Genesis A, lines 2261–2381

ða wearð unbliðe Abrahames cwen,
hire worcþeowe wrað on mode,
heard and hreðe, higeteonan spræc
fræcne on fæmnan. Heo þa fleon gewat
þrea and þeowdom; þolian ne wolde
yfel and ondlean, þæs ðe ær dyde
to Sarran, ac heo on sið gewat
westen secan. þær hie wuldres þegn,
engel drihtnes an gemitte
geomormode, se hie georne frægn:
"Hwider fundast þu, feasceaft ides,
siðas dreogan? þec Sarre ah."
Heo him ædre andswarode:
"Ic fleah wean, wana wilna gehwilces,
hlæfdigan hete, hean of wicum,
tregan and teonan. Nu sceal tearighleor
on westenne witodes bidan,
hwonne of heortan hunger oððe wulf
sawle and sorge somed abregde."
Hire þa se engel andswarode:
"Ne ceara þu feor heonon fleame dælan
somwist incre, ac þu sece eft,
earna þe ara, eaðmod ongin
dreogan æfter dugeðum, wes drihtenhold.
þu scealt, Agar, Abrahame sunu
on woruld bringan. Ic þe wordum nu
minum secge, þæt se magorinc sceal
mid yldum wesan Ismahel haten.
Se bið unhyre, orlæggifre,
and wiðerbreca wera cneorissum,
magum sinum; hine monige on
wraðe winnað mid wæpenþræce.
Of þam frumgaran folc awæcniað,
þeod unmæte. Gewit þu þinne eft
waldend secan; wuna þæm þe agon!"
Heo þa ædre gewat engles larum
hire hlafordum, swa se halga bebead,
godes ærendgast, gleawan spræce.
þa wearð Abrahame Ismael geboren,
efne þa he on worulde wintra hæfde
VI and LXXX. Sunu weox and ðah,
swa se engel ær þurh his agen word,
fæle freoðoscealc, fæmnan sægde.
þa se ðeoden ymb XIII gear,
ece drihten, wið Abrahame spræc:
"Leofa, swa ic þe lære, læst uncre wel
treowrædenne! Ic þe on tida gehwone
duguðum stepe. Wes þu dædum from
willan mines! Ic þa wære forð
soðe gelæste, þe ic þe sealde geo
frofre to wedde, þæs þin ferhð bemearn.
þu scealt halgian hired þinne.
Sete sigores tacn soð on gehwilcne
wæpnedcynnes, gif þu wille on me
hlaford habban oððe holdne freond
þinum fromcynne. Ic þæs folces beo
hyrde and healdend, gif ge hyrað me
breostgehygdum and bebodu willað
min fullian. Sceal monna gehwilc
þære cneorisse cildisc wesan
wæpnedcynnes, þæs þe on woruld cymð,
ymb seofon niht sigores tacne
geagnod me, oððe of eorðan
þurh feondscipe feor adæled,
adrifen from duguðum. Doð swa ic hate!
Ic eow treowige, gif ge þæt tacen gegaþ
soðgeleafan. þu scealt sunu agan,
bearn be bryde þinre, þone sculon burhsittende
ealle Isaac hatan. Ne þearf þe þæs eaforan sceomigan,
ac ic þam magorince mine sylle
godcunde gife gastes mihtum,
freondsped fremum. He onfon sceal
blisse minre and bletsunge,
lufan and lisse. Of þam leodfruman
brad folc cumað, bregowearda fela
rofe arisað, rices hyrdas,
woruldcyningas wide mære."
Abraham ða ofestum legde
hleor on eorðan, and mid hucse bewand
þa hleoðorcwydas on hige sinum,
modgeðance. He þæs mældæges
self ne wende þæt him Sarra,
bryd blondenfeax bringan meahte
on woruld sunu; wiste gearwe
þæt þæt wif huru wintra hæfde
efne C, geteled rimes.
He þa metode oncwæð missarum frod:
"Lifge Ismael larum swilce,
þeoden, þinum, and þe þanc wege,
heardrædne hyge, heortan strange,
to dreoganne dæges and nihtes
wordum and dædum willan þinne."
Him þa fægere frea ælmihtig,
ece drihten, andswarode:
"þe sceal wintrum frod on woruld bringan
Sarra sunu, soð forð gan
wyrd æfter þissum wordgemearcum.
Ic Ismael estum wille
bletsian nu, swa þu bena eart
þinum frumbearne, þæt feorhdaga
on woruldrice worn gebide,
tanum tudre. þu þæs tiða beo!
Hwæðre ic Isace, eaforan þinum,
geongum bearne, þam þe gen nis
on woruld cumen, willa spedum
dugeða gehwilcre on dagum wille
swiðor stepan and him soðe to
modes wære mine gelæstan,
halige higetreowa, and him hold wesan."
Abraham fremede swa him se eca bebead,
sette friðotacen be frean hæse
on his selfes sunu, heht þæt segn wegan
heah gehwilcne, þe his hina wæs
wæpnedcynnes, wære gemyndig,
gleaw on mode, ða him god sealde
soðe treowa, and þa seolf onfeng
torhtum tacne. A his tir metod,
domfæst cyning, dugeðum iecte
on woruldrice; he him þæs worhte to,
siððan he on fære furðum meahte
his waldendes willan fremman.