The Braes of Bushby

Ae glenting cheerfu' simmer morn,
As I cam owre the rigs o' Lorn,
I heard a lassie all forlorn
Lamenting for her Johnnie, O.
Her wild notes poured the air alang ;
The Highland rocks an' woodlands rang,
An' aye the owreword o' her sang
Was " Bushby braes are bonnie, O.

" On Bushby braes where blossoms blow,
Where bloom the brier an' sulky sloe,
There first I met my only joe,
My dear, my faithfu' Johnnie, O.
The grove was dark, sae dark an' sweet,
Where first my lad an' I did meet ;
The roses blushed around our feet ;
Then Bushby braes were bonnie, O.

" Departed joys, how soft, how dear,
That frae my ee still wring the tear !
Yet still the hope my heart shall cheer
Again to meet my Johnnie, O.
The primrose saw, an' blue hare-bell,
But nane o' them our love can tell,
The thrilling joy I felt too well
When Bushby braes were bonnie, O.

" My lad is to the Baltic gane
To fight the proud an' doubtfu' Dane:
For our success my heart is fain ;
But 'tis maistly for my Johnnie, O.
Then, Cupid, smooth the German Sea,
An' bear him back to Lorn an' me !
An' a' my life I'll sing wi' glee,
The Bushby braes are bonnie, O."