Lines 247–369

Salomon cuæð:
"Bec sindon breme, bodiað geneahhe
weotodne willan ðam ðe wiht hygeð.
Gestrangað hie and gestaðeliað staðolfæstne geðoht,
amyrgað modsefan manna gehwylces
of ðreamedlan ðisses lifes."
Saturnus cwæð:
"Bald bið se ðe onbyregeð boca cræftes;
symle bið ðe wisra ðe hira geweald hafað."
Salomon cuæð:
"Sige hie onsendað soðfæstra gehwam,
hælo hyðe, ðam ðe hie lufað."
Saturnus cwæð:
"An wise is on woroldrice
ymb ða me fyrwet bræc L wintra
dæges and niehtes ðurh deop gesceaft;
geomrende gast deð nu gena swa,
ærðon me geunne ece dryhten
ðæt me geseme snoterra monn."
Salomon cwæð:
"Soð is ðæt ðu sagast; seme ic ðe recene
ymb ða wrætlican wiht. Wilt ðu ðæt ic ðe secgge?
An fugel siteð on Filistina
middelgemærum; munt is hine ymbutan,
geap gylden weall. Georne hine healdað
witan Filistina, wenað ðæs ðe naht is,
ðæt hiene him scyle eall ðeod on genæman
wæpna ecggum; hie ðæs wære cunnon,
healdað hine niehta gehwylce norðan and suðan
on twa healfa tu hund wearda.
Se fugel hafað IIII heafdu
medumra manna, and he is on middan hwælen;
geowes he hafað fiðeru and griffus fet,
ligeð lonnum fæst, locað unhiere,
swiðe swingeð and his searo hringeð,
gilleð geomorlice and his gyrn sefað,
wylleð hine on ðam wite, wunað unlustum,
singgeð syllice; seldum æfre
his leoma licggað. Longað hine hearde,
ðynceð him ðæt sie ðria XXX ðusend wintra
ær he domdæges dynn gehyre.
Nyste hine on ðære foldan fira ænig
eorðan cynnes, ærðon ic hine ana onfand
and hine ða gebendan het ofer brad wæter,
ðæt hine se modega heht Melotes bearn,
Filistina fruma, fæste gebindan,
lonnum belucan wið leodgryre.
ðone fugel hatað feorbuende,
Filistina fruman, uasa mortis."
Saturnus cwæð:
"Ac hwæt is ðæt wundor ðe geond ðas worold færeð,
styrnenga gæð, staðolas beateð,
aweceð wopdropan, winneð oft hider?
Ne mæg hit steorra ne stan ne se steapa gimm,
wæter ne wildeor wihte beswican,
ac him on hand gæð heardes and hnesces,
micles and mætes; him to mose sceall
gegangan geara gehwelce grundbuendra,
lyftfleogendra, laguswemmendra,
ðria ðreoteno ðusendgerimes."
Salomon cuæð:
"Yldo beoð on eorðan æghwæs cræftig;
mid hiðendre hildewræsne,
rumre racenteage, ræceð wide,
langre linan, lisseð eall ðæt heo wile.
Beam heo abreoteð and bebriceð telgum,
astyreð standendne stefn on siðe,
afilleð hine on foldan; friteð æfter ðam
wildne fugol. Heo oferwigeð wulf,
hio oferbideð stanas, heo oferstigeð style,
hio abiteð iren mid ome, deð usic swa."
Saturnus cwæð:
"Ac forhwon fealleð se snaw, foldan behydeð,
bewrihð wyrta cið, wæstmas getigeð,
geðyð hie and geðreatað, ðæt hie ðrage beoð
cealde geclungne? Full oft he gecostað eac
wildeora worn, wætum he oferbricgeð,
gebryceð burga geat, baldlice fereð,
reafað"
"swiðor micle ðonne se swipra nið
se hine gelædeð on ða laðan wic
mid ða fræcnan feonde to willan."
Saturnus cwæð:
"Nieht bið wedera ðiestrost, ned bið wyrda heardost,
sorg bið swarost byrðen, slæp bið deaðe gelicost."
Salomon cwæð:
"Lytle hwile leaf beoð grene;
ðonne hie eft fealewiað, feallað on eorðan
and forweorniað, weorðað to duste.
Swa ðonne gefeallað ða ðe fyrena ær
lange læstað, lifiað him in mane,
hydað heahgestreon, healdað georne
on fæstenne feondum to willan,
and wenað wanhogan ðæt hie wille wuldorcining,
ælmihtig god, ece gehiran."
Saturnus cwæð:
"Sona bið gesiene, siððan flowan mot
yð ofer eall lond, ne wile heo awa ðæs
siðes geswican, sioððan hire se sæl cymeð,
ðæt heo domes dæges dyn gehiere."
Salomon cwæð:
"Wa bið ðonne ðissum modgum monnum, ðam ðe her nu mid mane lengest
lifiað on ðisse lænan gesceafte. Ieo ðæt ðine leode gecyðdon;
wunnon hie wið dryhtnes miehtum, forðon hie ðæt worc ne gedegdon.
Ne sceall ic ðe hwæðre, broðor, abelgan; ðu eart swiðe bittres cynnes,
eorre eormenstrynde. Ne beyrn ðu in ða inwitgecyndo!"
Saturnus cwæð:
"Saga ðu me, Salomon cyning, sunu Dauides,
hwæt beoð ða feowere fægæs rapas?"
Salomon cuæð:
"Gewurdene wyrda,
ðæt beoð ða feowere fæges rapas."
Saturnus cwæð:
"Ac hwa demeð ðonne dryhtne Criste
on domes dæge, ðonne he demeð eallum gesceaftum?"
Salomon cwæð:
"Hwa dear ðonne dryhtne deman, ðe us of duste geworhte,
nergend of niehtes wunde? Ac sæge me hwæt nærende wæron."
Saturnus cwæð:
"Ac forhwon ne mot seo sunne side gesceafte
scire geondscinan? Forhwam besceadeð heo
muntas and moras and monige ec
weste stowa? Hu geweorðeð ðæt?"