Genesis A, lines 2018–2138

Him þa secg hraðe gewat siðian,
an gara laf, se ða guðe genæs,
Abraham secan. Se þæt orlegweorc
þam Ebriscan eorle gecyðde,
forslegen swiðe Sodoma folc,
leoda duguðe and Lothes sið.
þa þæt inwitspell Abraham sægde
freondum sinum; bæd him fultumes
wærfæst hæleð willgeðoftan,
Aner and Manre, Escol þriddan,
cwæð þæt him wære weorce on mode,
sorga sarost, þæt his suhtriga
þeownyd þolode; bæd him þræcrofe
þa rincas þæs ræd ahicgan,
þæt his hyldemæg ahreded wurde,
beorn mid bryde. Him þa broðor þry
æt spræce þære spedum miclum
hældon hygesorge heardum wordum,
ellenrofe, and Abrahame
treowa sealdon, þæt hie his torn mid him
gewræcon on wraðum, oððe on wæl feollan.
þa se halga heht his heorðwerod
wæpna onfon. He þær wigena fand,
æscberendra, XVIII
and CCC eac þeodenholdra,
þara þe he wiste þæt meahte wel æghwylc
on fyrd wegan fealwe linde.
Him þa Abraham gewat and þa eorlas þry
þe him ær treowe sealdon mid heora folcgetrume;
wolde his mæg huru,
Loth alynnan of laðscipe.
Rincas wæron rofe, randas wægon
forð fromlice on foldwege.
Hildewulfas herewicum neh
gefaren hæfdon. þa he his frumgaran,
wishydig wer, wordum sægde,
þares afera, him wæs þearf micel
þæt hie on twa healfe
grimme guðgemot gystum eowdon
heardne handplegan; cwæð þæt him se halga,
ece drihten, eaðe mihte
æt þam spereniðe spede lænan.
þa ic neðan gefrægn under nihtscuwan
hæleð to hilde. Hlyn wearð on wicum
scylda and sceafta, sceotendra fyll,
guðflana gegrind; gripon unfægre
under sceat werum scearpe garas,
and feonda feorh feollon ðicce,
þær hlihende huðe feredon
secgas and gesiððas. Sigor eft ahwearf
of norðmonna niðgeteone,
æsctir wera. Abraham sealde
wig to wedde, nalles wunden gold,
for his suhtrigan, sloh and fylde
feond on fitte. Him on fultum grap
heofonrices weard. Hergas wurdon
feower on fleame, folccyningas,
leode ræswan. Him on laste stod
hihtlic heorðwerod, and hæleð lagon,
on swaðe sæton, þa þe Sodoma
and Gomorra golde berofan,
bestrudon stigwitum. Him þæt stiðe geald
fædera Lothes. Fleonde wæron
Elamitarna aldorduguðe
dome bedrorene, oðþæt hie Domasco
unfeor wæron. Gewat him Abraham ða
on þa wigrode wiðertrod seon
laðra monna. Loth wæs ahreded,
eorl mid æhtum, idesa hwurfon,
wif on willan. Wide gesawon
freora feorhbanan fuglas slitan
on ecgwale. Abraham ferede
suðmonna eft sinc and bryda,
æðelinga bearn, oðle nior,
mægeð heora magum. Næfre mon ealra
lifigendra her lytle werede
þon wurðlicor wigsið ateah,
þara þe wið swa miclum mægne geræsde.
þa wæs suð þanon Sodoma folce
guðspell wegen, hwelc gromra wearð
feonda fromlad. Gewat him frea leoda,
eorlum bedroren, Abraham secan,
freonda feasceaft. Him ferede mid
Solomia sinces hyrde;
þæt wæs se mæra Melchisedec,
leoda bisceop. Se mid lacum com
fyrdrinca fruman fægre gretan,
Abraham arlice, and him on sette
godes bletsunge, and swa gyddode:
"Wæs ðu gewurðod on wera rime
for þæs eagum þe ðe æsca tir
æt guðe forgeaf! þæt is god selfa,
se ðe hettendra herga þrymmas
on geweald gebræc, and þe wæpnum læt
rancstræte forð rume wyrcan,
huðe ahreddan and hæleð fyllan.
On swaðe sæton; ne meahton siðwerod
guðe spowan, ac hie god flymde,
se ðe æt feohtan mid frumgarum
wið ofermægnes egsan sceolde
handum sinum, and halegu treow,
seo þu wið rodora weard rihte healdest."
Him þa se beorn bletsunga lean
þurh hand ageaf, and þæs hereteames
ealles teoðan sceat Abraham sealde
godes bisceope. þa spræc guðcyning,
Sodoma aldor, secgum befylled,
to Abrahame (him wæs ara þearf).
"Forgif me mennen minra leoda,
þe þu ahreddest herges cræftum
wera wælclommum! Hafa þe wunden gold
þæt ær agen wæs ussum folce,
feoh and frætwa! Læt me freo lædan
eft on eðel æðelinga bearn,
on weste wic wif and cnihtas,
earme wydewan! Eaforan syndon deade,
folcgesiðas, nymðe fea ane,
þe me mid sceoldon mearce healdan."
Him þa Abraham andswarode
ædre for eorlum, elne gewurðod,
dome and sigore, drihtlice spræc: