Alysoun

Bytuene Mersh and Aueril,
When spray biginneþ to springe,
Þe lutel foul haþ hire wyl
On hyre lud to synge.
Ich libbe in loue-longinge
For semlokest of alle þynge;
He may me blisse bringe—
Icham in hire baundoun.
An hendy hap ichabbe yhent;
Ichot from heuene it is me sent;
From alle wymmen mi loue is lent,
And lyht on Alysoun.

On heu hire her is fayr ynoh,
Hire browe broune, hire eȝe blake;
Wiþ lossum chere he on me loh,
Wiþ middel smal and wel ymake.
Bote he me wolle to hire take,
For te buen hire owen make,
Longe to lyuen ichulle forsake,
And feye fallen adoun.
An hendy hap, &c.

Nihtes when y wende and wake,
Forþi myn wonges waxeþ won,
Leuedi, al for þine sake
Longinge is ylent me on.
In world nis non so wyter mon
Þat al hire bounté telle con;
Hire swyre is whittore þen þe swon,
And feyrest may in toune.
An hendy hap, &c.

Icham for wowyng al forwake,
Wery so water in wore,
Lest eny reue me my make,
Ychabbe yȝyrned ȝore.
Betere is þolien whyle sore
Þen mournen euermore.
Geynest vnder gore,
Herkne to my roun.
An hendi hap ichabbe yhent;
Ichot from heuene it is me sent;
From alle wymmen mi loue is lent,
And lyht on Alysoun.