Lines 124–246

Swilce hiene ᛢ Q and ᚢ V cwealme gehnægað,
frome folctogan, farað him togegnes,
habbað leoht speru, lange sceaftas,
swiðmode sweopan, swenga ne wyrnað,
deorra dynta; him bið ðæt deofol lað.
ðonne hine I and ᛚ L and se yrra ᚳ C
guðe begyrdað (geap stæf wigeð
biterne brogan), bigað sona
helle hæftling, ðæt he on hinder gæð.
ðonne hiene ᛇ F and ᛗ M utan ymbðringað,
scyldigne sceaðan, habbað scearp speru,
atole earhfare, æled lætað
on ðæs feondes feax flana stregdan,
biterne brogan; banan heardlice
grimme ongieldað, ðæs hie oft gilp brecað.
ðonne hine æt niehstan nearwe stilleð
ᛄ G se geapa, ðone god sendeð
freondum on fultum, færeð æfter ᛞ D
fifmægnum full. Fyr bið se ðridda
stæf stræte neah, stille bideð.
ᚻ H onetteð, engel hine scierpeð,
Cristes cempan, on cwicum wædum
godes spyrigendes geonges hrægles.
ðonne hine on lyfte lifgetwinnan
under tungla getrumum tuigena ordum,
sweopum seolfrynum, swiðe weallað,
oððæt him ban blicað, bledað ædran;
gartorn geotað gifrum deofle.
Mæg simle se godes cwide gumena gehwylcum
ealra feonda gehwane fleondne gebrengan
ðurh mannes muð, manfulra heap
sweartne geswencan, næfre hie ðæs syllice
bleoum bregdað. æfter bancofan
feðerhoman onfoð, hwilum flotan gripað;
hwilum hie gewendað in wyrmes lic
stronges and sticoles, stingeð nieten,
feldgongende feoh gestrudeð.
Hwilum he on wætere wicg gehnægeð,
hornum geheaweð, oððæt him heortan blod,
famig flodes bæð, foldan geseceð.
Hwilum he gefeterað fæges mannes,
handa gehefegað, ðonne he æt hilde sceall
wið lað werud lifes tiligan;
awriteð he on his wæpne wællnota heap,
bealwe bocstafas, bill forscrifeð,
meces mærðo. Forðon nænig man scile
oft orðances ut abredan
wæpnes ecgge, ðeah ðe him se wlite cweme,
ac symle he sceal singan, ðonne he his sweord geteo,
Pater Noster, and ðæt palmtreow
biddan mid blisse, ðæt him bu gife
feorh and folme, ðonne his feond cyme."
"...... swice, ær he soð wite,
ðæt ða sienfullan saula sticien
mid hettendum helle tomiddes.
Hateð ðonne heahcining helle betynan,
fyres fulle, and ða feondas mid."
Hæfde ða se snotra sunu Dauides
forcumen and forcyðed Caldea eorl.
Hwæðre was on sælum se ðe of siðe cwom
feorran gefered; næfre ær his ferhð ahlog.
Hwæt! Ic flitan gefrægn on fyrndagum
modgleawe men, middangeardes ræswan,
gewesan ymbe hira wisdom; wyrs deð se ðe liehð
oððe ðæs soðes ansæceð. Saloman was bremra,
ðeah ðe Saturnus sumra hæfde,
bald breosttoga, boca cæga,
leornenga locan. land eall geondhwearf,
Indea mere, east Corsias,
Persea rice, Palestinion,
Niniuen ceastre and norð Predan,
Meda maððumselas, Marculfes eard,
Saulus rice, swa he suð ligeð
ymbe Geallboe and ymb Geador norð,
Filistina flet, fæsten Creca,
wudu Egipta, wæter Mathea,
cludas Coreffes, Caldea rice,
Creca cræftas, cynn Arabia,
lare Libia, lond Syria,
Pitðinia, Buðanasan,
Pamhpilia, Pores gemære,
Macedonia, Mesopotamie,
Cappadocia, Cristes eðel,
Hieryhco, Galilea, Hierusalem
"oððe ic swigie,
nyttes hycgge, ðeah ic no sprece.
Wat ic ðonne, gif ðu gewitest on Wendelsæ
ofer Coforflod cyððe secean,
ðæt ðu wille gilpan ðæt ðu hæbbe gumena bearn
forcumen and forcyððed. Wat ic ðæt wæron Caldeas
guðe ðæs gielpne and ðæs goldwlonce,
mærða ðæs modige, ðær to ðam moning gelomp
suð ymbe Sanere feld. Sæge me from ðam lande
ðær nænig fyra ne mæg fotum gestæppan."
Saturnus cuæð:
"Se mæra was haten sæliðende
weallende Wulf, werðeodum cuð
Filistina, freond Nebrondes.
He on ðam felda ofslog XXV
dracena on dægred, and hine ða deað offeoll;
forðan ða foldan ne mæg fira ænig,
ðone mercstede, mon gesecan,
fugol gefleogan, ne ðon ma foldan neat.
ðanon atercynn ærest gewurdon
wide onwæcned, ða ðe nu weallende
ðurh attres oroð ingang rymað.
Git his sweord scineð swiðe gescæned,
and ofer ða byrgenna blicað ða hieltas."
Salomon cwæð:
"Dol bið se ðe gæð on deop wæter,
se ðe sund nafað ne gesegled scip
ne fugles flyht, ne he mid fotum ne mæg
grund geræcan; huru se godes cunnað
full dyslice, dryhtnes meahta."
Saturnus cuæð:
"Ac hwæt is se dumba, se ðe on sumre dene resteð?
Swiðe snyttrað, hafað seofon tungan;
hafað tungena gehwylc XX orda,
hafað orda gehwylc engles snytro,
ðara ðe wile anra hwylc uppe bringan,
ðæt ðu ðære gyldnan gesiehst Hierusalem
weallas blican and hiera winrod lixan,
soðfæstra segn. Saga hwæt ic mæne."