Erthe upon Erthe

Erthe owte of erthe es wondirly wroghte,
Erthe hase getyn one erthe a dignyte of noghte,
Erthe appone erthe hase sett alle his thoghte
How þat erthe appone erthe may be heghe broghte.

Erthe appone erthe wolde be a kynge,
Bot howe þat erthe to erthe sail thynkis he no thynge.
When erthe bredis erthe & his rentis home brynge,
Thane schalle erthe of erthe hafe full harde partynge.

Erthe appone erthe wynnys castells and towrrys.
Thane saise erthe vnto erthe: 'This es alle owrris'.
When erthe appone erthe hase bigged vp his bourris,
Than schalle erthe for erthe suffire scharpe scowrrys.

Erthe gose appone erthe as golde appone golde,
He that gose appone erthe gleterande as golde,
Lyke als erthe neuer more goo to erthe scholde,
And ȝitt schal erthe vnto erthe ȝa rathere þan he wolde.

Now why þat erthe luffis erthe wondire me thynke,
Or why þat erthe for erthe scholde oþer swete or swynke,
For when þat erthe appone erthe es broghte within brynke,
Thane schalle erthe of erthe hafe a foulle stynke.