O Weel Befa' the Maiden Gay

O, weel befa' the maiden gay,
In cottage, bught, or penn,
An' weel befa' the bonny May
That wons in yonder glen;
Wha loes the modest truth sae weel,
Wha 's aye kind, an' aye sae leal,
An' pure as blooming asphodel
Amang sae mony men.
O, weel befa' the bonny thing
That wons in yonder glen!

'Tis sweet to hear the music float
Along the gloaming lea;
'Tis sweet to hear the blackbird's note
Come pealing frae the tree;
To see the lambkins lightsome race--
The speckled kid in wanton chase--
The young deer cower in lonely place,
Deep in her flowing den;
But sweeter far the bonny face
That smiles in yonder glen!

O, had it no' been for the blush
O' maiden's virgin flame,
Dear beauty never had been known,
An' never had a name;
But aye sin' that dear thing o' blame
Was modell'd by an angel's frame,
The power o' beauty reigns supreme
O'er a' the sons o' men;
But deadliest far the sacred flame
Burns in a lonely glen!

There 's beauty in the violet's vest--
There 's hinney in the haw--
There 's dew within the rose's breast,
The sweetest o' them a'.
The sun will rise an' set again,
An' lace wi' burning goud the main--
The rainbow bend outow'r the plain,
Sae lovely to the ken;
But lovelier far the bonny thing
That wons in yonder glen!