Moggy and Me

O wha are sae happy as me an' my Moggy?

O wha are sae happy as Moggy an' me ?
We're baith turnin' auld, an' our walth is soon tauld,
But contentment bides aye in our cottage sae wee.
She toils a' the day when I'm out wi' the hirsel,
An' chaunts to the bairns while I sing on the brae;
An' aye her blithe smile welcomes me frae my toil,
When down the glen I come weary an' wae.

Aboon our auld heads we've a nice little biggen,
That keeps out the cauld when the simmer's awa ;
We've twa wabs o' linen o' Moggy's ain spinnin',
As thick as silk velvet and white as the snaw ;
We've kie in the byre, an' yauds in the stable,
A grumphie sae fat that she hardly can stand ;
An' something, I guess, in yon auld painted press,
To cheer up the speerits an' steady the hand.

'Tis true we hae had mony sorrows an' crosses,
Our pouches oft toom, an' our hearts fu' o' care ;
But wi' a' our crosses, our sorrows, an losses,
Contentment, thank Heaven ! has aye been our share.
I've an auld roostit sword that was left by my father,
Whilk aye has been drawn when my king had a fae !
We hae friends ane or twa that aft gie us a ca',
To laugh when we're happy or grieve when we're wae.

Our duke may hae goud mairthan schoolmen can reckon,
An' flunkies to watch ilka glance o' his ee,
His lady aye braw sittin prim in the ha' ;
But are they sae happy as Moggy an' me ?
A' ye wha ne'er fand the straight road to be happy,
Wha are nae content wi' the lot that ye dree,
Come down to the dwellin' o' whilk I've been tellin', —
You'll learn it by looking at Moggy and me.