Welcome to the Lord Treasurer

I thocht lang quhile sum lord come hame,
Fra quhom faine kyndnes I wald clame ;
His name of confort I will declair,
Welcom, my awin Lord Thesaurair !

Befoir all raik of this regioun,
Under our roy of most renoun,
Of all my mycht, thocht it war mair,
Welcom, my awin Lord Thesaurair.

Ȝour nobill payment I did assay,
And ȝe hecht sone without delay,
Againe in Edinburgh till repair ;
Welcom, my awin Lord Thesaurair !

Ȝe keipit tryst so winder weill,
I hald ȝow trew as ony steill ;
Neidis nane ȝour payment till dispair ;
Welcom, my awin Lord Thesaurair

Ȝett in a pairt I was agast,
Or ȝe the narrest way had past,
Fra toun of Stirling to the air :
Welcom, my awin Lord Thesaurair !

Thane had my dyt beine all in duill,
Had I my wage wantit quhill ȝuill ;
Quhair now I sing with heart onsair,
Welcum, my awin Lord Thesaurair !

Welcum, my benefice, and my rent,
And all the lyflett to me lent ;
Welcum, my pensioun most preclair ;
Welcum, my awin Lord Thesaurair !

Welcum, als heartlie as I can,
My awin dear maister to ȝour man ;
And to ȝour schervand singulair,
Welcum, my awin Lord Thesaurair !

Quod Dumbar.