wæter ofer widland. Ge on wolcnum þæs
oft and gelome andgiettacen
magon sceawigan, þonne ic scurbogan
minne iewe, þæt ic monnum þas
wære gelæste, þenden woruld standeð."
ða wæs se snotra sunu Lamehes
of fere acumen flode on laste
mid his eaforum þrim, yrfes hyrde
(and heora feower wif;
nemde wæron Percoba, Olla,
Olliua, Olliuani),
wærfæst metode, wætra lafe.
Hæleð hygerofe hatene wæron,
suna Noes Sem and Cham,
Iafeð þridda. From þam gumrincum
folc geludon and gefylled wearð
eall þes middangeard monna bearnum.
ða Noe ongan niwan stefne
mid hleomagum ham staðelian
and to eorðan him ætes tilian;
won and worhte, wingeard sette,
seow sæda fela, sohte georne
þa him wlitebeorhte wæstmas brohte,
geartorhte gife, grene folde.
ða þæt geeode, þæt se eadega wer
on his wicum wearð wine druncen,
swæf symbelwerig, and him selfa sceaf
reaf of lice. Swa gerysne ne wæs,
læg þa limnacod. He lyt ongeat
þæt him on his inne swa earme gelamp,
þa him on hreðre heafodswima
on þæs halgan hofe heortan clypte.
Swiðe on slæpe sefa nearwode
þæt he ne mihte on gemynd drepen
hine handum self mid hrægle wryon
and sceome þeccan, swa gesceapu wæron
werum and wifum, siððan wuldres þegn
ussum fæder and meder fyrene sweorde
on laste beleac lifes eðel.
þa com ærest Cam in siðian,
eafora Noes, þær his aldor læg,
ferhðe forstolen. þær he freondlice
on his agenum fæder are ne wolde
gesceawian, ne þa sceonde huru
hleomagum helan, ac he hlihende
broðrum sægde, hu se beorn hine
reste on recede. Hie þa raðe stopon,
heora andwlitan in bewrigenum
under loðum listum, þæt hie leofum men
geoce gefremede; gode wæron begen,
Sem and Iafeð. ða of slæpe onbrægd
sunu Lamehes, and þa sona ongeat
þæt him cynegodum Cham ne wolde,
þa him wæs are þearf, ænige cyðan
hyldo and treowa. þæt þam halgan wæs
sar on mode, ongan þa his selfes bearn
wordum wyrgean, cwæð, he wesan sceolde
hean under heofnum, hleomaga þeow,
Cham on eorþan; him þa cwyde syððan
and his fromcynne frecne scodon.
þa nyttade Noe siððan
mid sunum sinum sidan rices
ðreohund wintra þisses lifes,
freomen æfter flode, and fiftig eac, þa he forð gewat.
Siððan his eaforan ead bryttedon,
bearna stryndon; him wæs beorht wela.
þa wearð Iafeðe geogoð afeded,
hyhtlic heorðwerod heafodmaga,
sunu and dohtra. He wæs selfa til,
heold a rice, eðeldreamas,
blæd mid bearnum, oðþæt breosta hord,
gast ellorfus gangan sceolde
to godes dome. Geomor siððan
fæder flettgesteald freondum dælde,
swæsum and gesibbum, sunu Iafeðes;
þæs teames wæs tuddor gefylled
unlytel dæl eorðan gesceafta.