Târih-i Mansıb: Dâd-endîş ü kerem-pîşe mütercim pâşâ

Dâd-endîş ü kerem-pîşe mütercim pâşâ
Devrde şimdi odur asaf-ı eflâtûn-rây

O Hudavend-i felek-câh u mu’allâ-rütbe
Ki cihân dergehine acz ile yüz sürse revây

O cihânbân-ı mu 'azzam o hıdîv-i efham
Kim olur tâkçe-i bârgehi gerdûn-sây
Zerredir pertev-i re'yine izâfetle güneş
Lem'adır bârika-i fikretine nisbeten ay

Hamdlillah yine hâvergeh-i feyz-i hakdan
Mihr-i rahşende-i ikbâli olup berk-nümây

Meclis-i ma'delete verdi riyâsetle şeref
O hıdîv-i hüner-endûz u fetânet-pîrây

Kevnân-ı cevher-i ehliyyet ü istihkaka
Bî-gümân ahter-i ikbâli olur şa'şa'a-zây

İsteriz Hazret-i Hak'tan ki bugünlerde ola
Yümnle câlis-i ser-mesned-i sadr-ı vâlây

Kurtulup nâ'ire-i zulm ü fitenden âlem
Sâyesinde ola âsûde bütün bây ü gedây

Başla ihlâsla îfâ-yı du'âya * Ekrem *
Söz hit'âmında olur lâzıme çün hayr-du'ây

Tâ ki vâbeste olup yek-digere azl ile nasb
Ola ta'kîbde birbirini cünbişte pây

Ömrünü devlet ü ikbâlini efzûn etsin
Dâ'imâ hazret-i Feyyâz-ı hakîm ü dânây

Fikr-i ta'rîhin ederken dilime etti tulû'
Ikd-ı cevher gibi bir mısra'-ı hûb ü ra'nây
Farzdır katıbe-i âleme îfâ-yı sipâs
Rüşdi Pâşâ'yı re'îs eyledi adliyle Hudây

Sene 1282