Ad Catullum

Catulle frater, ut velim comes tibi
Remota per vireta, per cavum nemus
Sacrumque Ditis haud inhospiti specus,
Pedem referre, trans aquam Stygis ducem
Secutus unum et unicum, Catulle, te,
Ut ora vatis optimi reviserem,
Tui meique vatis ora, quem scio
Venustiorem adisse vel tuo lacum,
Benigniora semper arva vel tuis,
Ubi serenus accipit suos deus,
Tegitque myrtus implicata laurea,
Manuque mulcet halituque consecrat
Fovetque blanda mors amabili sinu,
Et ore fama fervido colit viros
Alitque qualis unus ille par tibi
Britannus unicusque in orbe praestitit
Amicus ille noster, ille ceteris
Poeta major, omnibusque floribus
Priore Landor inclytum rosa caput
Revinxit extulitque, quam tua manu
Recepit ac refovit integram sua.