Psalm 53

On þinum þam haligan naman, gedo me halne, god;
alys me fram laðum þurh þin leofe mægen.
God, min gebed gearuwe gehyre,
and earum onfoh min agen word.
Forþam me fremde oft facne gestodon,
sohtan mine sawle swiðe strange,
and na heom god setton gleawne on gesyhðe.
Efne me þonne god gleawe fultumeð,
is andfengea ece drihten
sawle minre; he me swican ne wile.
Afyr me fæcne yfel feonda minra,
and hi soðfæst toweorp syððan wide.
Ic ðe lustum lace cweme,
and naman þinne niode swylce
geara andette, forðon ic hine goodne wat.
Forþon þu me alysdest, lifes ealdor,
of earfoðum eallum symble,
ealle mine fynd eagum ofersawe.