I Hae Lost My Jeanie, O

O, I hae seen when fields were green,
An' birds sae blithe an' cheerie, O,
How swift the day wou'd pass away
When I was wi' my dearie, O.
My heart's now sair, my elbows bare,
My pouch without a guinea, O ;
I'll never taste o' pleasure mair,
Since I hae lost my Jeanie, O.

O Fortune, thou hast used me ill;
Far waur than my deserving, O ;
Thrice owre the crown thou'st knocked me down.

An' left me hauflins starving, O :
Thy roughest blast has blawn the last,
My lass has used me meanly, O:
Thy keenest dart has pierced my heart,
An' ta'en frae me my Jeanie, O.

I'll nae mair strive, while I'm alive,
For aught but missing slavery, O ;
This world's a stage, a pilgrimage,
A mass o' guilt an' knavery, O :
If fickle fame but save my name,
An' frae oblivion screen me, O ;
Then farewell fortune, farewell love,
An' farewell, bonnie Jeanie, O !