Ey kâkülü sâye-gâh-ı fitne

Ey kâkülü sâye-gâh-ı fitne
Çeşmin mi degil penâh-ı fitne
Sad âh ki etti çeşm-i şûhun
Cân u dilimi tebâh-ı fitne
Hârût nigâhın etse imdâd
Dünyâyı yıkar sipâh-ı fitne
Olmuş ezelî hayâl-i çeşmın
Taht-ı dile pâdişâh-ı fitne
Tâ arş-ı Hudâ'ya oldu peyvest
Zülfünle ulüvv-i câh-ı fitne
Gör gamzeyi mest-i nahvet olmuş
Her cünbişi bir güvâh-ı fitne
Tarf-ı nigehi kemîn-i efsûn
Kâkülleri dam-gâh-ı fitne
Bîmâri-i çeşmin eyler isbât
Renc-âver imiş günâh-ı fitne
İ'câz-ı nigâhın eyler ihyâ
Bin mürde-i hâk-i râh-ı fitne
Merdüm değil ol tegafülünden
Dutmuş nigehini âh-ı fitne
* Ekrem * hazer ol mehin nihândır
Kûyunda hezâr çâh-ı fitne