Gin Ye Meet a Bonnie Lassie

Gin ye meet a bonnie lassie,
Gie her a kiss an' let her gae ;
But gin ye meet a dirty hussy,
Fy gae rub her ower wi' strae,
Nought is like a bonny lassie,
Brisk an' bonny, blithe and gay ;
But gin ye meet a dirty hussy,
Fy gae rub her ower wi' strae.

Be sure ye dinna quat the grip
O' ilka joy while ye are young,
Afore auld age your veetals nip,
An' lay ye twafauld ower a rung.

But look out for a bonny lassie,
Brisk an' bonny, blithe an' gay ;
But gin ye meet a dirty hussy,
Fy gae rub her ower wi' strae.

Auld age an' youth has joys apart,
An' though they dinna weel combine,
The honest, kind, an' gratefu' heart
Will aye be blithe like yours an' mine.
But nought is like a bonny lassie,
Dearer gift Heav'n never gae ;
But gin ye meet a dirty hussy,
Fy gae rub her ower wi' strae.