Genesis A, lines 1615–1735

Swilce Chames suno cende wurdon,
eaforan on eðle; þa yldestan
Chus and Chanan hatene wæron,
ful freolice feorh, frumbearn Chames.
Chus wæs æðelum heafodwisa,
wilna brytta and worulddugeða
broðrum sinum, botlgestreona,
fæder on laste, siððan forð gewat
Cham of lice, þa him cwealm gesceod.
Se magoræswa mægðe sinre
domas sægde, oðþæt his dogora wæs
rim aurnen. þa se rinc ageaf
eorðcunde ead, sohte oðer lif,
fæder Nebroðes. Frumbearn siððan
eafora Chuses yrfestole weold,
widmære wer, swa us gewritu secgeað,
þæt he moncynnes mæste hæfde
on þam mældagum mægen and strengo.
Se wæs Babylones bregorices fruma,
ærest æðelinga; eðelðrym onhof,
rymde and rærde. Reord wæs þa gieta
eorðbuendum an gemæne.
Swilce of Cames cneorisse woc
wermægða fela; of þam widfolce
cneorim micel cenned wæron.
þa wearð Seme suna and dohtra
on woruldrice worn afeded,
freora bearna, ær ðon frod cure
wintrum wælreste werodes aldor.
On þære mægðe wæron men tile,
þara an wæs Eber haten,
eafora Semes; of þam eorle woc
unrim þeoda, þa nu æðelingas,
ealle eorðbuend, Ebrei hatað.
Gewiton him þa eastan æhta lædan,
feoh and feorme. Folc wæs anmod;
rofe rincas sohton rumre land,
oðþæt hie becomon corðrum miclum,
folc ferende, þær hie fæstlice
æðelinga bearn, eard genamon.
Gesetton þa Sennar sidne and widne
leoda ræswan; leofum mannum
heora geardagum grene wongas,
fægre foldan, him forðwearde
on ðære dægtide duguðe wæron,
wilna gehwilces weaxende sped.
ða þær mon mænig be his mægwine,
æðeling anmod, oðerne bæd
þæs hie him to mærðe, ær seo mengeo eft
geond foldan bearm tofaran sceolde,
leoda mægðe on landsocne
burh geworhte and to beacne torr
up arærde to rodortunglum.
þæs þe hie gesohton Sennera feld,
swa þa foremeahtige folces ræswan,
þa yldestan oft and gelome
liðsum gewunedon; larum sohton
weras to weorce and to wrohtscipe,
oðþæt for wlence and for wonhygdum
cyðdon cræft heora, ceastre worhton
and to heofnum up hlædræ rærdon,
strengum stepton stænenne weall
ofer monna gemet, mærða georne,
hæleð mid honda. þa com halig god
wera cneorissa weorc sceawigan,
beorna burhfæsten, and þæt beacen somed,
þe to roderum up ræran ongunnon
Adames eaforan, and þæs unrædes
stiðferhð cyning steore gefremede,
þa he reðemod reorde gesette
eorðbuendum ungelice,
þæt hie þære spæce sped ne ahton.
þa hie gemitton mihtum spedge,
teoche æt torre, getalum myclum,
weorces wisan, ne þær wermægða
ænig wiste hwæt oðer cwæð.
Ne meahte hie gewurðan weall stænenne
up forð timbran, ac hie earmlice
heapum tohlocon, hleoðrum gedælde;
wæs oðerre æghwilc worden
mægburh fremde, siððan metod tobræd
þurh his mihta sped monna spræce.
Toforan þa on feower wegas
æðelinga bearn ungeþeode
on landsocne. Him on laste bu
stiðlic stantorr and seo steape burh
samod samworht on Sennar stod.
Weox þa under wolcnum and wriðade
mægburh Semes, oðþæt mon awoc
on þære cneorisse, cynebearna rim,
þancolmod wer, þeawum hydig.
Wurdon þam æðelinge eaforan acende,
in Babilone bearn afeded
freolicu tu, and þa frumgaran,
hæleð higerofe, hatene wæron
Abraham and Aaron; þam eorlum wæs
frea engla bam freond and aldor.
ða wearð Aarone eafora feded,
leoflic on life, ðam wæs Loth noma.
ða magorincas metode geþungon,
Abraham and Loth, unforcuðlice,
swa him from yldrum æðelu wæron
on woruldrice; forðon hie wide nu
dugeðum demað drihtfolca bearn.
þa þæs mæles wæs mearc agongen
þæt him Abraham idese brohte,
wif to hame, þær he wic ahte,
fæger and freolic. Seo fæmne wæs
Sarra haten, þæs þe us secgeað bec.
Hie þa wintra fela woruld bryttedon,
sinc ætsomne, sibbe heoldon
geara mengeo. Nohwæðre gifeðe wearð
Abrahame þa gyt þæt him yrfeweard
wlitebeorht ides on woruld brohte,
Sarra Abrahame, suna and dohtra.
Gewat him þa mid cnosle ofer Caldea folc
feran mid feorme fæder Abrahames;
snotor mid gesibbum secean wolde
Cananea land. Hine cneowmægas,
metode gecorene mid siðedon
of þære eðeltyrf, Abraham and Loth.