Bauldy Frazer

My name is Bauldy Frazer, man ;
I'm puir, an' auld, an' pale, an' wan ,
I brak my shin, an' tint a ban',
Upon Culloden lea, man ;
Our Highlan' clans were bauld and stout,
An' thought to turn their faes about,
But gat that day a desperate rout,
An' owre the hills did flee., man.

Sic hurly-burly ne'er was seen,
Wi' cuffs, an' buffs, an' bliridit een,
While Highlan' swords, o' metal keen,
War gleamin' grand to see, man.
The canons rowtit in our face,
An' brak our banes an' raive our claes ;
'Twas then we saw our ticklish case
Atween the deil an' sea, man.

Sure Charlie an' the brave Lochiel
Had been that time beside theirsell'
To plant us in the open fell
In the artillery's e'e, man :
For had we met wi' Cumberland
By Athol braes or yonder strand,
The bluid o' a' the savage band
Had dy'd the German sea, man.

But down we drappit dadd for dadd ;
I thought it should hae put me mad,
To see sae inony a Highlan' lad
Lie bluthrm' on the brae, man.
I thought we ance had won the fray ;
We smasht ae wing till it gae way ;
But the other side had lost the day,
An' skelpit fast awa, man.

When Charlie wi' Macpherson met ;
Like Hay he thought him back to get ;
" We'll turn," quo' he, " an' try them yet;
We'll conquer or we'll dee, man."
But Donald shumpit o'er the purn,
An' sware an aith she wadna turn,
Or sure she wad hae cause to mourn ;
Then fast awa did flee, man.

O ! had you seen that hunt o' death !
We ran until we tint our breath,
Ay looking back for fear o' skaith,
Wi' hopeless, shinin' ee, man.
But Britain ever may deplore
That day upon Drumossie moor,
Whar thousands ta'en war drench'd in gore,
Or hang'd outower a tree, man.

O Cumberland, what mean'd ye then,
To ravage ilka Highlan' glen ?
Our crime was truth, an' love to ane,
We had nae spite at thee, man :
An' you or your's may yet be glad,
To trust the honest Highland lad ;
The bonnet blue, and belted plaid,
Will stand the last o' three, man.