Genesis A, lines 1736–1862

Him þa cynegode on Carran
æðelinga bearn eard genamon,
weras mid wifum. On þam wicum his
fæder Abrahames feorh gesealde,
wærfæst hæle; wintra hæfde
twa hundteontig, geteled rime,
and fife eac, þa he forð gewat
misserum frod metodsceaft seon.
ða se halga spræc, heofonrices weard,
to Abrahame, ece drihten:
"Gewit þu nu feran and þine fare lædan,
ceapas to cnosle. Carran ofgif,
fæder eðelstol. Far, swa ic þe hate,
monna leofost, and þu minum wel
larum hyre, and þæt land gesec
þe ic þe ælgrene ywan wille,
brade foldan. þu gebletsad scealt
on mundbyrde minre lifigan.
Gif ðe ænig eorðbuendra
mid wean greteð, ic hine wergðo on
mine sette and modhete,
longsumne nið; lisse selle,
wilna wæstme þam þe wurðiað.
þurh þe eorðbuende ealle onfoð,
folcbearn freoðo and freondscipe,
blisse minre and bletsunge
on woruldrice. Wriðende sceal
mægðe þinre monrim wesan
swiðe under swegle sunum and dohtrum,
oðþæt fromcyme folde weorðeð,
þeodlond monig þine gefylled."
Him þa Abraham gewat æhte lædan
of Egipta eðelmearce,
gumcystum god, golde and seolfre
swiðfeorm and gesælig, swa him sigora weard,
waldend usser þurh his word abead,
ceapas from Carran; sohton Cananea
lond and leodgeard. þa com leof gode
on þa eðelturf idesa lædan,
swæse gebeddan and his suhtrian
wif on willan. Wintra hæfde
fif and hundseofontig ða he faran sceolde,
Carran ofgifan and cneowmagas.
Him þa feran gewat fæder ælmihtiges
lare gemyndig land sceawian
geond þa folcsceare be frean hæse
Abraham wide, oðþæt ellenrof
to Sicem com siðe spedig,
cynne Cananeis. þa hine cyning engla
Abrahame iewde selfa,
domfæst wereda and drihten cwæð:
"þis is seo eorðe þe ic ælgrene
tudre þinum torhte wille
wæstmum gewlo on geweald don,
rume rice." þa se rinc gode
wibed worhte and þa waldende
lifes leohtfruman lac onsægde
gasta helme. Him þa gyt gewat
Abraham eastan eagum wlitan
on landa cyst, (lisse gemunde
heofonweardes gehat, þa him þurh halig word
sigora selfcyning soð gecyðde),
oðþæt drihtweras duguþum geforan
þær is botlwela Bethlem haten.
Beorn bliðemod and his broðor sunu
forð oferforan folcmæro land
eastan mid æhtum, æfæste men
weallsteapan hleoðu, and him þa wic curon
þær him wlitebeorhte wongas geþuhton.
Abraham þa oðere siðe
wibed worhte. He þær wordum god
torhtum cigde, tiber onsægde
his liffrean, (him þæs lean ageaf
nalles hneawlice þurh his hand metend),
on þam gledstyde gumcystum til.
ðær ræsbora þrage siððan
wicum wunode and wilna breac,
beorn mid bryde, oðþæt brohþrea
Cananea wearð cynne getenge,
hunger se hearda, hamsittendum,
wælgrim werum. Him þa wishydig
Abraham gewat on Egypte,
drihtne gecoren, drohtað secan,
fleah wærfæst wean; wæs þæt wite to strang.
Abraham maðelode, geseah Egypta
hornsele hwite and hea byrig
beorhte blican; ongan þa his bryd frea,
wishydig wer, wordum læran:
"Siððan Egypte eagum moton
on þinne wlite wlitan wlance monige,
þonne æðelinga eorlas wenað,
mæg ælfscieno, þæt þu min sie
beorht gebedda, þe wile beorna sum
him geagnian. Ic me onegan mæg
þæt me wraðra sum wæpnes ecge
for freondmynde feore beneote.
Saga þu, Sarra, þæt þu sie sweostor min,
lices mæge, þonne þe leodweras
fremde fricgen hwæt sie freondlufu
ellðeodigra uncer twega,
feorren cumenra. þu him fæste hel
soðan spræce; swa þu minum scealt
feore gebeorgan, gif me freoðo drihten
on woruldrice, waldend usser,
an ælmihtig, swa he ær dyde,
lengran lifes. Se us þas lade sceop,
þæt we on Egiptum are sceolde
fremena friclan and us fremu secan."
þa com ellenrof eorl siðian,
Abraham mid æhtum on Egypte,
þær him folcweras fremde wæron,
wine uncuðe. Wordum spræcon
ymb þæs wifes wlite wlonce monige,
dugeðum dealle; him drihtlicu mæg,
on wlite modgum mænegum ðuhte,
cyninges þegnum. Hie þæt cuð dydon
heora folcfrean þæt fægerro lyt
for æðelinge idesa sunnon,
ac hie Sarran swiðor micle,
wynsumne wlite wordum heredon,
oðþæt he lædan heht leoflic wif to
his selfes sele. Sinces brytta,
æðelinga helm heht Abrahame
duguðum stepan. Hwæðere drihten wearð,
frea Faraone fah and yrre
for wifmyne; þæs wraðe ongeald
hearde mid hiwum hægstealdra wyn.